Sranan Tongo Bible 2016 (STB16)
2

21Fu dat'ede un mus poti un prakseri moro tranga tapu san un ben yere, fu un no grati kmopo fu a pasi. 2Bika a boskopu di Gado ben meki den engel tyari, ben de sowan bigi sani taki A ben strafu ala sma tapu wan leti fasi di no ben arki noso du san a boskopu taki. 3Dan fa wi o man kmopo gi a strafu dan, efu wi no e span nanga a ferlusu di A ferlusu wi? Masra fosi ben taki fu en, èn den sma di yere san A taki, taigi un tak' na so a de. 4Gado srefi ben sori tu taki a tru. Bika A ben meki wondru nanga marki psa, nanga difrenti sortu sani di sori a krakti fu En. Sosrefi A ben meki a Santa Yeye kon tapu suma A wani.

Yesus tron libisma fu ferlusu libisma

5A no engel Gado o poti fu rigeri a nyun ten di o kon, a ten fu san wi e taki. 6Bika wan sma taki wan presi ini Gadowortu taki:

San na wan libisma tak' Yu e prakseri en,

èn san na wan libisma tak' Yu e sorgu gi en?

2:6-8
Psa 8:5-7

7Fu wan syatu pisten

Yu ben gi en wan presi

di lagi moro den engel,

dan Yu gi en glori nanga bigi nen,

8èn Yu poti ala sani ondro en futu.

Di Gado poti ala sani ondro en futu, A no libi noti na baka. Nownow un no e si ete taki ala sani de ondro en futu. 9Ma wi e si Yesus! Fu wan syatu pisten A kisi wan presi di lagi moro den engel. Wi e si En nanga a glori nanga bigi nen di A kisi fu di A ben dede. Bika Gado ini En bun-ati ben wani fu A ondrofeni gi ala sma san na dede. 10Gado meki ala sani, èn ala sani meki gi En. A ben wani fu furu pikin fu En teki prati ini En glori. Dat' meki a ben fiti fu A meki a Fesiman di tyari ferlusu kon gi den, nyan pina fu A gro kon tron san A mus de. 11Bika a Wan di e meki sma kon santa, nanga den sma di e kon santa, abi a srefi P'pa. Fu dat'ede Yesus no e syen fu taki tak' den na brada nanga sisa fu En. 12A taki: “Mi sa ferteri den brada fu Mi suma Yu de. Na mindri fu a gemeente Mi sa singi prijse Yu.”
2:12
Psa 22:23
13A taki tu taki: “Mi sa poti Mi fertrow tapu Gado.” A taki moro fara taki: “Luku Mi nanga den pikin dya di Gado gi Mi.”
2:13
Yes 8:17-18

14Fu di den pikin na libisma, meki En srefi tron libisma tu. Tapu sowan fasi A ben kan dede fu broko a makti fu a wan di ben abi a makti abra dede, sobun didibri. 15So A ben kan ferlusu ala sma di ben de ini katibo den heri libi langa fu di den ben frede fu dede. 16Ma a de krin fu si taki A no broko En ede nanga den engel, ma taki A kon fu yepi den bakapikin fu Abraham.

2:16
Yes 41:8-9
17Fu dat'ede A ben mus kon de leki den brada fu En ini ala sani. So A ben kan tron wan granpriester fu Gado di e sari den èn di den kan fertrow. Èn so a pipel kan kisi pardon fu den sondu nanga a ofrandi di A tyari gi den. 18Bika fu di En srefi nyan pina èn A psa tesi, meki A kan yepi den sma di e psa tesi tu.

3

Yesus bigi moro Moses

31Brada nanga sisa di Gado kari èn di A poti aparti gi Ensrefi, na dat' meki un mus poti un prakseri tapu Yesus, a Wan di Gado seni. Na En na a granpriester fu a bribi san wi abi. 2A hori Ensrefi na a Wan di poti En fu du En wroko, leki fa Moses ben hori ensrefi na san a ben mus du ini a heri oso fu Gado.

3:2
Nom 12:7
3Ma a fiti taki Yesus kisi moro grani leki Moses, leki fa a sma di bow a oso e kisi moro grani leki a oso srefi. 4Bika ala oso abi wan sma di meki en, ma Gado na a Wan di meki ala sani. 5Moses ben hori ensrefi na san a ben mus du ini a oso fu Gado leki wan knekti: a ferteri fu san Gado ben o taki. 6Ma Kristus, di de a Manpikin fu Gado, hori Ensrefi tu na den sani san A ben mus du ini a oso fu Gado. Èn wi na a oso fu Gado, solanga wi tan hori dek'ati èn wi hori tranga na a howpu di wi abi. 7Dat' meki a de soleki fa a Santa Yeye e taki:

Tide efu un yere Gado sten,

3:7-11
Psa 95:7-11

8dan un no mus tranga un yesi

leki den afo fu unu.

Den ben meki rigeri

a pisten di Mi ben tesi den ini a dreisabana.

9Drape den tesi Mi

fu luku san Mi ben o du

aladi den ben si fotenti yari langa san Mi man du.

10Dat' meki Mi ati bron na den tapu,

dan Mi taki:

“Noiti den e tan du san Mi wani,

èn den no e ferstan

fa Mi wani taki den mus libi.”

11So Mi sweri ini Mi atibron taki:

“Noiti den sa doro na a presi

pe Mi o gi den rostu.”

12Brada nanga sisa, un mus luku bun taki no wan fu unu abi wan takru ati di no e bribi, dan a drai en baka gi a libilibi Gado. 13Ma un mus gi makandra dek'ati ala dei, solanga un man taki fu “tide.” Dan sondu no o man drai no wan fu un ede, fu un tranga un yesi. 14Bika wi e teki prati ini san Kristus abi, efu te na a kba wi e tan abi a fertrow san wi ben abi na a bigin. 15Leki fa a skrifi kba: “Tide efu un yere Gado sten, dan un no mus tranga un yesi leki fa den afo fu unu ben du di den ben meki rigeri.”
3:15
Psa 95:7-8
16Ma suma na den sma dan di meki rigeri aladi den yere Gado sten? Dati na ala den sma di Moses ben tyari kmoto fu Egipte.
3:16-18
Nom 14:1-35
17Èn suma na den sma di meki Gado ati bron fotenti yari langa? Dati na den sma di ben sondu dan den fadon dede ini a dreisabana. 18Nanga suma Gado ben abi en di A sweri taki noiti den o doro na a presi pe A o gi den rostu? Dati na den sma di no ben wani arki. 19So wi e si taki den no ben doro na a presi fu di den no ben wani bribi.
4

Wan presi fu rostu gi bribisma

41A pramisi fu Gado, taki un kan doro na a presi pe A o gi un rostu, de ete. Dat' meki un mus luku bun taki no wan fu unu no tan na baka. 2Bika wi srefi kisi a bun nyunsu fu yere leki fa den ben yere en. Ma gi den a nyunsu no tyari bun, bika den no bribi en di den yere en. 3Ma wi di bribi o doro na a presi fu rostu. Leki fa Gado taki: “Mi sweri ini Mi atibron taki: ‘Noiti den sa doro na a presi pe Mi o gi den rostu.’ ” Ma A ben meki ala sani kba sensi di A ben meki grontapu.

4:3
Psa 95:11
4Bika a skrifi wan presi fu a di fu seibi dei taki: “Gado rostu tapu a di fu seibi dei fu ala den wroko san A du.”
4:4
Gen 2:2
5Ma na fesi wi si taki Gado taki: “Noiti den sa doro na a presi pe Mi o gi den rostu.”
4:5
Psa 95:11
6Den fosi sma di yere a bun nyunsu no doro na a presi fu di den no du san Gado taki. Ma a de so taki son sma o doro na a presi ete. 7Fu dat'ede Gado poti wan dei baka, èn dati na “tide.” Baka someni yari A ben meki David taki a srefi sani, leki fa un ben si na fesi kba: “Tide efu un yere Gado sten, dan un no mus tranga un yesi.”
4:7
Psa 95:7-8
8Bika efu Yosua ben doro nanga den na a presi fu rostu, dan Gado no ben o taki wan tra leisi fu wan tra dei.
4:8
Deu 31:7
Yos 22:4
9Dati wani taki tak' wan dei4:9 Ini Grikitongo a skrifi taki: wan sabatdei-rostu. de ete pe a pipel fu Gado o rostu. 10Bika a sma di doro na a presi fu rostu, e rostu fu en wroko, leki fa Gado ben rostu fu a wroko fu En.
4:10
Gen 2:2
11Dat' meki un mus meki ala muiti fu doro na a presi fu rostu, èn no wan sma mus fadon fu di a meki a srefi fowtu leki den fu no bribi. 12Bika a wortu fu Gado e libi èn a abi krakti. A srapu moro leki wan owru di srapu na ala tu sei. A e koti so dipi taki a e prati wi yeye fu wi sili. A e prati bonyo nanga brudu, èn a e tyari den firi nanga den prakseri fu wi kon na krin. 13Noti no kibri gi Gado. Ala sani de opo-opo na En fesi. Na En wi o abi fu gi frantwortu.

Yesus na wi granpriester

14Meki wi tan hori a bribi san wi abi, bika wi abi wan bigi granpriester di go te na ini heimel. Dati na Yesus, a Manpikin fu Gado. 15Bika wi no abi wan granpriester di no sabi den swakifasi fu wi. Ma wi abi Wan di psa ala den srefi tesi leki wi, ma En no sondu. 16Meki wi kon dan sondro frede fesi Gado. Dan Gado o sori wi sari-ati nanga bun-ati, èn A o yepi wi te wi abi yepi fanowdu.