Sranan Tongo Bible 2016 (STB16)
8

Yesus na a granpriester fu a nyun ferbontu

81A moro prenspari sani di wi wani tyari kon na fesi na taki wi abi sowan granpriester di e sidon na a let'anu sei fu a kownusturu fu a Bigi Gado na heimel.

8:1
Psa 110:1
2A e du a wroko ini a santa presi, ini a trutru santa tenti di a no libisma meki, ma di Gado srefi meki. 3A wroko fu ibri granpriester na fu tyari presenti nanga ofrandi gi Gado. Fu dat'ede a ben de fanowdu tu taki a granpriester disi ben abi wan ofrandi fu tyari. 4Efu A ben de na grontapu, A no ben o de wan priester srefsrefi, bika sma de kba di e tyari ofrandi soleki fa a wèt e taki. 5Ma a santa tenti pe den e du a wroko na wan prentyi nanga wan eksempre nomo fu a wan di de na heimel. Di Moses ben o meki a santa tenti, Gado taigi en taki: “Sorgu taki yu meki ala sani leki a eksempre san Mi sori yu tapu a bergi.”
8:5
Eks 25:40
6A wroko di Yesus kisi fu du now leki priester, moro hei. Bika En de a Mindriman fu wan moro bun ferbontu di abi moro bun pramisi. 7Bika efu noti no ben mankeri na a fosi ferbontu, dan a di fu tu no ben o de fanowdu. 8Ma fu di Gado ben feni fowtu na den sma fu En, A taki: “Masra e taki: Luku, wan ten o kon pe Mi o meki wan nyun ferbontu nanga a pipel fu Israel èn nanga a di fu Yuda.
8:8-12
Yer 31:31-34
9A no sa de leki a ferbontu di Mi ben meki nanga den afo fu den, na a ten di Mi ben langa anu gi den fu puru den na Egipte. Bika den no hori densrefi na Mi ferbontu, dan Mi drai Mi baka gi den. Na so Masra e taki.” 10Masra e taki: “Disi na a ferbontu di Mi o meki nanga a pipel fu Israel baka den dei dati: Mi o poti den wèt fu Mi na ini den prakseri, èn Mi o skrifi den poti na ini den ati. Mi o de den Gado èn den sa de Mi pipel. 11A no sa de fanowdu moro fu wan sma e taigi en kondreman noso en brada taki: ‘Yu mus kon leri sabi Masra.’ Bika ala sma sa sabi Mi, bigin fu den pikinwan kon miti den bigiwan. 12Bika Mi o gi den pardon fu den ogri di den du èn Mi no sa memre den sondu fu den moro.” 13Efu Gado taki fu wan nyun ferbontu, dan A e taki tak' a fosi wan kon owru. Èn efu wan sani de langa kba èn a kon owru, dan pikinso ete èn a no o de moro.

9

Fa den fosten sma ben mus dini Gado na ini a santa tenti

91A fosi ferbontu ben abi en fasi fa den sma ben mus anbegi Gado, èn a ben abi wan santa presi dya na grontapu. 2Den ben meki wan tenti, dan den ben kari a fosi pisi fu en a santa presi. Drape yu ben abi a kandelaar nanga a tafra pe den brede ben de di den poti aparti gi Gado.

9:2
Eks 25:23—26:1-30
3Baka a di fu tu garden, yu ben abi wan pisi san den ben kari a Moro santa presi.
9:3
Eks 26:31-33
4Drape yu ben abi a gowtu altari pe den ben e bron switismeri, nanga a santa kisi fu a ferbontu. A kisi disi ben tapu na ala sei nanga gowtu. Ini a kisi yu ben abi wan gowtu kan nanga mana, a wakatiki fu Aaron san ben sproiti, nanga den ston tapu san a ferbontu ben skrifi.
9:4 a
Eks 30:1-6
5Tapu a kisi yu ben abi tu Kerub leki marki taki Gado drape. Nanga den frei den ben e tapu a presi pe a granpriester ben e kon aksi Gado pardon fu sondu. Ma un no man taki fin'fini fu den sani disi now.
9:5
Eks 25:18-22
6Na so a tenti ben seti. Dan ala leisi te den priester ben e kon fu du den wroko, den ben e kon soso ini a fosi pisi.
9:6
Nom 18:1-7
7Ma na ini a di fu tu pisi, a granpriester wawan ben e go wan leisi ini wan yari. A ben mus go nanga brudu san a ben mus gi leki ofrandi gi sondu di ensrefi du, nanga fu den sondu san a pipel ben du sondro fu den ben sabi.
9:7
Lev 16:2-34
8A Santa Yeye ben e sori wi nanga dati taki a pasi fu go ini a Moro santa presi no ben opo ete, solanga a fosi tenti ben de ete. 9Den sani disi na wan eksempre gi now. Den sma fu fosi di ben e dini Gado, ben e tyari presenti nanga ofrandi, ma den sani disi no ben man krin den konsensi. 10Bika a nyanyan, den dringi, nanga den difrenti fasi fu wasi ben de sani fu a skin nomo. Sma ben mus fu du den te leki Gado kenki ala sani kon nyun.

Kristus gi En brudu fu krin wi

11Ma Kristus kon leki a granpriester fu den bun sani di de now. A tenti pe A e du En wroko, moro betre èn a de leki fa a mus de. A no libisma meki en, dati wani taki a no de fu a grontapu disi. 12A no go ini a Moro santa presi nanga a brudu fu bokoboko noso pikin kaw, ma A go nanga En eigi brudu. A du en wan leisi nomo, èn noiti moro a sa de fanowdu fu du en baka. So A ferlusu unu fu têgo. 13Bika efu a brudu fu wan bokoboko noso wan bulu, noso a asisi fu wan yongu kaw, ben kan krin wan sma di no ben krin ini Gado ai fu a kan dini Gado baka,

9:13 a
Lev 16:15-16
14dan a brudu fu Kristus sa krin wi moro ete! A Yeye di e libi fu têgo, meki taki A gi Ensrefi na Gado leki wan ofrandi di no e mankeri noti. A brudu fu En e krin wi konsensi fu den wroko di ben o meki taki wi dede, fu wi kan dini a libilibi Gado.

15Dat' meki Kristus na a Mindriman fu wan nyun ferbontu. Fu di A dede, A meki den sma kon fri fu den sondu di den ben du di a fosi ferbontu ben de ete. So den sma di Gado kari kan kisi den sani san A pramisi, den sani di e tan fu têgo. 16Efu wan testamenti9:16 Ini a Grikitongo a wortu san wi puru nanga testamenti, na a srefi wortu di wi puru nanga ferbontu. de, dan den mus man sori taki a sma di meki en dede. 17Bika wan testamenti abi warti soso te a sma di meki en dede. A no abi warti solanga a sma e libi ete. 18Fu dat'ede brudu ben de fanowdu di a fosi ferbontu ben meki. 19Dat' meki baka di Moses leisi ala den wèt gi a heri pipel, a teki a brudu fu pikin kaw nanga bokoboko èn a teki watra. Dan nanga redi wol nanga wan taki fu a hisopbon, a nat'nati a buku nanga a heri pipel.

9:19-20
Eks 24:6-8
20A taki: “Disi na a brudu san e stampu a ferbontu san Gado meki nanga unu.” 21Na a srefi fasi a nat'nati a santa tenti nanga ala sani ini en di ben de fanowdu fu anbegi Gado.
9:21
Lev 8:15
22Leki fa a wèt e leri, dan wantu sani nomo de di no abi fu krin nanga brudu. Èn pardon fu sondu no e gi efu brudu no lon.
9:22
Lev 17:11

23So a ben de fanowdu fu krin den eksempre fu den sani di de na heimel tapu sowan fasi. Ma den sani na heimel abi wan moro betre ofrandi fanowdu. 24Bika Kristus no go na ini wan santa presi di libisma meki, sobun wan eksempre fu a trutru wan. Ma A go na ini heimel srefi fu tnapu drape na Gado fesi fu wi ede. 25A no abi fu gi Ensrefi leki ofrandi ala yuru tu, leki fa a granpriester abi fu go ini a santa presi ala yari nanga brudu san no de en eigi brudu. 26Efu A ben abi fu du dati, dan A ben o abi fu nyan pina furu leisi sensi na a bigin fu grontapu. Ma A kon wan leisi nomo na a kba fu a ten disi, fu tyari wan kba kon na sondu di A gi Ensrefi leki ofrandi. 27A de so taki ala sma mus dede wan leisi nomo, èn baka dati Gado e krutu den. 28Na so Kristus gi Ensrefi wan leisi nomo leki wan ofrandi fu teki a sondu fu furu sma na En tapu. Ma A o kon fu a di fu tu tron, no fu teki sondu na En tapu, ma fu ferlusu den sma di e ferwakti En.

9:28
Yes 53:12

10

A trutru ofrandi

101A wèt no de den trutru sani srefi, ma a e meki wi tesi pikinso fu den bun sani di de fu kon. Dat' meki noiti a wèt ben man meki den sma di ben e tyari den srefi ofrandi kon na Gado ala yari, kon de leki fa den mus de. 2Efu a ben de so, dan den ben o tapu fu tyari ofrandi. Bika den sma di e anbegi Gado ben o krin, èn den konsensi no ben o krutu den fu den sondu. 3Ma ala yari den ofrandi ben e meki den prakseri den sondu baka. 4Bika noiti a brudu fu bulu nanga bokoboko ben man puru sondu.

5Dat' meki di Kristus kon na grontapu, A taki:

Den sani di den tyari kon leki ofrandi gi Yu,

Yu no ben wani den.

Ma Yu gi Mi wan skin.

10:5-7
Psa 40:7-9

6Ini den meti di den bron

nanga den ofrandi fu puru sondu,

Yu no ben abi prisiri.

7Ne Mi taki:

“Luku, Mi kon fu du Yu wani, Gado,

soleki fa Buku taki.”

8Na fesi wi si tak' A taki: “Yu no ben wani den sani di den tyari kon leki ofrandi gi Yu, nanga den meti di den bron, nanga den ofrandi fu puru sondu. Yu no ben abi prisiri nanga den.” A taki so aladi a wèt e taki tak' sma mus tyari den kon. 9Ma baka dati A taki: “Luku, Mi kon fu du Yu wani.” So wi e si taki A poti a fosi sani na wan sei fu A kan poti a di fu tu. 10So wi kon santa, fu di Yesus Kristus du a wani fu Gado di A gi En skin leki wan ofrandi. Disi psa wan leisi, èn noiti a sa de fanowdu moro.

11Ala dei ala den priester e du den wroko. Ala leisi den e tyari den srefi ofrandi di noiti no man puru wi sondu.

10:11
Eks 29:38
12Ma Kristus dati tyari wan enkri ofrandi nomo gi sondu, dan baka dati A teki presi fu têgo na a let'anu sei fu Gado.
10:12-13
Psa 110:1
13Drape A e wakti te leki Gado poti den feyanti fu En leki wan futubangi ondro En futu. 14Bika a wan enkri ofrandi di A tyari, meki den sma di e kon santa, kon de fu têgo leki fa a mus de. 15A Santa Yeye srefi e taigi wi taki na so a de. A taki fosi: 16Masra e taki: “Disi na a ferbontu san Mi o meki nanga den baka den dei dati: Mi o poti den wèt fu Mi ini den ati èn Mi o skrifi den ini den prakseri.” 17Dan A taki: “Mi no sa memre den sondu nanga den ogri di den du moro.”
10:16-17
Yer 31:33-34
18Efu un kisi pardon fu den sani disi, dan a no de fanowdu moro fu un tyari ofrandi gi sondu.

Meki un kon krosbei na Gado

19Brada nanga sisa, a brudu fu Yesus e gi wi dek'ati now fu go ini a santa presi. 20A opo wan nyun pasi gi wi di o tyari wi go na a libi. A pasi disi e psa doro a garden fu a santa tenti, dati na En skin. 21Dan fu di wi abi wan granpriester ini a oso fu Gado, 22meki wi kon moro krosbei na Gado nanga wan krin ati èn nanga tranga bribi. A nat'nati wi ati fu wi konsensi no fon wi moro, èn A wasi wi skin nanga krin watra.

10:22
Lev 8:30
Ese 36:25
23Meki wi tan hori na a howpu di wi e taki tak' wi abi, sondro fu degedege. Bika a Wan di meki den pramisi, de fu fertrow. 24Èn meki wi prakseri fa wi kan yepi makandra fu lobi trawan èn fu du bun sani. 25Meki wi no tapu fu go na den konmakandra fu wi, leki fa son sma gwenti fu du. Ma wi mus gi makandra dek'ati fu hori doro, spesrutu now di un e si taki a bigi dei e kon moro krosbei.

Gado e strafu sma di e sondu espresi

26Bika efu wi e sondu espresi baka di wi kon sabi den tru sani, dan no wan ofrandi de moro di kan krin wi fu wi sondu. 27San libi na fu frede a krutu di e wakti unu, nanga a bigi faya di o bron den feyanti fu Gado.

10:27
Yes 26:11
28Efu wan sma ben poti a wèt fu Moses na wan sei, den ben e kiri en sondro fu gi en pardon efu tu noso dri sma ben taki tak' a du en trutru.
10:28
Deu 17:6
19:15
29O hebi un denki taki a strafu o de gi a sma di trapu a Manpikin fu Gado nanga en futu, di si a brudu fu a ferbontu di meki a kon santa leki noti, èn di broko a Yeye saka di abi bun-ati?
10:29
Eks 24:8
30Bika wi sabi suma ben taki: “Mi na a wan di o strafu, na Mi o pai baka.” A ben taki tu taki: “Masra sa krutu En pipel.”
10:30
Deu 32:35-36
31Wan moro takru sani no kan miti yu, dan fu fadon ini anu fu a libilibi Gado.

Hori doro na a bribi

32Prakseri fa a ben de fosi, baka di un ai ben kon opo. Un ben nyan someni pina, ma un ben hori doro. 33Son leisi den ben broko un saka na ala sma fesi èn den ben pina unu. Son leisi un ben de makandra nanga trawan di ben e psa den srefi sani. 34Un ben e firi gi den sma di den poti na straf'oso, èn un ben e breiti te den ben e teki un sani tyari gwe, fu di un sabi taki un abi moro betre sani di noiti no e lasi gwe. 35Fu dat'ede un no mus lasi a fertrow san un abi, bika wan bigi paiman e wakti unu. 36A de fanowdu fu un hori doro fu un kan du a wani fu Gado èn kisi san A ben pramisi. 37“Bika a no tumsi langa moro dan a Wan di mus kon, o kon. A no o draidrai moro.

10:37-38
Hab 2:3-4
38Dan a sma di bun ini Mi ai sa libi fu di a bribi. Ma Mi no sa abi prisiri nanga a sma di drai baka.” 39Wi a no sma di e drai baka dan wi e go lasi. Wi na sma di e bribi, èn dati e meki tak' Gado o ferlusu wi.