Sranan Tongo Bible 2016 (STB16)
1

11Disi na san MASRA taigi Hosea, a manpikin fu Beri. A ben de ini a ten di Usia, Yotam, Akas nanga Yekiskia ben de na makti ini Yuda. A pisten dati Yerobeam, a manpikin fu Yoas, ben de kownu fu Israel.

A sondu fu Israel

2Na so MASRA bigin taki nanga Hosea. MASRA taigi Hosea taki: “Go trow nanga wan motyo, dan yu e meki pikin nanga en. Bika a heri kondre e libi wan huru libi fu di den drai den baka gi MASRA.” 3Dan so Hosea go trow nanga Gomer, a umapikin fu Diblaim. Gomer hori bere, dan a kisi wan manpikin. 4Dan MASRA taigi Hosea taki: “Kari en Yisreel, bika no langa moro dan Mi o strafu a famiri fu Yehu fu a brudu di den meki lon na Yisreel, èn Mi no o meki kownu tiri Israel moro. 5A pisten dati Mi o broko a makti fu Israel ini a Yisreeldal.” 6Gomer hori bere baka dan a kisi wan umapikin. Dan MASRA taigi Hosea taki: “Kari en Lo-Rukama,1:6 Lo-Rukama wan taki: no abi sari-ati. bika Mi no sa sorgu gi a folku fu Israel moro. Mi no sa gi den pardon moro. 7Ma Mi sa sorgu gi a folku fu Yuda. Mi, MASRA, a Gado fu den, sa ferlusu den. Mi no o ferlusu den nanga bo, deigri noso tra fetisani. Mi no o ferlusu den tu nanga asi noso man di e tyari den asi.” 8Baka di Gomer puru Lo-Rukama na bobi, a hori bere baka dan a kisi wan manpikin. 9Dan MASRA taigi Hosea taki: “Kari en Lo-Ami,1:9 Lo-Ami wan taki: A no mi folku. bika un no de Mi folku moro, èn Mi no sa yepi un moro. 10Ma wan ten e kon pe den sma fu Israel o kon furu leki a santi na sekanti. Yu no o man teri den, yu no o man taki o meni den de. Dan leti na a presi pe den ben yere taki: ‘Un no de Mi folku,’ den o kisi a nen baka fu pikin fu a libilibi Gado.1:10 Son vertaling abi a vers disi leki 2:1. 11Dan den sma fu Yuda nanga den sma fu Israel sa kon na wan, èn den o teki wán edeman fu tiri den, èn fu tyari den kmoto ini a kondre. Bika a o de wan bigi dei gi Yisreel. 12Dan un kan taigi un brada baka taki: Ami.1:12 Ami wan taki: Na Mi folku. Un kan taigi un sisa tu taki: Rukama.1:12 Rukama wan taki: Abi sari-ati.

2

21“Krutu yu mama. Krutu en! Bika a no de Mi uma moro èn Mi no de en masra moro. Meki a puru den sani na en fesi di e meki a gersi wan huru, nanga den marki na mindri den borsu fu en di e sori taki a ben go huru. 2Efu a no du dati Mi o puru ala krosi na en skin dan Mi o poti en tnapu leki fa a ben kon na grontapu. Mi o meki a kon drei leki wan dreisabana, leki wan kondre pe a gron drei trutru. Mi o meki watra kiri en te leki a dede. 3Mi no o sorgu gi den pikin fu en bika a kisi den di a ben e huru. 4A mama fu den ben e libi wan huru libi. A mama fu den ben e libi wan syen libi, di a ben mus kisi den pikin. A ben taki: ‘Mi e go na den lobi fu mi, di e sorgu gi mi brede nanga mi watra, gi mi krosi nanga mi katun nanga linnen, mi oli nanga mi dringi.’

5Fu dat'ede Mi o poti wan skotu di lai nanga makamaka gi en tapu en pasi fu a no psa. Mi o hari wan skotu gi en fu a no go waka moro. 6A o wani fu go na den lobi fu en, ma a no o man doro na den. A o suku den, ma a no o feni den. Dan a sa taki: ‘Mi o drai go baka na mi fosi masra, bika Mi ben abi en moro bun na en.’

7Ma a no e ferstan taki a ben de Mi di ben e gi en a karu, a win nanga a oli, nanga a solfru nanga a gowtu di a teki meki wan afkodreipopki fu Baal. 8Fu dat'ede mi o teki Mi karu baka te a ten doro fu koti karu. Mi o teki mi win baka te a ten doro fu meki win. Mi o hari a katun nanga a linnen puru baka nanga san a e tapu en skin. 9Na fu dat'ede mi o puru en krosi na en skin meki den lobi fu en si, èn no wan sma no o man kon yepi en fu puru en na Mi anu. 10Mi o meki a lasi ala prisiri di a abi, tyari wan kba kon na den fesa fu en, a nyunmunfesa, a sabatdei, iya na ala den prenspari dei fu en. 11Mi o pori a droifibon nanga a figabon fu en. Den bon fu san a ben taki: ‘Disi na a pai di den lobi fu mi gi mi.’ Mi o meki den tron wan busi, meki den meti fu a busi nyan den. 12Na so Mi o strafu en fu den dei di a ben e bron ofrandi gi Baal, di a ben e moi ensrefi nanga linga nanga keti, fu go waka nanga den lobi fu en. Ma mi a ben e fergiti.” Na so MASRA taki.

13“Arki. Fu dat'ede Mi o kori en dan Mi o tyari en go ini a dreisabana. Drape Mi o taki nanga en ati. 14Drape Mi o gi en den droifidyari baka. Drape Mi o meki a Akordal2:14 Akor wan taki: Problema.tron wan doro fu howpu. Dan a sa singi drape leki fa a ben e du ini en yongu yari, leki a ten di a ben e hari kmoto na ini Egipte.” 15Na so MASRA taki: “A pisten dati yu sa kari Mi: mi masra. Yu no sa taki moro: mi Baal. 16Iya, Mi sa puru den nen fu den Baal na ini en mofo. Sma no sa yere den nen moro. 17A pisten dati Mi o sroto wan ferbontu gi den, nanga den meti di e libi ini den wei, nanga den fowru di e frei na loktu, nanga den meti di e kroipi na gron. Mi o broko ala bo, deigri nanga tra fetisani ini a kondre, fu den kan libi na ini freide. 18Mi o teki yu leki Mi trow-uma fu têgo. Mi o teki yu leki Mi trow-uma tapu wan bun nanga leti fasi, nanga sari-ati nanga safri fasi. 19Mi o teki yu leki Mi trow-uma fu sori yu taki Mi de fu fertrow. Dan yu sa leri sabi MASRA.”

20Na so MASRA taki: “A pisten dati Mi sa arki.

Mi sa arki heimel

èn Mi sa arki grontapu.

21Grontapu sa arki a karu, a win nanga a oli,

èn den dati sa arki Yisreel.

22Dan Mi sa sai en gi Misrefi ini a kondre.

Mi sa sorgu baka gi Lo-Rukama.

Lo-Ami Mi o taigi taki: ‘Yu na Mi folku.’

Dan a sa taki: ‘Mi Gado.’ ”