Sranan Tongo Bible 2016 (STB16)
4

Gado e krutu den priester nanga a folku

41Sma fu Israel, arki san MASRA e taki. MASRA tyari den sma fu a kondre go na krutu, fu di den no de fu fertrow, fu di den no lobi Gado èn fu di den no sabi Gado moro. 2Den e fluku, den e lei, den e kiri, den e fufuru èn den e broko trow. Soso hogri den e du. A wan kiri baka a trawan. 3Fu dat'ede a kondre de na row. Ala sani ini a kondre e dede gwe. Den meti ini den wei nanga den fowru di e frei na loktu. Srefi den fisi na ini a se e dede.

4No meki no wan sma tyari wan trawan go na krutu, no meki no wan sma krutu wan trawan. Na unu leki priester Mi e krutu. 5Bigibigi dei un o stotu un futu, èn te un e fadon te neti den profeiti e fadon makandra nanga unu. Mi o kiri a mama fu unu tu. 6Mi folku e dede gwe fu di den no wan leri sabi Mi. Fu di yu poti dati na wan sei meki Mi poti unu na wan sei tu. Un no abi fu de priester fu Mi moro. Fu di un fergiti a wèt fu un Gado, Mi o fergiti den pikin fu yu tu. 7O moro den e kon furu o moro den e du san Mi no wani. Mi o meki a grani di den abi tron syen. 8Den e libi fu den sondu fu Mi folku, den e angri fu si moro ogri. 9Na so a e tron: leki fa a priester tan na so a folku tan tu. Dat' meki Mi o strafu en fu a fasi fa a e libi. 10Den o nyan, ma nyanyan no o sari den. Den o libi wan huru libi, ma den no o kon moro furu, bika den drai den baka gi MASRA. 11Huru libi, win nanga tranga sopi e meki den lasi den ferstan.

12Mi folku e suku rai na wan pisi udu, wan tiki mus sori den san de fu kon. Bika wan huruyeye e meki taki den lasi pasi. Ini a hurulibi di den e libi den e gwe moro nanga moro fu den Gado. 13Den e srakti meti leki ofrandi na tapu den hei bergi dan den bron en na tapu den pikin bergi, nanga ondro ala sortu bon, fu di den lobi a kowrupe na ondro a bon. Na fu dat'ede den umapikin fu unu e libi wan yayolibi. Na fu dat'ede den frow fu den manpikin fu unu e sribi nanga tra man. 14Mi no sa strafu den umapikin fu unu fu a yayolibi fu den. Mi no sa strafu den frow fu den manpikin fu unu tu fu di den sribi nanga tra man. Bika unsrefi e go na bedi nanga den huru, unsrefi e tyari ofrandi makandra nanga den huru di e wroko na den tempel. Na so wan folku di no abi ferstan, e fadon.

15Israel, efu yu e libi wan hurulibi kba, no meki Yuda meki a srefi fowtu. No kon na Gilgal, no go na Bet-Awen èn no sweri taki: “So leki fa a tru taki MASRA e libi.” 16Bika Israel e kaka futu leki wan trangayesi kaw. Fu dat'ede MASRA no o tyari en go na wei tu leki wan skapu na ini wan opo wei. 17Efraim seri en ati gi den afkodrei popki. 18Libi en te leki a kisi ensrefi. Te den ai krin, den e go libi wan syen hurulibi baka. A lostu e bron ini den taki den no e syen moro.4:18 A Hebrewtekst fu a pisi disi no krin. 19Ma wan tranga winti sa wai den gwe. Den nanga den ofrandi fu den o kon na syen.

5

Gado e krutu den fesiman

51Priester, un arki. Israel, teki yu ai luku. Kownu, poti yesi arki. Bika na unu na den sma di ben mus krutu. Ma un seti wan trapu gi Mi pipel na Mispa, wan krafana tapu a Taborbergi. 2Den wan di no wan dini Mi diki wan dipi peti5:2 A Hebrewtekst fu a pisi disi no krin. Ma Mi o strafu den alamala. 3Mi sabi Efraim5:3 Disi na wan tra nen gi den tin lo di e meki Israel. Israel no kibri gi Mi. Ma fu tru, Efraim, now yusrefi go libi wan hurulibi. Israel doti ensrefi. 4Den sani di den e du e hori den fu den no drai kon na den Gado. Bika wan yeye fu hurulibi e libi ini den. Israel doti ensrefi. 5A bigi fasi fu Israel e krutu en. Den kruktudu fu Israel nanga Efraim o meki den stotu den futu. Yuda srefi e stotu en futu nanga den. 6Den o tyari skapu, krabita nanga den kaw fu den kon fu suku MASRA, ma den no o feni En. A drai En baka gi den. 7Den no tan waka baka MASRA wawan, ma den go meki pikin na dorosei. Fosi a nyun mun opo den o dede gwe. Den nanga den gron fu den.

8Bro a tutu na ini Gibea, Bro a trompet na ini Rama. Meki babari ini Bet-Awen meki sma yere. Benyamin, den de na yu baka. 9Efraim o tron wan dreisabana te a dei doro fu krutu en. Mi o meki kon sabi san Mi besroiti fu du nanga den lo fu Israel. 10Den tiriman fu Yuda gersi den sma di e meki a gron fu den moro bigi leki san a mus de. Ma Mi sa lusu Mi atibron na den tapu leki watra. 11Den e pina Efraim, sani no e du nanga leti, fu di na ensrefi ben wani fu waka baka soso sani. 12Fu dat'ede Mi de leki wan woron di e nyan Efraim. Gi Yuda Mi de leki wan pori pisi na ini en futu, di e tan pori go doro. 13Di Efraim kon si taki a e siki, di Yuda si a soro fu en, Efraim seni boskopuman go na Asur fu suku yepi na kownu Fetiman. Ma a disi no o man yepi yu fu yu kon betre, a no o man dresi a soro fu yu. 14Bika gi Efraim Mi gersi wan lew. Gi Yuda Mi gersi wan yongu lew. Mi, Misrefi sa priti den dan Mi gwe. 15Mi o teki tyari gwe sondro taki wan sma man yepi den. Mi sa drai go baka fu pe Mi kmoto, te leki den kon ferstan taki den sondu èn den bigin suku Mi baka. Te den no sabi moro san fu du, den sa angri fu Mi baka.

6

61“Kon meki wi drai go baka na MASRA.

Bika na En priti wi,

èn na En o dresi wi baka.

Na En naki wi,

na En o tai wi soro baka.

2Baka tu dei A o meki wi kon na libi baka.

A di fu dri dei A o meki wi tnapu baka,

dan wi sa libi baka nanga En.

3Iya, wi wani fu kon sabi MASRA,

wi sa du ala sani fu kon sabi En.

Leki fa un sabi taki dei e opo,

na so wi sabi tu taki A o kon.

Dan A o kon na wi leki wan safri alen,

leki a mofoyari alen

di e nati a gron.”

4San Mi mus du nanga yu, Efraim? San Mi mus du nanga yu, Yuda? Bika a lobi fu yu de leki a dow di e de mamanten na tapu den wei, leki a dow di e gwe es'esi te mamanten. 5Dat' meki Mi meki den profeiti naki unu nanga den wortu di Mi taki meki un dede. Dan leki fa wan faya e broko doro na so a o broko doro tu taki Mi abi leti. 6Bika na lobi Mi wan si, no meti di srakti leki ofrandi. Mi wani si taki un sabi Gado, no meti di bron leki ofrandi. 7Ma leki fa Adam ben du, na so den broko a ferbontu nanga Mi tu. So den ben gwe libi Mi kba. 8Gilead na wan foto fu abani. Wan foto di lai nanga brudu. 9Den priester e didon luru leki wan ipi fufuruman. Den e kiri sma tapu a pasi di e go na Sikem. Fu tru, soso hogri den e du. 10Mi si groskin sani na ini Israel. Israel e libi wan huru libi. Israel doti ensrefi. 11Yuda, yusrefi o koti san yu sai, te Mi o tyari wan kenki kon na ini a libi fu Mi pipel.