Sranan Tongo Bible 2016 (STB16)
1

11Disi na den sani di Gado meki Yesaya, a manpikin fu Amos, si fu Yuda nanga Yerusalem. A meki a si den sani dati ini den ten di kownu Usia, kownu Yotam, kownu Akas nanga kownu Yekiskia ben e tiri Yuda.

Gado piri ai gi En pipel

2Heimel nanga grontapu, un arki,

un arki bun!

MASRA e taki disi:

Den pikin di Mi kweki, di Mi sorgu,

no ben wani saka densrefi moro gi Mi.

3Kaw sabi den basi,

buriki sabi pe den basi e poti a nyanyanbaki gi den,

ma Israel no sabi noti,

a pipel fu Mi no e ferstan noti.

4A kba gi den,

a sondu pipel dati,

a folku dati di lai nanga kruktudu,

bakapikin fu ogri-ati sma,

den takru-ati pikin!

Den gwe libi MASRA,

den si a Santa Wan fu Israel leki noti,

den drai den baka gi en.

5Fu sanede un wani kisi moro fonfon?

Fu sanede un wan tan kaka un futu.

Un heri ede lai mankeri kba, ala un ati kon swaki kba.

6Sani e du unu na un heri skin, fu un ede go miti un futu:

soso soro, kundukundu nanga nyun wipi marki.

Den no krin,

den no kisi sorgu,

den no lobi oli gi den fu kowru den.

7A kondre fu un tron wan broko pranasi.

Den foto fu un bron.

Sma di un no sabi e nyan den sani di un prani leti na un fesi.

A kondre tron wan broko pranasi,

leki te doroseisma broko en fu teki en abra.

8Sion tan na baka leki wan afdaki ini wan droifidyari,

leki wan pikin wakti-oso ini wan komkomro wei,

leki wan foto di feyanti lontu fu alasei.

9Efu MASRA fu ala sani no ben meki wantu fu un tan abra,

a srefi sani di psa nanga Sodom nanga Gomora ben o psa nanga unu.

10Edeman fu Yerusalem, un di takru leki den di fu Sodom,

un arki san MASRA e taigi unu,

Sma fu Yerusalem, un di ogri leki den di fu Gomora,

un kaka un yesi gi san Gado e leri unu.

11MASRA e aksi un taki:

Sortu bun ala den meti abi di un e srakti leki ofrandi gi Mi?

Mi e fuga fu den man skapu di un e bron leki ofrandi gi Mi,

nanga fu a fatu fu den kaw di ben kweki wan spesrutu fasi.

Mi no abi prisiri moro nanga a brudu fu den bulu,

den skapu nanga den bokoboko,

12te un e kon na Mi fesi.

Suma aksi unu fu un e wakawaka so

tapu a dyari fu a tempel fu Mi?

13Un tapu fu tyari den ofrandi fu unu di no wani taki noti.

A wierook di un e bron e gro Mi skin.

Un e du ala sortu ogri,

dat' meki Mi no man lobi a nyunmunfesa di un e hori,

a sabatdei nanga den spesrutu konmakandra fu unu.

14A nyunmunfesa nanga ala den tra fesa fu unu,

Mi no lobi den srefsrefi,

den de leki wan hebi gi Mi.

Mi weri fu tyari den.

15Te un e opo un anu e begi, Mi e drai Mi fesi,

srefi te un e begi moro furu, Mi no e arki,

bika brudu de na un anu.

16Un go wasi,

un krin unsrefi baka ini Mi ai!

Un no meki Mi si den kruktudu fu unu moro,

un tapu nanga a ogri di un e du!

17Un leri fu du bun,

un du sani na tapu wan leti fasi,

un tapu fu e pina trawan,

un meki den pikin di no abi p'pa nanga m'ma moro kisi den leti,

èn un hori baka gi den uma di masra dede kba.

18MASRA taki moro fara taki:

Un kon dan, meki un taki luku suma abi leti.

Awinsi den sondu fu unu redi leki brudu,

den o kon weti leki sneeuw,

awinsi den redi leki win,

den o kon leki weti leki katun.

19Efu un wani du baka san Mi e taigi unu,

un o nyan den bun sani di e gro ini a kondre.

20Ma efu un no wani,

efu un trangayesi,

den feyanti fu unu o kiri un na ini feti,

bika na MASRA srefi taki so.

21Fa a foto disi di ben de fu fertrow, kon tron wan motyo?

Na drape sani ben e du na tapu wan leti fasi,

na drape sma ben e libi soleki fa a fiti,

now na soso kiriman de drape.

22A solfru fu yu kon blaka,

a win fu yu kon watra.

23Den edeman fu yu no wani arki,

èn den abi fufuruman leki mati.

Ibriwan fu den lobi teki tyuku,

den no e du noti sondro fu sma gi den kado.

Den no e feti gi a leti fu pikin di no abi p'pa nanga m'ma moro,

èn den no e arki den kragi srefsrefi fu den uma di masra dede kba.

24Dat' meki Masra, a MASRA fu ala sani,

a Tranga Wan fu Israel, taki so:

A kba gi den,

Mi o lusu Mi atibron tapu den sma di e feti Mi,

èn Mi o pai den feyanti fu Mi baka.

25Mi o tron yu feyanti now.

Leki fa den e krin solfru puru a doti,

na so Mi o krin yu,

Mi o puru ala doti fu yu.

26Mi o meki den krutubakra fu unu

de baka leki fa den ben de fosi,

den raiman leki fa den ben de na a bigin.

Baka dati den o kari yu:

“Foto pe sma e du sani tapu wan leti fasi”,

“foto di de fu fertrow.”

27Gado sa ferlusu Sion efu den sma sa du sani nanga leti

èn A sa ferlusu den sma di drai kon baka na en,

fu di den e libi now leki fa a fiti.

28Ma den sma di no wani saka densrefi gi En,

A o puru na pasi makandra nanga den sondusma.

Den sma di gwe libi MASRA o dede gwe.

29Un o firi syen,

fu di un ben tyari ofrandi gi tra gado

ondro den bigi bon.

Un o firi ferleigi,

fu di un ben abi bromkidyari

di un ben teki spesrutu fu du den sani dati.

30Bika un o kon de leki wan bigi bon di lasi en wiwiri,

leki wan bromkidyari di no e kisi watra.

31Den wan di abi makti o kon swaki leki drei ptatatitei,

den sani di den e du de leki wan pikin faya.

Den ala tu o bron makandra,

èn no wan sma o man kiri a faya.

2

Freide di e tan

21Disi na san Gado meki Yesaya, a manpikin fu Amos, si leki wan boskopu gi Yuda nanga Yerusalem.

2Wan ten e kon

pe a bergi nanga a oso fu MASRA

sa tnapu bun steifi leki a moro hei bergi.

A sa hei bari moro den pikin bergi.

Ala folku sa hari go drape,

3furu kondre sa hari go èn den o taki:

“Un kon, meki un kren go na a bergi fu MASRA,

na a oso fu a Gado fu Yakob,

fu A leri unu fa A wani tak' un mus libi,

èn fu un libi tu leki fa A e sori unu.”

Bika na fu Sion a wèt o kmoto,

na fu Yerusalem MASRA o taki nanga unu.

4A sa koti krutu mindri folku,

A sa taigi bigi kondre suma abi leti.

Dan den o teki den deigri èn meki wrokosani fu en fu drai doti.

Den o teki den lansri èn meki wrokosani fu koti grasi.

Folku no sa hari go feti moro nanga trawan,

den no sa leri moro fa fu feti nanga trawan.

5Bakapikin fu Yakob, un kon,

meki un waka ini a leti di MASRA e gi unu.

6Yu gwe libi Yu pipel, den bakapikin fu Yakob,

bika den teki ala den gwenti fu den folku di e libi na oostsei.

Den e du tofruwroko tu leki den Filistijnsma,

èn den e wroko makandra nanga doroseisma.

7A kondre fu den furu nanga solfru èn nanga gowtu,

den gudu fu den no de fu teri.

A kondre fu den lai asi.

Fetiwagi de so furu taki den no de fu teri.

8A kondre fu den furu nanga kruktu gado tu.

Den sma e boigi gi sani di den meki nanga den eigi anu,

gi sani di den meki nanga den eigi finga.

9Den o abi fu broko densrefi saka,

den o abi fu boigi.

No gi den pardon!

10Un go ini bergi-olo,

un go ondro a gron go kibri

gi a hebi strafu fu MASRA di de fu frede,

nanga a bigi glori fu En.

11Den sma di abi bigifasi,

o abi fu saka den ai.

Den sma nanga heimemre,

no o man opo den ede,

bika a ten dati na MASRA wawan o kisi grani.

12Bika MASRA fu ala sani,

A poti wan dei pe A o krutu ala sma di abi heimemre,

bigifasi nanga bigimemre.

A o broko den saka.

13A o krutu ala den bigi hei sedrebon fu a Libanon,

di e opo so hei go na loktu

nanga ala den bigi bon fu Basan.

14A o krutu ala den hei bergi,

di de so hei go na loktu,

nanga ala den pikin bergi.

15A o krutu ala hei toren,

nanga ala tranga skotu,

16A o krutu ala den sipi fu Tarsis,

nanga den boto di e tyari diri lai.

17Dan den bigifasi sma o abi fu boigi den ede

èn den heimemre sma o kisi syen.

MASRA wawan o kisi grani a ten dati.

18Den kruktu gado no o de fu si srefsrefi moro.

19Dan den sma sa go ini bergi-olo,

nanga ini olo ini a gron,

fu lon gi a hebi strafu fu MASRA di de fu frede,

nanga a bigi glori fu En,

te A o opo fu krutu grontapu.

20A ten dati den sma sa teki den solfru

nanga den gowtu kruktu gado fu den,

di densrefi ben meki fu anbegi,

èn fringi den gi alata nanga fremusu.

21Dan den o lon go na ini bergi-olo

nanga ini den bigi priti na ini den bergiston,

fu lon gi a hebi strafu fu MASRA di de fu frede,

nanga a bigi glori fu En,

te A opo fu krutu grontapu.

22Tapu fu bow tapu libisma,

bika den no de noti sondro a bro ini den noso.

Sortu warti den abi?