Sranan Tongo Bible 2016 (STB16)
13

A kba fu Babel

131Disi na san Gado taigi Yesaya, a manpikin fu Amos, taki o psa nanga Babel. A meki Yesaya si den sani disi.

2Opo wan fraga,

opo en tapu wan bergi di no abi noti na en tapu.

Bari kari den gi a feti,

gi wan marki nanga un anu,

fu den hari go ini den poort fu den heihei man.

3Mi komanderi den santawan fu Mi,

Mi taigi den dyadya fetiman fu Mi,

di e prisiri fu a glori fu Mi,

fu den go puru atibron gi Mi.

4Yere a babari tapu den bergi,

a gersi taki na wan bun bigi legre e kon.

yere a babari fu den kondre fu den kownu,

fu folku di e bondru kon na wan.

Na MASRA fu ala sani,

na En e tyari wan legre kon na wan gi a feti.

5Den kmoto fu wan bun fara kondre,

fu te na a kba fu grontapu:

MASRA e kon,

A e kon nanga den wrokosani fu a hebi atibron fu En,

A e kon fu pori ala sani.

6Un krei, bika a dei fu MASRA de krosbei,

A o de wan dei pe A Wan di abi ala makti o wai ala sani puru na pasi.

7Dati e meki taki ala anu e beifi,

frede e meki taki ala ati kon swaki.

8Libisma e bruya taki den no sabi san den mus du.

Krampu nanga pen e moro den,

leki te wan uma mus kisi wan pikin.

Nanga frede tapu den fesi den e luku makandra

den fesi kon weti fu frede.

9Yere, a dei fu MASRA e kon,

A no abi sari-ati,

En ati e bron srefsrefi,

A e kuku fu atibron!

A e kon fu meki grontapu tron wan sabana,

A e kon fu kiri ala den sondusma di e libi na en tapu.

10Den stari na heimel no e gi faya moro,

a faya fu den spesrutu grupu stari srefi e dede safrisafri.

A son dungru te a e opo,

a munkenki no e sori a faya fu en moro.

11Dan Mi o meki grontapu pai fu a ogri fu en,

den ogri-ati sma fu den kruktudu fu den.

Mi o broko a heimemre fu den bigifasi sma,

nanga a bigifasi fu den di no sabi san na sari-ati.

12Mi o meki taki lala gowtu o moro makriki fu feni leki libisma,

èn a fini gowtu fu Ofir o moro makriki fu feni leki sma na grontapu.

13Dat' meki Mi o meki a heimel seki,

èn grontapu o beifi èn kmopo na en presi.

Fu di a ati fu MASRA fu ala sani e bron srefsrefi,

A o meki dati psa tapu a dei fu En faya atibron.

14Dan a o psa taki ala sma o lon panya:

leki dia di e lon gi krasi meti,

leki wan grupu skapu di no abi skapuman.

Den o lowe go na a kondre pe den kumbatitei beri,

den o lowe go na den eigi folku.

15Iniwan fu den di den kisi, den o dyuku kiri,

iniwan fu den di den grabu, den o kiri nanga deigri.

16Den o naki den nyunyun pikin fu den kiri leti na den fesi,

den o fufuru ala sani teki ini den oso,

èn nanga tranga den o sribi nanga den uma fu den.

17Yere, Mi e seni den sma fu Meden go na den tapu,

solfru no e taigi den noti,

yu no man kori den nanga gowtu.

18Nanga den bo den e sutu yongu boi kiri,

den no abi sari-ati nanga nyunyun pikin,

yongu pikin srefi den no e sari.

19Babel, a parelkrara fu ala kondre,

a foto nanga san den Kaldeasma e prodo sote,

a o tron leki Sodom nanga Gomora,

den foto di Gado wai puru na grontapu.

20Noiti moro sma o libi na ini,

no now, no bakaten.

No wan Arabiri sa opo en tenti poti drape,

no wan skapuman sa meki skapu rostu drape.

21Meti fu a dreisabana sa go didon drape,

owrukuku sa furu den oso,

bigi busi fowru o go libi drape,

èn bokoboko o dyompodyompo lontu drape tu.

22Krab'dagu o meki babari ini den tranga bigi oso,

èn bus'dagu ini den kownu-oso pe ala sortu prisiri ben e meki.

A ten fu Babel de krosbei,

den dei fu en teri!

14

141Ma MASRA sa sori Yakob en bun-ati, A o teki Israel baka gi Ensrefi èn A o meki den libi ini freide ini den eigi kondre. Doroseisma sa go na den drape, èn den o tron wan nanga a oso fu Yakob. 2Tra folku sa go teki den Israelitisma èn tyari den go baka na den eigi kondre. Baka dati den sma fu Israel sa kisi den folku dati gi densrefi, leki mansrafu nanga umasrafu, ini a kondre fu MASRA. Den sa sroto den sma now di ben sroto den fosi, èn den sa tiri den sma di ben e pina den.

3A ten dati MASRA o gi un freide. A o tyari wan kba kon na ala un nowtu, na a benawtu ini san un ben de, na a wroko di un ben mus wroko leki srafu. 4Dan un o teki a kownu fu Babel meki spotu nanga a singi disi:

“A kba nanga a man dati di ben e pina unu,

a kba nanga a pina di a ben pina unu.

5MASRA broko a makti fu den ogri-ati sma,

a broko a tiki fu den tiriman

di e sori taki den de na a makti,

6a tiki di ben e naki folku nanga hebi atibron,

sondro fu kba,

a tiki di ben de nanga atibron nomo baka den folku

fu tan pina den dorodoro.

7Alasei fu grontapu de tiri èn ini freide now,

den sma e bari fu prisiri.

8Srefi den sipresbon e prisiri fu yu ede,

sosrefi den sedrebon tapu Libanonbergi,

den e taki:

‘Now di yu fadon,

no wan sma kan kapu un trowe moro.’

9Dedekondre na ondrosei de ini dyugudyugu

fu kan gi yu wan kon na ini.

A e wiki den yeye fu ala den tiriman fu grontapu,

a e meki ala den kownu fu den folku opo fu den kownusturu gi yu.

10Den alamala e bari yu wan kon na ini,

èn den e taigi yu taki:

‘Now yusrefi kon swaki leki unu,

yu kon tron wan fu wi tu.

11Yu saka kon ini dedekondre nanga ala yu prodo

èn nanga a poku fu harp di ben e gi yu prisiri.

Woron na yu bedi now,

èn woron na a krosi nanga san yu e tapu yu skin.’

12Fa yu du fadon kmopo so na heimel,

yu sowan mamanten stari,

manpikin fu a krin fu dei?

Fa yu du fadon so na gron,

yu di ben poti folku na yu ondro?

13Èn yu ben prakseri srefi taki:

Mi o opo go na heimel,

mi o poti a kownusturu fu mi moro hei leki den stari fu Gado,

mi o sidon te na loktu fu Safon,

a bergi pe den gado e kon makandra.

14Mi o opo go na loktu,

psa den wolku srefi,

mi o de leki a Moro Hei Gado.

15Ma prefu dati na dedekondre yu o saka go,

ini a moro dipi peti.

16Den sma di e si yu e luku yu fin'fini,

èn den e aksi densrefi taki:

‘Na a man disi ben meki grontapu beifi?

Na en ben seki den kondre fu den kownu?

17Na en ben meki kondre tron sabana

èn broko den foto fu den?

Na en no ben e lusu den strafuman fu en moro?’

18Ala den kownu fu den tra folku didon nanga grani,

iniwan ini en eigi grebi.

19Ma yu, den trowe yu fara fu yu grebi,

leki wan taki di no bun.

Na yu tapu den dedeskin didon fu den wan di dede ini a feti,

den wan di saka go ini a grebi èn di sma tapu nanga ston.

Leki wan dede meti den skopu yu poti na wan sei.

20Yu no o didon makandra nanga den kownu,

bika yu broko a kondre fu yu,

èn yu kiri yu eigi kondreman.

Noiti moro sma sa memre a famiri fu den sortu ogri-ati sma disi.”

21Meki wan presi klari fu tyari den pikin fu en go srakti,

fu den kruktudu di den bigisma fu den du.

Noiti moro den sa teki grontapu abra,

fu furu grontapu nanga den foto fu den.

Gado o puru Babel na pasi

22MASRA fu ala sani taki disi:

Misrefi o teki en skin now.

Mi o wai a nen fu Babel,

den sma fu en di ben tan abra,

den pikin nanga bakapikin puru na pasi.

23Mi o meki Babel tron wan presi pe dyindyamaka o tan,

wan presi di o lai nanga soso swampu.

Mi o wai Babel puru na pasi nanga a sibi di e sibi ala sani gwe,

na so MASRA fu ala sani taki.

Gado o puru den sma fu Asur na pasi

24MASRA fu ala sani e sweri taki:

“Fu tru, sani o go soleki fa Mi poti tak' den mus go,

sani o psa soleki fa Mi besroiti tak' den mus psa.

25Mi o broko a makti fu Asur ini a kondre fu Mi,

Mi o traputrapu den tapu den bergi.

A pipel fu Mi o kon fri fu a hebi di den e syow,

a lai o kmopo na den skowru.”

26Disi na a besroiti di meki gi heri grontapu,

disi na a anu di opo fu naki ala folku.

27Bika MASRA fu ala sani meki wan besroiti,

suma o man tapu en?

Na En langa en anu,

suma o man meki A saka en?

Gado o puru den Filistijnsma na pasi

28Ini a yari di kownu Akas dede, Gado taki disi:

29“Filistijnsma, iya un alamala,

un no lafu tumsi fruku

fu di a tiki broko di ben naki unu.

Bika a sneki e meki wan labaria

èn a labaria e meki wan makasneki di gaw srefsrefi.

30Den pikin fu den pôtiwan fu Mi pipel,

den o feni nofo nyanyan tapu den pranigron fu Mi,

den mofinawan o didon tiri fu den sondro fu frede ogri.

Ma Mi o meki den bakapikin fu unu dede fu angri,

èn sma o kiri den wan di tan na libi.

31Bigi doro, un krei!

Foto, un bari!

Sma fu Filistea, un alamala lasi ati!

Bika smoko e kmopo fu noordsei,

wan legre di e kon leki wan man.

32San un o piki den boskopuman fu a pipel dati?

Tak' na MASRA poti Sion tnapu.

A sa de wan kibripresi gi den pôtiwan fu a pipel fu En.”

15

Gado sori san o psa nanga Moab

151A boskopu gi Moab.

Trutru, Ar-Moab broko,

a pori ini a neti!

Trutru, Kir-Moab broko,

a pori ini a neti!

2Dibon e hari go na a tempel

èn den e go krei na den presi pe den e tyari ofrandi.

Moab e bari krei fu Nebo nanga Medeba.

Ala ede piri,

ala barba koti kmopo.

3Ala sma weri lowkrosi tapu strati,

tapu den daki nanga tapu den pren,

alasei krei de fu yere.

nanga watra-ai sma e waka tapu strati.

4Hesbon nanga Elale e bari,

te na Yahas den sten de fu yere.

Den srudati fu Moab e beifi sote,

den lasi ati.

5Mi ati e krei fu Moab ede.

Den sma fu en di lowe doro te na Soar,

te na Eglat-Selisia.

Nanga watra-ai den e kren go na Lukit,

a krei fu den de fu yere tu tapu a pasi fu Horonaim.

6Srefi den presi fu Nimrim pe watra ben de fu feni tron dreisabana.

A grasi e drei,

sani di prani e kon geri,

noti no wani gro moro.

7Dat' meki den e abra a Wilgenkriki

nanga san den ben abi ete,

nanga san den ben kibri poti na wan sei.

8A krei fu den de fu yere alasei ini Moab:

fu Eglaim te go miti Beer-Elam yu e yere:

“A kba gi unu!”

9A watra fu Dimon redi leki brudu.

Ma Mi o meki moro sani miti Dimon:

Mi o seni wan lew baka den wan di lowe kmopo ini Moab,

èn baka den sma di tan na baka ini a kondre.