Sranan Tongo Bible 2016 (STB16)
16

161Tiriman fu a kondre,

un seni skapu go na Sion,

un seni den fu Sela fu den psa ini a dreisabana.

2Dan den sma fu Moab,

o de na a presi pe sma e abra a Arnonliba.

Den o de drape leki pikin fowru di sma wan fanga,

leki pikin fowru di sma yagi fu den nesi.

3“Gi rai! Teki wan besroiti!

Meki a schaduw fu yu de leki neti gi unu

tapu a moro faya yuru fu a dei.

Kibri den wan di ben abi fu lon panya,

no gi den wan di lowe abra.

4Meki den wan di lon kmopo ini Moab tan sranga nanga yu,

de wan kibripresi gi den gi a wan di wan puru den na pasi.”

Dan te a benawtu kon na wan kba,

te a feyanti tapu fu broko a kondre,

te den yagi a wan puru fu a kondre di ben pina wi,

5den o poti wan kownusturu di o tnapu tapu lobi,

èn wan man di de fu fertrow o sidon na en tapu ini a oso fu David,

A sa de wan tiriman di e du sani nanga leti,

wan di e meki ala muiti fu sani du tapu wan leti fasi.

6Un sabi taki Moab abi heimemre,

fa a abi bigifasi,

fa a e kaka en borsu,

fa a e opo ensrefi,

èn fa a e si ensrefi hei moro trawan.

Ma na fu soso a e meki bigi.

7Dat' meki den sma fu Moab e krei,

den alamala e krei gi Moab.

Den e dyeme, den lasi ati trutru,

fu di den rosenkuku fu Kir-Hareset no de moro.

8Den pranigron fu Hesbon e dede gwe,

srefi den droifibon fu Sibma.

Tiriman fu dorosei kondre traputrapu den spesrutu droifi fu den,

den taki fu en ben e doro te na Yaser,

den ben e psa go te ini a dreisabana.

Den yongu taki fu en e panya go te abra a se.

9Dat' meki mi sa krei tranga fu Yaser,

krei fu den droifibon fu Sibma.

Hesbon nanga Elale,

mi o nati unu petepete nanga den watra-ai fu mi,

bika a kba nanga a prisiri babari fu unu,

a babari di un ben meki te un ben e puru un lepi froktu,

èn te un ben e koti san un ben prani.

10Prisiri nanga singi no de fu yere moro ini den pranigron,

babari nanga lafu no de moro tu ini den droifidyari.

Droifi no e masi moro ini den baki.

Mi e tyari wan kba kon na ala babari fu prisiri.

11Dat' meki mi ati e brudu gi Moab,

mi ati e priti gi Kir-Heres.

12Awinsi fa Moab e meki muiti na den presi pe den e tyari ofrandi,

awinsi omeni leisi a e kon makandra fu begi na a santa presi,

na fu soso.

13Dati na san MASRA ben taki fu Moab, ini a ten di de na wi baka. 14Ma MASRA e tak' now taki: efu yu e teri den yari leki fa wan wrokoman di yu yuru e teri den, dan ini dri yari ten Moab sa lasi a grani di a abi, awinsi fa a folku fu den bigi. Wantu o tan abra, den no o de furu èn sma o si den fu noti.