Sranan Tongo Bible 2016 (STB16)
19

Gado sori san o psa nanga Egipte

191A boskopu gi Egipte.

Yere, MASRA e rei na tapu wan wolku,

A e rei es'esi go na Egipte.

Den gado fu Egipte e beifi gi En,

den sma fu Egipte e frede te fu dede.

2Mi o sutu faya mindri den sma fu Egipte,

brada o feti nanga brada,

birtisma nanga birtisma,

foto nanga foto,

kondre nanga kondre.

3Egipte o lasi en ferstan,

èn Mi o pori den prakseri nanga san a e waka.

Dan den o go suku yepi na den gado fu den,

na den bonuman,

na yeye fu dedesma,

èn na yeye di e taigi sma sani di de fu kon.

4Mi o gi Egipte abra ini a makti fu wan tiriman

di no abi sari-ati,

wan tranga kownu sa tiri den.

Na so Masra, a MASRA fu ala sani taki.

5Dan a watra fu a se o drei,

a watra fu a Nijl-liba o kba èn a o lon drei.

6Den kriki o bigin tingi,

ala a watra fu den tra liba di e bigin na a Nijl-liba o kba,

èn den o drei.

A langa grasi na a syoro fu den srefi o geri.

7Ala sani di e gro na a syoro fu a Nijl-liba o drei,

den pranigron drape srefi o drei gwe.

A winti o wai ala sani tyari gwe,

noti no o tan abra.

8Den fisiman o soktu èn den o sari,

iniwan di e fringi en fisi-aka ini a Nijl-liba.

Den wan di e fringi den net ini a liba e lasi ati.

9Den sma di e wroko nanga vlas nanga den wan di e brei en,

o lasi ati.

10Den sma di e brei a vlas no o sabi san fu du,

ala den sma di ben e feni den deibrede nanga a wroko dati,

o sari srefsrefi.

11Den edeman fu Soan no abi ferstan.

den moro koni raiman fu Farao e gi don rai.

Fa un kan taigi Farao taki:

“Wi na pikin fu koniman,

pikin fu kownu di ben de langa na fesi.”

12Pe den de dan, den koniman fu unu?

Meki den taigi unu dan,

meki den tyari kon na krin gi unu

san MASRA fu ala sani poti tak' o psa nanga Egipte.

13Den edeman fu Soan kon don,

den edeman fu Nof e meki sma kori den.

Den edeman di ben mus tyari Egipte

meki a pipel lasi pasi.

14MASRA bruya a yeye fu den.

Dat' meki den e tyari Egipte tapu wan kruktu pasi

ini ala san a wani du,

leki fa wan drunguman e misi futu

èn fadon ini san a puru kon na doro.

15No wan sma ini Egipte o man du wan sani:

No guduwan, no pôtiwan,

no bigiwan, no pikinwan.

16A ten dati den sma fu Egipte o de leki umasma: den o beifi èn den o frede te fu dede gi a anu fu MASRA fu ala sani, di opo fu naki den. 17Den sma fu Egipte o frede gi Yuda. Ala leisi te sma memre den na Yuda, den o frede baka fu san MASRA fu ala sani besroiti fu du nanga den.

18A ten dati feifi foto fu Egipte sa taki a tongo fu Kanaan èn den o sweri ini a nen fu MASRA fu ala sani. Den sa kari wan fu den foto dati: foto fu pori.19:18 Son owru Hebrewtekst abi: Foto fu a son. 19A ten dati wan altari sa tnapu leti mindri fu Egipte gi MASRA, èn na a kba fu a kondre den o opo wan ston tnapu gi En. 20Den sa de wan marki fu memre MASRA fu ala sani na Egipte. Dan te den sa kari na En fu di feyanti e pina den, A sa seni wan ferlusuman di sa feti gi den èn ferlusu den. 21Na a fasi dati MASRA sa meki Egipte kon sabi En, èn a ten dati Egipte sa sabi MASRA. Dan den o srakti meti leki ofrandi fu dini En, èn den o tyari ofrandi fu graan gi En. Den sa meki MASRA pramisi èn den o hori den na den pramisi dati. 22Na so MASRA o strafu Egipte tapu wan fasi di o dresi den. Den o drai kon na MASRA, èn A o yere den begi fu den èn A o dresi den.

23A ten dati wan pasi sa waka fu Egipte go na Asur. Dan den sma fu Asur o go na Egipte èn den sma fu Egipte o go na Asur, èn makandra den sa dini MASRA. 24A ten dati Israel sa tnapu leki a di fu dri kondre sei Egipte nanga Asur, leki wan blesi gi heri grontapu, 25bika MASRA fu ala sani ben blesi den nanga den wortu disi: “Mi e blesi Egipte Mi folku, Mi e blesi Asur a wroko fu Mi anu, èn Mi e blesi Israel Mi eigi pipel.”