Sranan Tongo Bible 2016 (STB16)
21

Gado sori san o miti Babel

211A boskopu gi a sabana na a se.

Leki fa draiwinti e kon baka makandra

abra a kontren na zuidsei,

na so a ogri o kmopo fu a sabana,

fu wan kondre di de fu frede.

2Gado sori mi wan sani di ogri srefsrefi:

A wan di e gi sma abra na en feyanti,

e gi sma abra.

A wan di e broko sani go te na gron,

e broko sani.

Elam, hari go!

Media, tapu den fu alasei!

Mi o tyari wan kba kon na ala a dyeme fu den!

3Na dat' meki mi e beifi na tapu mi futu,

wan pen e nyan mi leki te wan uma mus meki pikin.

Mi no man bribi san mi e yere,

mi skreki fu san mi e si.

4Mi ati e naki bun tranga,

Mi e frede te fu dede.

a ten di mi lobi sote, a ten te neti e fadon,

e meki mi e beifi now.

5Tafra e seti,

krosi e bradi na gron,

nyan e nyan, dringi e dringi.

Edeman un opo,

un lobi oli gi den schild!

6Bika disi Masra taigi mi:

“Go, go poti wan waktiman tnapu.

Meki a taigi yu ala san a e si.

7Efu a e si man tapu asi, tu na tu,

man tapu buriki noso tapu kameel,

meki a luku bun,

meki a opo den ai fu en luku bun.”

8Ne a waktiman bari taki:

“MASRA, luku, heri dei mi e hori wakti ini a toren,

èn ala neti mi e tnapu na tapu mi presi.”

9Yere, man e kon ini fetiwagi,

man tapu asi, tu na tu.

A man e bari taki: “Babel fadon, a fadon!

Ala den ston nanga udu popki fu den kruktu gado fu den

didon panyapanya na gron!”

10Tye, pipel fu mi, un di den naki èn masi

leki fa den e du nanga aleisi.

Na san mi yere fu MASRA fu ala sani,

a Gado fu Israel,

na dati mi taigi unu.

Gado sori san o miti Edom

11A boskopu gi Duma.

Wan sma e bari kari mi fu Seir21:11 Seir na wan tra nen gi Edom. taki:

“Waktiman, waktiman,

olanga a neti o tan ete, olanga?”

12A waktiman piki taki:

“Mamanten e kon, ma neti e kon tu.

Efu na wan sani yu wani aksi, yu kan aksi,

drai kon!”

Gado sori san o psa nanga Arabia

13A ogri di o miti Arabia.

Meki a grupu sma fu Dedan opo den tenti ini a bus'busi fu Arabia.

14Meki den sma fu Tema tyari watra

gi den sma di watra e kiri srefsrefi,

meki den tyari brede gi den di ben abi fu lowe.

15Bika den lowe gi a feti,

gi a deigri di ben hari kba,

gi a bo di ben hari span,

den lon gi a faya fu a feti.

16Bika disi MASRA taigi mi: “Efu yu e teri den yari leki fa wan wrokoman di yu yuru e teri den, dan ini wan yari ten a sa kba nanga a grani fu Kedar. 17Wantu nomo fu den dyadya fetiman fu Kedar di e sutu bo, o tan na libi. Na dati MASRA, a Gado fu Israel, taki.”

22

A kba gi Yerusalem

221A boskopu fu a dal.

San psa nanga unu

tak' un alamala e kren tapu den daki?

2Babari! Wan foto nanga soso opruru!

Wan foto di e meki prisiri!

Den wan fu unu di dede,

a no deigri kiri den,

a no ini a feti den dede tu.

3Ala den edeman fu unu ben lowe.

A feyanti grabu den alamala,

sondro fu wan peiri sutu na den tapu.

Awinsi o fara den ben lowe go,

den grabu den alamala.

4Fu dat'ede mi e taigi unu:

“Un drai un fesi,

bika mi wani bari krei.

Un no abi fu meki muiti fu trowstu mi

fu a bigi ogri di miti a lobi pipel fu Mi.”

5Bika Masra, MASRA fu ala sani,

e hori wan dei fu dyugudyugu ini a dal di A sori mi,

wan dei pe a stampu fu furu srudatisusu o de fu yere,

wan dei fu bruya:

skotu e fadon broko,

sma e bari e lon go na den bergi.

6Bika Elam grabu a kokro nanga den peiri fu en,

fetiwagi nanga srudati tapu asi tnapu klar'klari,

Kir hari den schild fu en kon na doro.

7Den moro moi dal fu unu ben kon furu nanga fetiwagi,

èn bogobogo srudati tapu asi go tnapu fesi a poort.

8Ne A tapu fu kibri Yuda.

A ten dati un ben e fertrow tapu den fetisani fu unu di ben e tan ini a oso di den e kari: Udu fu Libanon. 9Un ben kon si tu tak' olo ben lai na a skotu fu a foto fu David. Un tyari watra kon na wan fu a bigi watrabaki di de na ondrosei. 10Dan un luku den oso fu Yerusalem wan fru wan fu luku sortu wan un ben kan broko fu steifi a skotu nanga en. 11Te fu kba un meki wan baki mindri den tu skotu fu poti a watra fu a owru bigi watrabaki. Ma a Wan di ben meki ala den sani disi psa, un no e luku. A Wan di ben seti den poti bun langa kba, un no e si.

12Dan a ten dati Masra, a MASRA fu ala sani,

kari un fu un krei èn fu un abi dipi sari,

fu un piri un ede èn fu un weri lowkrosi.

13Ma luku, prefu dati un e meki prisiri, fesa e hori,

kaw, skapu nanga krabita e srakti,

nyan e nyan, win e dringi,

dan un e taki: “Meki un nyan, meki un dringi,

bika tamara un o dede.”

14Ma MASRA fu ala sani

tyari disi kon na krin gi den yesi fu mi:

“Fu tru, solanga un e libi Mi no sa gi un pardon fu a kruktudu disi.

Disi na san Masra, MASRA fu ala sani, taki.”

Gado sori san o psa nanga Sebna nanga Elyakim

15Masra, MASRA fu ala sani, taigi mi taki: “Go, go na inisei na a edeman fu den knekti fu kownu, na Sebna di e sorgu taki ala sani e go bun ini a kownu-oso. 16Aksi en taki: ‘Sortu leti yu abi dyaso? Suma yu abi dyaso tak' yu kapu wan grebi gi yusrefi hei na loktu na a bergiskin, leki wan presi pe yu o rostu? 17Ma yere, awinsi fa yu prenspari, Masra o fringi yu gwe. A o grabu yu hori bun steifi, 18A o lolo yu kon na wan, dan A o fringi yu, leki fa den e fringi wan bal, go ini wan bigi opo wei. Drape yu o dede, èn drape den o poti den moi wagi di ben e tyari yu. Yu na wan syen gi a oso fu yu basi. 19Mi o puru a wroko fu yu na yu anu, puru yu fu a kamra pe yu e sidon.

20A srefi ten dati, Mi sa kari mi knekti Elyakim, a manpikin fu Hilkia. 21Mi o gi en a moi krosi fu weri di mi ben gi yu fu weri, mi o tai a banti fu yu lontu a bere fu en, èn mi o poti a makti di yu ben abi ini en anu. A o de leki wan p'pa gi den sma fu Yerusalem nanga gi a pipel fu Yuda. 22Mi o gi en a sroto fu a kownu-oso fu David tu. Te a opo en, no wan sma o man sroto en, èn te a sroto en, no wan sma o man opo en. 23Mi o meki a tnapu bun steifi tapu en presi, leki fa sma e naki wan pen fasi ini a gron. A o de wan bigi grani gi a famiri fu en.’ ”

24Dan a heri famiri o anga na en tapu, krosbei famiri nanga den farawe wan. Leki kan, komki nanga kroiki den o anga na en. 25Ma MASRA fu ala sani e taki tak' a ten dati a pen di ben naki fasi o lusu. A o broko kmopo fu en presi èn a o fadon. Dan ala sani di ben anga na en o broko pis'pisi. Na so MASRA taki.

23

Gado sori san o miti Tyrus nanga Sidon

231A boskopu gi Tyrus.

Sipi fu Tarsis, un krei,

bika Tyrus broko, no wan oso tnapu moro.

Sensi di un e kmopo na Siprus un kisi a sani dati fu yere.

2Un tan tiri, unu di e libi na a sekanti,

un bai nanga seriman fu Sidon,

un di e seiri abra den liba

di meki un kon gudu.

3Abra den bigi watra un tyari a graan fu Sikor kon,

a nyanyan di koti fu den pranigron na a Nijl-liba.

Na dati un seri meki moni.

Na so un kon tron bai nanga seriman na difrenti kondre.

4Yu mus syen Sidon, tranga foto na a se!

Bika a se e kragi yu, taki:

“Mi no sabi a pen di uma e abi te den mus meki pikin.

Mi no sabi san a wani taki fu meki wan pikin.

Mi no sabi tu san a wan taki fu kweki manpikin nanga umapikin.”

5Te Egipte o kisi a boskopu fu yere,

den o beifi na tapu den futu,

beifi fu san den yere taki psa nanga Tyrus.

6Un koti abra go na Tarsis,

èn un krei, sma fu a foto na a sekanti!

7Na disi na a foto fu unu pe prisiri ben e meki nomo?

A foto di ben bow langa na fesi kba?

A foto di ben e seni sma fu en go na bun fara kondre fu go tan drape?

8Suma teki a besroiti taki dati musu psa nanga Tyrus?

A foto di ben e puru kownu èn poti kownu.

Den bai nanga seriman fu en ben de den bigiman fu kondre,

na den man dati heri grontapu ben gi grani.

9Na MASRA fu ala sani ben teki a besroiti dati,

fu tyari wan kba kon na a heimemre di den kisi

fu den sani di den e du,

èn fu broko ala den wan di grontapu e gi grani.

10Sma fu Tarsis un go wroko gron now.23:10 Disi na fa a Grikitekst abi en. A Hebrewtekst abi: psa ini a kondre.

neleki den gronman di e prani sei a Nijl-liba,

bika ala yu lanpe tapu.

11MASRA opo en anu fu naki a se.

A meki kondre nanga den kownu fu den beifi.

A komanderi fu broko den tranga presi fu Kanaan.

12Dan A taki:

“Sidon, yu no o abi prisiri moro,

yu di no ben sribi nanga wan man ete,

ma den sribi nanga yu nanga tranga.

Un opo, dan un koti abra go na Siprus!

Ma drape srefi un no o de tiri!”

13Luku san psa nanga a kondre fu den Kaldeasma:

a folku dati no de moro.

Asur teki a kondre fu den leki wan tanpresi gi meti fu a dreisabana.

Asur poti den toren fu en tnapu, fu feti nanga den,

a broko den tranga oso fu den,

a broko a kondre fu den pis'pisi te na gron.

14Sipi fu Tarsus, un krei,

bika a tranga foto fu un broko.

15A ten dati sma o fergiti Tyrus. Den o fergiti en seibitenti yari langa, a libimarki fu wan kownu. Na a kba fu a seibitenti yari Tyrus o de leki a motyo fu a singi disi:

16Motyo di ala sma gwe libi,

teki a harp fu yu dan yu e go lontu ini a foto.

Prei moi,

singi omeni singi leki yu man,

fu sma memre yu baka.

17A o psa baka a seibitenti yari dati taki MASRA sa luku fu Tyrus baka. Dan Tyrus o du en owru bai nanga seri wroko baka. A o de leki a foto baka di e seri ensrefi leki wan uma gi ala den kondre fu grontapu. 18Ma a pai di a o kisi, nanga a moni di a o meki tapu den sani di a o seri, o de spesrutu gi MASRA. Den no o kibri en noso poti en na wan sei gi densrefi, ma a o de gi den sma di e dini MASRA, fu den abi nofo nyanyan, èn fu den weri den moro bun krosi.