Sranan Tongo Bible 2016 (STB16)
24

Gado o krutu grontapu

241Yere, MASRA e leigi grontapu èn A e broko en!

A e drai en tapu,

èn A e panya den sma di e libi na en tapu go na alasei!

2A srefi sani di e miti a priester e miti a pipel,

a srefi sani di e miti a basi e miti a knekti,

a srefi sani di e miti a uma di de a basi fu a umaknekti,

e miti a umaknekti.

A srefi sani di e miti a seriman e miti a baiman,

a srefi sani di e miti a sma di e leni fu wan trawan,

e miti a sma di e leni trawan,

èn a srefi sani di e miti a sma di mus pai wan trawan,

e miti a sma di wan trawan mus pai.

3Grontapu e leigi srefsrefi,

ala sani fu en den e fufuru tyari gwe,

bika na MASRA taki den sani disi.

4Grontapu e sari èn a e flaw gwe,

a e swaki èn a e drei gwe.

Srefi den bigiman fu kondre e swaki dei fu dei.

5Den sma fu grontapu doti a grontapu:

bika den no hori den na den wèt,

den no hori den na den sani di den ben mus tan du,

èn den broko a têgo ferbontu.

6Na dat' meki wan fluku e pori grontapu,

na dat' meki den sma fu en e butu.

Na dat' meki a gersi tak' na wan faya

e bron den sma fu grontapu,

wantu fu den nomo e tan na libi.

7A nyun win di meki e drei gwe,

den droifibon e flaw,

ala sma di ben e prisiri e soktu now.

8Den sma no e naki moro na tapu den tamboerijn.

A babari fu den sma di ben e meki prisiri tapu.

Den sma no e prei moro na tapu den harp.

9Singi no e singi moro te win e dringi,

a biri kon bita gi den wan di e dringi en.

10A foto broko fadon pis'pisi te na gron.

Den sma tapu den oso fu sma no kan go na inisei.

11Sma e krei tapu strati fu di win no de moro.

Ala prisiri tapu,

prisiri no de fu feni moro na grontapu.

12Na wan ipi broko ston tan nomo fu a foto,

a bigi doro dati broko pis'pisi.

13Na disi o psa nanga grontapu nanga den folku:

a o de leki wan oleifbon di den seki puru ala den froktu,

noso leki wan droifidyari baka te knekti waka tu leisi

fu puru ala den lepi droifi.

14Na a westsei den e prijse a glori fu MASRA.

Den e opo den sten,

den e meki babari fu prisiri.

15Dat' meki un mus gi MASRA grani na a oostsei.

A nen fu MASRA, a Gado fu Israel, mus kisi grani

ini den kondre tapu se nanga den wan na a sekanti.

16Te na den kba pisi fu grontapu un e yere sma e singi taki:

“Grani gi a Wan di e du sani nanga leti!”

Ma dan mi e taki:

“Yepi fu mi no de moro! Yepi fu mi no de moro!

A kba gi mi!

Den wan di e gi sma abra na feyanti,

e gi sma abra!

Na tapu wan lagi fasi den e gi sma abra!”

17Sma fu grontapu!

Sani di o meki un frede te fu dede,

bigi olo fu un fadon na ini,

nanga titei fu fanga unu, e wakti unu!

18A sa de so tak' den di o lon gi a babari di o frede den,

o fadon ini a olo.

Den di man kren kmoto ini a olo,

o go fasi ini a titei.

Bika den sroisi fu tap'sei e opo,

èn grontapu e seki na tapu den fundamenti fu en.

19Grontapu e broko opo trutru,

a e priti opo srefsrefi,

a e seki hebi.

20Grontapu e misi futu leki wan drunguman.

A e degedege leki wan afdaki!

Bika a kruktudu fu en de leki wan hebi na en tapu!

A e fadon fu no opo moro!

21A ten dati MASRA o strafu den makti fu heimel, na heimel

nanga den kownu fu grontapu, na grontapu.

22A sa tyari den kon na wan,

leki fa den e tyari straf'man kon na wan,

èn tapu den poti ini wan olo,

sroto den ini dungru-oso.

Baka wan heri pisten den o kisi den strafu.

23Dan a faya fu a munkenki o kon dungrudungru,

èn a faya son o lasi en krakti.

Bika MASRA fu ala sani e rigeri tapu Sionbergi nanga ini Yerusalem,

èn den fesiman o si a glori fu En.