Sranan Tongo Bible 2016 (STB16)
29

Yerusalem e kmoto ini a benawtu

291Tye Ariyel, Ariyel,29:1 Ariyel na wan tra nen gi Yerusalem.

foto pe David ben meki en legrekampu wanten.

Meki den yari psa, a wan baka a trawan,

un hori den fesa fu unu ala yari baka.

2Ma Mi o tyari Ariyel kon na ini benawtu.

Sari nanga dyeme sa de,

bika Mi o meki a foto tron wan altari pe sani o bron nanga faya.

3Mi o poti mi legrekampu lontu en,

Mi o lontu en fu alasei nanga srudati,

Mi o seti den hei fetisani poti na a skotu fu en tu.

4Yu o taki kmoto dipi fu ondro a gron.

Yu sten o de fu yere fara fu ondro a doti.

A sten fu yu di o kmoto fu ondro a gron,

gersi a sten fu wan yorka,

safrisafri a sten fu yu o de fu yere ini a doti.

5Ma dan wantronso, ini wan pingi fu wan ai

a bigi ipi feyanti fu yu o de leki fini doti.

A bigi ipi fu den di no sabi san na sari-ati,

o de leki aleisibuba di a winti e wai gwe.

6Bika MASRA fu ala sani o du wan sani.

Dondru o bari,

a gron o seki,

bigi babari o de fu yere,

draiwinti,

bun tranga winti

nanga wan bigi faya di e bron ala sani.

7Dan a bigi ipi fu ala den folku di ben hari kon feti nanga Ariyel,

o psa gwe leki wan dren,

leki wan sani di sma e si ini den sribi,

iya, a heri legre di ben feti nanga a tranga foto,

den di ben tyari en ini benawtu.

8Leki fa wan sma nanga angri e dren tak' a e nyan,

ma te a wiki angri e kiri en ete,

leki te wan sma di watra e kiri e dren tak' a e dringi,

ma te a wiki a swaki a srefi fasi èn watra e kiri en ete,

na so a o de nanga a bigi ipi fu ala folku

di ben hari kon fu feti nanga Sionbergi.

A pipel no e arki warskow

9Un tnapu nomo nanga opo mofo,

sondro fu man taki wan sani.

Un tapu un ai nomo leki un breni,

sondro fu un man si wan sani.

Un drungu, ma a no fu win,

un e misi futu, ma a no fu sopi.

10Ma na MASRA meki den go ini wan dipi sribi.

Na so A tapu den ai fu unu, dati na den profeiti,

èn A poti wan duku tapu den ede fu unu,

dati na den man di Gado e sori sani.

11So a heri sani disi di Gado sori unu, de leki wan buku di sroto. Den o aksi wan sma di man leisi taki: “leisi en gi unu,” ma a sma di o piki taki: “Mi no o man leisi en bika a sroto.” 12Te den o aksi wan sma di no sabi leisi fu a leisi, a sma o piki den taki: “Mi no man leisi.”

13Na dat' meki mi Masra taki:

A pipel disi e taki tak' den e waka na Mi baka,

den e gi Mi grani nanga den mofo,

ma a ati fu den, dati de fara fu Mi.

A lespeki di den e sori Mi,

na wan lespeki di libisma leri den

èn komanderi den tak' den mus du en.

14Dat' meki, yere, Mi o du wondru baka gi a pipel disi,

wondru di o meki den tnapu nanga opo mofo,

sani di bigi moro den ferstan.

Dati o meki a koni fu den koniwan o lasi gwe,

èn a ferstan fu den di srapu no o de fu si.

15A kba gi den,

den di wani kibri den sani di den wani du,

dipi gi MASRA.

Den e du den wroko ini dungru dan den e taki:

“Suma e si unu? Suma sabi san un e du?”

16Un wani drai den sani!

A man di e wroko kleidoti no kan de a srefi leki a kleidoti.

A sani di a man meki no kan taki tak' a no a man meki en.

A kleipatu no kan tak' tu fu a man di e wroko en

tak' a no abi ferstan.

Wan moro betre ten e kon

17A no e teki langa moro,

dan a Libanon busi o tron wan gron nanga froktubon,

èn wan gron nanga froktubon o tron wan busi.

18A ten dati dofusma o man yere den sani di sma

e leisi fu wan buku.

Brenisma ai o opo tu,

den o kon fri fu a dipi dungru.

19Den sma nanga sakafasi o prisiri moro nanga moro nanga MASRA,

den moro mofinawan o bari fu prisiri

gi a Santa Wan fu Israel.

20Bika a kba gi den di e du sani nanga tranga,

nanga den di e spotu.

Ala sma di e prakseri fu du ogri o lasi den libi:

21den di e taki sani di no tru fu krutubakra kan leisi strafu gi sma,

nanga den di wan kori den krutubakra di e krutu tori na a bigi doro fu a foto.

Nanga den soso sani di den e tyari kon na fesi,

den e meki taki sma di mus kisi den leti no e kisi en.

22Dat' meki na so MASRA, a Gado di ferlusu Abraham,

e taigi den bakapikin fu Yakob:

Yakob no o kon na syen moro,

syen no o de fu si tapu a fesi fu den moro.

23Bika te den pikin fu en,

si san Mi du na den mindri,

den o gi a nen fu Mi grani.

Den o gi a Santawan fu Yakob grani,

den o abi bigi lespeki gi a Gado fu Israel.

24Sma di ben bruya ini den denki, o si sani krin,

èn den di ben lobi e krutukrutu, o teki leri now.

30

A no Egipte, ma na MASRA e ferlusu

301Na so MASRA taki:

A kba gi den pikin disi di no wani arki!

Den e du sani di a no Mi taigi den fu du.

Den e meki wan ferbontu,

ma a no Mi meki den du dati.

So den e lai sondu tapu sondu na densrefi tapu.

2Sondro fu aksi Mi rai den e lon go na Egipte

fu go suku wan kibripresi na Farao,

èn fu go kibri ini a kowrupe fu Egipte.

3Ma a kibri di un go kibri na Farao

o meki un kisi syen,

èn a kibri di un go kibri ini a kowrupe fu Egipte

o broko un saka.

4Awinsi den tiriman fu unu go na Soan,

den heihei boskopuman te na Hanes,

5den alamala o kon na syen,

bika a pipel dati no man du noti gi unu.

A no o tyari yepi noso wini gi unu,

ma syen nanga brokosaka.

6Disi na san Gado taki fu den meti fu a Negebsabana.

Den e hari psa ini wan kontren di ogri,

èn di de fu frede,

wan kondre pe lew e libi, manwan nanga umawan,

wan kondre fu takru sneki nanga makasneki di gaw sote.

Tapu a baka fu buriki èn tapu den kundu fu kameel.

Den e syow den gudu fu den go na wan folku

di no o man du noti gi den.

7Egipte no warti noti!

A yepi di den e gi no de noti!

Dat' meki Mi e kari en:

Rahab di no man du noti.

8Go now!

Tyerfi den sani dati tapu wan plata ston leti na den fesi.

Skrifi en poti ini wan buku,

fu a tan leki wan ketoigi gi a ten di e kon,

fu a tan fu têgo.

9Bika na wan trangayesi pipel,

pikin di e bedrigi,

pikin di no wani arki san a wèt fu MASRA e taki.

10Den e taigi den wan di Gado e sori sani taki:

“No si sani moro.”

Den profeiti den e taigi taki:

“No taigi un san tru,

ma taigi un swit'switi sani di un wani yere,

taigi un sani di yu no e si trutru.

11Kmoto fu a pasi,

beni kmopo na en tapu.

No ferferi un moro nanga a Santa Wan fu Israel.”

12Dat' meki a Santa Wan fu Israel e taki disi:

Fu di un no teki a wortu disi,

ma bow tapu ogri

èn fertrow tapu bedrigifasi,

13meki a kruktudu fu unu

o de leki wan broko pisi fu wan hei skotu,

wan di kan fadon ala momenti.

Èn wantronso a e fadon, ini wan pingi fu wan ai.

14A e fadon broko pis'pisi leki wan kleipatu.

Den e broko en so finifini tak' no wan fu den pisi fu en

bigi nofo fu puru pikinso asisi fu wan udu faya,

noso fu teki pikinso watra puru fu wan bari.

15Bika na so Masra MASRA, a Santa Wan fu Israel, e taki:

“Efu un wani libi leki fa Mi wani èn de tiri fu unu,

un o si a ferlusu fu unu.

Efu un abi pasensi èn tan fertrow,

un o kisi krakti.”

Ma un no ben wani.

16Un taki: “No!

Un o lowe gwe tapu asi.”

Dat' meki lowe nomo un sa lowe.

Un tak' tu taki:

“Un o gwe bun esi.”

We, bun esi a feyanti o doro un tu.

17Wan dusun fu unu o lowe

te wan enkri feyanti tapu skreki gi unu,

èn te feifi tapu skreki gi unu

un alamala o lowe.

A pikinso fu unu di o tan

o de leki wan postu loktusei fu wan bergi,

leki wan fraga tapu wan pikin bergi.

18Ma now MASRA e wakti fu sori unu a bun-ati fu En,

A opo fu sori unu a sari-ati fu En,

bika MASRA na wan Gado di e du sani nanga leti.

Ala sma di wani wakti na En tapu na blesi sma.

Gado sa blesi En pipel

19Sma ini Sion, unu di de ini Yerusalem, un no o tan krei. A no abi misi tak' MASRA o sori un a sari-ati fu En, te un o kari En. A o piki un wanten te A yere unu. 20A tru tak' A ben meki un nyan brede ini tranga ten èn meki un dringi watra di un ben de ini benawtu. Ma a Wan di e gi unu leri no o kibri moro gi unu. Nanga un eigi ai un o si En. 21Te un o drai fu go na un let'sei noso na kruktusei, un o yere wan sten na un baka di o taki: “Disi na a pasi di yu mus waka.” 22Dan un o si taki den udu noso ston popki di un ben meki fu den kruktu gado, èn di un ben tapu nanga solfru noso gowtu, no krin ini Gado ai. Un o fringi den gwe leki doti, èn un o taki: “Kmoto fu dyaso.”

23Dan Gado o meki alen fadon tapu den siri di un sai ini un pranigron. A nyanyan di un o koti o switi èn bun fu nyan. A ten dati den meti fu unu o nyan grasi tapu bun bigi wei. 24Den kaw nanga den buriki di e wroko un gron, o kisi a moro bun nyanyan baka te den sma prati a buba puru fu a siri nanga den wrokosani. 25Watra sa lon bogobogo kmoto fu ibri hei bergi nanga tapu ibri pikin bergi, tapu a dei pe furu brudu o lon te tranga hei toren o fadon kon na gron. 26Tapu a dei di MASRA o tai a mankeri di a pipel fu En kisi, èn te A o dresi den marki fu a fonfon di A ben gi den, a faya fu a munkenki sa de leki a faya fu a son, èn a faya fu a son sa tranga seibi leisi moro, leki a faya fu seibi dei.

Gado o strafu Asur

27Yere, MASRA srefi e kmopo farawe e kon.

En ati e bron srefsrefi,

deki smoko e kmopo fu En noso.

A e taki nanga hebi atibron,

a tongo fu En de leki wan faya di e bron ala sani.

28A bro fu En de leki wan liba di e lon abra

èn di e doro te na a neki fu sma.

A e seki folku ini wan manari fu A kan puru den na pasi,

A e poti a isri sani nanga san den e tiri meti ini den mofo,

fu A kan tyari den nanga tranga gwe.

29Ma singi o de fu yere na unu,

leki fa den de fu yere tapu a neti fu a santa fesa.

Un sa prisiri ini un ati leki den wan di e bro tapu froiti

te den e hari go na a bergi fu MASRA,

a Bergiston fu Israel.

30Dan MASRA o meki a makti sten fu En de fu yere,

èn A o meki den si fa a anu fu En e saka nanga hebi atibron:

wan faya di e bron ala sani,

liba di e lon abra,

bun tranga alen,

nanga pis'pisi ijs.

31Asur o bruya gi a sten fu MASRA,

te A o naki den nanga tiki.

32Ibri leisi te MASRA o naki den nanga a tiki,

tamboerijn nanga citer o prei.

Nanga En anu opo na loktu A o feti nanga den.

33Wan presi pe den ben o bron ben seti langa ten kba.

A ben seti gi a kownu tu.30:33 Un kan puru a pisi disi so tu: A srefi presi fu Molok.

A olo fu a faya o dipi èn a bradi,

udu nanga faya de bogobogo.

A bro fu MASRA o de leki kroiti di o sutu faya gi en.

31

Na MASRA wawan e ferlusu

311A kba gi den di e hari go na Egipte fu suku yepi.

Den e bow tapu asi,

den e fertrow tapu den furu fetiwagi

nanga tapu tranga fetiman tapu asi.

Ma den no e poti den ai tapu a Santa Wan fu Israel,

den no e suku fu MASRA.

2Ma na En koni.

A kan meki ogri psa èn A no e teki baka san A taki.

A o hari go na den oso fu den di e du ogri,

èn A o tyari wan kba kon na den di e yepi ogri-ati sma.

3Den sma fu Egipte na libisma,

den a no Gado.

Den asi fu den na fu brudu nanga meti,

den a no yeye.

Te MASRA langa En anu,

dan den wan di ben gi yepi, o misi futu,

èn den wan di ben go suku yepi o fadon.

Dan so den ala tu o dede.

4Bika disi MASRA taigi mi:

Leki fa wan lew noso wan yongu lew

e bari fu sori taki a meti di a grabu na fu en,

èn taki a no e frede gi a babari fu den skapuman,

awinsi den e kon ini wan grupu na en tapu,

na so MASRA fu ala sani o saka kon

fu feti tapu Sionbergi nanga a pikin bergi fu en.

5Leki fa wan fowru e frei lontu a nesi fu en

fu kibri den pikin fu en,

na so MASRA fu ala sani o kibri Yerusalem.

A o kibri en èn A o yepi en,

A o luku fu noti no miti en èn A o ferlusu en.

6Pipel fu Israel,

un drai kon baka na a Wan,

gi san yu drai yu baka.

7Bika a pisten dati den o trowe den solfru

nanga den gowtu kruktu gado fu den,

den wan di unu ben meki gi unsrefi.

8Dan wan deigri o kiri Asur,

ma a no di fu wan libisma.

Wan deigri o puru en na pasi,

ma a no di fu wan libisma.

A o lon gi a deigri,

ma den yonkuman fu en o abi fu wroko leki srafu.

9Frede o tyari wan kba kon na a tranga legre fu den.

Den ofisiri o bruya èn lon gwe libi a fraga fu den.

Na so MASRA taki,

En di abi wan faya di e bron tapu Sionbergi,

nanga wan bun faya onfu ini Yerusalem.