Sranan Tongo Bible 2016 (STB16)
32

Freide sa de pe sani e du tapu wan leti fasi

321Efu wan kownu sa rigeri soleki fa a fiti,

èn tiriman e tiri na tapu wan leti fasi,

2dan iniwan fu den o de leki wan skotu gi tranga winti,

leki wan kibripresi gi bigi alen,

leki watra na ini wan dreisabana,

leki a kowrupe fu wan bigi bergiston ini wan drei kontren.

3Dan den wan di e si, sa si krin,

den wan di e yere sa arki bun.

4Den sma di e du sani es'esi sondro fu denki bun fosi,

sa prakseri bun now fosi den du sani.

èn den wan di e gagu sa man taki bun.

5Dan sma no o taki moro tak' wan don sma

na wan sma di yu mus lespeki moro,

noso taki wan bedrigiman na wan bun sma.

6Bika wan don sma e tak' don èn soso ogri a e prakseri:

a e du sani di Gado no lobi srefsrefi,

a e ferteri lei fu MASRA,

a e libi a sma di angri e kiri nanga angri

èn a no wani gi watra na a wan di watra e kiri.

7Wan bedrigiman e du sani tapu bedrigi fasi,

den sani di a e prakseri fu du na ogri sani.

Nanga den lei di a e ferteri a e broko den mofinawan,

srefi te den pôtiwan e feti gi den leti.

8Ma wan lespeki sma e prakseri fu du sani di e gi en lespeki,

èn a e tnapu baka den sani dati tu.

9Uma di no abi broko ede, un opo!

Yongu uma di no abi fu span nanga noti,

un kaka un yesi gi den wortu fu mi.

10Un di no abi fu span nanga noti,

baka wan yari nanga wantu dei un o skreki srefsrefi.

Bika lepi droifi no o de moro fu puru na den bon,

droifi no o de srefsrefi moro fu puru.

11Un beifi, un di no abi broko ede,

un skreki, un di no abi fu span nanga noti!

Un puru ala un krosi na un skin,

dan un weri wan lowkrosi.

12Un naki tapu un borsu fu sori taki un e sari,

fu den moi pranigron nanga bun doti,

nanga den droifibon di e gi froktu bogobogo.

13Un sori taki un e sari tu fu den pranigron fu mi pipel,

pe makamaka nanga krasiwiwiri e gro now,

fu ala den oso pe prisiri ben e meki,

nanga den foto pe lafu ben e lafu.

14Bika sma o gwe libi a kownu-oso,

a foto di ben dyugudyugu so, o leigi.

A tranga kibripresi nanga a toren fu den waktiman,

o broko pis'pisi didon na gron fu têgo.

Busiburiki o prisiri nanga a presi disi,

a o de wan presi pe meti e kon nyan grasi.

15Sani o tan so te leki a Yeye kon fu loktu na wi tapu.

Dan a dreisabana o tron wan dyari nanga froktubon,

èn wan dyari nanga froktubon o tron wan busi.

16Dan sani o du tapu wan leti fasi ini a dreisabana,

èn ini a dyari nanga froktubon sani o du leki fa a fiti.

17Freide o de pe sma e du sani tapu wan leti fasi,

èn dati o tyari tirifasi nanga fertrow fu têgo.

18Dan so a folku sa tan na wan presi pe freide de,

wan presi pe den no abi frede gi noti,

wan presi pe dyugudyugu no e kon pori a tirifasi,

19awinsi pis'pisi ijs o naki a heri busi plata,

èn a foto naki broko te na gron.

20Den sma di e sai na presi pe nofo watra de, na blesi sma,

den di e meki den kaw nanga den buriki waka pe den wani.

33

A wan di e pori sani o de fu sari

331A kba gi a wan di e broko sani te na gron,

ma ensrefi sma no broko go te na gron ete.

A kba gi a wan di e gi sma abra na en feyanti,

ma ensrefi sma no gi abra na en feyanti ete.

Te yu kba broko sani te na gron,

yusrefi o broko te na gron tu.

Te yu kba fu gi sma abra na en feyanti,

sma o gi yusrefi abra na yu feyanti tu.

2MASRA, sori un a sari-ati fu Yu.

Na tapu Yu wi e howpu.

Hori baka gi un ala mamanten.

Iya, ferlusu un te feyanti lontu unu.

3Kondre e lon gi a bigi babari.

Folku e lon panya te Yu opo.

4Dan sma o tyari den sani kon na wan

di yu ben teki fu den feyanti fu yu,

leki fa sprenka e nyan ala sani di de na den pasi,

leki fa wan ipi sprenka e fadon na wan sani skin.

5MASRA bigi,

èn A e libi hei na loktu.

A meki taki sani e psa ini Sion soso tapu wan leti fasi,

èn tak' ala sma e libi soleki fa a fiti.

6Na En e hori baka gi un tu, un heri libi langa.

Na En e kibri a gudu fu wi.

Koni, sabi nanga lespeki gi MASRA,

dati na a gudu fu En.

7Yere! Ariyel e bari na tapu strati

den boskopuman fu freide e krei.33:7 A Hebrewtekst fu a pisi disi no krin.

8Den bigi pasi leigi!

Sma no e waka tapu a pasi moro.

Sma e broko ferbontu,

Sma no e bribi moro san ketoigi e taki!

No wan sma e teri wan trawan.

9A kondre e sari èn a e dede gwe,

a busi fu Libanon drei gwe èn a e syen.

Saron tron wan dreisabana,

ala den bon fu Basan nanga den di fu Karmelbergi

e seki den wiwiri trowe.

10Dan MASRA taki:

Now Mi o opo tnapu!

Now Mi o sori Mi makti!

Now Mi o kisi grani!

11Den prakseri fu unu de leki drei buba,

den sani di un e du na leki drei grasi.

A bro fu unu na wan faya, di o meki unsrefi teki faya.

12Folku o bron te leki den tron karki,

den o bron leki fa makamaka e bron ini faya.

A moi ten di de fu kon

13Un di e libi farawe, un arki san Mi du!

Un di de krosbei, un si Mi krakti èn un taki tak' na so a de.

14Den sondu sma ini Sion e beifi,

frede e naki den sma di no krin ini Gado ai.

“Sortu wan fu unu sa man tan na wan faya

di e bron ala sani?

Sortu wan fu unu sa man tan na wan faya

di e bron fu têgo?”

15Na a sma di e libi tapu wan leti fasi,

a sma di e taki sani leki fa den de,

a sma di no wani pina trawan fu kon gudu,

a sma di no e opo en anu fu teki sani ondro tafra,

a sma di e tapu en yesi te trawan e taki fa den o kiri wan sma,

a sma di e tapu den ai fu en fu no luku kruktudu.

16Na so wan sma wawan kan libi hei na loktu.

A e kibri na den tranga kibripresi ini den bergi.

En nyanyan a o kisi èn watra a no o mankeri.

17Den ai fu yu o si a kownu ini ala a moi fu en,

den o si wan bun bigi kondre tu.

18Now na prakseri wawan yu o prakseri a bigi benawtu:

Pe a wan de di e skrifi sani?

Pe a wan de di e wegi sani?

Pe a wan de di e teri den toren?

19Yu no o si a grofu pipel dati moro,

a pipel di e tak' wan fasi di no de fu ferstan,

èn di e tak' wan dorosei tongo di no wan sma e ferstan.

20Luku go na Sion dan,

a foto pe sma e kon makandra fu hori fesa.

Den ai fu yu o si Yerusalem,

wan tiri presi fu libi,

wan tenti di no wan sma kan puru fu en presi.

Den pen fu en no e hari puru noiti moro,

èn no wan fu den titei fu en sa koti kmoto.

21Èn MASRA o de drape ini a glori fu En.

Drape o de wan presi nanga furu watra,

wan presi fu bradi liba.

No wan sma o pari boto na den tapu,

no wan bigi sipi o psa na den tapu.

22Fu tru, na MASRA o de wi krutubakra,

na MASRA o de wi tiriman,

na MASRA o de wi kownu,

na En o ferlusu wi.

23Den titei di e hori a fraga anga lus'lusu,

den no e hori a fragatiki tnapu let' opo moro,

a fraga no e wai moro.

Dan yu abi a okasi fu prati den furu gudu di un teki fu den.

Srefi lansma o go teki san den man teki.

24No wan sma o tak' a ten dati taki:

“Mi e siki.”

A pipel di e libi drape o kisi pardon fu den sondu.

34

Gado krutu Edom

341Folku, un kon krosbei fu arki!

Kondre, un kaka un yesi!

Meki grontapu nanga ala sma

èn nanga ala sani di e libi na en tapu arki.

2Bika MASRA ati e bron tapu ala folku,

A de fu lusu En atibron tapu ala den legre fu den.

A o puru den na pasi,

A gi den abra fu tyari go srakti.

3Den dedewan fu den o didon na gron sondro fu sma beri den,

a tingi smeri fu den dedeskin o opo go na loktu,

a brudu fu den e droipi fu den bergi.

4Ala den stari na a heimel o pori gwe.

A heimel o lolo kon na wan leki fa den e lolo papira.

Ala den stari o fadon kmopo na a heimel,

leki fa wiwiri e fadon kmopo fu a droifibon,

leki drei froktu fu a figabon.

5A deigri fu Mi de fu si na heimel,

a e saka go tapu Edom,

a e saka fu strafu a folku di Mi o puru na pasi.

6A deigri fu MASRA nati nanga brudu,

fatu e dropu kmoto na en,

brudu fu yongu skapu nanga fu bokoboko,

a fatu fu den niri fu man skapu.

Bika MASRA e tyari wan ofrandi ini Bosra,

A o srakti bun furu ini Edom.

7Bofru e dede gwe nanga den,

sosrefi yongu bulu nanga bigi tranga bulu.

A gron fu a kondre nati nanga brudu,

a gron sungu nanga fatu.

8Bika na wan dei pe MASRA o puru atibron,

wan yari pe A o strafu den feyanti fu a ogri

di den ben du Sion.

9A watra fu Edom e tron tara,

a santi o tron kroiti,

a kondre o tron wan bigi tara onfu.

10Dei nanga neti a o tan bron,

fu têgo a o tan puru smoko.

Yari go yari kon a o tan wan broko pranasi,

noiti moro sma o psa na ini.

11Busifowru nanga dyindyamaka o tan drape,

owrukuku nanga raaf o go libi drape.

Gado meki drape kon tron wan bruya

èn leigi presi.

12Heihei man no o de moro fu tron kownu.

Tiriman no de.

13Makamaka e bigin gro ini den bigi oso,

bus'busi nanga krasiwiwiri ini den tranga foto.

A kondre o tron wan tanpresi fu busi dagu,

wan presi pe bigi bus'fowru e miti.

14Meti fu a dreisabana o miti drape nanga krasi meti,

èn bokoboko o hori feti nanga densrefi drape.

Wan takruyeye srefi o libi drape tiri fu en.

15Drape a takrusneki o meki en nesi,

drape a o poti en eksi,

a o hori den waran den te leki den pikin broko kon na doro,

èn a o sorgu gi den fu noti no miti den.

Tingifowru srefi o de drape, manwan nanga umawan.

16Ondrosuku a buku fu MASRA èn leisi en,

no wan fu den meti disi o mankeri,

iniwan fu den o de nanga den tu.

Bika na MASRA srefi komanderi en

èn na a Yeye fu En tyari den kon na wan.

17Na Ensrefi fringi a lot,

nanga En eigi anu A prati a kondre gi den.

Fu têgo a sa de fu den,

a wan famiri baka a trawan o libi drape fu têgo.