Sranan Tongo Bible 2016 (STB16)
4

41A ten dati seibi uma sa grabu wan enkri man hori

èn den o taigi en taki:

“Un o sorgu gi un eigi nyanyan nanga gi un eigi krosi.

Meki wi tyari yu nen wawan,

èn puru a syen fu wi nanga dati.”

Bun ten broko gi den sma ini Yerusalem

2A ten dati MASRA sa meki sani gro baka ini a kondre, di sa moi èn di sa bun. Ibri Israelitisma di tan na libi sa firi bun srefsrefi fu a nyanyan di a gron e gi. 3Dan den o kari den sma di de ete ini Sion, den sma di tan na baka ini Yerusalem, santa sma. Dati na ibriwan di nen skrifi taki den ben de na libi ini Yerusalem. 4Dati o psa baka te MASRA wasi a doti puru fu Sion nanga den bruduflaka fu Yerusalem. A o du disi te A o krutu den nanga faya tapu wan leti fasi. 5Dan MASRA sa meki wan wolku anga te deiten abra a heri kontren fu a bergi Sion pe den sma e kon makandra èn te neti wan faya o de fu si. Bika a glori fu En o tapu ala sani, 6leki wan tenti te deiten di e gi kowrupe gi a faya son, èn leki wan kibripresi gi sibibusi nanga alen.