Sranan Tongo Bible 2016 (STB16)
43

Gado e pramisi fu ferlusu a pipel fu En

431Ma now MASRA, a Wan di meki yu, Yakob,

a Wan di meki yu nanga En anu, Israel,

e taki disi:

No frede, bika na Mi ferlusu yu!

Mi kari yu na yu nen, yu na fu Mi!

2Te yu e psa ini watra, Mi de nanga yu.

Te yu e hari psa ini liba, den no o hari yu tyari gwe.

Te yu e psa ini faya, a no o kiri yu,

a faya no o bron yu.

3Bika Mi, MASRA, na yu Gado!

A Santa Wan fu Israel na yu Ferlusuman!

Mi e gi Egipte leki pai fu yu kon fri.

Mi e kenki Etiopia nanga Seba fu kisi yu.

4Fu di yu warti ini Mi ai,

fu di yu diri sote gi Mi èn fu di Mi lobi yu,

Mi e kenki sma fu kisi yu.

Mi e gi ala folku abra fu yu kan tan na libi.

5No frede, bika Mi de nanga yu.

Fu oostsei Mi e tyari den bakapikin fu yu kon,

fu westsei Mi e tyari den kon na wan.

6Mi e taigi noordsei taki: “Lusu den!”

Zuidsei Mi e taigi taki: “No hori den!”

Tyari den manpikin fu Mi kon fu farawe presi,

den umapikin fu Mi fu den kba pisi fu grontapu,

7iniwan di e tyari Mi nen,

èn di Mi meki fu Mi kisi grani,

den wan di Mi meki nanga Mi anu,

den wan di Mi meki.

Israel na a ketoigi fu MASRA

8Meki a pipel kon na doro,

a pipel di breni, aladi a abi ai,

a pipel di dofu, aladi a abi yesi.

9Ala folku kon makandra.

Meki den pipel kon na wan.

Sortu wan na den mindri ben ferteri un fu den sani disi?

Sortu wan fu den ben meki un yere fu sani di psa kba?

Meki den tyari den ketoigi fu den kon na fesi,

den di mus sori tak' den abi leti,

fu trawan kan yere èn taki fu den taki: “A tru.”

10MASRA e taki:

Unu na Mi ketoigi,

Mi knekti di Mi teki spesrutu,

fu un kan kon sabi,

fu un kan bribi,

èn fu un ferstan tak' Mi na a wan.

No wan gado ben meki fosi Mi,

èn baka Mi no wan no o de.

11Mi, na Mi na MASRA,

boiti Mi ferlusuman no de.

12Mi ben taki en na fesi,

Mi ferlusu,

èn Mi ben meki a de fu yere.

Un no yere en fu wan sma di un no sabi.

Unu na Mi ketoigi taki trutru Mi na Gado,

MASRA taki.

13Mi e tan suma Mi de

No wan sma kan ferlusu wan sani di de ini Mi makti.

Suma o man tapu a wroko fu Mi?

14Na disi MASRA, un Ferlusuman,

a Santa Wan fu Israel, e taki:

Fu un ede Mi e seni wan sma go na Babel,

Mi e meki ala den Kaldeaman lowe go na den sipi fu den

èn a babari di den ben e meki fu prisiri, tron dyeme.

15Na Mi na MASRA, a Santawan fu unu,

a Wan di meki Israel,

na Mi na un Kownu.

16Na so MASRA taki,

di meki wan pasi ini a se,

di meki wan pasi ini a bigi watra,

17di meki asi nanga fetiman hari gwe,

a legre fu dyadya fetiman.

Den alamala didon na gron now,

den no e opo noiti moro.

Den dede gwe, a kba nanga den.

18No prakseri a ten di de na yu baka,

no poti yu prakseri tapu sani di psa bun langa kba.

19Yere, Mi e du wan nyun sani!

Now a o kon na doro!

Un no man si en ete?

Iya, na Mi meki wan pasi ini a dreisabana,

na Mi meki liba lon ini a kontren pe sani no e gro.

20Bus'meti e gi mi grani,

bus'dagu nanga bigi bus'fowru,

bika Mi e sorgu tak' a dreisabana abi watra,

tak' liba e lon ini a kontren pe sani no e gro,

fu a pipel di Mi teki fu Misrefi,

kan abi fu dringi.

21A pipel disi di Mi meki nanga Mi anu,

o ferteri fa Mi bigi.

Den sondu fu Israel

22Ma Yakob, yu no ben kari Mi,

Israel, yu no meki muiti fu Mi ede.

23A no gi Mi yu ben bron meti leki ofrandi,

yu no gi Mi grani nanga den meti di yu srakti leki ofrandi.

Mi no weri yu ede fu yu tyari graan-ofrandi,

Mi no ferferi yu fu bron wierook gi Mi.

24Nanga yu solfru Yu no bai diri spesrei gi Mi,

èn yu no meki Mi firi prisiri nanga a fatu fu den meti di yu srakti.

Kwet' kweti, ma yu ferferi Mi nanga den sondu fu yu,

na yu weri Mi nanga den kruktudu fu yu.

25Na Mi, na Mi e wasi den ogri fu yu gwe

fu Misrefi ede,

èn Mi no e memre den sondu fu yu moro.

26Memre Mi na den sani fu san yu e krutu Mi,

èn meki un kruderi den.

Tyari den kon na fesi,

fu sori tak' yu abi leti.

27A fosi afo fu yu ben sondu kba,

èn den sma di ben e taki ini yu nen,

no ben wani saka densrefi moro gi Mi.

28Na dat' meki Mi pori den edeman fu a santa presi,

na dat' meki Mi meki den broko den foto fu Yakob,

èn meki feyanti tyari en gwe nanga tranga,

na dat' meki Mi meki den teki Israel leki spot'popki.