Sranan Tongo Bible 2016 (STB16)
45

451Na disi MASRA taigi Kores, a wan di A salfu,

a wan di A gi krakti fu teki kondre abra,

èn fu puru fetisani na den kownu skin,

A wan gi san A e opo doro,

èn di no wan poort no e tan sroto gi en.

2Misrefi e hari go na yu fesi

fu grati a pasi gi yu.

Mi e naki kopro doro panya

èn Mi e broko isri greni.

3Mi e gi yu gudu di kibri ini dungru presi,

gudu di kibri dipi,

fu yu kan sabi tak' Mi na MASRA,

a Wan di kari yu na yu nen,

a Gado fu Israel.

4Fu Mi knekti Yakob ede,

nanga fu Israel, di Mi teki spesrutu,

Mi kari yu na yu nen.

Mi gi yu wan nen di abi grani,

aladi yu no ben sabi Mi.

5Na Mi na MASRA,

wan trawan no de.

Boiti Mi, wan tra Gado no de.

Na Mi gi yu san yu abi,

awinsi yu no ben sabi Mi.

6Sofasi sma di e libi te pe a son e opo, nanga te pe a e saka,

kan sabi tak' boiti Mi trawan no de.

Mi na MASRA,

trawan no de!

7Na Mi meki a faya nanga Mi anu,

èn na Mi meki a dungru.

Na Mi e sorgu taki freide de,

na Mi meki ongoloku psa.

Na Mi, MASRA, e du ala den sani dati.

8Heimel, meki sani psa tapu wan leti fasi,

leki fa alen e fadon fu loktu,

meki den wolku lusu en kon na gron.

Grontapu, opo yusrefi,

meki ferlusu sproiti kon na doro,

èn du sani tapu wan leti fasi,

sa gro kon.

Na Mi, MASRA, meki dati.

9A kba gi a sma di e hori feti nanga a Wan di meki en,

a no de noti moro leki wan pisi fu wan broko kleipatu

mindri tra broko pisi.

A kleidoti no man aksi a sma di e wroko en taki:

“San yu e meki?”

Noso: “A sani di yu e meki no abi yesi.”

10A kba gi a sma di e taigi en p'pa taki:

“San yu meki?”

Noso di e taigi wan uma taki:

“San yu e pusu kon na doro?”

11Na disi MASRA, e taki,

A Santa Wan di meki Israel nanga En anu:

A no de na unu fu aksi fa sani o waka nanga den pikin fu Mi

ini a ten di didon na wi fesi.

Na komanderi un wani komanderi Mi san Mi mus du?

12Na Mi na a wan di meki grontapu,

èn na Mi meki libisma poti na en tapu.

Na Mi hari a heimel poti fa a de, nanga Mi eigi anu,

èn na Mi komanderi ala den dusundusun stari.

13Na Mi na a wan di si tak' na a yoisti sani

fu meki Kores kon,

èn na Mi e grati ala pasi gi en.

A o meki a foto fu Mi baka,

a o fri den wan di feyanti ben tyari gwe nanga tranga,

sondro fu pai wan moni èn sondro fu gi wan kado.

Na so MASRA fu ala sani taki.

Masra e du sani na tapu wan leti fasi èn A e ferlusu

14Na so MASRA taki:

“Den gudu fu Egipte,

a moni di den bai nanga seriman fu Etiopia e meki,

o de fu yu.

Den bigiskin man fu Seba o waka kon na yu baka.

Nanga keti na den futu den o abra kon na yu.

Den o boigi èn kindi gi yu

èn taigi yu nanga ala sakafasi taki:

‘Nanga yu wawan Gado de,

wan trawan no de,

wan tra Gado no de.’ ”

15Fu tru, Yu na wan Gado di e kibri Yusrefi,

Gado fu Israel, Ferlusuman!

16Den man di ben meki den popki fu kruktu gado

e syen èn den tron spot'popki.

Den saka den ede di den e waka gwe.

17Ma MASRA ferlusu Israel,

a ferlusu di A ferlusu en na fu têgo.

Fu têgo yu no o kon na syen Israel,

noiti sma o teki yu meki spotu.

18Bika na so MASRA, di meki a heimel, e taki.

Na En na Gado!

Na En meki grontapu, A meki en nanga En anu.

Na En poti en tnapu.

A no meki en wan bruyabruya fasi,

A meki en fu sma kan libi na en tapu:

Mi na MASRA!

Wan trawan no de!

19Mi no tak' kibrifasi,

ini wan dungru presi fu a kondre.

Mi no taigi den bakapikin fu Yakob taki:

“Suku Mi fu soso.”

Mi, MASRA, e taki sani tapu wan leti fasi,

Mi e ferteri san tru.

20Un moksi kon na wan, dan un kon!

Un alamala di tan na libi na mindri den tra folku,

un kon krosbei!

Den di e syow wan udu popki,

no abi ferstan,

den di e begi wan gado di no man ferlusu.

21Un tak' san un abi fu taki,

un sori taki un abi leti.

Iya, meki den gi densrefi rai.

Suma ben meki a sani disi de fu yere langa na fesi kba?

Suma taki en bun langa kba?

Na Mi, MASRA.

Boiti Mi wan tra Gado no de!

Wan bun Gado, wan Ferlusuman,

wan trawan no de!

22Heri grontapu, un drai kon na Mi meki Mi ferlusu unu,

bika na Mi na Gado, wan trawan no de!

23Mi ben sweri na Misrefi taki:

Mi mofo sa taki sani tapu wan reti fasi,

wan wortu di Mi no sa teki baka.

Ala kindi sa boigi gi mi,

ala tongo sa sweri ini Mi nen.

24Wan sma taigi mi taki:

“Soso MASRA e du sani tapu wan leti fasi,

na En krakti de!”

Ala sma di ben drai baka gi En ini atibron

sa kon na syen èn drai kon baka na En.

25MASRA sa meki ala den bakapikin fu Yakob feni den leti,

èn den sa gi En grani fu dati.