Sranan Tongo Bible 2016 (STB16)
48

Trangayesi Israel

481Oso fu Yakob, arki disi,

un di e tyari a nen fu Israel,

un leki bakapikin fu Yuda,

un di e sweri ini a nen fu MASRA,

un di e anbegi a Gado fu Israel.

Ma un no e du den sani dati nanga un heri ati,

un no e du den tapu wan leti fasi.

2Ma un e taki tak' unu na sma fu a santa foto

èn un e bow tapu a Gado fu Israel.

MASRA fu ala sani na En nen.

3Bun langa na fesi Mi ben taki fu den sani di psa.

Mi ben taki den,

èn Mi ben meki sma yere den.

Dan wantronso Mi du den, Mi meki den psa.

4Fu di Mi sabi tak' un trangayesi,

tak' un no wani boigi un ede fu du san Mi wani,

èn tak' un no e arki srefsrefi,

5na fu dat'ede Mi ben taigi un den sani disi langa na fesi.

Fosi den psa Mi meki un yere fu den,

fu un no taki tak':

“Na a gado fu mi du den.

Na den gowtu noso solfru popki fu den gado fu mi ben wani fu a psa.”

6Un ben yere fu ala den sani dati.

Un si tak' den psa.

Ma un no wani taki tak' na so a de.

Mi o meki un yere nyun sani,

kibrisani di un no ben sabi.

7Na now Mi meki den, den no ben de bifo kba.

Noiti un ben yere fu den ete,

so un no kan taki: “Yu si, mi ben sabi fu den kba.”

8Noiti un ben yere fu den, noiti un ben sabi den.

Langa ten kba un no ben wani poti yesi fu arki.

Bika Mi sabi tak' un no de fu fertrow.

Sensi di un gebore un ben kaka futu gi Mi.

9Mi e hori a atibron fu Mi, fu Mi nen ede.

Fu no pori Mi grani, meki Mi e hori Misrefi,

fu no wai un puru na pasi.

10Un yere, Mi krin unu, ma no leki solfru.

Mi o meki un psa tranga ten fu tesi unu.

11Fu Mi ede, fu Mi ede Mi du en!

Bika Mi no wani fu un afrontu Mi nen.

Mi no e prati a glori fu Mi nanga no wan trawan!

12Arki Mi, Yakob,

nanga Israel, di Mi kari.

Na Mi na Gado.

Mi na a fosiwan èn Mi na a kriboiwan tu.

13Iya, na Mi anu poti grontapu tnapu,

nanga Mi krakti Mi hari a heimel poti leki fa a de.

Te Mi kari den,

den e tnapu klar'klari makandra.

14Un kon makandra, un alamala, dan un arki!

Sortu wan fu den gado fu unu taigi un fu den sani disi?

A wan di MASRA lobi,

sa du a wani fu En ini Babel,

èn a o sori den Kaldeasma a makti fu en.

15Na Mi, na Misrefi taki en.

Iya, na Mi kari en.

Na Mi tyari en kon èn ala san a o du o waka bun.

16Un kon krosbei na Mi, dan un arki:

Sensi na a bigin, Mi no taki kibrikibri.

Sensi di a ben e psa, Mi ben drape.

Now Masra MASRA seni mi nanga a Yeye fu En.

17Na disi MASRA, un Ferlusuman,

a Santa Wan fu Israel e taki:

Na Mi na MASRA, a Gado fu unu,

a Wan di e gi un leri fu sani kan go bun nanga unu,

a Wan di e tiri unu tapu a pasi di un mus waka.

18Efu un ben du san den komanderi fu Mi e taki,

freide ben o lon leki wan liba,

èn den sani di un du tapu wan leti fasi

ben o de leki den skwala fu a se.

19Den bakapikin fu unu ben o furu leki a santi,

den wan di ben o kon na un baka leki den ai fu a santi.

Wan kba no ben o kon na a nen fu den,

noiti a ben o lasi gwe na Mi fesi.

20Un hari kmopo ini Babel!

Un lowe kmopo mindri den Kaldeasma!

Un taki en nanga prisiri,

un meki sma yere en!

Un panya en go te na den kba fu grontapu!

Un taki:

“MASRA ferlusu En knekti Yakob.”

21Watra no ben kiri den

di A ben hari psa nanga den ini a dreisabana.

A meki watra kmoto ini a bergiston gi den.

A priti a bergiston fu a watra lon kmoto na ini.

22MASRA e taki:

“Ma den ogri-ati sma no o abi freide.”

49

491Kondre tapu se nanga den wan na a sekanti,

un arki mi!

Kondre di de farawe, un kaka un yesi!

MASRA ben kari mi fosi mi ben gebore.

Fosi mi ben gebore A gi mi wan nen.

2A meki a mofo fu mi leki wan srapu deigri,

A kibri mi ini En anu.

A meki mi leki wan srapu peiri,

A poti mi ini a kokro fu den peiri fu En.

3A ben taigi mi taki:

“Yu na Mi knekti, Israel,

nanga yu Mi o kisi grani.”

4Ma mi ben prakseri na misrefi taki:

“na fu soso mi haswa,

na fu soso mi lasi mi krakti.

Ma MASRA sa meki mi kisi leti,

a pai fu mi de na mi Gado.”

5Ma MASRA taki tu nanga mi,

En di ben meki mi leki En knekti fosi mi ben gebore,

fu tyari Yakob kon baka na En,

fu tyari Israel kon tnapu lontu En,

fu mi ben kan de wan sma nanga grani ini a ai fu MASRA,

èn taki a Gado fu mi ben sa de mi krakti.

6A taki disi:

“A no nofo tak' yu de Mi knekti,

fu tyari den lo fu Yakob kon na wan baka,

fu tyari den wan fu Israel di tan abra kon baka.

Ma Mi poti yu fu de wan leti gi den folku,

fu tyari a ferlusu fu Mi go te na a kba fu grontapu.”

7Na so MASRA, a Ferlusuman,

a Santa Wan fu Israel,

e taigi a wan di sma e si fu noti,

a wan di den tra folku e si leki wan groskin sani,

a wan di de wan knekti fu tiriman:

Te kownu o si disi, den o opo tnapu.

Tiriman o boigi,

fu MASRA ede, di sori tak' A de fu fertrow,

a Santawan fu Israel,

fu di A teki yu spesrutu.

8Na so MASRA taki:

Tapu a ten di Mi ben feni bun

Mi du san yu aksi Mi,

èn tapu a ten di Mi e ferlusu,

Mi yepi yu.

Mi kibri yu èn Mi poti yu fu de wan ferbontu gi a pipel,

fu meki kondre kon bun baka,

èn fu meki den sma kan kisi den sani fu den baka,

den sani di den ben gwe libi.

9fu taigi straf'man taki: “Un fri fu go”

nanga den wan di de na dungru taki:

“Un kon meki den si unu.”

Den sa feni nyanyan na sei a pasi,

den sa feni nyanyan srefi tapu ala den lagi bergi pe noti no e gro.

10Angri no kiri den,

watra no kiri den tu.

Faya winti nanga a son no o bron den.

Bika a Wan di abi sari-ati nanga den e tiri den

èn tyari den go na watrabron.

11Mi plata ala den bergi fu Mi tron pasi,

èn Mi sa grati ala den bradi pasi fu Mi.

12Luku, den e kmopo fu farawe kon.

Sowan fu noordsei, trawan fu westsei,

trawan baka fu a kondre fu den Sinitisma.

13Heimel, prisiri!

Grontapu, bari fu prisiri!

Bergi, un broko ini prisiri,

bika MASRA trowstu a pipel fu En,

èn A e sori den mofinawan En sari-ati.

14Ma Sion e taki:

“MASRA gwe libi mi!

MASRA fergiti mi!”

15Ma fa wan uma kan fergiti a pikin di a e gi bobi?

Fa a no kan sorgu gi a pikin di ben de ini en bere?

Ma srefi efu a e fergiti en, Mi no sa fergiti yu noiti!

16Yere, Mi tyerfi yu poti ini den anu fu Mi,

èn ala ten Mi e si den skotu fu yu na Mi fesi.

17Den pikin fu yu e kon es'esi baka,

den wan di ben broko yu èn di ben pori yu,

e hari gwe.

18Opo yu ai luku lontu, èn si!

Den alamala drai kon baka. Den kon na yu.

Soleki fa a tru tak' Mi e libi,

MASRA e taki,

yu o prodo nanga den leki wan moi sani,

yu o weri den leki fa wan trowmisi e du.

19Den ipi broko ston,

den foto fu yu di broko pis'pisi te na gron,

a kondre fu yu di pori,

fu tru, den o pikin gi ala den sma

èn den wan di ben broko yu sa de farawe.

20Yu o yere baka fa den pikin fu yu

di feyanti ben fufuru tyari gwe o taki:

“A presi disi pikin tumsi gi unu.

Gi un wan moro bigi presi fu un kan libi.”

21Dan yu o prakseri na yusrefi taki:

“Suma meki den pikin disi gi mi?

Bika den ben fufuru mi pikin tyari gwe

èn mi no ben man kisi pikin.

Den ben tyari mi gwe nanga tranga na tra kondre,

èn den ben yagi mi gwe.

Dan suma kweki den pikin disi?

Mi ben de mi wawan,

pe den disi kmoto?”

22Na so Masra MASRA taki:

Luku, Mi e opo Mi anu go na den kondre,

Mi e opo a fraga fu Mi go na loktu gi den folku.

Dan den sa tyari den manpikin fu yu tapu den anu kon,

èn den umapikin fu yu tapu den skowru.

23Kownu o kweki yu,

den uma fu den o luku yu.

Nanga den fesi go te na gron den o boigi gi yu,

èn den o leki a doti puru na yu futu.

So yu o sabi tak' Mi na MASRA,

èn tak' den di e wakti na Mi tapu no e kon na syen.

24Sma no kan puru den sani di wan tranga fetiman wini ini wan feti,

na en anu.

Strafuman no man kmoto tu ini en anu.

25Ma disi MASRA e taki:

Yu kan ferlusu den strafuman

na ini anu fu wan tranga wan.

Yu kan puru den sani di wan tranga fetiman ben wini ini wan feti

na en anu.

Mi srefi o feti den wan di e feti yu,

èn Misrefi o ferlusu den pikin fu yu.

26Mi o meki den di e pina yu nyan den eigi meti,

èn Mi o meki den drungu fu den eigi brudu,

leki fa sma e drungu fu win di no lepi ete.

Dan ala sma o sabi tak' Mi MASRA na yu Yepiman,

yu Ferlusuman,

a Tranga Gado fu Yakob.

50

501Na so MASRA taki:

Pe a brifi de di e sori taki Mi prati nanga yu m'ma?

Noso gi sortu wan fu den sma di Mi mus pai mi seri unu?

Un yere, na fu den kruktudu fu unu meki Mi seri unu,

èn na fu den sondu fu unu meki Mi seni a m'ma fu un gwe.

2Fu sanede no wan sma ben drape di Mi ben kon?

Mi kari, ma no wan sma piki.

Un denki taki na syatu Mi anu syatu fu ferlusu unu,

noso tak' krakti Mi no abi fu yepi unu?

Un yere,

efu Mi bari a se nomo a e drei

èn liba e tron dreisabana.

Den fisi fu den e pori fu di watra no de,

den e dede fu di watra no de fu den dringi.

3Mi e weri blaka krosi gi den heimel,

èn Mi e tapu den nanga lowkrosi.

4Masra MASRA leri mi fa mi mus taki,

fu mi kan gi dek'ati na den wan di weri.

A e wiki mi ala mamanten,

A e wiki mi fu mi arki leki fa sma di e teki leri e arki.

5Mi Masra MASRA gi mi wan yesi fu arki,

èn mi no kaka futu gi En.

Mi no drai mi baka gi En.

6Mi no drai mi baka puru gi den di ben e naki mi.

Mi no hari mi fesi puru gi den wan di ben e hari mi barba puru.

Mi no drai mi fesi tu di den ben e kosi mi èn spiti ini mi fesi.

7Ma fu di Masra MASRA yepi mi, mi no firi broko saka.

Mi no ben e seki awinsi san den ben e du,

bika mi sabi tak' mi no ben o kon na syen.

8A Wan di o meki mi kisi mi leti, de krosbei.

Suma wan prefuru fu tyari mi go na krutu?

Meki un opo tnapu makandra.

Suma na a sma di o krutu mi?

Meki a waka miti mi!

9Yere, mi Masra MASRA e yepi mi.

Suma o man taki tak' mi fiti fu kisi strafu?

Luku, den alamala de leki wan owru pisi krosi di kakalaka nyan.

10Sortu wan fu unu e lespeki MASRA?

Suma arki san a knekti fu en e taki?

A sma di e waka na dungru presi,

presi pe no abi faya,

mus poti en fertrow tapu MASRA

èn bow tapu a Gado fu en.

11Un alamala di e sutu presi na faya,

un di e waka nanga faya peiri,

un arki:

unsrefi o abi fu hari psa ini a faya di un meki,

un o bron unsrefi na den faya peiri di un sutu.

Na dati Mi o du nanga unu!

Un o kanti didon nanga bun hebi pen!