Sranan Tongo Bible 2016 (STB16)
66

A tru fasi fu dini Gado

661Na so MASRA taki:

Heimel na Mi kownusturu èn grontapu na Mi futubangi.

Sortu oso un o man meki gi Mi dan?66:1 Un kan puru a pisi disi so tu: Pe a oso ben o de gi Mi dan?

Sortu presi un o man meki gi Mi fu kon tan?

2Na Mi meki ala den sani dati nanga Mi anu, MASRA taki.

Na so den du de.

Na den sma disi Mi e luku:

den di abi trutru sakafasi,

den sma di trawan e pina,

nanga den di abi dipi lespeki gi Mi wortu.

3A wan di e srakti wan bulu,

no betre moro a wan di e naki wan libisma kiri.

A wan di e srakti wan pikin skapu,

no betre moro a wan di e broko a neki fu wan dagu.

A wan di e tyari wan graan-ofrandi,

no betre moro a wan di e tyari a brudu fu wan agu leki ofrandi.

A wan di e bron wierook leki wan pisi fu a heri ofrandi,

no betre moro a wan di e gi wan kruktu gado grani.

Leki fa den teki a besroiti fu teki den eigi pasi,

èn leki fa den e prisiri nanga den groskin sani di den e du,

4na so Mi teki a besroiti fu tyari ongoluku kon na den pasi,

èn fu meki a sani miti den di den e frede.

Bika di Mi ben kari, no wan sma no piki,

di Mi ben taki, no wan sma ben arki.

Ma un du sani san no bun ini Mi ai,

èn un teki a besroiti fu du sani di no e gi Mi prisiri.

5Un arki san MASRA taki,

unu di abi dipi lespeki gi a wortu fu En.

Den kondreman fu unu di no lobi unu,

den di no wan sabi noti fu unu fu Mi nen ede,

e taigi un taki:

“Meki MASRA sori En glori dan,

meki wi si a prisiri di un abi.”

Ma na den o kon na syen.

6Wan babari e kmopo fu a foto,

a babari e kmopo fu a tempel.

Na a sten fu MASRA,

A e pai den feyanti fu En san den fiti fu kisi.

7Fosi a kisi den pen, a pikin ben kon na doro kba.

Fosi a pen ben kon tranga fu a pusu,

a ben tyari wan manpikin kon na grontapu kba.

8Noiti ete sma ben yere fu so wan sani.

Noiti ete sma ben si so wan sani.

Wan kondre no man de leki fa a de ini wan dei.

Wan folku no man gebore ini wan momenti.

Ma Sion no ben kisi pen wan bun fasi ete,

èn a puru den pikin fu en kon na doro kba.

9Mi no sa meki a bere fu wan uma klari fu kisi a pikin,

dan a no kisi a pikin.

Na so MASRA taki.

Mi no sa meki wan sma e kisi pikin,

dan Mi tapu a bere fu En.

Na so a Gado fu un taki.

10Un prisiri nanga Yerusalem, un breiti nanga en,

un alamala di lobi en,

Un alamala di ben e firi sari gi en,

un prisiri trutru nanga en.

11Un dringi te un abi nofo,

na den borsu fu en di e trowstu un.

Un dringi nanga prisiri fu den bigi borsu fu en

te leki den leigi.

12Bika na so MASRA taki:

Yere, Mi sa meki a abi freide,

di sa lon leki wan liba,

èn a gudu di a o kisi fu den kondre

o de leki wan kriki di e lon abra.

èn un sa dringi fu en.

A o syow un na en seibere

èn boboi un tapu en kindi.

13Leki fa wan m'ma e trowstu en pikin,

na so Misrefi o trowstu unu.

Un o feni trowstu na Yerusalem.

14Un o si en, èn un ati o prisiri,

èn den bonyo fu unu o firi steifi,

leki yongu grasi di e opo.

Dan ala sma sa kon sabi

taki a anu fu MASRA de nanga den sma di e dini En,

èn a hebi atibron fu En nanga den feyanti fu En.

15Bika yere, MASRA e kon ini wan faya,

den fetiwagi fu En leki wan bun tranga winti.

A e kon fayafaya fu lusu a atibron fu En,

A e kon fu strafu nanga faya.

16Bika MASRA e kon fu strafu ala sani di e libi

nanga faya èn nanga bigi feti.

Den wan di MASRA o kiri o furu.

17Den sma di poti densrefi aparti

èn krin densrefi fu tyari ofrandi ini bromkidyari,

den di e waka baka den sma di e du a sani dati,

den di e nyan agumeti,

meti di no krin ini Gado ai nanga moismoisi,

ala den sma dati o dede makandra!

Na so MASRA taki.

18Mi sabi den sani di den e du nanga san den e prakseri.

Ma a ten e kon fu tyari ala folku kon na wan, awinsi sortu tongo den e taki, fu den kan kon èn si a glori fu Mi. 19Èn Mi o poti wan marki na den mindri èn Mi o seni sowan fu den di tan na libi go na dorosei kondre. Mi o seni den go na Tarsis, Pul, Lud, a kondre pe den sabi sutu bun nanga bo, Tubal nanga Yawan, den kondre tapu se nanga den wan na sekanti, di noiti no yere fu Mi ete èn di noiti no si a glori fu Mi, fu den kan ferteri den fu a glori fu Mi. 20Dan den o tyari ala den brada fu unu di de na mindri den tra folku, leki wan ofrandi kon gi MASRA. Den o tyari den tapu asi, tapu wagi, ini sturu di den e tyari na tapu den skowru, tapu buriki nanga kameel kon na tapu Mi santa bergi, kon na Yerusalem. Na so MASRA taki. Den o tyari den leki fa den Israelitisma e tyari den graan-ofrandi ini krin sani go na a oso fu MASRA. 21Mi o teki wantu fu den leki priester nanga Lefitiman. Na so MASRA taki.

22Bika leki fa a nyun heimel nanga a nyun grontapu di Mi o meki o tan fu têgo na Mi fesi, na so a nen fu unu nanga den bakapikin fu unu sa tan fu têgo tu. Na so MASRA taki. 23Ala nyunmunfesa nanga ala sabatdei ala sma sa kon boigi gi Mi. Na so MASRA taki. 24Ma te den o kmopo fu a foto den o si den dedeskin fu den sma di ben drai den baka gi Mi. Bika den skin sa pori gwe fu têgo èn a faya di e bron den no sa dede. Den o tan de wan groskin sani gi ala libisma.