Sranan Tongo Bible 2016 (STB16)
6

Masra seni Yesaya go na a pipel

61Ini a yari di kownu Usia dede, mi si Masra. A ben sidon hei tapu wan kownusturu èn a ben gersi leki a lantyi fu En krosi ben e furu a heri tempel. 2Seraf ben lontu En. Iniwan fu den ben abi siksi frei: nanga tu den ben e tapu den fesi, nanga tu den ben e tapu den syenpresi èn nanga tu den ben e frei. 3A wan ben e bari gi a trawan taki: “MASRA fu ala sani santa, A santa, A santa! Heri grontapu furu nanga a glori fu En!” 4Den postu fu den doro ben e seki fu a tranga babari, èn a oso ben kon furu nanga smoko. 5Ne mi bari taki: “A kba gi mi! Bika mi na wan man di e taki soso sondu sani èn mi e libi na mindri fu wan pipel di e taki soso sondu sani tu. Èn now, nanga mi eigi ai, mi si a Kownu, MASRA fu ala sani.” 6Ma dan wan fu den seraf frei kon na mi nanga wan krofaya di a ben abi faya ete. A ben puru en nanga wan tanga fu a altari. 7A fasi a mofo fu mi nanga a krofaya, dan a taigi mi taki: “Yere, a krofaya fasi den mofobuba fu yu. Now den kruktudu fu yu kmopo na yu tapu, èn yu kisi pardon fu yu sondu.” 8Dan mi yere a sten fu MASRA. A taki: “Suma Mi sa seni? Suma sa go gi Unu?” Dan mi piki taki: “Dyaso mi de, seni mi.” 9Dan MASRA taki: “Go, dan yu e taigi a pipel taki: ‘Awinsi fa un o arki, un no o ferstan. Awinsi fa un o luku, un no o si.’ 10Ma tan taki nanga a pipel aladi den o tranga den ati, tapu den yesi èn tapu den ai. Dan den no o si nanga den ai, den no o yere nanga den yesi èn den no o ferstan nanga den ati, taki den mus drai kon na Mi, fu Mi kan dresi den.” 11Dan mi aksi taki: “Olanga sani o tan so Masra?” Masra piki taki: “Te leki den foto nanga den oso broko, èn sma no e libi moro na den ini. Te leki den pranigron tron broko pranasi. 12Iya, te leki MASRA tyari den sma gwe fara èn a heri kondre kon leigi. 13Efu tin prosenti tan na baka ete, dan Mi sa pori dati tu. Neleki fa a tompu e tan te sma koti bigi bon trowe, na so a tompu disi sa sproiti baka èn den pransun sa de santa pransun.”6:13 A Hebrewtekst fu a pisi disi no krin.

7

A boskopu fu MASRA gi kownu Akas

71Ini a ten di Akas, a manpikin fu Yotam èn granpikin fu Usia ben e tiri Yuda, kownu Resin fu Aram hari go feti nanga Yerusalem makandra nanga kownu Pekak fu Israel, a manpikin fu Remalyahu. Ma a no ben man teki a foto abra. 2Ma di kownu Akas, a bakapikin fu David, kisi a boskopu taki den sma fu Aram nanga Efraim bondru densrefi,7:2 Un kan puru a pisi disi so tu: Den sma fu Aram de ini a kontren fu Efraim kba. kownu Akas nanga a pipel ben e beifi leki fa bon e beifi ini wan bun tranga winti. 3Dan MASRA taigi Yesaya taki: “Yu nanga yu manpikin Sear-Yasub7:3 Sear-Yasub wani taki: den di tan abra o drai kon baka. mus waka miti Akas tapu a pasi fu a wei pe sma e wasi krosi, na a kba pisi fu den kokro di e tyari a watra kon fu a tapusei watrabaki. 4Yu mus taigi en taki: ‘Hori yusrefi, no meki yu ati de na dyompo, no frede gi den tu pisi udu di e puru smoko, Resin fu Aram nanga a manpikin fu Remalyahu, awinsi fa den ati teki faya.’ 5Meki Aram, Efraim nanga a manpikin fu Remalyahu poti na den ede nomo fu du yu ogri. Meki den taki nomo taki: 6‘Meki un hari go na Yuda, meki un meki den frede te fu dede, meki un teki drape abra èn poti a manpikin fu Tabeal leki kownu.’ 7Ma Masra MASRA e taki: Den no o man du en, a no o psa! 8Bika a mamafoto fu Aram na Damaskus nomo èn a edeman fu Damaskus na no wan sma moro leki a man Resin. Ma ini siksitenti-na-feifi yari a folku fu Efraim no sa de wan folku moro. 9Bika a mamafoto fu Efraim na Samaria èn a edeman fu Samaria na a manpikin fu Remalyahu. Efu un bribi no tranga, un no o man tnapu tranga tu.”

10No langa baka dati MASRA seni taigi Akas taki: 11“Yu kan aksi MASRA, yu Gado, awinsi sortu marki yu wani, wan di kmoto dipi ini dedekondre noso wan di kmoto fu a hei heimel.” 12Ma Akas piki taki: “Mi no o aksi no wan marki, mi no o tesi MASRA.” 13Dan Yesaya taki: “Bakapikin fu David, mi e begi unu, un arki mi. Un weri libisma nofo kba, fu sanede un wan weri a Gado fu mi tu? 14Dat' meki Masra srefi o gi un wan marki: Yere, a yongu uma di noiti no sribi nanga wan man ete, sa hori bere. A sa kisi wan manpikin, di den sa kari Emanuel.7:14 Emanuel wani taki: Gado de nanga wi. 15A sa nyan merkilun nanga oni, te leki a sabi fa fu kaka futu gi ogri èn teki a besroiti fu du bun. 16Ma fosi a boi sa sabi fa fu kaka futu gi ogri èn teki a besroiti fu du bun, den kondre fu den tu kownu gi san yu e frede so, no sa abi sma moro. 17Ma MASRA sa meki wan tranga ten broko gi yu, gi a pipel fu yu nanga gi a famiri fu yu. So wan ten noiti no ben kon ete sensi a dei di Efraim prati nanga Yuda. MASRA o seni a kownu fu Asur kon na yu tapu!”

18A ten dati MASRA sa froiti den freifrei fu den moro fara kriki fu a Nijl-liba nanga den waswasi fu a kondre Asur kon na En. 19Den alamala o frei kon, èn den o saka ini den dal mindri den hei bergi, ini den priti fu den bergiston, tapu ala makamakabon nanga na ala den presi pe den meti kan dringi watra. 20A ten dati Masra o yuru wan srepinefi, a kownu fu Asur, fu abrasei fu a Eufratliba. A o krebi ala un edewiwiri nanga a wiwiri fu un syenpresi puru, srefi a wiwiri fu un barba a o koti puru. 21A ten dati wan sma sa abi wan yongu kaw nanga tu skapu. 22Ma den sa gi bogobogo merki, taki a sma sa abi nofo botro fu nyan. Ala sma di tan na baka ini a kondre sa nyan botro nanga oni. 23A ten dati ibri pisi gron di abi wan dusun droifibon na en tapu èn di warti wan dusun solfru moni, sa gro tapu nanga makamaka nanga krasiwiwiri. 24Soso nanga peiri nanga bo sma e go ini den gron dati, bika makamaka nanga krasiwiwiri sa gro tapu a pasi. 25Sma no man doro moro na den bergifutu di den ben e krin nanga tyapu, fu di den e frede a makamaka nanga a krasiwiwiri di e gro drape. Na kaw wawan den e meki go drape, nanga skapu fu traputrapu den makamaka.

8

81MASRA taigi mi taki: “Teki wan bigi sani tapu san un e skrifi èn skrifi na en tapu fu ala sma kan ferstan: Esi fu fufuru, gaw fu grabu teki.” 2Dan mi teki priester Uria nanga Sekarya, a manpikin fu Yeberekyahu, leki tu ketoigi di de fu fertrow. 3Baka dati mi sribi nanga mi uma, èn a hori bere. Bakaten a kisi wan manpikin. Dan MASRA taigi mi taki: “Kari en Maher-Salal Has-Bas,8:3 Dati wan taki: Esi fu fufuru, gaw fu grabu teki. 4bika fosi a boi disi o man taki papa nanga mama, srudati sa teki den gudu fu Damaskus nanga den sani di den fufuru fu den sma fu Samaria, tyari go gi a kownu fu Asur.”

5Dan MASRA taki baka nanga mi. A taigi mi taki: 6“Fu di a pipel disi e si a watra fu Siloak di e lon safrisafri, leki noti, èn fu di den e suku den koloku na Resin nanga na a manpikin fu Remalyahu, 7yu mus teki yu ai luku, Masra o seni a kownu fu Asur nanga a bigi legre fu en, go na den tapu. A legre dati de leki a bradi Eufratliba. A watra fu en e lon bun tranga èn a e abra go na syoro srefi. 8A watra sa psa go te ini Yuda èn sungu a heri kondre. A sa doro te na den noso. A bigi legre o tapu a heri bradi fu a kondre. Tye Gado, de nanga wi.”

9Folku, un kan kari un legre fu hari go feti, ma un mus frede. Un arki, folku fu den moro fara uku fu grontapu. Un tai un fetisani na un seibere, ma un mus frede. Un tai un fetisani na un seibere, ma un mus frede. 10Un kan sidon prakseri fu du wan sani, ma a no o psa. Un kan meki mofo fu du wan sani makandra, ma a no o go doro, bika Gado de nanga wi.

11Disi na san MASRA taigi mi di a krakti fu En ben de tranga na mi tapu. A warskow mi fu mi no tyari misrefi a srefi fasi leki fa a pipel ben e tyari ensrefi. A taigi mi taki: 12“A pipel disi e si leki alasei sma e meki mofo fu du den ogri. No si sani leki fa den e si en. No frede san den e frede, no meki den sani dati meki yu beifi. 13MASRA fu ala sani, na En wawan santa. Na gi En un mus abi dipi lespeki, na gi En un mus beifi. 14A sa de wan santa presi, ma gi ala tu oso fu Israel A sa de wan ston tu pe den o stotu den futu, wan bergiston di sa meki den aka den futu èn fadon. A sa de wan krafana, wan net gi den sma fu Yerusalem. 15Furu fu den o misi futu, den o fadon, a feyanti o traputrapu den, den o fasi ini a titei èn a feyanti o fanga den. 16Tai a lolo tapu san den sani skrifi di mi ben taki èn tapu en tu nanga wan marki. Gi en na den wan di teki leri fu mi, fu den kibri en ini den ati fu den no fergiti en.”

17Mi o wakti tapu MASRA, awinsi A drai En baka gi a pipel fu Yakob, mi o tan ferwakti En. 18Yere, mi nanga den pikin di MASRA gi mi, wi de mindri den sma fu Israel leki libilibi marki fu MASRA fu ala sani, di e libi tapu Sionbergi.

19Te sma o taigi un taki: “Un aksi den yeye fu den dedewan, nanga den yeye di e taigi un na fesi san de fu kon, den di e taki safri, den di e tak' sani di sma no man ferstan. Bika ibri folku e suku rai na den gado fu den. Na dedesma den e suku rai gi den di de na libi.” 20Un hori soso na a leri disi èn na den sani di un yere fu mi. Efu wan sma no e taki soso san den wortu disi e leri, a no sa go bun nanga en ini a ten di didon na en fesi.

21Nanga lasi ati èn nanga angri bere den sma o waka lontu nomo ini a kondre. Te angri e kiri den, den sa kisi atibron èn den o fluku a kownu nanga a Gado fu den. Den o luku go na loktu, 22noso den e luku go na gron, ma alasei hebi benawtu nanga dungru de, dungru di de fu frede, èn na ini a dungru den abi fu tan. 23Ma den wan di ben de ini hebi benawtu no sa de ini dungru moro.

Ini a ten di de na wi baka

A broko den kondre fu Sebulon nanga Naftali saka,

ma ini a ten di de na wi fesi

A o gi grani na a pasi di e waka go na se,

na a tra sei fu Yordanliba,

Galilea pe sma fu tra folku e tan.