Sranan Tongo Bible 2016 (STB16)
1

Odi

11Gi den twarfu lo fu den Dyusma di panya na heri grontapu.

Disi na wan brifi fu Yakobus, wan knekti fu Gado nanga Yesus Kristus. Mi e bari un odi.

1:1
Mat 13:55
Mrk 6:3
Bosk 15:13
Gal 1:19

Fa fu du te tesi e miti unu

2Brada nanga sisa, un mus si en leki wan prisiri sani te ala sortu tesi e miti unu. 3Bika un sabi taki efu a bribi fu unu e psa a tesi, un o man hori doro. 4Ma un mus tan hori doro te leki un kon de soleki fa Gado wani fu un de. Dan sma no o abi no wan enkri sani fu taki na un tapu, èn noti no o mankeri na unu.

5Efu wan fu unu no abi nofo koni, dan a mus begi Gado fu A gi en. Bika Gado e gi ala sma sondro fu hori wan sani na baka, èn sondro fu taki na den tapu. 6Ma a sma mus begi nanga bribi. A no mus begi nanga tu ati. Bika efu a e du dati, a de leki wan skwala fu a se di winti e seki go seki kon. 7Sowan sma no mus prakseri taki Masra o gi en wan sani. 8Bika a e kenki prakseri ala leisi. Tide a wani du so, tamara a wani du dati.

Pôtisma nanga gudusma

9Wan pôti bribisma mus prisiri taki a abi wan hei presi ini Gado ai. 10Ma wan gudu bribisma mus prisiri taki Gado gi en wan lagi presi. Bika neleki fa bromki na sei pasi de fu wan syatu pisten nomo, na so ensrefi de fu wan syatu pisten tu.

1:10-11
Yes 40:6-7
11Te a son kon faya, a e bron a bromki. A bromki e drei gwe, a e fadon, èn noti no de fu si moro fu a moi fu en. So a de tu nanga a guduman. Ini a wroko di a e wroko, a e dede.

Takru lostu na a m'ma fu sondu

12A sma di e tan hori doro te tesi miti en na wan blesi sma. Bika te a psa den tesi, Gado o gi en a libi fu têgo leki wan grani. Gado pramisi ala sma di lobi En a sani disi. 13Te wan sma e psa wan tesi, a no mus taki: “Na Gado poti mi ini a tesi disi.” Bika soleki fa ogri no man tesi Gado, na so Gado no e tyari sma kon na ini tesi. 14Ma te wan sma e psa wan tesi, a de so taki den takru lostu fu en e kari en, den e hari en. 15Dan te a gi ensrefi abra na den takru lostu disi, den e meki wan sondu. Te a sondu disi kon gro kba, a e tyari dede kon.

16Lobi brada nanga sisa, no meki sma kori unu. 17Ala sani di bun èn di no e mankeri noti, e kmopo na loktu fu Gado a P'pa di meki a son, a munkenki nanga den stari. Gado no e kenki, A faya fu En no e kenki kon dungru. 18Gado ben teki a besroiti fu meki un kon sabi a tru boskopu, fu un kon kisi a nyun libi. Disi meki taki wi teki a fosi presi na mindri ala den sani di A meki.

Arkiman noso duman

19Mi lobi brada nanga sisa, disi na wan sani san un mus sabi: Ibri sma mus gaw fu yere, ma a no mus gaw fu taki èn a no mus gaw fu kisi atibron. 20Bika wan sma di kisi atibron, no e du san bun ini Gado ai. 21Dat' meki un mus poti ala doti fasi nanga ala takru fasi fu libi na wan sei. Nanga sakafasi un mus teki a boskopu di Gado poti ini un ati, a boskopu di kan ferlusu un sili. 22Un no mus arki wawan san Gadowortu e taki, ma un mus du en tu. Noso un e kori unsrefi. 23Bika a sma di e arki a wortu, ma di no e du san a wortu e taki, gersi wan man di e luku ini wan spikri fu si fa en eigi fesi tan. 24Di a du dati, a gwe, èn a srefi momenti a fergiti fa en fesi tan. 25Ma a sma di e tan ondrosuku a boskopu fu Gado di no abi fowtu èn di e meki sma kon fri, na wan blesi sma. Gado o blesi en ini den sani san a e du efu a no fergiti san a yere, èn efu a e du san a boskopu e taki. 26Efu wan sma prakseri taki a e dini Gado, ma en mofo e tak'tak' sani, dan a e kori ensrefi. A dini san a e dini Gado no abi warti. 27A soifri fasi fu dini Gado a P'pa sondro fowtu, na te yu e yepi sma ini den nowtu, soleki pikin di no abi m'ma nanga p'pa moro, uma di masra dede kba, nanga te yu e sorgu taki yu no e du den ogri sani san den sma fu grontapu e du.

2

Lespeki ala sma a srefi fasi

21Mi brada nanga sisa, efu un e bribi ini Yesus Kristus, wi Masra fu glori, dan un mus si ala sma a srefi fasi. 2Kon un taki wan guduman kon inisei te un de makandra fu dini Gado. A weri en moi krosi èn a abi wan gowtu linga na en finga. Ma dan wan pôtiman kon tu di weri syabi-syabi. 3A man nanga en moi krosi un e sori moro lespeki, èn un e taigi en fu a go sidon na wan bun presi. A pôtiman un e taigi fu a go tnapu na wan sei, noso fu a kon sidon na gron na un futusei. 4Efu un e du dati, dan un no e si ala sma a srefi fasi, èn a prakseri di de na en baka no bun. 5Mi lobi brada nanga sisa, un arki. Gado teki den pôtisma fu grontapu fu kon gudu ini bribi èn fu kon ondro a tiri fu En. Na so A pramisi ala sma di lobi En. 6Ma unu e broko den pôtisma saka! Ma na den gudusma e pina unu. Na den e srepi un go na fesi krutubakra. 7Na den e afrontu a bun nen fu Masra di ben kari na un tapu. 8Efu un e du san a moro prenspari wèt ini a Santa Buku taki, dan un e du bun. A wèt disi e taki: “Yu mus lobi tra sma leki fa yu lobi yusrefi.”

2:8
Lev 19:18
9Ma efu un no e si ala sma a srefi fasi, dan un e sondu èn a wèt e krutu unu leki sma di broko a wèt. 10Bika efu wan sma di e hori ensrefi na a heri wèt, broko wan pikin pisi nomo, na a heri wèt a broko. 11Bika na a Wan di taki: “Yu no mus huru,” taki tu taki: “Yu no mus kiri trawan.” So efu yu no huru, ma yu kiri wan tra sma, dan a tan taki na broko yu broko a wèt.
2:11 a
Eks 20:14
Deu 5:18
12Fu dat'ede un mus taki èn un mus libi leki sma di Gado o krutu nanga a wèt di e meki libisma kon fri. 13Bika Gado no sa abi sari-ati nanga a sma di no ben abi sari-ati nanga trawan. Ma a sma di ben abi sari-ati nanga trawan, no abi fu frede gi a krutu fu Gado.

Trutru bribi de fu si ini san yu e du

14Mi brada nanga sisa, wan sma kan taki tak' a e bribi, ma efu a no de fu si na den sani di a e du, dan a no abi warti. A bribi disi no o man yepi en. 15Kon un taki wan brada noso wan sisa de na un mindri di no abi krosi fu weri èn di no abi nofo fu nyan. 16Dan efu wan fu unu sa taigi en taki: “Waka bun! Weri bun fu yu skin tan waran, èn nyan yu bere furu,” ma dan a no e yepi en nanga den sani san en skin abi fanowdu, sortu yepi a gi en dan? 17Na so a de nanga a bribi tu. Efu a no de fu si na den sani san yu e du, dan a bribi dati dede. 18Ma dan wan sma kan taki: “Yu e bribi, ma mi e du.” Dan mi e piki taki: “Sori mi taki yu e bribi sondro taki a de fu si na san yu e du, dan mi sa sori yu nanga den sani san mi e du taki mi e bribi.” 19Yu e bribi taki na wan Gado nomo de. Dati bun! Ma dati den takruyeye e bribi tu, èn den e frede! 20Fa un don so! Mi o sori unu taki bribi no abi warti efu a no de fu si na den sani san wan sma e du. 21A sani di wi afo Abraham du di a poti en manpikin Isak tapu a altari, meki taki a kon bun ini Gado ai.

2:21
Gen 22:1-14
22So un e si taki a no ben bribi wawan, ma a ben du sani tu di sori taki a ben bribi. San a du meki taki a bribi fu en kon de san a mus de. 23So a sani san skrifi ini a Santa Buku kon tru. A skrifi taki: “Fu di Abraham bribi Gado, meki Gado si en leki wan sma di bun ini En ai.” Dan so den kari en wan mati fu Gado.
2:23 a
Gen 15:6
24So un e si taki a no bribi wawan e meki wan sma e kon bun ini Gado ai, ma te a e du sani tu di e sori taki a e bribi. 25Tapu a srefi fasi disi, den sani san a motyo Rakab du meki taki a kon bun ini Gado ai. Bika a ben kibri den boskopuman ini en oso, èn a meki den teki wan tra pasi gwe.
2:25
Yos 2:1-21
26Bika leki fa a skin dede te yu no e bro moro, na so bribi dede tu te a sma no e du sani di e sori taki a e bribi.

3

Luku bun nanga san yu e taki

31Mi brada nanga sisa, un alamala no mus suku fu tron sma di e gi leri. Bika un sabi taki Gado sa luku moro fini te A e krutu wi di e gi leri. 2Wi alamala e meki fowtu someni leisi. Ma a sma di no e meki fowtu ini san a e taki, na wan sma di kon de soleki fa a mus de, èn di man hori ensrefi ini ala sani tu. 3Efu wi wani meki wan asi du san wi e taki, wi e poti wan titei ini en mofo. So a mus fu go pe wi wani. 4Luku den sipi tu. Den bigi èn tranga winti e trusu den go na fesi. Ma nanga wan pikin sani leki wan pari di fasi na bakasei fu a sipi, a man di e tyari a sipi e tyari en go pe a wani. 5Na so a de nanga a tongo tu. Na wan pikin pisi fu a skin, ma a e taki bradi. Luku fa wan pikin faya kan bron wan bigi busi. 6Un tongo na wan faya tu. Soso ogri a e puru kon na doro. Fu ala den pisi fu a skin, a tongo na a wan di e pori a heri skin. A e sutu faya gi a heri fasi fa wi e libi èn na hel srefi e leti en. 7Libisma man tiri ala sortu meti èn den e du dati tu. Den e tiri bus'meti, fowru di e frei, meti di e kroipi, nanga meti di e libi na se. 8Ma no wan libisma man basi a tongo. Na wan ogri sani, yu no sabi na fesi san a o du. A ogri san a e du, na leki te takru sneki beti yu. 9Nanga en wi e opo a nen fu Masra Gado wi P'pa, èn nanga en wi e fluku libisma di Gado meki leki fa Ensrefi de.

3:9
Gen 1:26
10Nanga a srefi mofo di wi e blesi, wi e fluku sma tu. Mi brada nanga sisa, a no mus de so. 11A no kan taki bun watra nanga sowtuwatra de makandra ini wan peti. 12Wan figabon no e gi oleif, èn wan droifibon no e gi figa. Na so wan sowtuwatra peti no man gi bun watra fu dringi.

A koni di e kmoto fu Gado

13Sortu wan fu unu koni èn sabi sani? We, meki a de fu si dan na a bun fasi fa yu e libi. Sma di koni e du sani tapu wan safri fasi. 14Ma efu ini un ati un kon bita fu di un dyarusu, èn efu un e prakseri soso unsrefi, dan un no mus meki bigi tak' un koni. Un mus kba fu lei, èn un mus taki den sani leki fa den de. 15A koni disi no kmopo fu Gado. Na wan grontapu sani, na wan sani di kmoto fu libisma, na wan didibri sani. 16Bika pe dyarusu de èn pe sma e prakseri soso densrefi, drape soso bruya de èn sma e du ala sortu takru sani. 17Ma ini a fosi presi, a koni di kmoto fu Gado e meki sma e libi wan krin libi. Moro fara a e meki den e pruberi fu hori freide, a e meki den abi switi maniri, a e meki den e arki san trawan e taki, a e meki den abi furu sari-ati nanga trawan, a e meki den e du furu bun, a e meki den no e teki a sei fu son sma, èn a e meki den e taki den sani leki fa den de. 18Den sma di e tyari freide kon na trawan mindri, e sai ini freide. Èn a froktu fu en na wan libi di bun ini Gado ai.