Sranan Tongo Bible 2016 (STB16)
3

Luku bun nanga san yu e taki

31Mi brada nanga sisa, un alamala no mus suku fu tron sma di e gi leri. Bika un sabi taki Gado sa luku moro fini te A e krutu wi di e gi leri. 2Wi alamala e meki fowtu someni leisi. Ma a sma di no e meki fowtu ini san a e taki, na wan sma di kon de soleki fa a mus de, èn di man hori ensrefi ini ala sani tu. 3Efu wi wani meki wan asi du san wi e taki, wi e poti wan titei ini en mofo. So a mus fu go pe wi wani. 4Luku den sipi tu. Den bigi èn tranga winti e trusu den go na fesi. Ma nanga wan pikin sani leki wan pari di fasi na bakasei fu a sipi, a man di e tyari a sipi e tyari en go pe a wani. 5Na so a de nanga a tongo tu. Na wan pikin pisi fu a skin, ma a e taki bradi. Luku fa wan pikin faya kan bron wan bigi busi. 6Un tongo na wan faya tu. Soso ogri a e puru kon na doro. Fu ala den pisi fu a skin, a tongo na a wan di e pori a heri skin. A e sutu faya gi a heri fasi fa wi e libi èn na hel srefi e leti en. 7Libisma man tiri ala sortu meti èn den e du dati tu. Den e tiri bus'meti, fowru di e frei, meti di e kroipi, nanga meti di e libi na se. 8Ma no wan libisma man basi a tongo. Na wan ogri sani, yu no sabi na fesi san a o du. A ogri san a e du, na leki te takru sneki beti yu. 9Nanga en wi e opo a nen fu Masra Gado wi P'pa, èn nanga en wi e fluku libisma di Gado meki leki fa Ensrefi de.

3:9
Gen 1:26
10Nanga a srefi mofo di wi e blesi, wi e fluku sma tu. Mi brada nanga sisa, a no mus de so. 11A no kan taki bun watra nanga sowtuwatra de makandra ini wan peti. 12Wan figabon no e gi oleif, èn wan droifibon no e gi figa. Na so wan sowtuwatra peti no man gi bun watra fu dringi.

A koni di e kmoto fu Gado

13Sortu wan fu unu koni èn sabi sani? We, meki a de fu si dan na a bun fasi fa yu e libi. Sma di koni e du sani tapu wan safri fasi. 14Ma efu ini un ati un kon bita fu di un dyarusu, èn efu un e prakseri soso unsrefi, dan un no mus meki bigi tak' un koni. Un mus kba fu lei, èn un mus taki den sani leki fa den de. 15A koni disi no kmopo fu Gado. Na wan grontapu sani, na wan sani di kmoto fu libisma, na wan didibri sani. 16Bika pe dyarusu de èn pe sma e prakseri soso densrefi, drape soso bruya de èn sma e du ala sortu takru sani. 17Ma ini a fosi presi, a koni di kmoto fu Gado e meki sma e libi wan krin libi. Moro fara a e meki den e pruberi fu hori freide, a e meki den abi switi maniri, a e meki den e arki san trawan e taki, a e meki den abi furu sari-ati nanga trawan, a e meki den e du furu bun, a e meki den no e teki a sei fu son sma, èn a e meki den e taki den sani leki fa den de. 18Den sma di e tyari freide kon na trawan mindri, e sai ini freide. Èn a froktu fu en na wan libi di bun ini Gado ai.

4

Saka unsrefi gi Gado

41Ma san e tyari feti nanga trobi na un mindri dan? Disi e psa fu di tranga lostu e bron ini unu. 2Un abi wan tranga angri fu kisi wan sani, ma un no e kisi en. Un e kiri trawan èn un e dyarusu. Ma un no e kisi san un wani. Un e meki trobi èn un e feti. Ma un no e kisi noti, fu di un no e aksi Gado. 3A kan taki un e aksi Gado, ma un no e kisi noti, fu di un no e aksi na a yoisti fasi. Bika un e aksi fu un kan du san un lostu fu du. 4Na drai un drai un baka gi Gado! Na sabi un no sabi taki efu un lobi sani fu grontapu, dan un na feyanti fu Gado? A sma di lobi den sani fu grontapu e sori nanga dati taki en na wan feyanti fu Gado. 5A no fu soso a skrifi ini a Santa Buku taki: “A yeye di A poti ini unu, mus de fu En wawan.”4:5 Un kan puru a pisi disi so tu: A yeye di Gado poti ini wi, lobi wi tranga. (Luku Eks 20:5; Deu 4:24; Sak 8:2). 6Ma Gado e sori unu En bun-ati moro tranga. Dat' meki a skrifi taki: “Gado e feti den sma di abi bigimemre, ma den sma di abi sakafasi A e sori En bun-ati.”

4:6
Leri 3:34
7Dat' meki un mus saka unsrefi gi Gado, ma un mus kaka futu gi didibri, dan a sa gwe libi unu. 8Un mus kon moro krosbei fu Gado, dan Gado sa kon moro krosbei fu unu. Un di e sondu, un krin unsrefi fu den sani san un e du! Un di de nanga tu ati, un poti un prakseri tapu den sani fu Gado wawan! 9Un mus sari, un mus de na row èn un mus krei. Un kba lafu dan un bigin row, èn a prisiri fu unu mus tron wan dipi sari. 10Un saka unsrefi na Gado fesi, dan Gado sa opo unu.

No krutu trawan

11Brada nanga sisa, un no mus taki takru fu wan tra bribisma. A sma di e taki takru fu wan tra bribisma noso di e krutu en, e taki takru fu a wèt èn a e krutu a wèt. Èn efu un e krutu a wèt dan un no e du san a wèt e taki, ma dan unu na krutubakra di e krutu a wèt. 12Wan nomo de di meki a wèt, èn na En wawan kan krutu wi. Dati na a Wan di abi makti fu ferlusu èn fu kiri. Ma suma na yu dan fu krutu wan trawan?

No meki bigi

13Un arki, un di e taki: “Tide noso tamara wi o go na sowan foto sowan foto. Dan wi o tan wan yari drape èn wi o bai èn seri sani fu meki moni.”

4:13-14
Leri 27:1
14Ma un no sabi srefi fa un libi o de tamara! Bika un de leki smoko di de fu si fu wan syatu pisten, dan baka dati a no de fu si moro. 15A moro bun efu un ben taki: “Efu Gado wani, wi sa tan na libi, dan wi sa du disi noso dati.” 16Ma san un e du now na bigi un e meki gi unsrefi, èn dati no bun. 17So, efu wan sma sabi san bun fu du, ma a no du en, dan na sondu a e sondu.

5

Yakobus warskow den guduman

51Unu di gudu, un arki! Un mus krei, iya un mus bari krei fu den bigi nowtu san o miti unu. 2Den gudu fu unu pori gwe. Kakalaka nyan den krosi fu unu.

5:2-3
Mat 6:19-21
3A gowtu nanga a solfru fu unu kon frustu. A frustu disi o sori taki un no du bun, èn leki faya a o bron un heri skin. Un kibri gudu aladi a kba fu grontapu de krosbei. 4Luku, a moni di yu hori na baka fu den wrokoman di mai den gron fu yu, e bari. Èn a krei fu den sma di tyari a nyanyan kon ini a maksin, kon te na den yesi fu Masra fu ala sani.
5:4
Deu 24:14-15
5Na grontapu un ben libi bigi èn ala sani san un ben wani, un ben abi. Un nyan fatu unsrefi fu a dei san den o srakti unu. 6Un krutu sma di no du noti, èn un kiri den. Den no man feti baka nanga unu.

Un mus hori pasensi

7Brada nanga sisa, un hori pasensi te leki Masra drai kon baka. Luku, a man di abi a gron e wakti tapu a bun nyanyan san a gron o gi. A e wakti nanga pasensi fu alen nati a gron fosi a sai. A e wakti tu fu alen nati en fosi a koti a nyanyan. 8Na so un mus abi pasensi tu. Un mus teki dek'ati, bika Masra e kon her'esi baka. 9Brada nanga sisa, un no mus krutukrutu tapu makandra, dan Gado no sa krutu unu. Luku, a Krutubakra e tnapu let' na mofodoro. 10Brada nanga sisa, teki wan eksempre na den profeiti di ben taki ini a nen fu Masra. Den ben nyan pina, ma den ben hori pasensi. 11Memre taki wi e si den sma di e hori doro, leki sma di Gado blesi. Un yere fa Yob ben hori doro, èn a fasi fa Masra tyari a tori kon na wan kba, meki un si taki A abi bunfasi nanga furu sari-ati.

5:11 a
Yob 1:21-22
2:10

12Brada nanga sisa, a moro prenspari sani na taki un no e meki sweri. Un no mus sweri na heimel, èn un no mus sweri na grontapu nanga no wan tra sani tu. Meki te un e taki: “Iya,” a tan “Iya.” Èn te un e taki: “No,” a tan “No.” Dan Gado no sa krutu unu.

5:12
Mat 5:34-37

Begi nanga bribi

13Efu wan fu unu abi wan nowtu, dan a mus begi. Efu wan fu unu e prisiri, dan a mus singi fu gi Gado bigi nen. 14Efu wan fu unu e siki, dan a mus seni kari den fesiman fu a gemeente kon, fu den begi gi en èn fu den lobi oli gi en ini a nen fu Masra.

5:14
Mrk 6:13
15Dan a begi san den begi nanga bribi sa meki taki a sikiwan kon betre baka. Masra sa dresi en. Efu a ben sondu, dan Gado sa gi en pardon fu en sondu. 16Dat' meki un mus taigi makandra efu un sondu, èn un mus begi gi makandra fu un kan kon betre. A begi fu wan sma di bun ini Gado ai, e du furu bika a abi krakti. 17Elia ben de wan libisma leki unu. A begi wan begi fu alen no fadon, èn dri yari nanga siksi mun langa alen no fadon.
5:17
1Kow 17:1
18:1
18Dan a begi baka. Ne alen fadon èn a gron bigin gi nyanyan.
5:18
1Kow 18:42-45

19Brada nanga sisa, efu wan fu unu bigin bribi wan sani san no e agri nanga a tru boskopu, ma dan wan trawan yepi en fu bribi a tru boskopu baka, 20dan un mus sabi taki a sma di e yepi wan sondusma fu kon baka tapu a leti pasi, e meki taki a sma no go lasi èn taki a kisi pardon fu furu sondu.

5:20
Leri 10:12
1Pe 4:8