Sranan Tongo Bible 2016 (STB16)
12

A feti fu Yefta nanga den man fu Efraim

121Den sma fu a lo fu Efraim ben kon na wan dan den koti a Yordanliba abra go na Safon. Drape den taigi Yefta taki: “Fu sanede yu hari go feti nanga den Amonitisma sondro fu kari wi fu go nanga yu? Dat' meki wi kon bron yu nanga yu oso!” 2Ma Yefta piki den taki: “Mi nanga a pipel fu mi ben de ini hebi dyugudyugu nanga den Amonitisma, mi kari unu, ma un no kon yepi wi nanga den. 3Di mi si taki un no ben kon fu yepi wi, mi hari go feti nanga den Amonitisma sondro fu teri mi eigi libi, èn MASRA gi den abra na mi. Dan fu sanede un hari kon dyaso tide fu feti nanga mi?” 4Ne Yefta kari ala den man fu Gilead dan a feti nanga Efraim èn den fon den sma fu Efraim. Bika den sma fu Efraim ben taki tak' den sma fu Gilead na loweman fu Efraim, fu di Gilead didon mindri Efraim nanga Manase. 5Dan den man fu Gilead poti waktiman na a Yordanliba, pe yu ben kan koti abra go na Efraim. Te wan man fu Efraim di ben wani lowe go baka ben doro drape èn a ben aksi fu koti abra, den man fu Gilead ben e aksi taki: “Yu na fu Efraim?” Efu a man ben piki: “No,” 6dan den ben taigi en taki: “Taki a wortu: syibolet.” Efu a man no ben man taki a wortu bun èn a ben taki: “sibolet,” den ben grabu en èn kiri en leti drape. Ini a feti dati sowan fotenti-na-tu dusun man fu Efraim lasi den libi.

7Siksi yari langa Yefta, a man fu Gilead, ben de krutubakra fu Israel. Di a dede den beri en ini wan fu den foto fu Gilead.

Ibsan

8Baka Yefta Ibsan fu Betlehem ben de krutubakra fu Israel. 9Ibsan ben abi dritenti manpikin. A ben abi dritenti umapikin tu di a meki trow nanga sma fu tra famiri, èn a teki dritenti uma fu tra famiri gi den manpikin fu en. 10Seibi yari langa a ben de krutubakra fu Israel. Di a dede den beri en ini Betlehem.

Elon

11Baka Ibsan Elon fu a lo fu Sebulon ben de krutubakra fu Israel. Tin yari langa a ben de krutubakra fu Israel. 12Di a dede den beri en ini Ayalon, ini a kontren fu den sma fu Sebulon.

Abdon

13Baka Elon Abdon, a manpikin fu Hilel, ben de krutubakra fu Israel. A ben de fu Piraton. 14Abdon ben abi fotenti manpikin nanga dritenti granpikin. Den alamala ben abi wan manburiki fu tyari den. Aiti yari langa a ben de krutubakra fu Israel. 15Di Abdon dede, den beri en ini Piraton ini Efraim, ini a bergikontren di ben de fu den Amalekitisma.