Sranan Tongo Bible 2016 (STB16)
13

A agersitori fu a linnen banti

131MASRA taigi mi taki: “Go bai wan linnen banti dan yu tai en na yu bere. Yu mus sorgu dati a no e nati.” 2Mi go bai a banti, leki fa MASRA komanderi mi, dan mi tai en na mi bere. 3Ne MASRA taki baka nanga mi, A taigi mi taki: 4“Meki yu klari fu go na Peratliba nanga a banti di yu bai en di yu e weri na yu bere. Te yu doro drape yu mus kibri a banti ini wan fu den priti fu wan bergiston.” 5So mi go èn mi kibri a banti na Peratliba leki fa MASRA komanderi mi. 6Baka wan heri pisten MASRA taki baka nanga mi. A taigi mi taki: “Meki yusrefi klari, dan yu e go na Peratliba go teki a banti di Mi ben komanderi yu fu kibri drape.” 7Ne mi go na Peratliba, mi suku a presi pe mi ben kibri a banti, dan mi puru en kon na doro. Ma a banti ben pori, a no ben bun moro gi noti. 8Ne MASRA taki nanga mi, A taigi mi taki: 9“Na disi MASRA e taki: Tapu a srefi fasi Mi o pori a heimemre fu Yuda nanga di fu Yerusalem, bika a bigi. 10A takru-ati pipel disi no wani arki san Mi e taki. Den e du san a takru ati fu den e gi den fu du, èn so den e waka baka tra gado fu dini den èn fu anbegi den. Dat' meki den o kon de leki a banti disi, di no bun moro gi noti. 11Bika leki fa a banti e fasi na a bere fu wan man, na so ala sma fu Israel nanga ala sma fu Yuda ben fasi na Mi, Na so MASRA taki. Den ben o de a pipel fu Mi, èn den ben o meki sma sabi Mi èn gi Mi grani nanga bigi nen. Ma den no ben wani de dati.”

12“Taigi a pipel tu taki: ‘Na disi MASRA, a Gado fu Israel, taki: Kroiki meki fu lai win poti na ini den. Dan efu a pipel taigi yu taki: Un sabi dati kroiki meki fu lai win, 13dan yu mus taigi den taki: Na disi MASRA taki: Yere, na so Mi o furu ala den sma fu a kondre disi nanga win te leki den drungu. Dati na den kownu di teki a presi fu David tapu a kownusturu, den priester, den profeiti nanga ala den sma fu Yerusalem. 14Dan Mi o naki den sma broko leki kroiki na makandra. P'pa nanga pikin, na so MASRA taki. Mi no o abi no wan dropu sari-ati nanga den, Mi no o gi den pardon, mi no o firi sari gi den, ma Mi o puru den alamala na pasi.’ ”

15“Pipel fu Israel, un arki!

Un no mus abi bigifasi,

bika na MASRA taki!

16Un gi MASRA, a Gado fu un, grani,

fosi A meki a kon dungru,

fosi un stotu un futu na den bergi ini a dungru.

Un o howpu tapu faya,

ma A o meki a dungru srefsrefi,

dipi dungru di e tapu ala sani.

17Ma efu un no wani arki,

mi o abi fu krei mi wawan fu a heimemre fu unu,

mi o bari krei,

Iya, mi ai sa lon watra sote,

fu di feyanti e tyari a pipel fu MASRA gwe,

a pipel di A ben luku leki fa wan skapuman e luku skapu.

18Taigi kownu nanga en m'ma taki:

Un saka kmopo fu un kownusturu,

bika a moi kroon fadon kmopo fu un ede.

19Feyanti lontu den foto na zuidsei fu ala sei,

èn no wan sma man psa go drape.

Den tyari ala den sma fu Yuda gwe nanga tranga,

den alamala den tyari gwe.

20Yerusalem opo yu ede luku suma e kmoto na noordsei e kon.

Pe a pipel de di yu ben kisi fu luku leki fa skapuman e luku skapu?

Pe den moi skapu nanga krabita de?

21Fa yu o firi efu sma di yu ben e si leki yu mati,

efu den o tiri yu now?

Pen o teki yu leki fa a e teki wan uma di de fu meki wan pikin.

22Èn efu yu o aksi yusrefi taki:

‘San meki disi psa nanga mi?’

We, na fu den furu kruktudu fu yu.

Na dat' meki sma e priti yu krosi puru na yu skin,

èn sribi nanga yu nanga tranga.

23Sma fu Yerusalem,

libisma no man kenki a kloru fu den skin,

wan peni tigri no man puru den flaka na den skin tu.

Na so unu di gwenti a ogri, no man fu du bun.

24Dat' meki Mi o panya un leki aleisibuba go na alasei,

Mi o meki a winti fu a bigi dreisabana wai un tyari gwe.

25Na dati o miti unu,

na dati na a strafu di Mi o gi unu,

Na so MASRA taki.

Bika un fergiti Mi èn un go fertrow na tapu kruktu gado.

26Yerusalem, Misrefi o opo yu yapon go na loktu,

te abra yu ede Mi o opo en,

fu sma kan si a syenpresi fu yu.

27Mi si den groskin gado tapu den pikin bergi ini den wei,

a waka di yu waka gi mi,

a babari di yu e meki leki te wan man asi angri fu wan umawan,

a takru huru di yu e huru.

Yerusalem, a kba gi yu!

A doti libi di yu e libi,

oten wan kba o kon na en?”