Sranan Tongo Bible 2016 (STB16)
27

A pipel mus saka ensrefi gi Babel

271No langa di kownu Sedekia, a manpikin fu Yosia, ben bigin tiri Yuda, MASRA taki nanga Yeremia. 2MASRA taigi mi taki: “Meki wan fu den udu sani di den e weri gi den meti na den neki te den mus drai a doti. Yu mus poti wantu banti na en dan yu e weri en lontu yu neki. 3Dan yu e go na den spesrutu man di kon na Yerusalem na kownu Sedekia fu Yuda. Den man disi na spesrutu boskopuman fu den kownu fu Edom, fu Moab, fu Amon, fu Tyrus nanga fu Sidon. Yu mus taigi den dati den mus gi den kownu fu den a boskopu disi: 4‘Na disi MASRA fu ala sani, a Gado fu Israel, e taki: Un mus taigi den kownu fu un disi: 5Nanga a bigi krakti èn nanga a makti fu Mi, Mi meki grontapu, den libisma nanga den meti di e libi na en tapu. Mi e gi a grontapu na suma Mi wani. 6Nownowde na Nebukadnesar, a kownu fu Babel, a knekti fu Mi, Mi gi ala den kondre fu unu. Iya, srefi den krasi meti Mi gi en fu den dini en. 7Ala folku sa abi fu dini en, en manpikin nanga a granpikin fu en, te leki a ten doro gi a kondre fu en tu dati den sa abi fu dini tranga folku nanga bigi kownu. 8A folku noso a kondre di no wani dini kownu Nebukadnesar fu Babel, den di no wani tyari a udu di a poti lontu a neki fu den, Mi sa strafu nanga bigi feti, angriten nanga takrusiki di sa panya ini den kondre, te leki Mi gi ini wan fu den ini a makti fu en. Na so MASRA e taki. 9Dat' meki un no mus arki den profeiti fu unu, den lukuman, den man di e puru dren gi unu, den man di e kari yeye fu dedesma fu kon taigi den san de fu kon, nanga den tofruman. Na den e taigi unu dati un no mus dini a kownu fu Babel. 10Na lei den e lei te den e taki dati na Masra gi den fu taki. Na wani den wani nomo fu feyanti tyari un gwe fu un kondre, fu Mi panya un go na difrenti kondre pe un o lasi un libi. 11Ma a pipel di sa tyari a udu di a kownu fu Babel poti lontu en neki èn di e tan dini en, a pipel dati Mi sa meki tan libi na ini a kondre fu den. Den sa wroko den pranigron fu den èn den sa tan libi drape. Na so MASRA taki.’ ”

12Di mi ben kba taki nanga den man mi go na kownu Sedekia fu Yuda go taigi en densrefi sani. Mi taigi en taki: “Tyari a udu di a kownu fu Babel poti lontu a neki fu yu. Dini en nanga a pipel fu en dan yu o tan na libi. 13Fu sanede yu o meki bigi feti, angriten nanga takrusiki kiri yu nanga a pipel fu yu? Na dati MASRA taki o psa nanga a pipel di no wani dini a kownu fu Babel. 14Yu no mus arki san den profeiti e taigi yu, dati yu no mus dini a kownu fu Babel. Na lei den e lei te den e taki dati na Masra gi den fu taki dati. 15A no Mi seni den, na so MASRA taki. Ma toku den e taki sani ini Mi nen, sani di no tru, fu Mi kan yagi un puru fu a kondre fu un kan dede. Unu nanga den profeiti di e taigi un sani.”

16Mi taki nanga den priester tu èn nanga a heri pipel fu Yuda: “Na disi MASRA e taki: Un no arki te den e taki dati na Masra gi den fu taki, te den e taki dati den gudu fu a oso fu MASRA, di a feyanti ben tyari go na Babel, o drai kon es'esi dyaso baka. Na lei den e taigi unu. 17Un no arki den. Un tan dini a kownu fu Babel fu un kan tan na libi. Fu sanede a foto disi mus tron bigi ipi broko ston? 18Efu den na trutru profeiti di e taki san MASRA e gi den fu taki, meki den begi MASRA fu ala sani, tangitangi, fu A no meki den gudu di de ete ini a oso fu En, nanga ini a kownu-oso, nanga ini Yerusalem, go na Babel. 19Bika na disi MASRA fu ala sani e taki: Den bigi kopro postu, a bigi kopro beki, den kopro baki, nanga den gudu fu a tempel de ete ini a foto disi. 20Nebukadnesar, a kownu fu Babel, no ben tyari den gwe di a ben tyari kownu Yekonya, a manpikin fu Yoyakim, fu Yuda nanga ala den heihei sma fu Yuda nanga Yerusalem nanga tranga go na Babel. 21Iya, na disi MASRA fu ala sani, a Gado fu Israel, e taki fu den gudu di de ini a oso fu MASRA, fu den gudu di de ini a kownu-oso fu a kownu, nanga den gudu di ben tan na baka ini Yerusalem: 22Ala sani o go na Babel, èn na drape den o tan te leki a dei doro di Misrefi o sorgu dati den kon baka. Na so MASRA taki.”