Sranan Tongo Bible 2016 (STB16)
2

Israel no de fu fertrow

21MASRA taki nanga mi. A taigi mi taki:

2“Bari taigi Yerusalem taki: Na disi MASRA e taki:

Mi sabi ete fa yu ben lobi Mi di yu ben yongu,

fa yu ben lobi Mi leki Mi uma,

èn fa yu ben hari kon na Mi baka ini a bigi dreisabana,

ini a sabana pe sma no man sai noti.

3Israel na fu MASRA wawan,

leki fa den fosi nyanyan di sma e koti na fu En.

Iniwan sma di wani nyan en o kisi strafu,

bigi ogri o miti en,

Na so MASRA taki.

4Bakapikin fu Yakob, ala lo fu Israel,

un arki a boskopu fu MASRA!

5Na disi MASRA e taki:

Sortu fowtu den afo fu unu ben feni na Mi

fu ben gwe libi Mi?

Den go waka baka gado di no de noti

èn so densrefi tron noti.

6Den no aksi taki: ‘Pe MASRA de?

Na En ben puru wi ini Egipte,

na En ben tyari unu ini a bigi dreisabana,

wan presi pe watra no de,

wan presi nanga dipi olo,

wan presi di drei èn di dungru sote,

a sabana pe sma no e hari psa

èn pe no wan libisma e libi.’

7Ma Mi ben tyari den go na wan kondre

di ben abi bun doti,

wan kondre di ben abi den moro switi froktu di de.

Ma di den doro drape den doti a kondre fu Mi,

a kondre di de fu Misrefi

tron wan groskin sani gi Mi.

8Den priester no aksi taki: ‘Pe MASRA de?’

Den di e wroko nanga a wèt no ben sabi Mi.

Den tiriman fu a pipel no ben wani sabi noti moro fu Mi.

Den profeiti ben e taki ini a nen fu Baal,

èn den ben e waka baka gado

di no ben man yepi den.

9Na dat' meki Mi e tyari un go baka na krutu,

Na so MASRA taki,

iya, den pikin nanga den bakapikin fu unu

Mi e tyari go na krutu.

10Un koti abra go na den eilanti fu den Grikisma,

un go drape go luku.

Un hari go na Kedar,

un go ondrosuku drape,

un go luku fin'fini efu sowan sani psa drape.

11Noiti a psa ete taki wan folku kenki gado,

èn den sani a no gado srefi.

Ma a pipel fu Mi kenki a grani fu den

gi sani di no man yepi den.

12Heimel, skreki fu a sani dati!

Beifi èn sari sote,

Na so MASRA taki.

13Na tu ogri a pipel fu Mi du:

A gwe libi Mi, a bron fu libi watra,

èn a go diki baki fu fanga alenwatra,

ma den baki priti,

den no man hori a watra.

14Israel a no wan srafu.

A no gebore leki wan srafu tu.

Dan fa a du kon taki a tron nyanyan gi trawan?

15Lew e bari gi en,

den e bari bun tranga gi en.

Feyanti meki a kondre fu en

tron wan broko pranasi,

den foto fu en broko fadon,

èn no wan sma e libi na den ini.

16Den man fu den foto Nof nanga Takpankes srefi o kon,

èn den o piri un ede.2:16 Un kan puru a pisi disi so tu: den o puru san de fu feni ete tapu den bergi fu unu.

17Israel, na yusrefi suku disi,

bika na yu gwe libi MASRA, a Gado fu yu,

a ten di A ben e tyari unu.

18We dan, fu sanede yu go na Egipte

fu go dringi a watra fu a Nijl-liba.

Fu sanede yu go na Asiria

fu go dringi a watra fu a Eufratliba.

19Yu eigi ogri o strafu yu,

èn a gwe di yu gwe libi mi

o drai kon tapu yu eigi ede.

Firi fu a tan,

fa a ogri nanga fa a bita fu gwe libi MASRA,

a Gado fu yu,

nanga fu no abi dipi lespeki gi Mi,

Na so Masra, MASRA fu ala sani,2:19 A Hebrewtongo abi: MASRA Sebaot. e taki.

20A no now yu e kmopo ondro a tiri fu Mi,

a no now yu e tapu fu saka yusrefi gi Mi,

èn taki: Mi no wani dini Yu.

Ma yu e huru gi Mi,

tapu ibri pikin bergi

nanga ondro ibri bon di lai wiwiri.

21Mi ben prani yu leki wan spesrutu droifi,

fu den moro bun siri di de.

Ma luku fa yu kon tan,

yu tron busi droifi di e gro bruyabruya.

22Awinsi yu sa wasi nanga soda

noso nanga furu sopo,

a kruktudu fu yu o tan na Mi fesi

leki wan flaka di no man gwe,

Na so Masra MASRA taki.

23Fa yu kan taki:

‘Mi no doti misrefi èn Mi no dini den Baal.’

Luku fa yu sondu ini a Hinomdal.

Yu mus ferstan san yu du.

Yu de leki wan uma kameel di e lonlon na alasei.

24Leki wan werder uma buriki yu de,

wan di gwenti a bigi dreisabana.

Yu e smeri a winti srefi, fu a krasi di yu krasi,

fu luku efu wan manwan de ini a birti.

Suma sa man tapu a angri di a e angri fu a manwan?

no wan no abi fu du muiti fu suku en,

ensrefi de drape e wakti den.

25Israel, no waka te leki yu futu kon swa,

te leki yu gorogoro kon drei.

Ma yu piki taki:

‘Yu no abi fu meki muiti, na tra gado un lobi,

na den baka wi o waka.’

26Leki fa wan fufuruman e kisi bigi syen te den kisi en,

na so den sma fu Israel o kisi bigi syen tu:

den, den kownu fu den,

den man di e yepi tiri a kondre,

den priester nanga den profeiti fu den.

27Un alamala o kon na syen,

bika un e taigi wan pisi udu taki:

‘Yu na wi p'pa.’

Wan ston un e taigi taki:

‘Na yu meki wi.’

Den drai den baka gi Mi,

den no wani luku Mi moro.

Ma te bigi ogri miti den, den e taigi Mi taki:

‘Du wan sani, ferlusu wi!’

28Ma pe den gado fu yu de di yusrefi meki?

Meki den dati du wan sani.

Meki den dati ferlusu yu efu den man,

te bigi ogri miti yu.

Bika den gado fu yu kon furu leki den foto fu yu,

a no so a de, Yuda?

29Dan fu sanede yu e krutu Mi dan?

Na un alamala tapu fu waka na Mi baka,

Na so MASRA taki.

30Na fu soso Mi lasi Mi ten fu fon den pikin fu unu,

a no du den no wan bun.

Un kiri den profeiti fu unu nanga deigri,

un priti den leki krasi lew.

31Unu fu a ten disi,

un kaka un yesi gi san MASRA abi fu taki:

Noiti Mi ben de gi Israel leki wan dreisabana,

noso leki wan bun dungru kondre.

Dan fu sanede a folku fu Mi e taki:

‘Un wani de fri,

un no e drai kon na Yu moro.’

32Wan yongu umapikin

no e fergiti fu weri en gowtu sani,

èn wan trowmisi

no e fergiti fu weri den moimoi sani fu en.

Ma a folku fu Mi fergiti Mi, olanga kba.

33Yu sabi a pasi bun fu go meki lobi,

srefi motyo kan leri fu yu.

34Brudu srefi de fu si na yu krosi,

a brudu fu pôtisma di no du noti.

A no brudu fu fufuruman di yu grabu

di den e broko yu oso.

35Dan yu e prefuru ete fu taki:

‘Ma mi no du noti. A atibron fu Gado o psa mi.’

Ma yere, Mi o tyari yu go na krutu

fu di yu taki dati yu no sondu.

36Es'esi yu e teki wan tra pasi.

Asur meki yu kon na syen,

Egipte srefi o du dati nanga yu.

37Yu o saka yu ede te yu o kmoto fu drape.

Bika MASRA poti den sma tapu san yu ben fertrow

na wan sei,

den no o man yepi yu.”

3

31MASRA taki nanga mi. A taigi mi taki: “Efu wan man prati nanga en uma dan a uma trow nanga wan tra man, a fosi masra fu en no kan teki en baka. So wan sani sa pori a heri kondre. Ma yu, Israel, huru nanga someni man, dan fa yu wani drai kon baka na Mi? Na so MASRA taki.

2Opo yu ede luku den pikin bergi

pe sani no e gro moro.

Tapu sortu wan fu den yu no huru?

Yu ben sidon wakti den man fu yu sei a pasi,

neleki fa abani e sidon wakti sma

di e hari psa ini a dreisabana.

Yu pori a kondre nanga a takru huru di yu huru.

3Na dat' meki alen no fadon,

no ini a pikin alenten,

no ini a bigi alenten.

Ma yu tan poti yu fesi leki di fu wan huru,

sondro wan enkri syen.

4Dan yu e taki now taki:

‘Yu na mi P'pa,

Yu ben lobi mi sensi di mi ben yongu.

5A atibron fu Yu o saka wan ten,

Yu no o tan mandi na mi tapu fu têgo.’

Ma yere, dati na san yu e taki,

ma yu du ogri èn yu no wani fu tapu nanga en.”

Israel nanga en sisa Yuda

6A pisten di kownu Yosia ben de na makti, MASRA taigi mi taki: “Yu si fa Israel drai en baka gi Mi? A huru gi Mi tapu ibri hei bergi nanga ondro ibri bon di lai wiwiri. 7Dan Mi prakseri taki: Te a du te a sari en, a sa drai kon baka na Mi. Ma a no drai kon. Yuda, a s'sa fu en di no de fu fertrow, si dati. 8Ma Mi si dati di Mi yagi Israel, di drai en baka gi Mi, èn di Mi gi en a brifi di e sori taki a trow broko, dati Yuda, a s'sa fu en di no de fu fertrow, no skreki srefsrefi, ma a gwe go huru fu en tu. 9A huru di a e huru so makriki nanga gado di meki fu ston nanga udu, pori a kondre. 10Baka dati Yuda, a s'sa di no de fu fertrow, drai kon na Mi. Ma a no du en nanga en heri ati, a du en fu kori sma. Na so MASRA taki.” 11MASRA taigi mi moro fara taki: “Israel di drai en baka gi Mi, bun moro Yuda di no de fu fertrow.

12We, go, dan yu e bari taigi den di e libi na noordsei taki:

Israel, yu di drai yu baka gi Mi,

drai kon baka! Na so MASRA taki.

Mi no sa luku yu nanga atibron,

bika Mi abi sari-ati,

na so MASRA taki.

Mi ati no sa bron fu têgo.

13Wan sani nomo yu mus du.

Yu mus ferstan taki yu no du bun,

dati yu ben gwe fu MASRA,

a Gado fu yu,

dati yu ben gwe na baka tra gado

na ondro ibri bon nanga furu wiwiri,

èn dati yu no ben arki san Mi ben taki.

Na so MASRA taki.

14Un drai kon baka, pikin di drai den baka gi Mi, na so MASRA taki, bika unu na fu Mi. Mi o teki unu, wán fu ibri foto nanga tu fu ibri famiri, dan Mi o tyari un kon baka na Sion. 15Mi o gi un tiriman di Misrefi teki, fu luku unu. Den o tiri unu nanga sabi èn nanga ferstan. 16Dan te un kon moro furu a ten dati, te libisma o furu a kondre baka, na so MASRA taki, a no o de fanowdu moro fu sma taki fu a santa kisi fu a ferbontu fu MASRA. No wan sma o prakseri en moro, no wan sma o taki fu en moro, no wan sma o suku fu en moro, èn no wan nyun wan o meki moro. 17A ten dati sma o kari Yerusalem: A Kownusturu fu MASRA. Dan ala folku sa hari kon drape ini Yerusalem fu gi Mi, MASRA, grani. Èn den o tapu fu du san a takru ati fu den ben e gi den nomonomo fu den du. 18Ini a ten dati tu den sma fu Yuda sa go moksi nanga den sma fu Israel, èn makandra den o kmopo fu a kondre na noordsei kon na a kondre di Mi ben gi den afo fu den taki na fu densrefi.

19Israel, Mi ben prakseri taki:

Mi o gi yu wan hei presi na mindri den tra folku,

Mi o gi yu wan bun èn switi kondre,

wan kondre di moi moro ala trawan na grontapu,

wan kondre di o de fu yusrefi.

Dan Mi prakseri taki yu o kari Mi: ‘Mi P'pa’,

èn dati yu no ben o gwe libi Mi.

20Ma, sma fu Israel,

leki fa wan uma e bedrigi en masra,

na so yu bedrigi Mi.

Na so MASRA taki.

21Wan babari de fu yere tapu den pikin bergi pe sani no e gro:

na a pipel fu Israel e krei èn begi gi sari-ati.

Den libi wan sondu libi fu di den fergiti MASRA,

a Gado fu den.

22Un drai kon baka,

pikin di drai den baka gi Mi.

Dan Mi sa dresi unu fu a wakawaka libi.

Dan un sa taki:

‘Luku, dyaso wi de,

wi e drai kon baka na Yu,

bika Yu na MASRA, a Gado fu wi.

23A tru, na kori wi ben kori wisrefi

na tapu den pikin bergi,

a babari di wi ben meki tapu den bergi

no du noti.

A tru, na MASRA, a Gado fu wi, a ferlusu fu Israel de.

24Iya, bun langa kba, Baal, a gado fu ala syen,

swari den sani fu wi afo

gi san den wroko so tranga:

den skapu, den kaw, den manpikin nanga den umapikin.

25Meki wi trowe wisrefi na gron, fu soso syen,

meki syen naki unu.

Bika wi nanga den afo fu wi sondu,

un no du san MASRA, a Gado fu wi wani,

sensi di wi yongu, te leki tide.

Wi no arki tu san MASRA, a Gado fu wi, ben taigi wi.’

4

41Ma Israel, efu yu sa tapu nanga a fasi dati fa yu e libi,

na so MASRA taki,

efu yu sa drai kon baka na Mi,

èn efu yu puru den groskin sani na Mi fesi

fu Mi no si den moro,

dan yu no abi fu lowe gi Mi.

2Dan un o man sweri baka taki:

‘Mi e sweri na a libilibi MASRA.’

Un o man du dati baka na tapu wan tru fasi,

wan leti fasi

èn nanga wan krin ati.

Dan ala folku na grontapu

sa winsi fu Mi blesi den leki fa Mi blesi unu.4:2 Un kan puru a pisi disi so tu: A blesi di Mi blesi yu sa de wan blesi gi ala sma na grontapu.

èn den o prisiri fu Mi ede.

3Bika na disi MASRA e taigi a pipel fu Yuda

nanga a di fu Yerusalem:

Un meki nyun gron klari fu kan prani,

un no sai mindri makamaka.

4Sma fu Yuda nanga fu Yerusalem,

un besnei soleki fa MASRA wani,

èn un gi un ati tu na En.

Noso, fu den ogri di un e du,

a hebi atibron fu En o kon na un tapu

leki wan faya,

wan faya di no wan sma o man kiri.

Feyanti fu noordsei e kon teki Yuda abra

5Un bari wroko ini Yuda!

Un meki a de fu yere ini Yerusalem!

Un komanderi taki:

‘Un bro a tutu ini a kondre!’

Un bari bun tranga taki: ‘Un kon na wan!

Un hari go ini den foto nanga den tranga hei skotu!

6Un gi a marki nanga a fraga san wani taki:

Un go na Sion!

Un lon go kibri, un no draidrai!’

Bika Mi e tyari bigi ogri kmopo na noordsei,

wan bigi pori e kon.

7Leki fa wan lew e dyompo kmopo ini grangran,

na so wan feyanti di e pori folku opo,

èn a hari kmopo fu en tanpresi kba.

A o meki a kondre fu unu tron wan broko pranasi.

A o broko den foto fu unu,

no wan sma o de moro na den ini.

8Dat' meki un kan bigin weri un lowkrosi,

èn un kan krei èn kragi fa un wani,

ma a faya atibron fu MASRA

no o kmoto na un tapu.

9A ten dati, na so MASRA taki,

ala dek'ati sa gwe libi a kownu

nanga den man di e yepi en tiri a kondre.

Den priester dati no o sabi san fu du,

èn den profeiti sa tnapu nanga opo mofo.”

10Ne mi taki: “Tye, Masra MASRA,

a tru, Yu kori a pipel disi nanga Yerusalem sote

di Yu taigi den taki:

Un o abi freide.

Bika a deigri de na wi gorogoro kba.”

11“A ten dati Mi o taigi den sma fu a folku disi,

nanga den di fu Yerusalem taki:

Wan bun faya winti o kmopo

fu den pikin bergi ini a dreisabana,

go na a lobi pipel fu Mi,

èn a no o go fu wai buba noso doti puru na a karu.

12Mi e seni wan bun tranga winti kon,

now na Misrefi o leisi strafu gi den.

13Yere, a feyanti e kon leki dungru wolku.

Den fetiwagi fu den gaw leki tranga winti,

den asi fu den gaw moro aka.

‘A kba gi wi! Den o puru wi na pasi!’

14Pipel fu Yerusalem,

un krin un ati puru a ogri,

dan Mi o ferlusu unu.

Olanga un o tan prakseri soso ogri?

15Bika un yere,

wan boskopuman fu Dan

e kon nanga takru boskopu,

a no bun boskopu e kmopo

fu a bergikondre fu Efraim.

16Piki den folku,

taigi Yerusalem taki:

Den di e kon fu teki a foto abra

e kon fu wan farawe kondre,

nanga feti babari den e lon go na den foto fu Yuda.

17Den lontu Yerusalem fu alasei,

leki fa waktiman e lontu pranigron

te nyanyan e koti,

bika den no wani arki Mi,

na so MASRA taki.

18Na a fasi fa un tyari unsrefi

meki den sani disi psa nanga unu,

na den eigi ogri fu unu

e meki a bita so gi unu,

te ini un ati un e firi en.”

19Tye, mi ati! Mi ati!

Pen e nyan mi sote!

Mi ati no man tyari en moro.

Mi no man hori mi mofo,

te ini mi sili mi e yere a babari fu a tutu,

a babari fu feti.

20A wan bigi ogri baka a trawan,

iya, a heri kondre e broko.

Wantron so den tenti fu mi pori,

ini wan pingi fu wan ai

den duku fu den tenti fu mi priti.

21Olanga mi mus si a fraga ete?

Olanga mi mus yere a babari fu a tutu ete?

22MASRA taki:

“A pipel fu Mi don,

den no abi no wan sabi fu Mi.

Na pikin di no abi ferstan,

den no srapu srefsrefi.

Den koni fu du ogri,

ma den no sabi fu du bun.”

23Mi luku grontapu, èn yere,

grontapu ben bruya èn leigi.

Mi luku heimel tu,

èn mi si dati faya no ben de na en moro.

24Mi luku den bergi, den ben e beifi,

ala den pikin bergi ben e seki.

25Mi luku moro fara,

mi no si no wan libisma,

ala den fowru di e frei na loktu srefi

ben frei gwe.

26Mi luku go doro,

den presi pe furu sani ben prani

ben tron dreisabana.

Ala den foto ben tron bigi ipi broko ston.

na MASRA ben meki den sani dati psa,

bika En ati ben bron fu tru.

27Bika na disi MASRA e taki:

Mi o meki a heri kondre tron wan broko pranasi,

ma Mi no o libi en so fu têgo.

28Na fu dat'ede grontapu e sari,

èn heimel na loktu e low.

Bika Mi taki dati Mi o du en,

èn Mi o du en tu,

Mi no o sari,

èn Mi no o teki baka san Mi taki.

29A heri foto e lon te den yere a babari,

a babari fu srudati di e rei asi,

nanga a babari fu srudati

di e sutu nanga bo.

Den sma e lon go ini busi,

den e kren go kibri baka bergiston.

Ala den foto kon leigi,

no wan sma e libi moro na den ini.

30We dan, san yu o du now Yerusalem,

now di bigi ogri de fu miti yu?

Awinsi yu weri diri redi krosi,

awinsi yu weri ala yu gowtu sani,

awinsi yu moi yu ai,

na fu soso yu o prodo.

Bika den man nanga san yu ben meki lobi,

den no wani yu moro.

Na kiri den wani kiri yu now.

31Mi e yere wan babari

leki di fu wan uma di e meki wan pikin,

wan babari fu hebi pen,

leki fu di fu wan uma di o meki en fosi pikin.

Na a babari fu Sion.

En blo de na tapu èn a e opo den anu go na heimel.

A e taki: “A kba gi mi! Den kiriman e kiri mi!”