Sranan Tongo Bible 2016 (STB16)
29

A brifi di Yeremia skrifi gi den Dyusma ini Babel

291Disi na a brifi di profeiti Yeremia seni fu Yerusalem go gi den edeman di ben de na libi ete na mindri den sma di kownu Nebukadnesar ben tyari go nanga tranga na en kondre, gi den priester, gi den profeiti nanga gi ala tra sma di a kownu ben tyari go na Babel. 2Yeremia skrifi a brifi baka di den ben tyari kownu Yekonya nanga en m'ma, den spesrutu wrokoman fu a kownu-oso, den tra man di ben e yepi tiri Yerusalem nanga Yuda, den smeti nanga den temreman, gwe nanga tranga kba na Babel. 3A ben meki Elasa, a manpikin fu Safan, nanga Gemarya, a manpikin fu Hilkia, tyari a brifi gwe. Den ben tyari en di kownu Sedekia fu Yuda ben seni den go na kownu Nebukadnesar fu Babel.

4Na disi ben skrifi ini a brifi: “Na disi MASRA fu ala sani, a Gado fu Israel, e taigi un alamala di den sma fu Babel tyari kon nanga tranga na den kondre: 5Un bow oso èn un libi na den ini. Un prani sani pe un e libi èn un nyan fu den. 6Un teki uma èn un meki manpikin nanga umapikin. Un teki uma gi den manpikin fu unu èn un meki den umapikin fu un trow fu den meki manpikin nanga umapikin gi unu. Un mus kon moro furu, un no mus kon moro pikinso. 7Un begi MASRA gi a foto pe Mi meki den tyari un go nanga tranga, èn un meki muiti fu sani kan go bun ini a foto, bika efu sani e go bun drape a o go bun nanga unu tu.

8Na disi MASRA fu ala sani, a Gado fu Israel, taki: Un no meki den profeiti nanga den lukuman di de na un mindri kori unu. Un no bribi den man tu di e kisi dren gi unu. Den e dren nomo san unu e angri dati musu psa. 9Te den taki tak' na Mi gi den sani fu taki, na lei den e lei, bika a no Mi seni den, na so MASRA taki.

10Bika na disi MASRA e taki: Seibitenti yari sa psa na ini Babel. Dan fosi Mi o du san Mi pramisi unu fu tyari un kon baka na Yerusalem. 11Mi sabi sortu prakseri Mi abi nanga unu, na so MASRA taki, prakseri fu sani kan go bun nanga unu, no fu ogri miti unu. Ini a ten di de na un fesi Mi o gi un a bun libi tapu san un e howpu. 12Dan te un sa kon na Mi ini begi èn aksi Mi fu yepi unu, Mi sa du san un e aksi. 13Te un sa suku Mi nanga un heri ati, un o feni Mi. 14Mi sa meki un feni Mi, na so MASRA taki, èn Mi sa tyari wan kenki kon gi unu. Mi o puru unu na mindri fu ala den folku nanga den presi pe Mi ben yagi un go, èn Mi o tyari un kon na wan, na so MASRA taki. Dan Mi o tyari un go baka na Yerusalem, na a presi fu pe den ben tyari un gwe nanga tranga.

15MASRA e taigi un ala den sani disi fu di un e taki dati A gi un profeiti tu ini Babilonia. 16Na disi MASRA e taki fu a bakapikin fu David di de kownu, nanga fu a heri folku di e libi ini a foto disi, dati na den kondreman fu unu di a feyanti no tyari gwe nanga tranga. 17Na disi MASRA fu ala sani e taki: Yere, Mi e seni bigi feti go na den tapu, angriten nanga takrusiki di o panya na den mindri. Mi o meki den kon tan leki den pori figa di sma no man nyan. 18Mi o meki den de ini bigi feti nomonomo, ini angriten èn takrusiki o panya nomo na un mindri. Ala kondre fu den kownu fu grontapu o frede te den si san Mi du nanga den, sma o fluku den èn sma o skreki te den si san miti den. Ala folku pe Mi o yagi den go o teki den meki spotu èn gi den syen. 19Bika den no arki san Mi ben taki, na so MASRA taki, den no arki den knekti fu Mi, den profeiti, di Mi ben seni go dorodoro na den, na so MASRA taki. 20Ma unu alamala di Mi meki den tyari gwe nanga tranga fu Yerusalem go na Babel, un arki Mi! 21Na disi MASRA fu ala sani, a Gado fu Israel, e taki fu Akab, a manpikin fu Kolaya, nanga fu Sedekia, a manpikin fu Maaseya, den tu man di e taki sani ini Mi nen, di Mi no gi den fu taki: Un arki, Mi e gi den abra ini a makti fu kownu Nebukadnesar fu Babel di o kiri den leti na un fesi. 22Dan te iniwan fu den sma fu Yuda di den tyari gwe nanga tranga go na Babel wan fluku, den o taki: ‘Meki MASRA du nanga yu leki fa A du nanga Sedekia nanga Akab di a kownu fu Babel losi na tapu faya.’ 23Bika den du wan sani di na wan bigi syen ini Israel: Den sribi nanga a uma fu wan tra man èn den taigi un sani ini Mi nen, di Mi no gi den fu taki. Na lei den lei, Mi no ben komanderi den noti. Iya, Mi sabi san den du, Mi de ketoigi fu san den du, na so MASRA taki.”

24Baka dati MASRA komanderi Yeremia fu taigi Semaya fu Neklam, taki: 25“Na disi MASRA fu ala sani, a Gado fu Israel, taki: Fu yusrefi yu ben teki a besroiti fu seni brifi gi priester Sefanya, a manpikin fu Maaseya, gi ala den priester nanga gi den sma fu Yerusalem. Yu skrifi ini den brifi taki: 26‘MASRA poti yu leki priester ini a presi fu priester Yoyada, fu luku taki sani e go leki fa den mus go ini a oso fu MASRA, èn fu grabu ibri lawman di e taki dati en na wan profeiti, èn fasi en ede, anu nanga futu na ini udu èn nanga wan isri keti na en neki.’ 27Ma fu sanede yu no du noti nanga Yeremia fu Anatot di e meki leki en na wan profeiti? 28A seni wan brifi gi unu drape ini Babel pe a skrifi dati un o tan langa dyaso ete, dati un mus bow oso fu libi na den ini èn dati un mus prani fu kan nyan fu san un prani.” 29Di priester Sefanya leisi a brifi gi Yeremia, 30MASRA taigi Yeremia taki: 31“Seni wan brifi go na ala den sma ini Babel di den tyari go drape nanga tranga. Skrifi ini a brifi taki: Na disi MASRA e taki fu Semaya fu Neklam. A taigi un sani, ma a no Mi seni en fu taki den. A meki un howpu tapu sani di no o psa. 32Dat' meki na disi MASRA e taki: Mi o strafu Semaya fu Neklam nanga ala den pikin nanga bakapikin fu en. No wan fu den o tan na libi fu si fa Mi o meki sani waka bun gi a pipel fu Mi, MASRA e taki. Bika den sani di a preiki meki a folku kaka en futu gi Mi.”

30

Masra e pramisi taki a pipel o drai kon baka

301MASRA taki nanga Yeremia, A taigi Yeremia taki:

2“Na disi MASRA, a Gado fu Israel, e taki: Skrifi ala den sani di Mi taigi yu poti ini wan buku. 3Bika yere, den dei e kon, na so MASRA taki, dati Mi o tyari wan kenki kon gi Mi pipel Israel nanga gi Yuda. Mi o tyari den go baka na a kondre di Mi ben gi den afo fu den, èn den o teki en abra baka. Na disi MASRA e taki.”

4Disi na san MASRA taki fu Israel nanga Yuda:

5“Na disi MASRA e taki:

Mi e yere fa sma e bari fu frede,

na a babari fu te sma skreki,

no a babari fu te sani e go bun.

6Mansma no e meki pikin.

Ma Mi e si dati ala mansma e hori den bere,

leki te uma e kisi pikin.

Mi e si dati den fesi fu den srefi weti leki dede.

7Den de fu sari! Bika a o de wan dei pe bun bigi ogri o psa.

No wan tra dei o de fu marki nanga a dei dati.

A o de wan dei fu bigi benawtu gi den bakapikin fu Yakob,

ma den o kmopo na ini.

8A dei dati Mi o broko a udu di den weri na a neki fu unu.

Mi o hari den banti koti, MASRA fu ala sani e taki.

Noiti moro dorosei folku o teki den leki knekti,

9ma den o dini MASRA, a Gado fu den,

nanga David, a kownu di Mi o poti fu tiri den.

10Bakapikin fu Mi knekti Yakob,

un no abi fu frede,

Israel, no skreki,

Na so MASRA taki.

Bika un yere, Mi o ferlusu un puru ini den farawe kondre,

Mi o puru den pikin nanga den bakapikin fu unu,

fu den kondre pe den ben tyari un go nanga tranga.

Den bakapikin fu Yakob o drai kon baka èn den o libi ini freide,

sondro broko-ede, sondro dati feyanti o skreki den.

11Mi de nanga unu fu ferlusu unu,

Na so MASRA taki.

Mi o wai ala den kondre puru na pasi pe Mi ben panya un go,

Unu o kisi a strafu di un fiti fu kisi,

ma Mi no o puru un na pasi.

12Na disi MASRA e taki:

A mankeri di Mi gi yu no o betre,

a soro no o dresi.

13No wan sma de di e luku fu yu.

Dresi de gi soro,

ma den di fu yu no e tapu moro.

14Ala den kondre tapu san yu ben e bow fergiti yu,

den no o luku fu yu srefsrefi.

Na Mi ben naki yu, leki fa wan feyanti e naki.

Mi strafu yu sondro fu ben sari yu pikinso srefi,

na a bakapisi fu den furu kruktudu nanga sondu fu yu.

15Fu sanede yu e bari fu a mankeri di yu kisi,

fu a pen di yu no man tyari?

Mi du dati nanga yu fu di den kruktudu nanga den sondu fu yu furu.

16Ma ala den folku di ben kiri yu, den feyanti fu den o kiri baka,

ala den feyanti fu yu sma o tyari gwe nanga tranga tu.

Sma o fufuru den sani baka fu den folku

di ben kon fufuru den sani fu yu.

Feyanti o tyari den sani gwe tu

fu den sma di ben tyari den sani fu yu gwe.

17Sabi dati Mi sa dresi yu,

Mi sa dresi den soro fu yu,

na so MASRA taki.

Awinsi den feyanti fu yu e kari yu:

‘Sion, a wan di libisma yagi puru na den mindri,

a wan di no wan sma e luku.’

18Na disi MASRA e taki:

Un yere, Mi e tyari wan kenki kon gi den bakapikin fu Yakob,

Mi o luku fu ibriwan fu den famiri fu den baka.

A foto di ben broko fadon o tnapu tapu en presi baka,

a kownu-oso o meki baka tu, so moi leki a ben de.

19Dan den sma o dansi kmopo ini den oso,

den o du dati nanga singi ini den mofo.

Mi o meki a pipel disi kon moro bigi,

a no o kon moro pikin.

Mi e gi en grani,

sma no o si en moro leki noti.

20A pipel o kon baka leki fa den ben de fosi,

Den sa tnapu fu têgo baka na Mi fesi

fu di Mi e kibri den

Mi sa strafu ala sma di e pina den.

21A sa de wan fu den di o tron tiriman,

wan edeman o opo na den mindri.

Mi o gi en pasi fu kon krosbei fu Mi.

Suma o prefuru fu du dati fu en srefi?

Na so MASRA taki.

22Unu o de a pipel fu Mi,

Mi o de a Gado fu unu.

23Yere, MASRA e lusu wan tranga winti ini a hebi atibron fu En,

wan draiwinti A e lusu tapu den ogri-ati sma.

24A atibron fu MASRA no o tapu,

a no o tapu solanga A no du san A abi ini prakseri.

Na te a ten dati doro fosi disi o krin gi unu.”

31

311“A ten dati, na so MASRA taki, Mi sa de Gado gi ala den lo fu Israel,

èn den sa de a pipel fu Mi.

2Na disi MASRA e taki:

Israel, a folku di no dede na ini feti.

Mi sori en Mi bun-ati na ini a bigi dreisabana,

di den ben e hari go na a presi pe den bo rostu.

3Fu fara MASRA sori Ensrefi na mi.

Iya, Mi lobi yu nanga wan têgo lobi,

na dat' meki Mi no tapu fu sori yu a lobi fu Mi.

4Mi o meki yu gro baka,

iya, Israel di Mi lobi, yu o gro baka.

Yu o teki a tamboerijn fu yu baka,

èn dansi fu prisiri.

5Yu o prani droifi baka na tapu den bergi fu Samaria,

èn na yu di prani den o nyan den froktu.

6Bika a dei e kon

taki den waktiman tapu den bergi ini a kontren fu Efraim,

o bari taki:

‘Un kon, meki un hari go na Sion,

na MASRA, a Gado fu unu!’

7Na disi MASRA e taki:

Un prisiri fu den bakapikin fu Yakob,

Un meki wan prisiri babari gi a basi fu ala folku.

un opo un sten èn singi taki:

‘MASRA ferlusu En pipel,

den wan di libi ete fu Israel.’

8Iya, Mi e puru den fu a kondre na noordsei,

Mi e tyari den kon na wan fu a kbapisi fu grontapu.

Breni sma nanga lan sma de na den mindri,

uma nanga bere, nanga uma di de fu kisi wan pikin.

Mi e meki den drai kon baka ini wan bigi grupu.

9Nanga watra-ai den o drai kon baka,

den kari Mi na ini begi,

èn Mi o tiri den.

Mi e tyari den go pe watra e lon bogobogo,

tiri den tapu moi grati pasi,

den no o misi futu.

Bika Mi de wan p'pa gi Israel,

iya, Efraim na Mi fosi manpikin.

10Folku, un arki den wortu fu MASRA,

èn un ferteri en te na den fara kondre tapu se:

En di ben panya a folku fu Israel,

na En o tyari den kon na wan baka èn tiri den,

neleki fa wan skapuman e luku en skapu.

11Bika MASRA e ferlusu den bakapikin fu Yakob,

A e ferlusu den puru ini a makti fu trawan di tranga moro den.

12Nanga prisiri den o kon na Sionbergi,

den fesi o brenki fu den bun di MASRA o gi den:

karu, win, oleif-oli, skapu nanga kaw.

Den o de leki wan moi dyari di e kisi nofo watra,

noiti moro den o mankeri wan sani.

13Dan yongu umapikin o dansi fu prisiri,

pikin boi nanga grani sma o dansi nanga den.

Mi e kenki a sari di den ben sari tron prisiri,

Mi e trowstu den, èn so den o fergiti a sari fu den.

14Den priester Mi e gi bogobogo fu den moro bun pisi fu den meti di tyari leki ofrandi,

a pipel fu Mi, Mi e gi bogobogo fu den bun sani fu Mi,

na so MASRA e taki.

15Na disi MASRA e taki:

Furu krei nanga dyeme de fu yere ini Rama.

Na Rachel e krei fu en pikin ede.

A no wani fu sma trowstu en,

bika den pikin no de moro.

16Ma na disi MASRA e taigi en:

No krei moro, drei den watra-ai fu yu.

A luku di yu ben luku den o tyari en froktu now,

na so MASRA taki.

Den drai kon baka fu a kondre fu a feyanti.

17Iya, howpu de gi yu ini a ten di de na wi fesi,

na so MASRA taki,

den pikin fu yu o drai kon na den eigi kondre baka.

18Mi e yere fa Efraim e krei taki:

‘Yu wipi mi,

Yu leri mi fu arki,

leki wan yongu bulu di ben mus leri arki ete.

Ma tyari mi kon baka na Yu, meki mi drai kon baka,

bika Yu MASRA, na mi Gado.

19Mi e sari, now di mi kisi misrefi,

Mi e naki misrefi, now di mi ai kon opo.

Mi e syen èn mi kisi syen tu

bika mi e tyari a bakapisi fu den sondu fu mi yongu yari.’

20Efraim na a manpikin di Mi lobi moro den trawan,

a wan nanga san Mi e prisiri.

Ala leisi te Mi e taki fu en a gersi a tnapu leti na Mi fesi.

A sani dati e meki Mi e firi bigi lobi gi en,

èn a no abi misi dati Mi o teki a sorgu fu en na Mi tapu,

MASRA e taki.

21Un poti wan ipi ston tnapu sei a pasi,

un poti marki na a pasi,

un mus feni a pasi baka di un ben waka di un ben gwe.

Drai kon baka Israel di Mi lobi,

drai kon baka na den foto fu yu.

22Olanga yu o draidrai ete,

pipel fu Mi di drai gwe fu Mi?

MASRA e meki wan nyun sani na grontapu:

a uma sa suku en masra.

23Na disi MASRA fu ala sani, a Gado fu Israel, e taki: Mi sa tyari wan kenki kon gi den. Dan a sani disi o de fu yere baka ini den foto fu Yuda, iya, ini a heri kondre taki: ‘Meki MASRA blesi yu, Yerusalem, presi pe sani e psa na tapu wan leti fasi, santa bergi!’ 24Ala den sma fu Yuda o libi makandra drape baka, den sma fu den foto, gronman nanga skapuman. 25Den di weri, den di kon swaki, Mi o gi krakti baka.”

26Dan mi wiki èn mi opo mi ai. A sribi ben du mi bun.

27“Un yere, den dei e kon, MASRA e taki, dati Mi e meki libisma nanga meti lai bogobogo ini Israel nanga ini Yuda. 28Leki fa Mi no ben draidrai di Mi ben rutu den puru, di Mi ben broko den, di Mi ben puru den na pasi, di Mi ben wai den puru na pasi, èn meki bigi ogri miti den, na so Mi no o draidrai tu fu bow den èn fu prani den baka, MASRA e taki. 29Den dei dati sma no o taki moro: ‘Te bigisma nyan froktu di no lepi, na den tifi den pikin e swa.’ 30Ma ibri sma o dede fu en eigi kruktudu. Te wan sma nyan froktu di no ben lepi na en eigi tifi o swa.

31Un yere, den dei e kon, MASRA e taki, dati Mi o meki wan nyun ferbontu nanga a pipel fu Israel èn nanga a di fu Yuda. 32A o de wan tra ferbontu leki a wan di Mi ben meki nanga den afo fu den, a ten di Mi ben teki den na den anu puru ini Egipte. Den ben broko a ferbontu dati aladi Mi ben a masra fu den, na so MASRA taki. 33Ma disi na a ferbontu di Mi o meki nanga den sma fu Israel ini a ten di de na un fesi, MASRA, e taki: Mi sa poti a wèt fu Mi na den inisei. Mi o skrifi en ini den ati. Dan Mi o de a Gado fu den èn den o de a pipel fu Mi. 34Dan no wan fu den o abi fu leri en kondreman moro taki: ‘Yu mus leri sabi MASRA.’ Bika den alamala, bigiwan nanga pikinwan, o sabi Mi, MASRA e taki. Èn Mi sa gi den pardon fu den kruktudu fu den, den sondu fu den Mi no o prakseri moro.

35Na disi MASRA e taki,

En di meki a son leki wan faya gi deiten,

a munkenki nanga den stari leki faya gi neti,

En di e meki a se rigeri sote dati den skwala e meki babari,

En di nen na MASRA fu ala sani:

36Na soso te den sani disi no de moro,

MASRA e taki,

dan fosi Israel no o de moro tu,

dan fosi den no o de a pipel fu Mi moro.

37Na disi MASRA e taki:

Leki fa no wan sma man marki o hei heimel de,

no wan sma man luku o dipi den fundamenti fu grontapu de,

na so Mi no o poti a pipel fu Israel na wan sei

fu ala den sani di den du,

MASRA e taki.

38Un yere, den dei e kon, na so MASRA taki, dati a foto o meki baka gi MASRA. A o meki fu a Hananeltoren, go te na a Ukupoort. 39Fu drape den o hari wan pisi poti moro na en, go te na a pikin bergi Gareb, dan a o beni go na Goa. 40A heri dal pe den e beri den dede èn pe den e fringi doti, ala den wei sei a Kidronkriki go te na a uku fu a Asipoort na oostsei. A heri kontren dati den sa poti aparti gi MASRA. Noiti moro sma sa kon broko Yerusalem baka.”