Sranan Tongo Bible 2016 (STB16)
46

Masra o strafu den tra folku

461Disi na san MASRA taigi Yeremia fu den tra folku.

2Fu Egipte. Ini a di fu fo yari, di Yoyakim, a manpikin fu Yosia, ben de kownu fu Yuda, kownu Nebukadnesar fu Babel wini a legre fu Farao Neko, a kownu fu Egipte. Dati psa ini a foto Karkemis na a Eufratliba.

3Masra taki:

“Mi e yere fa den ofisiri fu Egipte e bari taigi den srudati taki:

‘Un teki den schild! Un hari go feti!

4Un di e tyari den fetiwagi,

un tai den asi na den wagi,

un dyompo sidon na den ini!

Un di e waka,

un poti un fet'ati tapu un ede,

un srapu un lansri,

un weri un fetikrosi!’

5Ma san Mi e si e psa?

Frede meki den e hari go nanga baka.

A feyanti e fon den dyadya fetiman fu den.

Den e lon sondro fu luku go nanga baka.

Alasei na soso bruya, na MASRA taki.

6Den moro esi srudati srefi no man lon gwe,

den dyadya fetiman srefi no man lowe.

Na noordsei, drape na Eufratliba, den misi futu èn den fadon.

7Suma e pusu kon drape leki a Nijl-liba?

Suma e rigeri so leki a watra fu a liba dati?

8Na Egipte e pusu e kon so leki a Nijl-liba,

e rigeri so leki a watra fu a liba.

A e taki: ‘Mi e lolo kon leki bigi skwala,

mi o sungu grontapu,

mi o puru foto nanga libisma na pasi.

9Asi, un hari gwe!

Fetiwagi, un go drape es'esi!

Un seni den dyadya fetiman go,

den wan fu Nubia nanga Libia di sabi feti bun nanga schild,

den di fu Lud di sabi sutu bun nanga bo.’

10Ma a dei dati na fu MASRA fu ala sani,

na a dei fu pai den feyanti fu en baka.

A deigri fu En e nyan den,

a deigri e dringi a brudu fu den te a sari en, te leki a drungu.

Bika Masra, MASRA fu ala sani,

e srakti den ini a kondre noordsei na a Eufratliba.

11Sma fu Egipte,

un hari go suku dresi na Gilead.

Na fu soso yu e teki someni dresi

bika yu no o kon betre.

12Ala den tra kondre yere fu a syen di yu kisi,

heri grontapu e yere fa yu e bari.

A wan dyadya fetiman e fadon abra a trawan,

a kba gi den alamala.”

13Disi na san MASRA taigi Yeremia di Nebukadnesar, a kownu fu Babel, ben hari go feti na Egipte:

14“Panya a boskopu ini Egipte!

Bari wroko ini den foto fu en,

ini Migdol, Nof nanga Takpankes.

Taigi den srudati taki:

‘Un hari go tnapu na un presi,

un go tnapu klar'klari,

bika a feti e feti alasei kba.’

15Fu sanede den dyadya fetiman fu yu gwe nanga baka?

Fa a du kon taki den no ben man hori feti?

Na fu di MASRA naki den trowe.

16A meki den misi futu, den fadon abra makandra.

Den bari: ‘Opo! Meki un hari gwe baka na un eigi folku,

na a kondre pe un gebore,

noso a feyanti o kiri unu.’

17Un mus kari Farao, a kownu fu Egipte:

a wan di e meki babari nomo,

a wan di misi a okasi fu en.

18MASRA fu ala sani, na En na Kownu.

A e taki: Soleki fa a tru taki Mi e libi,

soleki fa a Taborbergi hei moro den tra bergi,

soleki fa a Karmelbergi tnapu ini a se,

na so a tru taki wan tranga feyanti e kon.

19Sma fu Egipte,

un meki unsrefi klari fu a feyanti tyari un gwe nanga tranga.

Bika Nof e tron wan broko pranasi,

a o broko pis'pisi te na gron

sma no o man libi drape moro.

20Egipte, wan moi yongu kaw yu de.

Ma kawfrei e frei kon na en tapu fu noordsei.

21Den steifisteifi srudati di Egipte yuru,

den gersi yongu kaw di kweki aparti fu srakti.

Ma densrefi no man kaka futu,

den e drai gwe libi a feti, den lon gwe.

Bika a dei fu den ongoloku doro,

a dei pe den o kisi strafu.

22Leki wan sneki Egipte e meki te a e lowe gwe.

Bika den feyanti furu.

Nanga beiri den e kon na en tapu,

leki fa den e fala bon.

23Na so den kapu en trowe,

na so MASRA taki.

A feyanti furu, den no de fu teri,

leki waswasi den kon na en tapu.

24Bigi syen teki Egipte,

den fadon ini anu fu a folku fu noordsei.

25MASRA fu ala sani, a Gado fu Israel, e taki disi: Mi o strafu Amon, a gado fu Thebe. Mi o strafu heri Egipte tu, Farao, den gado fu en nanga den kownu fu en. Iya, Mi e strafu Farao nanga ala den sma di poti den fertrow na en tapu. 26Mi e gi den abra ini anu fu den di wani kiri den, ini anu fu kownu Nebukadnesar fu Babel nanga a legre fu en. Ma baka wan pisten sma sa libi baka na ini Egipte leki fa a ben de bifo, na so MASRA taki.

27Bakapikin fu Yakob,

un no abi fu frede,

Israel, no skreki.

Bika un yere, Mi o ferlusu un puru ini den farawe kondre,

Mi o puru den pikin nanga den bakapikin fu unu,

fu den kondre pe den ben tyari un go nanga tranga.

Den bakapikin fu Yakob o drai kon baka èn den o libi ini freide,

sondro broko-ede, sondro dati feyanti o skreki den.

28Un no frede, bakapikin fu Yakob,

na so MASRA taki,

bika Mi de nanga unu.

Mi o wai ala den folku puru na pasi pe Mi ben panya un go.

Unu o kisi a strafu di un fiti fu kisi,

ma Mi no o puru un na pasi.”

47

Fu Filistea

471Disi na san MASRA taigi Yeremia fu den sma fu Filistea, fosi Farao ben teki a foto Gasa abra:

2“Na disi MASRA e taki:

Luku! Watra e pusu kon fu noordsei,

a e tron wan frudu di e sungu ala sani.

A e tapu a kondre nanga ala san e libi drape,

den foto nanga ala sma di e libi na den ini.

Ala den libisma e bari e suku yepi,

den e krei sote.

3Den e yere fa tranga asi e lon kon,

den e yere a babari fu fetiwagi.

P'pa nanga m'ma no e luku den pikin fu den moro,

4frede meki den no man beweigi.

A dei doro pe Gado o puru ala den Filistijnsma na pasi,

fu wai ala den mati di ben e yepi Tyrus nanga Sidon ete puru na pasi.

MASRA e puru den Filistijnsma na pasi,

a folku di ben kmoto na Kreta.

5A pipel fu a foto Gasa piri den ede leki wan marki fu dipi sari.

Wan kba kon na a pipel fu a foto Askelon.

Olanga den wan di de na libi ete o tan kot'koti den skin

leki marki taki den e low?

6Den e dyeme èn den e soktu taki:

‘Deigri fu MASRA, tye,

olanga a o teki fu yu bro?

Hari go baka ini yu kokro,

ori yusrefi, de tiri fu yu.’

7Ma fa yu o man de tiri?

MASRA komanderi yu fu go feti na Askelon,

nanga na a folku di e libi na a syoro fu a se.”

48

Fu Moab

481Na disi MASRA fu ala sani, a Gado fu Israel, e taki fu Moab:

“A kba gi a foto Nebo, a o tron wan broko pranasi.

Feyanti o teki a foto Kiryataim abra tu,

den kisi syen.

A presi fu unu srefi di tranga fu teki abra

kon na syen,

den sma di drape o lasi ati.

2A kba nanga a bigi nen di Moab ben abi.

Ini Hesbon a feyanti e sidon prakseri fu du Moab ogri.

Den e taki: ‘Un kon, meki un puru a folku dati na pasi.

Pipel fu a foto Madmen, unsrefi wi o puru na pasi,

na ini bigi feti o puru un na pasi.’

3Arki! Wan babari de fu yere ini a foto Horonaim:

‘Bigi ogri, bigi pori e kon na wi tapu.’

4Moab broko,

den pikin fu en e krei trangatranga.

5Den sma e krei tapu a pasi di e kren go na Lukit.

Srefi tapu a pasi di e saka kmopo fu Horonaim sma e krei den nowtu.

6Sma fu Moab, un lowe! Un lon gi un libi!

Un luku wan fasi fu tan na libi,

leki a grangran ini a dreisabana.

7Na fu di un fertrow na tapu san unsrefi kan du,

nanga tapu a gudu fu unu,

meki feyanti o teki a kondre abra.

Den o tyari Kemos, a gado fu un, nanga tranga gwe,

sosrefi den priester nanga den tra tiriman fu a kondre.

8A feyanti di e pori ala sani o go na ibri foto,

no wan foto o kmopo ini en anu.

Den o pori ala sani na ini a Yordandal,

broko ala sani na tapu den opo wei.

leki fa MASRA ben taki na fesi.

9Gi Moab frei,

bika nanga frei a mus lowe gwe.

Den foto fu en o tron broko pranasi,

presi pe sma no e libi.

10Wan fluku mus de tapu a sma

di no e du a wroko fu MASRA nanga en heri ati.

Wan fluku mus de tapu a sma

di no wan kiri sma nanga en deigri.

11Masra e taki disi:

Sensi di Moab de a ben de tiri fu en.

leki win di den poti na wan sei fu lepi.

Noiti sma no kanti en fu a wan bari go ini a trawan,

noiti feyanti tyari a pipel fu en nanga tranga go na den kondre.

Na dat' meki a tesi fu en tan bun,

na dat' meki a smeri fu en no kenki.

12Ma yere, den dei e kon, na so MASRA taki,

dati Mi o seni sma fu kanti a win abra,

fu leigi den bari, fu naki den kroiki broko.

13Dan a gado Kemos o meki den sma fu Moab fesi fadon,

leki fa a gado Betel ben meki den Israelitisma fesi fadon.

Na tapu en den ben poti den fertrow.

14Man fu Moab, fa un kan taki:

‘Un na dyadya srudati,

srudati di man feti bun.’

15Moab nanga ala den foto fu en tron broko pranasi.

Den srakti den moro bun yonkuman fu en,

na so MASRA fu ala sani, En di de Kownu, e taki.

16A broko di Moab o broko de krosbei,

a bigi ogri di o miti en e kon es'esi.

17Kondre di lontu Moab,

sosrefi un di sabi en bun,

un singi a lowsingi disi gi en:

‘Tye, a makti fu en broko,

a glori nanga a grani fu en no de moro.’

18Sma fu a foto Dibon,

un saka kmopo fu den moi sturu go sidon ini a doti.

Bika a feyanti di e broko Moab,

a o hari kon broko den tranga foto fu yu.

19Sma fu a foto Arower,

un go tnapu sei a pasi.

Dan un aksi den di ben kan lowe, taki:

‘San psa?’

20Den o piki taki:

‘Bigi syen naki Moab, feyanti teki en abra.

Un krei èn un bari.

un go panya a nyunsu ini a kontren fu Arnonliba,

dati Moab broko pis'pisi te na gron.’

21Masra leisi strafu gi den hei kontren:

gi Holon, gi Yahas nanga gi Mefaat,

22gi Dibon, Nebo nanga Bet-Diblataim,

23gi Kiryataim, Bet-Gamul nanga Bet-Meon,

24gi Keriot, Bosra nanga ala den foto ini Moab,

den foto di de krosbei nanga den wan di de farawe.

25A makti fu Moab broko, a lasi en krakti, na so MASRA e taki.

26Un drungu Moab, bika a ben naki tapu en borsu gi MASRA.

A sa lolo ini a morsu di ensrefi puru kon na doro,

fu sma teki en meki spot'popki.

27Na yu ben teki Israel meki spotu.

Noiti den grabu en leki wan fufuruman.

Ma yu ben e taki nomo fu en, èn yu ben e lafu en e seki yu ede.

28Sma fu Moab, un kmopo ini den foto,

un go kibri na ini den bergi-olo.

Un meki un tanpresi leki den doifi,

na a lantyi fu a dal.

29Un yere fu a heimemre fu Moab,

fa a e naki tapu en borsu,

fa a abi bigifasi,

fa a e denki so hei fu ensrefi,

fa a e prakseri dati a de wan sani.

30Mi sabi fa a no abi maniri,

na so MASRA taki,

Mi sabi den bigi taki fu en,

ma den sani di a e du no wani taki noti.

31Na dat' meki mi ai e lon watra gi Moab,

bari krei gi a heri kondre,

nanga gi den man fu Kir-Heres.

32Sibma, yu di de leki wan droifibon

Mi sa krei moro gi yu dan gi Yaser.

Den taki fu yu e doro te na a se.

Den ben doro srefi te na a se fu Yaser.

Ma a wan di e pori ala sani e pori den figa nanga den droifi fu yu.

33Prisiri no e prisiri moro

ini den dyari fu Moab pe sani e gro so bun.

Mi meki taki win no e kmopo moro

ini den baki pe sma e masi den droifi.

Sma no sa masi droifi moro nanga babari fu prisiri.

Babari de fu yere, ma a no de babari fu prisiri.

34Den sma fu Hesbon e bari so tranga taki a de fu yere te ini Elale,

te leki Yahas srefi.

Te ini Soar, Horonaim nanga Eglat-Selisia den sten de fu yere.

Bika den watra fu Nimrim srefi drei gwe.

35Na so Mi e tyari wan kba kon ini Moab,

na so MASRA taki,

na den di e kren den altari fu bron wierook gi a gado fu den.

36Dat' meki a ati fu Mi de leki wan froiti di e prei low singi.

A e prei en gi den sma fu Moab nanga gi den sma fu Kir-Heres.

Bika den lasi ala san den ben tyari kon na wan.

37Den piri ala ede,

ala barba koti puru,

ala anu kot'koti,

ala sma weri den lowkrosi.

38Tapu ala daki fu den oso fu Moab,

tapu ala den pren sma e sari e krei.

Bika Mi naki Moab broko leki wan prapi di sma no wani moro.

Na so MASRA taki.

39Moab broko pis'pisi,

syen meki a e drai en fesi.

A no man opo en ede moro,

a tron wan spot'popki nanga wan groskin sani,

gi ala kondre lontu en.

40Na disi MASRA e taki:

Yere, a feyanti sa saka leki wan aka kon tapu Moab,

èn a sa tapu en nanga den frei fu en.

41A sa teki den foto fu un abra,

owktu den presi fu un di tranga fu teki abra.

Den dei dati a ati fu den dyadya fetiman fu Moab,

a sa naki leki a ati fu wan uma di de fu meki wan pikin.

42Dan den o wai Moab puru na pasi,

a no o de wan folku moro.

Bika a ben naki tapu en borsu gi MASRA.

43Bun hebi frede, olo, nanga net,

na dati o miti den sma fu Moab,

na so MASRA taki.

44Den wan di lon fu di den e frede o fadon ini wan olo,

èn den di kren kmopo ini a olo o fasi ini a net.

Bika a momenti doro fu Mi strafu Moab,

Na so MASRA taki.

45Den e lowe go na Hesbon,

den no abi krakti moro.

Faya broko na ini Hesbon

a oso fu kownu Sikon e bron.

A foto di kownu Sikon ben tiri wan ten, de ini faya.

A bigi foto fu den trobiman teki faya,

a e bron te na den moro fara uku fu en.

46A kba gi yu Moab!

Wan kba e kon na a folku fu a gado Kemos.

A feyanti e tyari den mansma fu yu gwe nanga tranga,

den e teki den umasma leki srafu gi densrefi.

47Ma wan dei Mi o tyari wan kenki kon gi Moab.

Na so MASRA taki.”

Te so fara a strafu di Masra leisi gi Moab.