Sranan Tongo Bible 2016 (STB16)
5

51“Waka lontu ini den strati fu Yerusalem

èn teki yu ai luku bun.

Suku tapu den pren efu yu e si wan sma

di e du san bun,

wan sma di e libi leki fa Mi wani.

Efu yu feni en Mi e gi a heri foto pardon.

2Awinsi, te den e sweri, den e taki:

‘Mi e sweri na a libilibi MASRA,’

na lei den e lei.”

3“MASRA, Yu wani taki sma mus du bun.

Yu naki den, ma den no firi,

Yu misi fu kiri den,

ma den no teki leri fu a strafu dati.

Den kon moro trangayesi,

èn den no ben wani drai kon na Yu.

4Ma mi prakseri na misrefi taki:

Na fu di den no de noti,

na fu di den no abi furu sabi,

na fu di den no sabi fa MASRA wani

taki sma mus libi,

na fu di den no sabi den besroiti

fu a Gado fu den.

5Dat' meki mi o go na den edeman,

nanga den mi o taki.

Bika den sabi fa MASRA wani

taki sma mus libi,

den sabi den besroiti

fu a Gado fu den.

Ma den dati srefi puru densrefi

ondro a tiri fu Gado,

den no wani saka densrefi gi Gado tu.

6Na dat' meki lew fu a busi e kiri den,

krasimeti e priti den.

Na dat' meki tigri didon e luru na den foto fu den,

fu priti ibri sma di e kon na dorosei.

Bika den sondu fu den furu,

bun furu leisi den drai den baka gi Gado.”

7“Fu sanede Mi sa gi yu pardon?

Den pikin fu yu gwe libi Mi,

èn den e meki sweri ini a nen fu sani di no de gado.

Baka di Mi gi den moro leki san den abi fanowdu,

den waka gi Mi.

Den lobi de na den oso fu motyo.5:7 Un kan puru a pisi disi so tu: Den tyerfi den skin na a oso fu motyo.

8Den krasi sote,

leki man asi den de.

Ini wan fu den e dyeme fu lostu

gi a uma fu wan tra man.

9Mi sa strafu den nomonomo fu dati,

na so MASRA taki.

Mi mus fu puru atibron tapu sowan folku.

10Un hari go na den droifidyari tapu den bergi

èn pori san un man pori,

ma un no broko den alamala.

Un koti den taki puru, bika den a no fu MASRA.

11Den sma fu Israel nanga den sma fu Yuda

den bedrigi Mi sote,

na so MASRA taki.

12Den poti MASRA na wan sei, den taki:

‘A no o du den sani dati

No wan ogri o miti wi.

Wi no o dede na ini feti èn angriten no o miti wi.

13Den sani di den profeiti e taki,

na leki winti den e psa wi.

No wan fu den e taki wortu fu MASRA.

Meki den sani di den e taki psa nanga densrefi.’

14Dat' meki na disi MASRA, a Gado fu ala sani, taki:

Fu di den taki so,

Mi o meki den wortu fu a mofo fu yu tron faya,

èn a folku disi o de leki udu di a faya o bron.

Dan Mi e meki a faya dati bron den

te leki noti fu den de fu si.

15Sma fu Israel, arki:

Mi e tyari wan folku kmopo fu fara

fu kon feti nanga yu,

na so MASRA taki.

Na wan tranga folku,

wan folku di de bun langa kba.

Un no sabi a tongo fu den,

èn un no man ferstan den te den e taki.

16A kokro nanga den peiri fu den

e tyari soso dede kon.

Den alamala na soso dyadya fetiman.

17Den o swari ala den lepi sani

fu den pranigron fu unu

nanga ala un nyanyan.

Den o kiri den manpikin

nanga den umapikin fu unu,

den o srakti den skapu

nanga den kaw fu unu,

èn den o pori den droifidyari

nanga den figabon fu unu.

Den o broko den foto

nanga den tranga hei skotu fu unu tu,

den foto tapu san un ben e fertrow,

èn den o kiri ala den sma nanga den deigri.

18Ma te a de so fara, na so MASRA taki, Mi no o puru a heri pipel na pasi. 19Dan te den o aksi taki: ‘Fu sanede MASRA, a Gado fu wi, meki ala den sani dati psa nanga wi?’ Dan yu mus piki den taki: ‘Leki fa un gwe libi MASRA, fu dini tra gado ini a kondre fu unu, na so un o dini doroseisma ini wan kondre di no de fu unu.’ 

20Bari a boskopu disi gi den bakapikin fu Yakob,

meki a de fu yere ini Yuda:

21Don pipel di no abi ferstan,

pipel di abi ai ma di no e si,

di abi yesi ma di no e yere.

22Na lespeki un no e lespeki Mi?

Na beifi un no e beifi gi Mi?

Na so MASRA taki.

Na Mi poti a santi leki wan kbapisi

o fara a se kan go,

wan kbapisi di a no kan psa noiti.

Den skwala fu en kan bari fa den wani,

den no o man psa en.

Den kan rigeri èn puru skuma,

ma psa dati den no o man psa.

23Ma a pipel disi trangayesi

èn den no wani du san Mi taki.

Den drai gwe èn den teki den eigi pasi.

24Den no taki na ini den ati taki:

‘Meki wi lespeki MASRA, a Gado fu wi.

Na En e gi alen tapu a yoisti ten,

pikin alenten nanga bigi alenten.

Na En e meki wi kan go koti den sani

di wi prani tapu a yoisti ten tu.’

25Ma na den kruktudu fu unu

meki den sani disi no e psa moro,

na den sondu fu unu

e meki a bun tan fara fu unu.

26Bika ogri-ati sma de mindri a pipel fu Mi,

den e bukundu e luru,

leki sma di e fanga fowru.

Ma na titei den e span,

na libisma den e fanga.

27Leki fa wan koi e lai nanga fowru,

na so den oso fu den lai nanga fufuru sani.

Na a fasi dati den kon abi makti

èn na so den kon gudu.

28Den bigi èn den fatu.

Den ogri psa marki.

Den no e krutu sani na tapu wan leti fasi tu.

Den no e teri den leti fu pikin

di no abi p'pa nanga m'ma moro,

èn den no e feti gi den leti fu den mofinawan.

29Mi sa strafu den nomonomo fu dati,

na so MASRA taki,

Mi mus fu puru atibron tapu sowan folku.

30Na bun ogri sani e psa ini a kondre,

sani di e gi gro skin.

31Den profeiti e taki sani

di a no Mi gi den fu taki,

den priester dati e du san densrefi wani,

èn a pipel fu Mi lobi so.

Ma Mi o tyari wan kba kon na ala den sani dati!

Dan san unu o du dan?