Sranan Tongo Bible 2016 (STB16)
8

81A ten dati, na so MASRA taki, a feyanti sa puru den bonyo fu den kownu fu Yuda na ini den grebi, owktu di fu den man di ben e yepi tiri a kondre, di fu den priester, di fu den profeiti nanga di fu den sma fu Yerusalem. 2Dan den o bradi den gi a son, gi a mun nanga gi ala den stari na heimel. Na den sani dati den ben lobi èn na den den ben dini. Na den baka den ben waka, na den den ben suku rai èn na gi den den ben boigi. Sma no o tyari den bonyo kon na wan baka fu beri den. Den o tan didon tapu den pranigron leki mest. 3Èn den wan di o tan na libi fu a ogri-ati pipel disi, den di Mi o panya go na difrenti kondre, den o angri fu dede moro leki fu tan na libi, Na so MASRA fu ala sani, e taki.

Feyanti fu noordsei e kon teki Yuda abra

4Yeremia, taigi den tu taki:

Na disi MASRA e taki:

Te wan sma fadon a e opo baka.

Te a lasi pasi a e drai gwe baka.

5A pipel disi lasi pasi,

ma a no e drai kon baka na Mi.

A pipel fu Yerusalem e tan drai den baka gi Mi.

Den e hori na den sani nanga san den e kori densrefi,

den no wani drai kon baka na Mi.

6Mi arki bun san den e taki,

den no e taki a tru.

No wan fu den e sari fu a ogri di a du,

no wan fu den e taki:

‘Fa mi ben kan du so wan sani.’

Ini wan fu den e go doro nomo,

leki wan asi di e hari go ini wan feti.

7Srefi a ooievaar di e frei na loktu,

a stondoifi nanga a zwaluw sabi a ten,

a ten te den mus hari gwe èn te den mus drai kon baka.

Ma a pipel fu Mi no sabi den besroiti fu MASRA.

8Fa un kan prefuru fu taki:

‘Un na koni sma, un sabi a wèt fu MASRA.’

Fu tru, un yere, den man di skrifi en,

den kenki en poti fa den wani.

9Ma den koniman o kon na syen,

den no o sabi san fu du èn den o tyari densrefi go fasi.

Yere, den poti den sani na wan sei di Mi, MASRA, taki.

Sortu koni den abi dan?

10Dat' meki Mi gi den uma fu den na tra man,

den pranigron fu den na tra sma.

Bika pikinman nanga bigiman,

den alamala e luku den eigi saka.

Srefi den profeiti nanga den priester e bedrigi sma.

11Den no e si a mankeri di a lobi pipel fu Mi kisi leki wan bigi sani.

Den e taigi den taki:

‘Ala sani e go bun, ala sani e go bun.’

Ma noti de leki fa a mus de.

12Den mus syen fu den groskin sani di den du.

Ma den no e syen, no wan syen den abi.

Dat' meki densrefi o dede te den trawan o dede.

Te Mi o kon strafu den a o kba gi den tu,

MASRA e taki.

13Te Mi wan koti nyanyan, na so MASRA taki,

No wan droifi no de na den bon.

No wan figa no de na den bon,

srefi den wiwiri fu den drei gwe.

Den no e hori den na den sani fu Mi.”

14Dan a pipel aksi makandra taki:

“Fu sanede meki un e draidrai?

Un kon meki un hari gwe,

meki un hari go na den foto nanga den tranga hei skotu,

meki un go dede drape.

Bika MASRA, a Gado fu unu, wani meki dati psa nanga unu.

A gi un watra nanga dresi fu dringi di o kiri unu,

bika un sondu, un no du san MASRA wani.

15Un ben howpu dati sani ben o waka bun gi un baka,

ma noti no e go bun.

Un ben howpu dati A ben o dresi unu,

ma yere, bigi frede e naki wi.

16A feyanti de ini a kontren fu a lo fu Dan kba.

Un e yere fa den asi fu den e bro.

Te den asi e meki a babari fu den

a heri kondre e beifi.

A feyanti broko kon ini a kondre kba.

Den e puru ala sani nanga ala sma na pasi,

ibri foto nanga den di e libi na den ini.”

17“Un yere, Mi e seni takru sneki kon na un tapu,

èn no wan sma o man tapu den.

Den o beti un kiri,

Na so MASRA taki.”

A sari di Yeremia sari fu a pipel ede

18“No wan sma man trowstu mi fu a sari di mi e sari.

mi ati no man tyari en moro!

19Arki, a lobi pipel fu Mi,

den e bari suku yepi ini a heri kondre.

Den e bari taki: ‘Na de MASRA no de moro ini Sion?

Na de a no de kownu moro drape?’ ”

“Ma dan fu sanede den tanteri Mi nanga den popki fu den,

nanga tra gado di no man du noti?”

20“Un kba koti nyanyan ini den gron,

a ten fu koti nyanyan kon na wan kba,

ma unu no feni yepi ete.”

21“Fu di a lobi pipel fu mi kisi mankeri misrefi kisi mankeri

Mi e weri lowkrosi,

mi bruya sote.

22Dresi mus fu de ini a kontren fu Gilead,

èn den mus fu abi datra drape.

Dan fa den soro fu a lobi pipel fu Mi no e kon betre dan?

9

91Tye, efu mi ede ben kan de wan sula,

den ai fu mi wan peti fu watra-ai,

dei nanga neti mi ben o krei,

krei gi a lobi pipel fu Mi fu mi di lasi den libi.9:1 Son vertaling abi a pisi disi leki 8:23.

2Tye, efu mi ben sabi wan presi ini a bigi dreisabana,

wan presi fu psa a neti,

dan mi ben o kmopo na mindri a pipel fu mi,

mi ben o gwe libi den.”

“Bika den alamala na sma di e huru,

wan bigi grupu bedrigiman.

3Den tongo de leki wan bo,

soso lei e sutu kmoto ini den mofo.

Den e kisi moro nanga moro makti ini a kondre,

ma den e kon ogri moro nanga moro tu.

Fu Mi dati den no wani sabi not'noti,

Na so MASRA taki.

4Ibri wan fu unu mus de na ai gi a sma di e libi na en sei,

èn un no mus fertrow na tapu un brada srefi.

bika ibri brada na wan bedrigiman leki Yakob,

èn ibri mati e waka lontu e taki takru fu yu.

5A wan e kori a trawan èn den no e taki a tru.

Den gwenti den tongo fu lei nanga fu bedrigi.

Den no o tapu fu sondu.

6Den e tan pina sma nomo,

den e kori sma go nanga langa.

Den no wani sabi Mi leki den Gado,

Na so MASRA taki.

7Dat' meki, na disi MASRA fu ala sani e taki:

Yere, Mi o tesi den nanga bigi ogri,

leki fa den e tesi solfru nanga faya.

Bika Mi no kan du no wan tra sani moro nanga a lobi pipel fu Mi.

8A tongo fu den de leki peiri di e kiri,

a mofo fu den e puru soso bedrigi kon na doro.

Den e taigi a trawan taki den e winsi taki sani sa go bun nanga en,

ma ini den ati den e luru a trawan fu kiri en.

9Mi sa strafu den nomonomo fu dati,

Na so MASRA taki,

Mi mus fu puru atibron tapu sowan folku.”

10“Mi e opo wan sari singi gi den bergi,

mi e singi wan dede-oso singi gi den wei.

Bika ala den sani di ben gro drape dede gwe,

no wan sma no e psa drape moro,

srefi a babari fu meti no de fu yere moro.

Den fowru di e frei na loktu

nanga den meti di ben nyan grasi drape, lowe.”

11“Masra e taki:

Mi o broko Yerusalem pisipisi te na gron,

wan presi pe krasi meti o libi.

Mi o meki den foto fu Yuda o tron broko pranasi,

no wan sma o libi moro na den ini.

12Suma koni so tak' a e ferstan a sani dati?

Gi suma MASRA tyari en kon na krin dati a kan ferteri trawan?”

“Fa a kondre du broko èn drei gwe leki a bigi dreisabana? No wan sma no e hari psa moro na ini.” 13MASRA srefi e piki taki: “Na fu di den no hori den na a wèt di Mi gi den. Na fu di den no arki san Mi taigi den èn libi nanga dati. 14Ma den libi soleki fa a takru ati fu den gi den. Den go waka baka den Baal soleki fa den afo fu den leri den. 15Dat' meki, na disi MASRA fu ala sani, a Gado fu Israel, e taki: Yere, Mi o gi den wan bita sani fu den nyan, èn Mi o gi den watra nanga dresi fu dringi di kan kiri den. 16Mi e panya den go mindri folku di, no den, no den afo fu den, ben sabi. Mi e meki feyanti go na den baka fu feti nanga den te leki Mi wai den alamala puru na pasi.

A pipel mus meki ensrefi klari fu low

17Na disi MASRA fu ala sani e taki:

Un luku bun san e psa.

Un seni kari den umasma di e singi dede-oso singi fu den kon.

Un seni boskopu gi den uma di sabi san den mus du fu den kon.

18Meki den kon es'esi fu kon singi wan dede-oso singi gi unu,

fu watra lon kmopo fu un ai leki wan liba.

19Wan dede-oso singi de fu yere ini Sion.

‘Tye, ala sani fu un pori.

Syen naki un sote fu di un ben abi fu gwe libi un kondre,

ala den oso fu un den broko.’

20Uma, un arki den wortu fu MASRA,

un kaka un yesi fu yere san A e taki.

Un leri den umapikin fu un fu krei,

èn un leri den fu singi a dede-oso singi disi:

21‘Bika dede kren na den fensre kon ini un oso,

a kon ini den kownu-oso fu unu.

A e kiri den pikin fu unu na strati,

sosrefi den yonkuman tapu den pren.’

22Yeremia, taki! Na so MASRA taki:

Den dedeskin fu den sma o didon leki mest ini a wei,

leki groto di den koti libi ini bosu ini den pranigron,

ma di no wan sma go piki.

23Na disi MASRA e taki:

A koniman no mus meki bigi taki a koni,

a sma di tranga no mus meki bigi taki a tranga,

èn a guduman no mus meki bigi taki a gudu.

24Ma efu sma wani meki bigi,

dan a mus meki bigi taki a sabi Mi bun,

taki a sabi taki Mi na MASRA,

di no e kba fu sori lobi,

di e du sani nanga leti

èn di e meki sani psa tapu wan leti fasi na grontapu.

Bika na den sani dati e gi Mi prisiri,

na so MASRA taki.

25Un yere, den dei e kon, Na so MASRA taki, dati Mi o strafu ala den folku di besnei, ma den e libi leki sma di no besnei. 26Mi o strafu den sma fu Egipte, den sma fu Yuda, den sma fu Edom, den Amonitisma, den sma fu Moab, nanga den sma fu a bigi dreisabana di e piri den sei ede. Bika ala den folku dati de leki Israel. Den na sma di no sabi Mi.

10

Masra de a wan enkri Gado

101Sma fu Israel, arki san MASRA e taigi unu!

2Na disi MASRA e taki:

Un no du san den tra folku e du.

Un no skreki fu marki di de fu si na a heimel,

awinsi heri grontapu e skreki fu den.

3Den gwenti di den folku dati abi no e yepi den.

Den e kapu wan pisi udu ini a busi,

wan man di sabi tyerfi udu bun e wroko en nanga en beitel,

4dan a e moi a pisi udu dati nanga solfru nanga gowtu.

Baka dati den e spikri en fasi na wan presi fu a no fadon.

5Den de leki den sani di sma e poti ini pranigron fu skreki fowru.

Den no man taki,

èn na syow sma mus syow den,

bika den no man puru no wan futu.

Un no frede gi den,

bika den no man du no wan ogri,

ma bun den no man du tu.”

6“No wan sma de leki Yu, MASRA,

Yu bigi èn sma sabi a makti fu Yu.

Dat' meki den e gi Yu bigi nen.

7Kownu fu den folku,

suma no sa abi dipi lespeki Yu?

A fiti fu sma lespeki Yu.

Bika no wan fu den koniman fu den folku,

no wan fu den kownu fu den de leki Yu.

8Ini wan fu den don sote.

Fa den kan prakseri taki udu popki kan leri den wan sani?

9Na wan man di sabi tyerfi udu bun e meki den.

Wan gowtusmeti e poti solfru na den tapu,

solfru fu Tarsis di a naki plata,

nanga gowtu di kmoto na Ufas.

Dan sma e weri blaw nanga redi purper krosi gi den.

Na soso sma di sabi den wroko bun e meki den.

10Ma na MASRA na a tru Gado,

En na a libi Gado, a têgo Kownu.

Grontapu e beifi te En ati teki faya,

no wan folku man nanga a atibron fu En.”

11“Taigi den sma taki:

Den gado di no meki heimel nanga grontapu,

den no o de fu feni na grontapu baka wan pisten,

den o figi kmoto fu grontapu.”

12Na a tru Gado meki grontapu nanga En krakti,

nanga a koni fu En A poti en tnapu,

nanga a ferstan fu En A hari a heimel span.

13Te A e opo En sten a watra di de na loktu e rigeri.

A e meki wolku opo te na a kbapisi fu grontapu,

A e meki faya koti te alen e fadon,

èn A e meki a winti kmopo fu den maksin fu En.

14Libisma e tnapu nanga opo mofo,

den no man ferstan den sani dati.

Den gowtusmeti e syen fu den popki di den meki.

Den kon si taki na soso sani di no e bro.

15Den sani na soso sani,

den sani di den meki na fu teki meki spotu.

Te Gado o strafu den noti fu den no o tan.

16Ma a Gado fu Yakob no de leki den.

Na En meki ala sani,

èn a pipel fu Israel, na En abi den.

MASRA fu ala sani na En nen!

Feyanti o tai a pipel nanga keti tyari gwe

17“Yerusalem, foto di a feyanti lontu fu ala sei,

meki den sma fu yu tyari ala den sani fu den kon na wan.

18Bika na disi MASRA e taki:

‘Yere, a leisi disi Mi e fringi den gwe fu a kondre,

Mi o poti den sma fu a kondre disi na ini benawtu,

a feyanti o feni den grabu.’ ”

19Yerusalem e bari taki: “A kba gi mi! Mi kisi bigi mankeri.

A mankeri e hati sote.

Trutru, mi sa mus fu nyan a skin-ati disi.

20A tenti fu mi broko, ala den titei koti.

Den pikin fu mi no de moro nanga mi,

noiti moro mi o si den.

No wan sma de moro di o meki a tenti fu mi baka,

no wan sma di o hari den duku span.”

21“Den tiriman na don sma,

den no e suku rai na MASRA.

Na dat' meki den no abi ferstan,

èn na dat' meki ala den meti fu den panya.

22Un arki! Wan boskopu kon!

A babari fu wan legre de fu yere ini wan kondre na noordsei.

A e kon fu broko den foto fu Yuda,

fu meki a tron wan broko pranasi pe krasimeti e tan.”

23“Tye MASRA,

mi ferstan dati no wan libisma kan seti fa a libi fu en o waka.

A no man poti na fesi fa a libi fu en o go.

24Piri ai gi un MASRA,

ma du en na tapu wan leti fasi.

No du en nanga atibron,

noso na puru Yu o puru un na pasi.

25Ma lusu a hebi atibron fu Yu tapu den folku di no sabi Yu,

tapu den folku di no e anbegi Yu.

Bika den kiri den bakapikin fu Yakob,

noti fu den libi.

Den meki den pranigron fu un tron sabana.”