Sranan Tongo Bible 2016 (STB16)
9

Yesus dresi wan breniman

91Di Yesus ben e gwe moro fara, A si wan man di ben breni sensi a gebore. 2Dan den man di ben e teki leri fu En aksi En taki: “Meister, fu sanede a man disi gebore so? Na fu di a sondu, noso fu di en m'ma nanga en p'pa sondu?” 3Yesus piki den taki: “A no den sondu fu en, noso di fu en m'ma nanga en p'pa, meki a breni. Ma a sani disi psa fu sma kan si san Gado kan du gi en. 4Solanga dei krin ete, wi mus du den wroko fu a Wan di seni Mi kon. Bika neti yuru e kon, dan no wan sma no o man wroko. 5Solanga Mi de na grontapu, Mi na a faya fu grontapu.”

9:5
Mat 5:14
Yoh 8:12
6Baka di Yesus taki a sani disi, A spiti na gron, A meki tokotoko fu en, dan A lobi a tokotoko gi den ai fu a man. 7Dan A taigi en taki: “Go wasi yusrefi ini a watra fu Siloam.” Siloam wani taki: Seni. Dan a man go wasi ensrefi. Di a e drai kon baka, a ben e si.

8Den sma fu en birti, nanga trawan di ben sabi en leki wan begiman, aksi taki: “A no a man disi ben e sidon e begi moni?” 9Sonwan fu den taki: “Na en.” Trawan taki: “No, ma a gersi en.” Ne a man srefi taki: “Na mi.” 10Dan den aksi en taki: “Fa a du kon dan taki yu e si now?” 11A piki den taki: “A man di den e kari Yesus, meki tokotoko lobi gi mi ai, dan A taigi mi fu go wasi misrefi ini a watra fu Siloam. So mi go wasi misrefi, dan mi ben kan si.” 12Dan den sma aksi en taki: “Pe A de now?” A man piki taki: “Mi no sabi.”

13Dan den tyari a man di ben breni go na den Fariseiman. 14A ben de wan sabatdei dei di Yesus meki a tokotoko dresi a ai fu a man. 15Dan den Fariseiman srefi aksi a man fa a du kon taki a kan si. A man taigi den taki: “Yesus lobi tokotoko gi mi ai. Dan mi go wasi misrefi, èn now mi kan si.” 16Dan sonwan fu den Fariseiman taki: “A no Gado seni a man disi kon, bika A no e hori a sabatdei.” Ma trawan taki: “Fa wan sondusma kan du den marki disi?” A sani disi tyari prati kon na den mindri. 17Dan den aksi a breniman baka taki: “San yu e taki fu En? Na yu ai A dresi!” A man piki den taki: “En na wan profeiti.”

18Den fesiman fu den Dyusma no ben wani bribi taki a man ben breni, ma taki a e si now, te leki den seni kari en m'ma nanga en p'pa kon. 19Den aksi den taki: “A man disi na yu manpikin? A tru taki a ben breni di a gebore? Fa a du kon taki a e si now?” 20Den piki taki: “Wi sabi taki a man disi na wi manpikin èn tak' a ben breni sensi a gebore. 21Ma fa a du kon tak' a e si now, wi no sabi. Èn wi no sabi tu suma dresi en ai fu a si. Aksi en, a bigi nofo fu taki gi ensrefi.” 22A m'ma nanga a p'pa taki so fu di den ben e frede den fesiman fu den Dyusma. Bika den man dati ben meki mofo kba taki efu wan sma sa taki tak' Yesus na a Mesias, den ben o puru a sma dati ini a kerki. 23Fu dat'ede a m'ma nanga a p'pa piki den taki: “A bigi nofo. Aksi en.”

24So den seni kari a breniman baka, dan den taigi en taki: “Gi Gado a grani!9:24 Disi ben de a Dyufasi fu komanderi wan sma fu a taki san na tru. (Luku Yosua 7:19). Bika un sabi taki a man disi na wan sondusma.” 25A man piki den taki: “Efu a man na wan sondusma, dati mi no sabi. Ma wan sani mi sabi: Mi ben breni, ma now mi e si!” 26Den man aksi en taki: “San A du nanga yu? Fa A du meki yu si?” 27A piki den taki: “Mi taigi un kba, ma un no arki. Sanede un wani yere a sani ete wan leisi? Na tron un wani tron bakaman fu En tu?” 28Ne den kosi en, dan den taigi en taki: “Yu na wan bakaman fu En, ma wi na bakaman fu Moses. 29Un sabi taki Gado ben taki nanga Moses. Ma un no sabi pe a man disi kmoto.” 30Dan a man piki den taki: “Na wan ferwondru sani tak' A dresi mi ai, ma un no sabi pe A kmoto. 31Wi sabi taki Gado no e arki sondusma. Ma A e arki den sma di e lespeki En èn di e du san A wani. 32Noiti a psa ete tak' wan sma opo den ai fu wan sma di gebore breni. 33Efu a man disi no ben kmoto fu Gado, A no ben o man du noti.” 34Den piki a man taki: “Yu gebore ini sondu, dan yu wani kon gi un leri?” Dan den yagi en gwe.

35Yesus ben kisi fu yere taki den yagi a man. So di A miti en, A aksi en taki: “Yu e bribi ini a Manpikin fu Libisma?” 36A man piki taki: “Masra, taigi mi suma na En, fu mi kan go bribi ini En.” 37Yesus piki en taki: “Yu si En kba. Na a Wan di e taki nanga yu.” 38Ne a man taki: “Masra, mi e bribi.” Dan a anbegi En. 39Dan Yesus taki: “Mi kon na grontapu fu koti a krutu disi: Brenisma o kon si èn den sma di e si, o kon breni.” 40Wantu Fariseiman di ben drape nanga En, yere san A taki. Dan den aksi En taki: “Yu wani taigi un taki un breni tu?” 41Yesus piki den taki: “Efu un ben breni, dan un no ben o abi sondu. Ma fu di un taki tak' un e si, meki un no e kisi pardon fu un sondu.”

10

A trutru skapuman

101“Fu tru Mi e taigi un taki: A sma di no psa na a doro fu kon ini a skapupen, ma di kren wan tra presi kon inisei, na wan fufuruman nanga wan abani. 2A sma di e psa na a doro fu kon inisei, na a skapuman. 3A waktiman e opo a doro gi en, èn den skapu e arki en sten. A e kari den skapu fu en na den nen, èn a e tyari den go na dorosei. 4Baka te a tyari ala den skapu fu en go na dorosei, a e waka na den fesi, dan den skapu e waka kon na en baka, bika den sabi en sten. 5Ma den no ben o waka baka wan sma di den no sabi. Den ben o lon gwe fu di den no sabi en sten.” 6Yesus ferteri den a agersitori disi, ma den no ben ferstan san A ben wani taki.

7Dat' meki A taigi den baka taki: “Fu tru Mi e taigi unu: Mi na a doro fu den skapu. 8Ala sma di ben kon na Mi fesi na fufuruman nanga abani, ma den skapu no arki den. 9Mi na a doro. Efu wan sma psa na Mi kon inisei, Mi sa ferlusu en. A sa go kon èn a sa feni nyanyan. 10A fufuruman e kon soso fu fufuru, fu kiri, èn fu pori sani. Mi kon fu gi sma libi, èn fu sorgu taki den abi en bogobogo.

11Mi na a bun skapuman. A bun skapuman de klari fu dede gi den skapu fu en. 12Ma wan wrokoman di den yuru fu luku den skapu, no de leki a skapuman di abi den skapu. Te a si taki wan tigri e kon, a e libi den skapu dan a lon gwe. So a tigri kan grabu wan skapu, dan a panya den trawan. 13A wrokoman e lon gwe bika na yuru den ben yuru en, èn a no abi firi gi den skapu. 14Mi na a bun skapuman. Mi sabi den skapu fu Mi èn den skapu sabi Mi, 15soleki fa a P'pa sabi Mi èn Mi sabi a P'pa. Èn Mi de klari fu dede gi den skapu.

10:15
Mat 11:27
Luk 10:22
16Mi abi tra skapu tu san no de fu a skapupen disi. Mi mus tyari den kon tu. Den o arki Mi sten, dan den tu grupu skapu o tron wán, èn den o abi wán skapuman. 17Mi P'pa lobi Mi, bika Mi e gi Mi libi abra fu dede, fu Mi teki en baka. 18No wan sma e teki Mi libi. Na Mi srefi e gi en abra. Mi abi makti fu gi Mi libi abra, èn Mi abi makti fu teki en baka. Disi na san Mi P'pa ben taigi Mi tak' Mi mus du.”

19Di Yesus taki den sani disi, wan prati kon baka mindri den Dyusma. 20Furu fu den taki: “Un no mus arki a man disi. A law èn A abi wan takruyeye na En tapu.” 21Ma trawan fu den taki: “Wan sma di abi wan takruyeye na en tapu, no e taki leki fa a man disi e taki. Èn wan takruyeye no man meki wan brenisma si baka.”

Yesus taki suma A de

22A ben de a kowruten èn a ben de a ten fu a Hanukafesa na ini Yerusalem. 23Yesus ben e waka ini a tempel na a presi di den kari a Gadri fu Salomo. 24Den fesiman fu den Dyusma kon lontu En, dan den taigi En taki: “Olanga Yu o hori unu ini a span ete? Taigi unu krin efu Yu na a Mesias.” 25Yesus piki den taki: “Mi taigi unu kba, ma un no e bribi. Den wondru san Mi e du ini a nen fu Mi P'pa e sori suma na Mi. 26Ma un no e bribi, bika unu a no skapu fu Mi. 27Den skapu fu Mi e arki Mi sten. Mi sabi den, èn den e waka na Mi baka. 28Mi e gi den a libi fu têgo, èn noiti den o go lasi. No wan sma o man hari den puru na Mi anu. 29Mi P'pa di gi Mi den, bigi moro ala sani. Èn no wan sma kan hari den puru na En anu.10:29 Un kan puru a pisi disi so tu: San Mi P'pa gi Mi bigi moro ala sani. Èn no wan sma kan hari den puru na En anu. 30Mi nanga a P'pa na wan.”

31Dan den Dyusma teki ston baka fu fringi na En tapu. 32Ma Yesus taigi den taki: “Mi meki un si someni bun wroko di Mi P'pa meki Mi du. Fu sortu wan fu den un wani ston Mi kiri?” 33Den piki En taki: “A no fu wan bun wroko un wani ston Yu kiri, ma fu di Yu afrontu Gado. Bika Yu leki wan libisma e taki tak' Yu na Gado.”

10:33
Lev 24:16
34Yesus piki den baka taki: “A skrifi ini a wèt fu unu taki: ‘Mi taki tak' un na gado.’
10:34
Psa 82:6
35Un sabi taki san skrifi ini a Santa Buku tan skrifi. So efu Gado kari den sma di yere En wortu ‘gado,’ 36fa un kan taki tak' Mi e afrontu Gado fu di Mi taki tak' Mi na a Manpikin fu Gado? Na Gado poti Mi aparti dan A seni Mi kon na grontapu. 37Efu Mi no e du den wroko fu Mi P'pa, dan un no abi fu bribi Mi. 38Ma efu na dati Mi e du, dan un mus bribi den wroko, awinsi un no wani bribi Mi. Dan un o kon sabi krin taki Mi P'pa de ini Mi, èn Mi de ini Mi P'pa.” 39Dan den pruberi fu grabu En baka, ma den no feni En fu grabu.

40Dan Yesus abra go baka na a tra sei fu a Yordanliba, na a presi pe Yohanes ben bigin dopu sma, dan A tan drape.

10:40
Yoh 1:28
41Furu sma kon na En. Den taki: “Yohanes no meki un si no wan marki. Ma ala san a ben taki fu a man disi kon tru.” 42Dan furu fu den sma drape bribi na ini Yesus.

11

Lasarus kon na libi baka

111Wan man Lasarus ben e siki. A ben de fu a dorpu Betania, pe Maria nanga en sisa Marta ben e libi.

11:1
Luk 10:38-39
2A Maria disi na a uma di ben kanti a switismeri-oli tapu Yesus, dan a drei den futu fu En nanga en edewiwiri. Na en brada Lasarus ben e siki.
11:2
Yoh 12:3
3So den tu s'sa seni boskopu gi Yesus taki: “Masra, a wan di Yu lobi so, e siki.” 4Di Yesus kisi a boskopu, A taki: “Dede no sa de a kba fu a siki disi, ma a psa fu Gado nanga En Manpikin kisi grani.” 5Yesus ben lobi Marta, nanga en s'sa, nanga Lasarus. 6Ma di A yere taki Lasarus e siki, A tan ete tu dei na a presi pe A ben de. 7Baka den tu dei, A taigi den man di ben e teki leri fu En taki: “Kon meki un drai go baka na Yudea.” 8Ne den man di ben e teki leri fu En taki: “Ma Meister, a no langa di den Dyusma ben wani ston Yu kiri. Dan Yu wani drai go drape baka?” 9Yesus piki den taki: “Twarfu yuru fu wan dei na deiten. Efu wan sma e waka deiten, a no e stotu en futu, bika a e si pe a e go. 10Ma efu a e waka neti yuru, a e stotu en futu, bika ensrefi no abi faya.” 11Baka di Yesus taki a sani disi, A taigi den moro fara taki: “Un mati Lasarus e sribi, ma Mi e go wiki en.” 12Dan den man di ben e teki leri fu En taigi En taki: “Ma Masra, efu na sribi a e sribi, a o kon betre baka.” 13San Yesus ben wani taki, na taki Lasarus dede. Ma den man di ben e teki leri fu En ben ferstan taki na sribi Lasarus e sribi. 14Ne A taigi den krin taki: “Lasarus dede. 15Ma Mi breiti gi unu taki Mi no ben drape, bika now a bribi fu unu kan kon moro tranga. Kon meki un go na en.” 16Wan fu den man di ben e teki leri fu Yesus di ben nen Tomas, ma den ben e kari en Didimus tu, taigi den trawan taki: “Kon meki un go, dan un dede nanga En.”

17Di Yesus doro, A kisi fu yere taki Lasarus ben beri fo dei kba. 18Betania ben de krosbei fu Yerusalem, a no ben doro dri kilometer srefi. 19Furu fu den Dyusma ben kon na Marta nanga Maria fu trowstu den fu di den lasi den brada. 20Di Marta yere taki Yesus e kon, a waka go miti En. Ma Maria tan sidon na oso. 21Dan Marta taigi Yesus taki: “Masra, efu Yu ben dya, mi brada no ben o dede. 22Ma aladi a dede kba, mi sabi taki Gado o gi Yu ala san Yu e aksi En.” 23Dan Yesus taigi en taki: “Yu brada o kon na libi baka.” 24Marta piki taki: “Mi sabi taki a o kon na libi baka tapu a laste dei, te ala dedesma o opo baka.” 25Yesus taki: “Na Mi e wiki dede èn na Mi e gi libi. A sma di e bribi na ini Mi sa libi, awinsi a dede. 26Èn iniwan sma di e libi èn di e bribi na ini Mi, no sa dede noiti moro. Yu e bribi dati?” 27Marta piki En taki: “Iya Masra, mi e bribi taki Yu na a Mesias, a Manpikin fu Gado di ben o kon na grontapu.”

28Di Marta taki disi, a drai go kari en s'sa Maria, dan a taigi en safrisafri taki: “A Meister doro. A seni kari yu.” 29Di Maria yere dati, a opo wantron go na Yesus. 30Yesus no ben doro ini a dorpu ete. A ben tnapu ete pe Marta ben miti En. 31Den Dyusma di ben de nanga Maria ini a oso fu trowstu en, si fa a opo es'esi go na dorosei, dan den waka go na en baka. Den ben prakseri taki na krei a e go krei na a grebi.

32Di Maria doro pe Yesus ben de èn a si En, a fadon tapu en kindi na En futu, dan a taki: “Masra, efu Yu ben dya, mi brada no ben o dede.” 33Di Yesus si fa Maria nanga den Dyusma di kon nanga en e krei, A soktu dipi. Dan nanga dipi sari 34A aksi den taki: “Pe un beri en?” Den piki En taki: “Masra, kon meki un sori Yu.” 35Dan Yesus krei. 36Ne den Dyusma taki: “Tye, yu kan si taki A ben lobi en.” 37Ma sonwan fu den taki: “Efu a Man disi ben man meki a breniman si baka, fa A no ben kan meki a man disi no dede?” 38Yesus soktu baka dan A waka go na a grebi. A ben de wan bergi-olo èn a mofo fu en ben tapu nanga wan ston. 39Dan Yesus taki: “Un puru a ston!” Ma Marta, a s'sa fu a wan di dede, taki: “Masra, a musu e smeri, bika na fo dei a dede kba.” 40Ma Yesus taigi en taki: “Mi no taigi yu tak' efu yu e bribi, yu o si a glori fu Gado?” 41So den puru a ston. Dan Yesus opo En ai go na loktu, A taki: “Mi P'pa, Mi e taki Yu tangi taki Yu piki Mi begi. 42Mi sabi taki ala leisi Yu e piki Mi begi. Ma Mi e taki so fu den sma ede di tnapu lontu Mi, fu den bribi taki na Yu seni Mi kon.” 43Baka di Yesus begi, A bari taki: “Lasarus, kon na dorosei!” 44Dan a man di ben dede kon na dorosei. En anu nanga en futu ben domru nanga dedekrosi èn en ede ben domru nanga wan duku. Dan Yesus taigi den taki: “Un puru den sani na en skin, dan un meki a go.”

Den fesiman fu den Dyusma meki mofo fu kiri Yesus

45Furu fu den Dyusma di ben kon na Maria, bribi ini Yesus di den si san A du. 46Ma wantu fu den go ferteri den Fariseiman san Yesus du. 47Dan den prenspari priester nanga den Fariseiman kari a grankrutu fu den Dyusma kon na wan. Den aksi den taki: “San wi o du nanga a man disi, bika A e sori den sma someni marki. 48Efu wi libi En meki A du san A wani, ala sma o bribi ini En. Dan den Romeinisma o kon broko a presi disi èn den o yagi a pipel.” 49Wan fu den man ben nen Kayafas. Na en ben de granpriester a yari dati. A taigi den taki: “Un no sabi noti! 50Na ferstan un no man ferstan taki a moro bun gi unu taki wan man nomo dede gi a pipel, prefu ala sma dede?” 51Kayafas no ben taki a sani disi fu ensrefi, ma leki granpriester fu a yari dati, a ben e taki na fesi taki Yesus ben o dede gi a pipel fu Israel. 52Ma a no gi den wawan. A ben o dede tu gi den tra pikin fu Gado di panya na grontapu, fu tyari den kon na wan. 53Bigin fu a dei dati den bigin kruderi fa den ben o man kiri Yesus.

54Dat' meki Yesus no ben e waka fri moro na mindri den Dyusma. A go na a foto Efraim, san de ini wan kontren krosbei fu a dreisabana. Dan A tan drape nanga den man di ben e teki leri fu En.

55A Paskafesa fu den Dyusma ben de krosbei. Dat' meki furu sma ben e hari kmopo fu den boiti presi go na Yerusalem, fu meki densrefi klari gi a Paskafesa fosi a bigin. 56Den sma ben e luku efu den ben o si Yesus. Di den ben de ini a tempel, a wan ben e aksi a trawan taki: “Yu prakseri taki Yesus o kon na a fesa?” 57Bika den prenspari priester nanga den Fariseiman ben taigi den sma taki efu den sabi pe Yesus de, dan den mus fu kon taigi den, fu den kan grabu En.