Sranan Tongo Bible 2016 (STB16)
13

Yesus wasi den futu fu den man di ben e teki leri fu En

131Fosi a Paskafesa doro, Yesus ben sabi taki a ten doro fu A libi grontapu go na En P'pa. Èn A lobi den sma fu En di A ben lobi na grontapu, te na a kba. 2A pisten di Yesus nanga den man di ben e teki leri fu En ben e nyan, dan didibri ben gi Yudas, a manpikin fu Simon Iskariot, a prakseri kba fu a seri En. 3Yesus ben sabi taki a P'pa ben poti ala sani na ini En anu. A ben sabi taki A ben kmopo fu Gado èn taki A ben o drai go baka na En. 4Dat' meki A opo, A puru En tap'sei krosi, dan A tai wan duku lontu En bere. 5Baka dati A kanti watra na ini wan beki, dan A bigin wasi den futu fu den man di ben e teki leri fu En. Dan A drei den nanga a duku san ben tai lontu En bere. 6Di A doro na Simon Petrus, a dati aksi En taki: “Masra, na wasi Yu wani wasi mi futu?” 7Yesus piki en taki: “Yu no man ferstan san Mi e du now, ma wan dei yu o sabi.” 8Dan Petrus taki: “Masra, solanga mi e libi, Yu no sa wasi mi futu!” Ma Yesus piki en taki: “Efu Mi no wasi yu futu, yu no man de wan sma fu Mi.” 9Ne Simon Petrus piki En taki: “Masra, dan Yu no mus wasi mi futu wawan, ma mi anu nanga mi ede tu.” 10Yesus taigi en taki: “A sma di wasi en skin, krin kba. A abi fu wasi en futu nomo. Un krin, ma a no un alamala.” 11Yesus taki so bika A ben sabi kba suma ben o seri En. Dat' meki A taigi den taki den alamala no krin.

12Di A kba wasi den futu, A weri En tap'sei krosi, dan A go sidon na En presi baka. Dan A taigi den taki: “Un ferstan san Mi du gi unu?

13:12-15
Luk 22:27
13Unu e kari Mi Meister nanga Masra, èn un abi leti, bika na dati Mi de tu. 14Efu Mi leki un Masra nanga un Meister, wasi un futu, dan un mus wasi makandra futu tu. 15Bika Mi gi un wan eksempre, fu un kan du leki fa Mi ben du gi unu. 16Fu tru Mi e taigi un taki: Wan knekti no hei moro en masra, èn wan boskopuman no hei moro a wan di seni en.
13:16
Mat 10:24
Luk 6:40
Yoh 15:20
17Now di un sabi den sani disi, Gado sa blesi unu efu un du den. 18San Mi e taki no de gi un alamala. Mi sabi den sma di Mi ben teki. Ma a musu psa leki fa a skrifi ini a Santa Buku. A skrifi taki: ‘A wan di nyan Mi brede, opo en bakafutu fu trapu Mi.’
13:18
Psa 41:10
19Mi e taigi un a sani disi na fesi, fu te a psa un kan bribi taki Mi de suma Mi de. 20Fu tru Mi e taigi un taki: A sma di opo en doro gi a wan di Mi seni, e opo en gi Mi. Èn a sma di opo en doro gi Mi, e opo en gi a Wan di seni Mi.”
13:20
Mat 10:40
Mrk 9:37
Luk 9:48
10:16

Yesus sori den suma o seri En

21Baka di Yesus taki den sani disi, A firi wan dipi sari, dan A taigi den taki: “Fu tru Mi e taigi unu: Wan fu unu o seri Mi.” 22Den man di ben e teki leri fu En luku makandra ferwondru. Den no ben sabi suma A e taki. 23Wan fu den man di ben e teki leri fu En, a wan di Yesus ben lobi, ben de let' na En sei. 24Dan Simon Petrus sori en fu a aksi Yesus suma A e taki. 25So a man disi dribi go moro krosbei, dan a aksi Yesus taki: “Masra, suma na en?” 26Yesus piki en taki: “Mi o dopu a pisi brede disi ini a komki, dan Mi o langa en gi a sma dati.” So Yesus dopu a pisi brede ini a komki, dan A langa en gi Yudas, a manpikin fu Simon Iskariot. 27Di Yudas teki a pisi brede, Satan kon ini en ati. Dan Yesus taigi en taki: “Opo, go du es'esi san yu wani du.” 28Ma no wan fu den trawan drape ben ferstan fu sanede Yesus taigi en a sani disi. 29Yudas ben de a man di ben e hori a moni gi den. Dat' meki sonwan fu den ben prakseri taki Yesus seni en fu go bai den sani di ben de fanowdu fu hori a Paskafesa. Trawan fu den ben prakseri taki Yesus seni en go fu gi den pôtisma wan sani. 30So Yudas teki a pisi brede, dan a gwe wantron. A ben de neti yuru.

31Baka di Yudas gwe, Yesus taki: “A ten doro now taki a Manpikin fu Libisma e kisi glori, èn so Gado e kisi glori tu. 32Efu a Manpikin meki Gado kisi glori, dan Gado sa meki a Manpikin kisi glori tu. Èn A o du dati wantron. 33Mi pikin, na wan syatu pisten ete Mi de nanga unu. Un o suku Mi, ma Mi taigi unu a srefi sani san Mi ben taigi den Dyusma: ‘Pe Mi e go, un no man kon.’

13:33
Yoh 7:34
34Wan nyun sani Mi e komanderi un fu du: Un mus lobi makandra. Leki fa Mi ben lobi unu, na so un mus lobi makandra tu.
13:34
Yoh 15:12,17
1Yoh 3:23
2Yoh 5
35Efu un lobi makandra, dan ala sma o sabi taki un na sma fu Mi.”

Yesus warskow Petrus

36Simon Petrus aksi En taki: “Masra, pe Yu e go?”

Yesus piki en taki: “Pe Mi e go, yu no man kon now nanga Mi. Ma baka wan pisten yu o kon tu.” 37Dan Petrus aksi En taki: “Masra, fu sanede mi no man kon now nanga Yu? Mi klari fu dede gi Yu.” 38Yesus piki en taki: “Yu klari fu dede gi Mi? Fu tru Mi e taigi yu taki: Fosi kakafowru bari, yu o taki dri leisi taki yu no sabi Mi.”

14

Yesus wawan kan tyari wan sma go na a P'pa

141Dan Yesus taigi den man di ben e teki leri fu En taki: “Un no abi fu sari so. Un e bribi ini Gado, so un mus bribi ini Mi tu. 2Ini a oso fu Mi P'pa yu abi furu presi fu tan. Efu a no ben de so, dan Mi ben o taigi unu. Mi e go drape fu meki presi klari gi unu. 3Te Mi kba meki presi klari gi unu, dan Mi o drai kon teki unu, fu un kan de pe Mi de. 4Un sabi fa fu kon na a presi pe Mi e go.” 5Dan Tomas taigi En taki: “Masra, un no sabi pe Yu e go. Fa un kan sabi a pasi dan?” 6Yesus piki taki: “Mi na a pasi, na Mi e sori san na tru, èn na Mi e gi libi. Sondro Mi no wan sma kan kon na a P'pa. 7Efu un ben sabi Mi, dan un ben o sabi Mi P'pa tu. Bigin fu now, un sabi En èn un si En.” 8Dan Filipus taigi En taki: “Masra, ala san un wani, na fu Yu sori unu a P'pa.” 9Yesus piki en taki: “Filipus, luku o langa Mi de kba na unu, dan yu no sabi Mi ete? A sma di si Mi, si a P'pa tu. Fa yu kan aksi Mi dan fu Mi sori unu a P'pa? 10Un no e bribi taki Mi de ini a P'pa, èn a P'pa de ini Mi? San Mi e taki, Mi no e taki fu Misrefi. Ma a P'pa di e tan ini Mi, e du En wroko. 11Un kan bribi Mi tak' Mi de ini a P'pa èn a P'pa de ini Mi. Ma efu un no wani bribi san Mi e taki, dan un mus bribi den wroko di Mi ben du. 12Fu tru Mi e taigi un taki: A sma di e bribi ini Mi, sa du den srefi wondru di Mi du, èn a sa du moro bigi wan, bika Mi e go na a P'pa. 13Awinsi san un aksi ini Mi nen, Mi sa du en, fu a Manpikin kan gi a P'pa glori. 14Efu un aksi Mi wan sani ini Mi nen, Mi o du en.”

Yesus pramisi tak' a Santa Yeye o kon

15“Efu un lobi Mi, un o du san Mi e komanderi un fu du. 16Dan Mi o aksi a P'pa meki A seni wan tra Trowstuman kon gi unu, di sa tan nanga unu fu têgo. 17Dati na a Yeye di e sori san na tru. Den grontapusma no o man kisi En, bika den no e si En, èn den no sabi En. Ma un dati sabi En, bika A de na unu, èn A sa tan ini unu. 18Mi no o libi un na baka leki pikin di no abi m'ma nanga p'pa. Mi o kon baka na unu. 19Wan syatu pisten ete, dan den grontapusma no o si Mi moro. Ma unu o si Mi, bika Mi e libi èn un o libi tu. 20Tapu a dei dati un sa kon sabi taki Mi de ini Mi P'pa, èn taki unu de ini Mi èn Mi de ini unu. 21A sma di du san Mi komanderi en fu du, dati na a sma di lobi Mi. Mi P'pa o lobi a sma di lobi Mi. Mi srefi o lobi en tu èn Mi o meki a kon sabi Mi trutru.” 22Dan Yudas aksi Yesus taki: “Masra, fu sanede Yu o meki unu kon sabi Yu, ma Yu no o meki grontapu sabi?” A man di aksi Yesus a sani disi, no ben de Yudas Iskariot. 23Yesus piki en taki: “Efu wan sma lobi Mi, a sa hori ensrefi na den wortu fu Mi. Dan Mi P'pa sa lobi en, èn Mi nanga Mi P'pa o kon tan nanga en. 24A sma di no lobi Mi, no e hori ensrefi na den wortu fu Mi. Èn den sani san un e yere Mi taki, no e kmoto fu Misrefi, ma den kmoto fu a P'pa di seni Mi kon. 25Mi ferteri un den sani disi now di Mi de dya nanga unu ete. 26Ma a P'pa o seni a Trowstuman kon ini Mi nen. Dati na a Santa Yeye di o leri un ala sani èn di o meki un memre ala den sani di Mi ben taigi unu.

27Freide Mi e libi gi unu. A freide fu Mi, Mi e gi unu. A no a freide di grontapu e gi. Dat' meki un no mus sari èn un no mus frede. 28Un yere di Mi taigi un taki: ‘Mi e gwe, ma Mi o drai kon baka na unu.’ Efu un ben lobi Mi, un ben o breiti taki Mi e go na a P'pa, bika a P'pa bigi moro Mi. 29Mi taigi un a sani disi na fesi, fu un kan bribi te a psa. 30Mi no abi furu ten moro fu taki nanga unu, bika a wan di e basi grontapu e kon. A no abi makti moro Mi, 31ma grontapu mus kon sabi taki Mi lobi a P'pa èn taki Mi e du ala sani leki fa A taigi Mi fu du.” Dan Yesus taki: “Opo, kon un kmoto fu dya.”

15

Yesus na a trutru droifibon

151“Mi na a trutru droifibon, èn Mi P'pa na a gronman. 2Ala den taki fu Mi di no e gi nyanyan, A e koti puru. Èn A e krin ibri taki di e gi nyanyan, fu a kan gi moro furu. 3Den sani san Mi taigi unu, meki un kon krin kba. 4Un tan ini Mi, soleki fa Mi e tan ini unu. Leki fa a taki no man gi nyanyan fu ensrefi efu a no de na a droifibon, na so un no man gi nyanyan tu efu un no tan ini Mi. 5Mi na a droifibon èn unu na den taki. A sma di e tan ini Mi èn Mi e tan ini en, e gi furu nyanyan. Bika sondro Mi un no man du noti. 6A sma di no e tan ini Mi, gersi wan taki di den trowe. Te a drei, den sma e tyari den taki kon na wan, dan den trowe den ini a faya fu den bron. 7Ma efu un e tan ini Mi, èn efu un tan du san Mi taigi unu, dan un kan aksi san un wani, èn un sa kisi en. 8Mi P'pa sa kisi glori efu un e gi furu nyanyan, bika dati o sori taki unu na sma fu Mi.

9Leki fa a P'pa lobi Mi, na so Mi ben lobi unu tu. Tan ini a lobi fu Mi! 10Efu un e du san Mi komanderi un fu du, dan un o tan ini a lobi fu Mi, leki fa Mi e tan ini a lobi fu Mi P'pa, fu di Mi hori Misrefi na den komanderi fu En. 11Mi taigi un den sani disi fu un kan abi a srefi prisiri san Mi abi, èn fu un prisiri fu tru.”

Un mus lobi makandra

12“Na disi Mi e komanderi unu: Un mus lobi makandra leki fa Mi ben lobi unu.

15:12
Yoh 13:34
15:17
1Yoh 3:23
2Yoh 5
13A moro bigi lobi san wan sma kan abi, na fu gi en libi abra gi den mati fu en. 14Unu na Mi mati, efu un e du san Mi e komanderi unu. 15Mi no e kari un knekti moro,15:15 Ini Yesaya 44:21 Gado kari den sma fu Israel den knekti fu En. bika wan knekti no sabi san en masra e du. Ma Mi kari unu mati, bika Mi taigi unu ala sani san Mi P'pa taigi Mi. 16A no un ben teki Mi, ma na Mi teki unu. Mi poti unu fu un go èn fu un gi furu nyanyan san e tan. Dan Mi P'pa sa gi unu ala sani san un aksi En ini Mi nen. 17Na disi Mi e komanderi unu: Un mus lobi makandra.”

Den grontapusma no o man si un na ai

18“Efu den grontapusma no man si un na ai, dan un mus sabi taki den no ben man si Mi na ai tu fosi unu. 19Efu un ben de fu grontapu, den grontapusma ben o lobi unu leki wan fu den. Ma unu a no fu grontapu, bika Mi ben puru unu na mindri fu den grontapusma. Dat' meki den no man si un na ai. 20Memre san Mi ben taigi unu: Wan knekti no hei moro en masra. Efu den ben de na Mi baka fu du Mi ogri, dan den o de na un baka fu du un ogri tu. Efu den ben hori densrefi na den wortu fu Mi, dan den sa hori densrefi tu na den wortu fu unu.

15:20
Mat 10:24
Luk 6:40
Yoh 13:16
21Den o du ala den sani disi nanga unu fu Mi nen ede, bika den no sabi a Wan di seni Mi kon. 22Efu Mi no ben kon taki nanga den, den no ben o abi sondu. Ma now den no kan taki tak' den no ben sabi fu den sondu. 23A sma di no man si Mi na ai, no man si Mi P'pa na ai tu. 24Efu Mi no ben du den wroko na den mindri san no wan tra sma no du, dan den no ben o abi sondu. Ma now den si den wroko, ma toku den no man si Mi nanga Mi P'pa na ai. 25Disi psa fu meki a sani san skrifi ini a wèt fu den, kon tru. A skrifi taki: ‘Fu soso den no man si Mi na ai.’
15:25
Psa 35:19
69:5
26Te a Trowstuman kon di Mi o seni kmoto fu a P'pa, A sa ferteri fu Mi. Dati na a Yeye di e sori san na tru èn di e kmoto fu a P'pa. 27Ma unu srefi mus ferteri fu Mi tu, bika sensi na a bigin un ben de nanga Mi.