Sranan Tongo Bible 2016 (STB16)
6

Yesus gi feifi dusun sma nyanyan

Mat 14:13-21; Mrk 6:30-44; Luk 9:10-17

61Baka dati Yesus go na a tra sei fu a Meer fu Galilea, di den e kari a Meer fu Tiberias tu. 2Wan bigi grupu sma ben e waka na En baka bika den ben si den marki di A ben du gi den sikisma. 3Dan Yesus kren go sidon tapu wan bergi nanga den man di ben e teki leri fu En. 4Now a ben de so taki a Paskafesa fu den Dyusma ben de krosbei.

5Di Yesus luku lontu, A si taki wan heri ipi sma e kon na En. Dan A aksi Filipus taki: “Pe wi o bai brede fu den sma disi kan nyan?” 6Yesus taki so fu yere san Filipus ben o taki, bika A ben sabi kba san A ben wani du. 7Filipus piki En taki: “Tu hondro solfrumoni no ben o sari ete fu gi ala den sma disi wan pikin pisi brede.” 8Dan Andreas, wan fu den man di ben e teki leri fu Yesus, di ben de a brada fu Simon Petrus, taigi En taki: 9“Wan boi de dya di abi feifi brede6:9 Den brede disi ben de wan sortu plata brede san den Dyusma ben e meki nanga groto. nanga tu fisi. Ma dati no sari gi someni sma.” 10Furu grasi ben de na a presi drape. Dan Yesus taki: “Meki den sma go sidon.” Ne den sma saka sidon. Wan feifi dusun mansma so ben de ini a grupu. 11Dan Yesus teki den brede, A taki Gado tangi, dan A prati den gi den sma di ben e sidon drape. A du a srefi sani nanga den fisi tu. Ala den sma ben kisi someni leki den wani. 12Di den sma nyan te den bere furu, Yesus taigi den man di ben e teki leri fu En taki: “Piki ala den pis'pisi san libi ete, fu noti no lasi.” 13So den piki den pis'pisi di ben libi ete fu den feifi brede baka di den sma nyan, èn den furu twarfu baskita. 14Di den sma si a marki san Yesus du, den taki: “Fu tru, disi na a Profeiti di ben o kon na grontapu.” 15Yesus si taki den ben wani kon teki En nanga tranga fu poti En leki kownu, so A gwe libi den. A go baka na a bergi presi pe En wawan ben kan de.

Yesus waka tapu a watra

Mat 14:22-33; Mrk 6:45-52

16Di neti tapu den man di ben e teki leri fu Yesus saka go na a meer. 17Den go ini wan boto, dan den bigin koti abra go na Kafarnaum. A ben dungru kba èn Yesus no ben drai kon baka na den ete. 18Dan wan hebi winti bigin wai èn den skwala kon hei. 19Di den pari a boto wan feifi kilometer so, den si Yesus e waka tapu a watra e kon na a boto. Den man frede, 20ma Yesus taigi den taki: “Na Mi! Un no abi fu frede.” 21Den ben wani teki En ini a boto, ma a srefi momenti dati a boto doro a syoro pe den ben wani go.

Yesus na a trutru brede

22A tra dei fu en, a bigi grupu sma di ben de na a tra sei fu a meer ete, memre taki na wan boto nomo ben drape. Den memre tu taki Yesus no ben go nanga den man di ben e teki leri fu En ini a boto, ma taki den man di ben e teki leri fu En ben gwe sondro En. 23Ma now tra boto ben kmopo fu Tiberias kon na a presi pe den ben nyan a brede baka di Masra ben taki tangi fu en. 24So di a bigi grupu sma si taki Yesus nanga den man di ben e teki leri fu En no ben drape, den go ini den boto dati, dan den koti abra go na Kafarnaum fu go suku Yesus.

25Di den feni En na abrasei fu a meer, den aksi En taki: “Meister, oten Yu kon dya?” 26Yesus piki den taki: “Fu tru Mi e taigi un taki: Un no e suku Mi fu di un si den marki, ma fu di un furu un bere nanga brede. 27Un no mus wroko fu kisi nyanyan san e pori gwe, ma un mus wroko fu kisi a nyanyan san no e pori èn san e gi a libi fu têgo. Dati na a nyanyan san a Manpikin fu Libisma o gi unu. Bika Gado a P'pa poti En stampu na En tapu.” 28Dan den sma aksi En taki: “San un mus du? San na den wroko san Gado wani taki un mus du?” 29Yesus piki den taki: “A wroko san Gado wani taki un mus du na disi: Un mus bribi ini a Wan di A seni kon.”

30Dan den aksi En baka taki: “Sortu marki Yu o sori unu fu un kan bribi ini Yu? San Yu o du? 31Den afo fu wi ben nyan mana ini a dreisabana, soleki fa a skrifi taki: ‘A gi den brede fu nyan di kmoto fu heimel.’ ”

6:31
Eks 16:4,15
Psa 78:24
32Dan Yesus taigi den taki: “Fu tru Mi e taigi unu: A no Moses ben gi un a brede di kmoto fu heimel, ma na Mi P'pa e gi un a trutru brede san e kmopo fu heimel. 33Bika a brede fu Gado na a Wan di saka kmopo fu heimel fu gi libi na ala sma fu grontapu.” 34Dan den sma aksi En taki: “Masra, gi unu a brede disi ala dei.” 35Yesus piki den taki: “Mi na a brede san e gi libi. Noiti moro angri o kiri a sma di e kon na Mi, èn noiti moro watra o kiri a sma di e bribi ini Mi. 36Leki fa Mi taigi un kba: Un e si Mi, ma toku un no e bribi. 37Ala den sma di a P'pa gi Mi, o kon na Mi, èn den sma di kon na Mi, noiti Mi o yagi gwe. 38Bika Mi no saka kmopo fu heimel fu du Mi eigi wani, ma fu du a wani fu a Wan di seni Mi kon. 39Èn disi na a wani fu a Wan di seni Mi kon, tak' Mi no lasi no wan fu den sma di A gi Mi, ma tak' Mi meki alamala kon na libi baka tapu a laste dei. 40Bika Mi P'pa wani taki ala sma di e si a Manpikin, èn di e bribi ini En, sa kisi a libi fu têgo, èn Mi o meki den kon na libi baka tapu a laste dei.”

41Dan den Dyusma bigin krutukrutu fu di A ben taki tak' En na a brede san saka kmopo fu heimel. 42Den taki: “A no Yesus, a manpikin fu Yosef? Un sabi En m'ma nanga En p'pa. Fa a kan taki tak' A saka kmopo fu heimel?” 43Ma Yesus piki den taki: “No krutukrutu nanga makandra. 44No wan sma kan kon na Mi, efu a P'pa di seni Mi, no hari en kon. Dan Mi sa meki a kon na libi baka tapu a laste dei. 45A skrifi ini den buku fu den profeiti taki: ‘Gado srefi o gi ala sma leri.’ Ala sma di e arki a P'pa èn di e teki leri fu En, e kon na Mi.

6:45
Yes 54:13
46Dati no wani taki tak' a sma si a P'pa, bika soso a Wan di kmoto fu Gado si a P'pa. 47Fu tru Mi e taigi un taki: A sma di e bribi, abi a libi fu têgo. 48Mi na a brede san e gi libi. 49Den afo fu unu ben nyan a mana ini a dreisabana, ma toku den dede. 50Ma a sma di e nyan fu a brede disi di e saka kmopo fu heimel, no sa dede. 51Mi na a brede san e gi libi, di saka kmopo fu heimel. A sma di e nyan fu a brede disi, sa libi fu têgo. Èn a brede san Mi o gi en na Mi skin, san Mi o gi fu ala sma na grontapu kan feni libi.”

52Dan den Dyusma bigin krutu nanga makandra. Den taki: “Fa a Man disi kan gi un En skin fu nyan?” 53Ne Yesus taigi den taki: “Fu tru Mi e taigi unu: Efu un no nyan a skin èn efu un no dringi a brudu fu a Manpikin fu Libisma, dan un no abi libi na ini unu. 54A sma di e nyan Mi skin èn di e dringi Mi brudu, abi a libi fu têgo. Èn Mi sa meki a kon na libi baka tapu a laste dei. 55Bika Mi skin na trutru nyanyan èn Mi brudu na trutru dringi. 56A sma di e nyan Mi skin èn di e dringi Mi brudu, e tan wan nanga Mi èn Mi e tan wan nanga en. 57A P'pa di e libi seni Mi kon, èn soleki fa A gi Mi libi, na so Mi o gi libi tu na a sma di e nyan Mi skin. 58Disi na a brede di saka kmoto fu heimel. Den afo fu unu ben nyan mana, ma toku den dede. Ma a sma di e nyan a brede disi, sa libi fu têgo.” 59Yesus taki den sani disi di A ben e gi leri ini a kerki na Kafarnaum.

Furu sma gwe libi Yesus

60Di furu fu den sma di ben e teki leri fu Yesus yere den sani di A taki, den taki: “A leri disi tranga. Suma o man teki en?” 61Ma Yesus ben sabi taki den man di ben e teki leri fu En ben e krutukrutu abra a san disi. So A taigi den taki: “Na mandi un e mandi fu di Mi taki so? 62San un o du dan te un si a Manpikin fu Libisma e opo go na a presi pe A ben de fosi? 63Na a Yeye e gi libi, a skin na noti. Den sani san Mi taigi unu, na yeye sani èn den e gi libi. 64Ma sonwan fu unu no e bribi.” Yesus ben sabi sensi na a bigin suma no ben o bribi, nanga suma ben o seri En. 65Dan Yesus taki: “Fu dat'ede Mi taigi unu: No wan sma kan kon na Mi efu a no a P'pa meki a du dati.” 66Sensi a pisten dati, furu fu den sma di ben e teki leri fu En, drai baka gi En. Den no waka moro langa nanga En.

San Petrus taki

67Dan Yesus aksi den twarfu man fu En taki: “Ma unu dan, un o gwe libi Mi tu?” 68Simon Petrus piki En taki: “Masra, na suma un o go dan? Na Yu abi wortu di e gi a libi fu têgo.

6:68-69
Mat 16:16
Mrk 8:29
Luk 9:20
69Wi e bribi Yu, èn wi sabi taki Yu na a Santa Wan fu Gado.” 70Dan Yesus piki den taki: “Unu na den twarfu man di Mi teki. Ma wan fu unu na wan didibri.” 71Yesus ben e taki fu Yudas, a manpikin fu Simon Iskariot. Bika fu den twarfu den man, Yudas ben de a wan di ben o seri En.

7

Yesus nanga den brada fu En

71Baka dati Yesus hari fu a wan presi go na a trawan ini Galilea. A no ben wani tan na Yudea, bika den fesiman fu den Dyusma ben e suku fu kiri En. 2Ma a ten fu den Dyusma hori a Sukotfesa fu den, ben de krosbei.

7:2
Lev 23:34
Deu 16:13
3Dan den brada fu Yesus taigi En taki: “Yu mus kmopo dya go na Yudea, meki den sma fu Yu si den sani san Yu e du. 4Bika no wan sma e du wan sani kibrifasi, efu a wani fu sma kon sabi en. Efu Yu e du den sani disi, dan meki heri grontapu kon sabi Yu!” 5Den brada fu Yesus taki so, fu di den srefi no ben e bribi na ini En. 6Dan Yesus piki den taki: “Un kan go oten un wani, ma a yuru fu Mi no doro ete. 7Den sma fu grontapu no man mandi nanga unu. Ma Mi den no man si na ai, fu di Mi e taigi den tak' na ogri den e du. 8Un kan go na a fesa. Mi no e go, bika a yuru fu Mi no doro ete.” 9Di A taigi den dati, A tan na Galilea.

Yesus go na a Sukotfesa

10Baka di den brada fu En go na a fesa, Yesus srefi go tu. Ma A go kibrifasi fu no wan sma sabi. 11Den fesiman fu den Dyusma ben e luku fu En tapu a fesa, èn den ben e aksi pe A de. 12Den furu sma di ben drape ben e taki safrisafri fu En. Sonwan ben e taki tak' Yesus na wan bun sma, ma trawan ben feni taki na kori A e kori den sma. 13Ma no wan sma ben prefuru fu taki fu En meki ala sma yere, bika den ben frede den fesiman fu den Dyusma.

14Di afu fu den dei fu a fesa ben psa kba, Yesus go na a tempel dan A bigin gi den sma leri. 15Den fesiman fu den Dyusma ben ferwondru, èn den aksi taki: “Fa a Man disi du sabi someni sani sondro fu A kisi leri?” 16Yesus piki den taki: “Den sani di Mi e leri no kmoto fu Misrefi, ma fu a Wan di seni Mi kon. 17Efu wan sma wani du a wani fu Gado, dan a sa kon sabi efu a leri san Mi e gi, kmoto fu Gado noso efu Mi kon nanga Mi eigi leri. 18Efu wan sma kon nanga en eigi leri, a e suku grani gi ensrefi. Ma a sma di e suku grani gi a wan di seni en kon, de fu fertrow èn a no e lei. 19Moses ben gi unu a wèt, ma no wan fu unu e du san a wèt e taki. Fu sanede un wani kiri Mi?” 20Den sma taigi En taki: “Suma wani kiri Yu? Na wan takruyeye Yu abi na Yu tapu!” 21Yesus piki den taki: “Mi du wan wondru nomo, dan un alamala ferwondru. 22Luku, Moses ben taigi un taki un mus besnei den boi fu unu. A sani disi no ben kmoto fu ensrefi, ma fu den afo fu wi. Dat' meki un e besnei, awinsi na wan sabatdei.

7:22 a
Lev 12:3
23Efu un e besnei tapu a sabatdei fu no broko a wèt fu Moses, dan fu sanede un ati e bron na Mi tapu fu di Mi meki wan sma kon betre tapu a sabatdei?
7:23
Yoh 5:9
24Un no mus krutu wan sma fu san un si, ma un mus krutu tapu wan leti fasi.”

25Sonwan fu den sma fu Yerusalem aksi taki: “A no En na a man di den wani kiri? 26Luku, A e gi leri na ala sma fesi, èn no wan sma e taigi En wan sani. Kande den edeman kon si now trutru tak' En na a Mesias. 27Un sabi pe a man disi kmoto, ma te a Mesias kon, no wan sma o sabi pe A kmoto.” 28Dat' meki di Yesus ben e leri den sma ini a tempel, A bari taki: “Un sabi Mi èn un sabi pe Mi kmoto. Ma Mi no kon ini Mi eigi nen. Na a Trutru Wan seni Mi kon. Un no sabi En, 29ma Mi sabi En, bika Mi kmopo na En èn na En seni Mi kon.” 30Di den yere dati, den suku fu grabu En. Ma no wan sma no fasi En, bika a yuru fu En no ben doro ete. 31Ma furu fu den sma bigin bribi ini En. Den taki: “Te a Mesias kon, A o man meki un si moro marki leki a man disi?” 32Den Fariseiman yere san den sma ben e taki safrisafri fu Yesus. Dat' meki den nanga den prenspari priester seni waktiman fu a tempel fu go grabu En.

33Dan Yesus taki: “Wan syatu pisten nomo Mi o de ete nanga unu, dan Mi o drai go baka na a Wan di ben seni Mi kon. 34Un o suku Mi, ma un no o feni Mi. Bika pe Mi de, un no man kon.” 35Den fesiman fu den Dyusma aksi makandra taki: “Pe a man disi o go dan, taki un no o man feni En? Kande A o go na den Dyusma di panya go na tra kondre, dan A o gi den sma drape di no sabi Gado a leri fu En. 36A taki tak' wi o suku En, ma un no o feni En, èn pe A de, un no man kon. San A wani taki nanga a sani dati?”

A watra di e gi libi

37A laste dei fu a Sukotfesa na a moro bigi dei. A dei dati Yesus opo tnapu dan A bari taki: “Efu watra e kiri wan sma, meki a kon na Mi fu dringi!

7:37
Lev 23:36
38A Santa Buku e taki: Liba fu watra di e gi libi, o lon kmoto inisei fu a sma di e bribi ini Mi.”
7:38
Ese 47:1
Sak 14:8
39Di Yesus taki a sani dati, A ben e taki fu a Santa Yeye san den sma ben o kisi di teki bribi ini En. Bika te leki a ten dati a Santa Yeye no ben kon ete, fu di Yesus no ben go na heimel ete.

40Di den sma yere san Yesus taki, sonwan fu den taki: “Trutru, a man disi na a Profeiti!” 41Trawan taki: “Disi na a Mesias!” Trawan baka taki: “A Mesias no o kmoto fu Galilea. 42Bika a Santa Buku e taki tak' a Mesias o de wan bakapikin fu David, èn A o kmoto fu Betlehem, a foto pe David ben e libi.”

7:42
2Sam 7:12
Mika 5:1
43Na so prati ben kon mindri den sma fu Yesus ede. 44Sonwan fu den ben wani grabu En, ma no wan sma no fasi En.

Den fesiman fu den Dyusma no wani bribi

45Den waktiman drai go baka na den prenspari priester nanga den Fariseiman, dan den man dati aksi den taki: “Sanede un no tyari En kon?” 46Den waktiman piki den taki: “Noiti ete wan man taki leki fa a man disi e taki.” 47Dan den Fariseiman taigi den taki: “Na drai A drai un ede tu? 48No wan edeman fu unu èn no wan fu den Fariseiman e bribi ini En. 49Ma Gado sa fluku ala den sma disi di no sabi a wèt fu Moses!” 50Dan Nikodemus, wan fu den Fariseiman di ben kon wan leisi na Yesus, taigi den taki:

7:50
Yoh 3:1-2
51“A wèt fu unu e taki tak' un no kan leisi strafu gi wan sma efu un no arki fosi san a e taki èn ondrosuku san a e du.” 52Den piki en taki: “Yu na fu Galilea tu? Go ondrosuku Gadowortu, dan yu o si taki no wan profeiti e kmoto fu Galilea.”

Yesus nanga a uma di prei en masra

53Baka dati ala sma go na den oso,

8

81ma Yesus go na a Oleifbergi. 2A tra mamanten frukufruku A go baka na a tempel èn a heri folku kon na En. Dan Yesus go sidon èn A bigin gi den leri. 3Dan den sabiman fu Gado wèt nanga den Fariseiman tyari wan uma kon di den kisi di a ben e huru gi en masra. Den poti en mindri den sma di ben lontu Yesus, 4dan den taigi En taki: “Meister, den kisi a uma disi di a ben e huru gi en masra. 5A wèt fu Moses e leri un taki un mus ston sowan sma kiri. San Yu e taki fu a sani disi?”

8:5
Lev 20:10
Deu 22:22-24
6Den ben aksi En a sani disi fu tesi En, fu di den ben e suku wan sani fu tyari En go na krutu. Ma Yesus boigi En ede, dan A bigin skrifi nanga En finga na gron. 7Di den tan aksi En nomo, Yesus opo En ede dan A taigi den taki: “Meki a sma di noiti no du wan sondu, fringi a fosi ston naki en.” 8Dan A saka En ede, èn A bigin skrifi na gron baka. 9Ma di den yere dati, den gwe wan fru wan, te leki Yesus nanga a uma wawan ben tan na baka. Den owru wan ben de den fosi wan di gwe. 10Yesus opo En ede dan A aksi a uma taki: “Uma, pe den man de? No wan fu den no krutu Yu?” 11A uma piki taki: “Nono, Masra. No wan fu den.” Ne Yesus taigi en taki: “Dan Mi no e krutu yu tu. Yu kan go, ma yu mus tapu nanga a sondu libi.”8:11 Wantu manuscript no abi a pisi fu 7:53 te kon miti 8:11.

Yesus na a faya fu grontapu

12Wan tra leisi Yesus taigi den sma taki: “Mi na a faya fu grontapu. A sma di e waka na Mi baka, no sa waka ini dungru noiti moro, ma a sa abi a faya di e gi libi.”

8:12
Mat 5:14
Yoh 9:5
13Dan den Fariseiman taigi En taki: “Yu e taki gi Yusrefi. A sani san Yu taki no abi warti.”
8:13
Yoh 5:31
14Yesus piki den taki: “Awinsi Mi e taki gi Misrefi, a abi warti, bika Mi sabi pe Mi kmopo èn pe Mi o go. Ma un dati no sabi pe Mi kmopo noso pe Mi o go. 15Un e krutu libisma fasi. Ma Mi no e krutu no wan sma. 16Ma efu Mi e krutu wan sma, dan Mi e krutu tapu wan leti fasi. Bika Mi no de Mi wawan, ma a P'pa di seni Mi kon de nanga Mi. 17Na ini un eigi wèt a skrifi taki: Efu tu sma e kotoigi fu wan sani, dan a sani tru.
8:17
Deu 19:15
18Mi e taki gi Misrefi, èn Mi P'pa di seni Mi kon, e taki fu Mi tu.” 19Dan den aksi En taki: “Pe Yu P'pa de?” Yesus piki den taki: “Un no sabi Mi èn un no sabi Mi P'pa. Efu un ben sabi Mi, dan un ben o sabi Mi P'pa tu.” 20Yesus taki den sani disi di A ben e gi den sma leri ini a tempel pe a kisi de pe yu mus poti moni. Ma no wan sma no grabu En, bika En yuru no ben doro ete.

Yesus nanga den Dyu fesiman

21Dan Yesus bigin taki baka nanga den sma. A taigi den taki: “Mi e gwe èn un o suku Mi. Un o dede sondro fu un kisi pardon fu un sondu. Pe Mi e go, un no man kon.” 22A sani disi meki den Dyusma taki: “Fu sanede A taki: ‘Pe Mi e go, un no man kon?’ Na kiri A o kiri Ensrefi?” 23Ma Yesus taigi den taki: “Unu na fu dya, ma Mi na fu loktu. Unu na fu a grontapu disi, ma Mi a no fu a grontapu disi. 24Mi taigi un kba tak' un o dede sondro fu un kisi pardon fu un sondu. Bika efu un no e bribi taki Mi de suma Mi de, dan un o dede ini un sondu.” 25Dan den aksi En taki: “Suma na Yu dan?” Yesus piki den taki: “Na dati Mi taigi unu someni langa kba. 26Mi abi furu sani san Mi kan taki fu unu, nanga furu sani fu san Mi kan krutu unu. A Wan di seni Mi kon, na a Trutru Wan. Èn san Mi yere fu En, na dati Mi e taigi den sma na grontapu.” 27Ma den no ben ferstan taki Yesus ben e taki nanga den fu a P'pa. 28Dan Yesus taigi den taki: “Baka te un opo a Manpikin fu Libisma na loktu, dan un o si taki na Mi. Dan un o si taki Mi no e du noti fu Misrefi, ma tak' Mi e taki soso san Mi P'pa leri Mi. 29A Wan di seni Mi kon de nanga Mi. A no libi Mi wawan, bika Mi e tan du san A lobi.”

30Di Yesus taki den sani disi, furu sma bigin bribi ini En.

Den trutru pikin fu Abraham

31Dan Yesus taigi den Dyusma di bribi ini En taki: “Efu un e tan du san Mi taki, dan un o de trutru sma fu Mi. 32Dan un sa sabi san na tru, èn na dati o meki un kon fri.” 33Ma den sma taigi En taki: “Un na bakapikin fu Abraham. Noiti un ben de srafu fu wan sma. Fa Yu kan taki dan taki un sa kon fri?”

8:33
Mat 3:9
Luk 3:8
34Yesus piki den taki: “Fu tru Mi e taigi unu: Ibri sma di e sondu, na wan srafu fu sondu. 35Wan srafu no e tan fu têgo ini a famiri, ma a manpikin e tan fu têgo. 36Fu dat'ede efu a Manpikin meki un kon fri, dan un o fri fu tru.

37Mi sabi taki un na bakapikin fu Abraham. Ma un e suku fu kiri Mi, fu di un no wani teki san Mi e taki. 38Mi e ferteri unu san Mi si na Mi P'pa, ma unu e du san un yere fu un p'pa.” 39Den piki En taki: “Abraham na wi p'pa.” Yesus piki den baka taki: “Efu un ben de pikin fu Abraham un ben o du den sani san Abraham ben e du. 40Ma now un e suku fu kiri Mi, Mi di ferteri unu den tru sani san Mi yere fu Gado. Abraham no ben o du sowan sani. 41Ma unu e du san un p'pa e du.” Den taigi En now taki: “Na Gado wawan na wi P'pa. Wi a no doroseipikin.” 42Yesus taigi den taki: “Efu Gado ben de un P'pa un ben o lobi Mi, bika Mi kmopo fu Gado. Mi no kon fu Misrefi, ma na En seni Mi kon. 43Un sabi fu sanede un no e ferstan san Mi e taigi unu? Na fu di un no man teki san Mi e taki. 44Didibri na un p'pa, èn un lobi fu du san a wani. Sensi na a bigin a de wan kiriman. A no man taki wan sani san tru, bika a no sabi san na tru. Te a e lei, a e taki leki fa ensrefi de, bika a de wan leiman èn na en meki lei. 45Ma fu di Mi e taki san na tru, meki un no e bribi Mi. 46Suma kan sori taki Mi du wan sondu? Efu Mi e taki san tru, fu sanede un no e bribi Mi dan? 47A sma di de fu Gado, e arki san Gado e taki. Ma unu a no sma fu Gado, dat' meki un no e arki.”

Yesus nanga Abraham

48Den Dyusma taigi Yesus taki: “Un ben abi leti di un taki tak' Yu na wan Samariasma èn tak' Yu abi wan takruyeye na Yu tapu!” 49Ma Yesus piki den taki: “Mi no abi no wan takruyeye na Mi tapu. Mi e gi Mi P'pa grani, ma unu e broko Mi saka. 50Mi no e suku grani gi Misrefi. Wan Trawan de di e suku grani gi Mi, èn na En e krutu libisma. 51Fu tru Mi e taigi un taki: A sma di e du san Mi taki, no sa dede noiti.” 52Dan den Dyusma taigi En taki: “Now wi sabi trutru taki Yu abi wan takruyeye na Yu tapu. Abraham nanga den profeiti dede. Ma Yu e taki tak' a sma di e du san Yu taki, no sa dede noiti. 53Yu denki taki Yu bigi moro un afo Abraham? A dede, èn den profeiti srefi dede tu. San Yu e prakseri fu Yusrefi?” 54Yesus piki den taki: “Efu Mi e suku grani gi Misrefi, dan a no abi warti. A Wan di e gi Mi grani na Mi P'pa. Un e kari En un Gado, 55ma un no sabi En. Mi sabi En, èn efu Mi ben sa taki tak' Mi no sabi En, dan Mi ben o de wan leiman leki unu. Ma Mi sabi En èn Mi e du san A wani. 56Un afo Abraham ben wakti nanga prisiri fu si a dei fu Mi. A si a dei dati èn a ben breiti.” 57Dan den Dyusma taki: “Fa a kan taki Yu si Abraham? Yu no abi feifitenti yari ete!” 58Yesus piki den taki: “Fu tru Mi e taigi un taki: Fosi Abraham gebore, Mi ben de!” 59Dan den sma teki ston fu fringi na En tapu, ma Yesus kibri fu den no si En, dan A kmoto ini a tempel.