Sranan Tongo Bible 2016 (STB16)
10

101Mi kon weri fu a libi,

dat' meki mi o tyari den kragi fu mi kon na fesi now,

awinsi fa mi ati broko, mi o taki now.

2Mi o taigi Gado taki: ‘No krutu mi tak' mi du ogri,

ma taigi mi fu sanede Yu tyari mi go na krutu.

3Sortu bun a e du yu fu pina mi so?

Sortu bun a e du Yu

fu poti san Yu meki nanga Yu eigi anu na wan sei?

Sortu bun a e du yu fu agri nanga den sani

di ogri-ati sma e prakseri fu du?

4Yu no e si sani leki fa libisma e si sani,

èn a ferstan fu Yu no smara leki di fu libisma tu.

5A libi fu Yu no e kon na wan kba,

a no syatu leki di fu wan libisma.

6Dat' meki Yu no abi fu suku fowtu so na mi,

Yu no abi fu ondrosuku mi so fu luku efu sondu de ini mi.

7Yu sabi tak' mi no e du ogri,

ma no wan sma de di kan ferlusu mi puru na ini Yu anu.

8Nanga den eigi anu fu Yu, Yu ben meki mi,

dan now Yu wani puru mi na pasi.

9Gado, memre tak' na fu kleidoti Yu ben meki mi,

dan fu sanede Yu wani naki mi broko

fu mi tron a soso doti baka?

10Soleki fa den e kanti merki poti na ini baki,

fu tron kasi,

na so Yu teki a manwatra fu mi p'pa

seti mi poti ini a bere fu mi m'ma.

11Yu meki a skin fu mi fu bonyo nanga titei,

dan Yu tapu en nanga meti èn nanga buba.

12Yu gi mi libi èn Yu sori mi a bunfasi fu Yu,

nanga Yu heri ati Yu ben kibri a libi fu mi tu.

13Ma Yu ben kibri sani

Ma mi sabi now san na den sani:

14fu hori ai na mi tapu fu luku efu mi o sondu,

èn krutu mi fu den sondu dati.

15Efu mi ben du ogri trutru, mi bo de fu sari!

Ma srefi efu mi e libi soleki fa Gado wani,

mi no man opo mi ede

bika mi lasi ala a grani di mi ben abi

èn a nowtu fu mi bigi.

16Efu mi e prefuru fu opo mi ede,

Yu e dyompo na mi tapu leki wan lew

fu sori mi a bigi makti fu Yu baka.

17Yu no e tapu fu tyari mi go na krutu,

a atibron fu Yu e bigi moro nanga moro,

dorodoro Yu e seni nyun problema kon na mi tapu,

leki fa den e seni nyun srudati go dorodoro ini wan feti.

18Gado, fu sanede Yu meki mi kmopo ini a bere fu mi m'ma?

Fu sanede Yu no meki mi dede fosi wan sma ben si mi?

19Dan mi bo kmopo ini a bere fu mi m'ma

go langalanga na berpe.

Noiti mi bo de na libi.

20Gado, dyonsro a libi fu mi e kon na wan kba.

Libi mi, fu mi kan prisiri pikinso.

21Bika dyonsro mi o go na dedekondre,

a presi fu pe mi no o drai kon moro,

drape soso dungru de.

22Dedekondre dungru srefsrefi,

na soso dipi dungru nanga bruya e rigeri drape.

Drape a faya srefi dungru.’ ”

11

A fosi leisi di Sofar taki

111Dan Sofar fu Naama bigin taki. A taigi Yob taki:

2“Wan sma mus fu gi piki tapu den someni sani di yu taki.

A no te yu e tak' so furu yu o kisi leti.

3Yu no mus prakseri tak' den lawlaw sani di yu e taki

o meki un tapu un mofo,

noso taki no wan sma no o piri ai gi yu.

4Yu feni taki: ‘mi e si a tori disi a yoisti fasi,

èn tak' mi no du ogri na fesi Gado.’

5O, fa mi e winsi tak' Gado ben sa opo En mofo,

tak' Ensrefi ben kan taki nanga yu.

6Dan A bo sori yu kibri sani fu a koni fu En,

sani di a ferstan fu libisma no man grabu.11:6 A Hebrewtekst no de so krin dyaso.

Dan a bo kon na krin gi yu

tak' Gado no e gi yu ala a strafu srefi di yu fiti fu kisi.

7Yu o man kon sabi suma Gado de trutru?

Yu o man grabu den dipi sani fu a Wan di abi ala makti?

8Den hei leki heimel,

yu o man doro na den?

Den dipi moro leki dedekondre,

yu o man ferstan den?

9Den langa moro leki grontapu,

den bradi moro leki den se.

10Efu Gado teki a besroiti fu grabu wan sma,

èn tyari en go na krutu, suma o man tapu En?

11Bika A sabi den bedrigiman,

A e si den kruktudu fu den krinkrin.

12Wan don sma no e kisi ferstan,

wan buriki e tan wan buriki.

13Ma Yob, drai go baka na Gado,

èn langa yu anu go na En ini begi.

14Efu yu e sondu, tapu nanga en,

èn no meki ogri psa na ini yu oso.

15Dan yu o man opo yu ede,

sondro fu yu konsensi fon yu,

yu no o degedege moro

èn yu no o abi fu frede gi noti moro tu.

16Iya, dan yu o fergiti a pina di yu e pina,

yu o fergiti en leki fa sma e fergiti watra di lon gwe.

17A libi sa kon lekti baka gi yu,

den problema fu yu o abi fu meki pasi,

neleki fa neti abi fu meki pasi gi dei.

18Yu o kisi nyun bribi, nyun howpu,

èn fu di Gado o kibri yu,

yu o man go sribi tiri fu yu.

19Yu o sribi sondro fu wan sma meki yu skreki wiki,

èn furu sma o wani tron yu mati.

20Ma den ogri-ati sma o luku lontu nomo

fa den o kmopo na ini den problema fu den.

Den no o man feni no wan fasi fu kmopo,

a wan enkri angri di den abi, na fu den bro kan koti.”

12

Yob piki Sofar

121Ma Yob piki Sofar taki:

2“Iya, na unu abi ala koni,

te un dede, koni sma no o de moro.

3Ma mi e ferstan sani heri bun tu, neleki unu,

mi no e du ondro gi unu.

Ala sma sabi den sani di un e taki.

4Mi tron wan spot'popki gi den mati fu mi,

mi di Gado ben e piki te mi ben e begi.

Mi e libi bun èn mi e libi tu soleki fa Gado wani,

toku den e teki mi e meki spotu.

5Den sma di abi en bun e si den sma di ongoluku miti, leki noti,

a ongoluku tnapu klari'klari fu pusu den sma trowe

di abi problema kba.

6Ma den sma di e gi trawan mankeri fu kan fufuru den sani,

e libi sondro wan broko ede na ini den oso,

noti e psa tu nanga den wan di e wiki a atibron fu Gado.

Ma den sortu sma dati e prakseri

tak' den kan du san den wani nanga Gado.

7Ma un aksi den meti,

meki den leri unu abra Gado,

un aksi den fowru di e frei na loktu,

den o taigi unu.

8Un aksi a doti fu grontapu tu, a o leri unu,

un aksi den fisi fu a se, den o ferteri unu.

9Sortu wan fu den sani dati no sabi

taki na MASRA du ala den sani dati.

10Gado abi makti abra ala sani di e libi,

sosrefi abra a bro fu libisma.

11Neleki fa mofo e tesi nyanyan,

na so yesi e arki fin'fini sa a e yere.

12A no te wan sma ede weti na wan marki tak' a koni,

noso te wan sma owru na wan marki

tak' a man ferstan sani.

13Ma na Gado koni nanga krakti de,

na En abi sabi nanga ferstan.

14Te Gado broko wan sani, no wan sma kan meki en baka.

Te A sroto wan sma, no wan sma kan lusu en.

15Te A tapu a alen fu a no fadon, a gron e drei,

te A meki a fadon, a e sungu grontapu.

16Gado tranga, A e wini ala ten,

A abi makti abra den sma di trawan kori

èn abra den sma di e kori trawan.

17A e meki bigiman fu kondre tron pinaman,

èn A e meki krutubakra lasi den ferstan.

18A e hari a moi krosi puru na kownu skin

dan a tai wan feskoki gi den.

19A e meki priester waka soso futu,

èn A e broko den wan di prakseri tak' den de kba.

20A e tapu a mofo fu raiman,

èn A e puru a koni na owrusma fu kan krutu sani nanga leti.

21A e si den bigiman fu kondre leki noti,

èn A e puru a makti ini anu fu tiriman.

22A e tyari den sani di de ini dipi dungru kon na krin,

èn A e tyari faya ini den moro dipi dungru presi.

23A e meki folku gro kon bigi,

dan A e puru den na pasi.

A e meki folku kon tranga,

dan A e meki feyanti tyari den gwe.

24A e meki tiriman fu folku lasi den ferstan,

A e meki den waka lontu nomo na ini sabana,

sondro fu sabi pe den e go.

25Den e waka leki drunguman,

e firifiri nomo ini a dungru.