Sranan Tongo Bible 2016 (STB16)
12

Yob piki Sofar

121Ma Yob piki Sofar taki:

2“Iya, na unu abi ala koni,

te un dede, koni sma no o de moro.

3Ma mi e ferstan sani heri bun tu, neleki unu,

mi no e du ondro gi unu.

Ala sma sabi den sani di un e taki.

4Mi tron wan spot'popki gi den mati fu mi,

mi di Gado ben e piki te mi ben e begi.

Mi e libi bun èn mi e libi tu soleki fa Gado wani,

toku den e teki mi e meki spotu.

5Den sma di abi en bun e si den sma di ongoluku miti, leki noti,

a ongoluku tnapu klari'klari fu pusu den sma trowe

di abi problema kba.

6Ma den sma di e gi trawan mankeri fu kan fufuru den sani,

e libi sondro wan broko ede na ini den oso,

noti e psa tu nanga den wan di e wiki a atibron fu Gado.

Ma den sortu sma dati e prakseri

tak' den kan du san den wani nanga Gado.

7Ma un aksi den meti,

meki den leri unu abra Gado,

un aksi den fowru di e frei na loktu,

den o taigi unu.

8Un aksi a doti fu grontapu tu, a o leri unu,

un aksi den fisi fu a se, den o ferteri unu.

9Sortu wan fu den sani dati no sabi

taki na MASRA du ala den sani dati.

10Gado abi makti abra ala sani di e libi,

sosrefi abra a bro fu libisma.

11Neleki fa mofo e tesi nyanyan,

na so yesi e arki fin'fini sa a e yere.

12A no te wan sma ede weti na wan marki tak' a koni,

noso te wan sma owru na wan marki

tak' a man ferstan sani.

13Ma na Gado koni nanga krakti de,

na En abi sabi nanga ferstan.

14Te Gado broko wan sani, no wan sma kan meki en baka.

Te A sroto wan sma, no wan sma kan lusu en.

15Te A tapu a alen fu a no fadon, a gron e drei,

te A meki a fadon, a e sungu grontapu.

16Gado tranga, A e wini ala ten,

A abi makti abra den sma di trawan kori

èn abra den sma di e kori trawan.

17A e meki bigiman fu kondre tron pinaman,

èn A e meki krutubakra lasi den ferstan.

18A e hari a moi krosi puru na kownu skin

dan a tai wan feskoki gi den.

19A e meki priester waka soso futu,

èn A e broko den wan di prakseri tak' den de kba.

20A e tapu a mofo fu raiman,

èn A e puru a koni na owrusma fu kan krutu sani nanga leti.

21A e si den bigiman fu kondre leki noti,

èn A e puru a makti ini anu fu tiriman.

22A e tyari den sani di de ini dipi dungru kon na krin,

èn A e tyari faya ini den moro dipi dungru presi.

23A e meki folku gro kon bigi,

dan A e puru den na pasi.

A e meki folku kon tranga,

dan A e meki feyanti tyari den gwe.

24A e meki tiriman fu folku lasi den ferstan,

A e meki den waka lontu nomo na ini sabana,

sondro fu sabi pe den e go.

25Den e waka leki drunguman,

e firifiri nomo ini a dungru.

13

131Un yere, ala den sani dati mi si,

fu di mi teki mi ai luku sani bun,

èn poti mi yesi arki sani fin'fini.

2San un sabi, mi sabi tu,

mi no e du ondro gi unu.

3Ma now mi o tak' nanga a Wan di abi ala makti,

na Gado mi wani sori tak' mi no du ogri.

4Bika unu, na soso lei un e lei gi mi,

un alamala de leki datra di e gi sma dresi di no e yepi.

5Efu un ben sa tan tiri!

Dan sma ben kan denki ete taki na koni un koni

6Un arki fa mi o tyari a tori fu mi kon na fesi,

un poti un yesi fu arki fa mi o taki gi misrefi.

7Un no abi fu prakseri tak' na yepi un e yepi Gado

te un e lei èn bedrigi.

8Na teki un wani teki a sei fu En?

Na tak' un wani taki gi Gado leki En afkati?

9Ma efu En tyari un go na krutu,

a no o waka bun gi unu,

bika un no o man bedrigi En

leki fa un e bedrigi libisma.

10A no abi misi tak' A o strafu unu,

efu bakabaka un wani teki a sei fu En.

11Na frede un no e frede Gado?

A makti fu En no sa meki un beifi?

12Den sani di un e taki de leki asisi, den no warti noti,

den sani di un e taki gi unsrefi, no abi krakti.

13Dat' meki un mus tan tiri, meki mi taki:

san wani kon, meki a kon.

14Mi no abi trobi fu lasi mi libi.

15Iya, Gado kan kiri mi efu A wani,

mi no abi noti moro fu lasi,

ma mi sa tan taki leti na En fesi, tak' mi no du ogri.

16Na dati wawan sa ferlusu mi,

bika sma di no wani dini En

no e prefuru fu kon na En fesi.

17So un arki bun san mi o taki,

un no mus misi noti.

18Un luku, mi seti ala sani kba

fa mi o tyari a tori fu mi kon na fesi,

mi sabi taki mi tnapu na ini mi leti.

19Ma efu wan sma sa kon èn sori krin tak' mi du ogri,

mi o tan tiri èn mi no abi trobi fu dede.

20Ma Gado, efu Yu sa du den tu sani disi gi mi,

a no sa de wan problema gi mi fu go na fesi krutu nanga Yu:

21tapu fu strafu mi,

èn no meki mi e frede so.

22Dan mi no abi trobi efu Yu wani taki fosi,

baka dati mi sa piki,

noso mi sa taki fosi tu,

dan baka dati Yu e piki.

23Taigi mi Gado: Omeni leisi mi du ogri? Omeni leisi mi sondu?

Sori mi den fowtu di mi meki, sori mi den sondu di mi du.

24Gado, fu sanede Yu e koti pasi gi mi?

Fu sanede Yu e si mi leki Yu feyanti?

25Mi de leki wan wiwiri di fadon kmopo na wan bon,

dan Yu wani frede mi ete?

Mi de leki wan drei karutiki,

dan Yu wani kon na Mi baka ete?

26Leki wan krutubakra Yu e skrifi ogri poti tapu papira,

fu kan krutu mi,

Yu e meki mi pai fu den ogri di mi du ini mi yongu yari.

27Yu e fasi mi futu nanga bui.

Yu e luku mi alasei pe mi e go,

Yu e ondrosuku den futumarki fu mi srefi.

28Yu sa du dati nanga wan sma di e pori gwe leki wan pisi udu,

leki wan krosi di kakalaka e nyan?

14

141Wan libisma e gebore swaki, a no de noti,

a libi fu en syatu èn a furu nanga problema.

2A de leki wan bromki di e opo,

ma di e flaw gwe,

leki wan schaduw di e psa es'esi,

èn di yu no e si moro.

3Gado, dan na tapu so wan sma Yu e hori ai?

Na so wan sma Yu e kari kon na krutu?

4Suma sa man puru wan sani di krin ini wan sani di no krin?

No wan sma!

5Yu poti na fesi kba olanga wan sma o tan na libi,

omeni dei Yu gi en.

No wan sma kan psa a ten dati di Yu poti.

6Dan fu sanede Yu no e puru Yu ai na en tapu dan?

Libi a sma meki a de fu en.

Meki a prisiri fu a syatu ten di a de na libi,

leki fa wan man di e wroko dei wroko

e prisiri nanga en pai na a kba fu a dei!

7Gi wan bon howpu de ala ten.

A kan gro baka efu sma kapu en trowe,

èn a e gi nyun pransun.

8Awinsi den rutu fu en kon owru ini a gron,

èn a tompu fu en dede ini a doti,

9a e kisi libi baka leki fa a smeri watra,

èn a e kisi taki baka leki wan yongu bon.

10Ma te wan libisma dede, a e lasi ala en krakti,

te en bro koti, a kba gi en.

11Leki fa a watra fu wan kriki e drei,

èn a watra fu wan liba e tapu lon,

12na so a de nanga wan sma di dede,

pe a didon, a no e opo moro.

Solanga heimel de, a no e opo,

a no e wiki fu a sribi di a e sribi.

13Tye, efu Yu ben sa kibri mi ini dedekondre,

efu Yu ben sa kibri mi drape,

te leki a atibron fu Yu ben saka.

Poti wan ten gi mi fu tan drape,

èn prakseri mi baka na a kba fu a ten dati.

14Te wan sma dede,

a no kan kon na libi baka.

Efu dati ben de so

mi bo abi howpu ini a tranga ten disi,

èn mi bo tan wakti tapu a ten

di mi bo fri fu a pina.

15Dan te Yu bo kari mi, mi bo piki,

èn Yu bo angri baka fu si mi

di Yu ben meki nanga Yu eigi anu.

16Yu bo luku mi tu fu noti no miti mi,

ma Yu no bo hori Yu ai na mi tapu moro

fu luku den sondu fu mi.

17Yu bo poti den sondu fu mi na ini wan saka,

èn tai a saka bun steifi.

Yu bo tapu den kruktudu fu mi.

18Ma leki fa wan bergi e broko pis'pisi te a fadon,

èn bergiston e rutu kmopo fu en presi,

19leki fa liba watra e broko ston di didon ini a liba,

èn leki fa sibibusi e wasi santi tyari gwe

na so Yu e broko a howpu fu libisma.

20Yu e basi en fu têgo èn a e dede gwe.

En fesi e kenki te Yu e seni en gwe.

21Den manpikin fu en e meki nen,

noso den e fadon, a no sabi not'noti.

22Soso en eigi skin-ati a sabi,

èn a kan firi sari gi ensrefi wawan.”