Sranan Tongo Bible 2016 (STB16)
16

Yob piki Elifas tapu den sani di a taki fu a di fu tu leisi

161Ma Yob piki Elifas taki:

2“Mi yere den sani di un e taki furu leisi kba.

Prefu un e trowstu mi, un e meki mi firi moro ogri.

3Un no man tapu nanga den soso sani di un e taki?

San e trusu yu so tak' yu wani piki nomonomo

tapu den sani di mi e taki?

4Efu un ben de ini mi presi,

mi bo man taki a srefi fasi nanga un tu.

Mi bo man taigi un wan lo sani,

mi bo man seki mi ede gi un tu.

5Ma mi no bo du dati.

Den sani di mi bo taigi unu bo gi un dek'ati,

den wortu fu mi bo meki un firi moro bun.

6Ma noti no e lekti a pen fu mi,

awinsi mi taki, awinsi mi tan tiri.

7Gado, Yu meki mi lasi ala mi krakti,

Yu wai mi heri famiri puru na pasi.

8Den marki di e sori san Yu du nanga mi

de leki wan kotoigi fu krutu mi.

Mi no abi no wan meti moro na mi skin,

dati srefi wani sori tak' mi du ogri.

9Gado e priti mi na ini hebi atibron

èn A no wani sabi not'noti fu mi.

A e kaw na tapu En tifi gi mi,

mi Feyanti e piri En ai e luku mi.

10Sma e lafu mi na ini mi fesi,

den e teki mi e meki spotu

te den e naki mi na ini mi fesi,

den e bondru tu fu du mi ogri.

11Gado e gi mi abra na sondusma,

na sma di e du ogri.

12Mi ben e libi tiri fu mi, ne Gado naki mi broko pis'pisi.

A grabu mi hori na mi neki, dan A fringi mi trowe na gron.

Yu teki mi leki a sani tapu san Yu e marki,

fu sutu den peiri fu Yu.

13Fu alasei den peiri fu En e sori kon na mi tapu,

dan sondro fu sari mi pikinso srefi,

A sutu den niri fu mi boro,

a gari fu mi fadon na gron.

14Leki wan dyadya fetiman A e lon kon na mi tapu,

a wan mankeri A e gi mi baka a trawan.

15Na soso mi lowkrosi mi e weri,

mi fesi fadon èn mi lasi ala mi krakti.

16Mi fesi sweri fu a krei di mi e krei,

lontu den ai fu mi blaka.

17Ma mi no du no wan sma ogri,

èn mi ben e begi nanga wan krin ati.

18Tye, santi, no tapu a brudu fu mi di e lon fu soso,

no wan sma no mus tapu mi tu,

te mi e kari fu kisi mi leti!

19Ma luku, srefi now mi abi wan kotoigi ini heimel,

mi afkati, de leti drape.

20Now di den mati fu mi e teki mi e meki spotu,

mi e suku mi yepi na Gado nanga ala mi watra-ai.

21A kotoigi fu mi sa tak' nanga Gado gi mi,

leki fa wan sma e meki tu trawan kon bun baka.

22Bika na wantu yari nomo mi abi fu go ete,

dan mi sa abi fu waka a pasi

fu pe mi no kan drai kon moro.”

17

171“Mi no abi krakti fu go moro fara,

mi no abi langa moro fu libi,

mi grebi e kari kba.

2Iya, fu alasei sma e teki mi e meki spotu,

ma mi abi fu teki a afrontu dati.

3Mi Gado, pai a moni gi mi fu mi kan kon fri,

bika no wan tra sma de

di sa wani du dati gi mi.

4Yu meki tak' den mati fu mi no e ferstan san e psa,

dat' meki na Yu no mus meki den wini mi tu.

5Bika te wan sma seri en mati fu moni ede,

den pikin fu en o firi a bakapisi.

6Now a pipel e koti a srefi odo dati gi mi

èn sma e spiti na ini mi fesi.

7A sari di mi e sari meki ala mi ai kon dungru,

mi anu nanga mi futu kon gersi tiki.

8Sma di de fu fertrow no man bribi a sani dati,

sma di no e du ogri e nyan den niri nanga den sma

di no wani dini Gado.

9Sma di e libi bun e tan waka a pasi dati,

èn a sma di no e sondu e kisi krakti moro nanga moro.

10Ma un dati,

un kan kon taki den sani fu un baka,

mi sabi tak' no wan fu un no koni.

11Mi no abi langa moro fu libi,

den sani di mi ben wani du no man go doro,

sosrefi den angri fu mi ati.

12Neti un e kari dei,

te a e dungru un e si tak' na dei e krin.

13Tapu wan sani nomo mi e wakti,

fu mi dede èn den beri mi,

fu mi kan kanti didon.

14Efu mi e kari a grebi mi p'pa

èn den woron drape mi m'ma nanga mi s'sa,

15dan sortu howpu mi abi dan?

No wan sma e si tak' sani kan waka bun gi mi ete.

16A howpu di mi ben abi

o go nanga mi na ini dedekondre,

a o go makandra nanga mi na ini mi grebi.”

18

A di fu tu leisi di Bildad taki

181Dan Bildad fu Suak bigin taki baka. A taigi Yob taki:

2“Olanga yu o taki go doro?

Kisi yusrefi, dan un kan taki baka dati.

3Fu sanede yu e si un leki buriki?

Na don un don so ini yu ai?

4Na yu e gi yusrefi mankeri nanga a hebi atibron fu yu,

yu no abi fu prakseri tak' ala sma o gwe libi grontapu

fu yu kan kisi yu leti,

noso tak' wan bergiston o kmopo fu en presi.

5Kwet'kweti, a libi fu wan ogri-ati sma o kon na wan kba,

a o de leki wan faya di no e bron moro,

6a oso fu en e kon dungru,

a faya fu a lampu na loktusei fu en e dede gwe.

7A dyadya fasi fa a ben e waka kon na wan kba,

den ogri di a ben prakseri fu du

e meki a broko en eigi neki.

8En eigi futu e tyari en go fromu ensrefi,

a e fadon ini wan olo di den ben tapu fu a no si.

9Wan isri sani grabu en bakafutu hori,

a no man lusu ensrefi.

10Den kibri wan titei gi en ondro a doti,

a e didon wakti en tapu a pasi.

11Sani di e frede en e lontu en alasei,

den e lon na en baka ala pe a e go.

12Angri meki a lasi ala en krakti,

fu ala sei ogri e miti en.

13Wan siki di e tyari dede, panya abra en heri skin,

a e nyan den anu nanga den futu fu en kba.

14Dede e rutu en puru na ini en tenti

di a ben e si leki en kibripe,

èn a e tyari en langalanga go fesi a kownu fu dede.

15Tra sma kan go libi now ini a oso di a libi na baka.

Ma fa a ben abi a takru siki,

den krin a oso fosi nanga kroiti.

16Wan ogri-ati sma de leki wan bon di e dede gwe:

a e pori fu den rutu ondro a doti,

go te na den moro hei taki.

17Ala sma na grontapu e fergiti en,

no wan sma no e kari a nen fu en moro tapu strati.

18Gado e pusu en puru fu a leti go ini a dungru.

A e yagi en puru na grontapu.

19A no e libi pikin na baka,

no wan sma di e tyari a nen fu en,

no wan ososma fu en tan na libi.

20Ala presi, fu a sei pe a son e opo,

go te na a sei pe a e saka,

sma e skreki sote te den yere fa a libi fu en

kon na wan kba.

21Iya, na dati e psa nanga den sma

di no e libi bun,

na so e psa nanga den sma

di no e lespeki Gado.”