Sranan Tongo Bible 2016 (STB16)
21

Yob e piki tapu den sani di Sofar taki fu a di fu tu leisi

211Ma Yob piki Sofar taki:

2“Yere, un arki bun san mi e taki,

meki dati de a trowstu di un e gi mi.

3Un hori pasensi nanga mi, dan mi sa taki,

dan te mi kba, un kan teki mi meki spotu.

4A no nanga wan libisma mi abi en di mi e kragi so.

Efu dati ben de so mi ben sa abi pasensi.

5Un luku mi fin'fini, dan un o ferwondru sote,

tak' un o tnapu nanga opo mofo.

6Te misrefi e prakseri san miti mi, mi e frede,

èn mi heri skin e beifi.

7Fu sanede ogri-ati sma e libi so langa?

O moro den e owru, o moro den e kisi makti.

8Den e si fa den pikin fu den e tron wan sani,

den e si den granpikin fu den srefi.

9Den e libi ini freide ini den oso,

den no e frede noti,

èn a wipi fu Gado no e miti den.

10Te den bulu fu den dyompo den kaw,

a no abi misi tak' den kaw e hori bere,

èn te den e kisi den pikin, den no e lasi no wan.

11Den pikin fu den ogri-ati sma

e lon go prei fu den na dorosei,

leki pikin skapu den e dyompodyompo lontu.

12Den e singi èn den e prisiri

tapu a poku fu tamboerijn, citer nanga froiti.

13Sani e go den ogri-ati sma bun, den heri libi langa,

èn te den e dede, den e dede ini freide.

14Ma Gado den e taigi taki:

‘Libi un meki un de fu unu,

un no wani libi leki fa Yu wani!

15Suma na a Wan di abi ala makti

tak' un mus anbegi En?

Sortu wini un o abi efu un begi?’

16Ma yere, a go di a libi e go den bun,

no de ini den eigi anu.

Dat' meki mi e tan fara fu a fasi fa den e denki.

17Omeni leisi un e si tak' ogri-ati sma

e dede fosi den yuru kisi,

tak' bigi ogri e miti den,

noso tak' Gado e meki den e pina

fu di En ati e bron na den tapu?

18Oten un e si tak' winti e wai den gwe leki dreigrasi,

noso tak' tranga winti e bro den tyari gwe leki aleisibuba?

19Un e taki: ‘Gado e meki den pikin fu den

pai fu den sondu di den du.’

Ma mi e winsi tak' Gado

sa meki densrefi pai fu den sondu,

fu den kan firi en.

20Densrefi mus si sortu pori sondu e tyari,

densrefi mus firi a atibron fu a Wan di abi ala makti.

21Bika te den yuru kisi èn den dede,

den no e span moro san e psa nanga den famiri.

22Suma sa man leri Gado wan sani?

En di e leisi strafu gi den wan di de ini heimel?

23Son sma e dede gesontu,

den e dede ini freide, sondro wan broko-ede.

24A skin fu den e sori tak' den ben e nyan bun,

den bonyo fu den de steifisteifi ete.

25Tra sma baka e dede nanga wan broko ati,

sondro fu ben sabi san na prisiri.

26Ma den ala tu e didon ini a doti,

èn woron e tapu den.

27Un yere, mi sabi san un e prakseri.

Mi sabi san un wani du tu fu du mi ogri.

28Un e aksi taki:

‘Pe a oso fu a guduman de?

Pe den ogri-ati man e libi?’

29Un aksi den sma di e go na difrenti presi,

èn un kan bribi san den e taki.

30Te bigi nowtu de na wan presi,

noti no e psa nanga ogri-ati sma.

Den e tan na libi te kon miti a dei

fu a bigi atibron fu Gado.

31Suma e bari en ini en fesi fu a fasi fa a e libi?

Suma e strafu en te a e du ogri?

32Ma nanga ala lespeki den e tyari en go beri,

èn sma e hori wakti na a grebi fu en.

33Kowru safri a e didon fu en ondro gron,

bun furu sma ben go na en fesi,

èn den wan di kon na en baka no ben de fu teri.

34Ma a trowstu fu unu, no wani taki noti.

Den sani di un e piki mi na soso lei.”

22

A di fu dri leisi di Elifas taki

221Dan Elifas fu Teman bigin taki baka. A taigi Yob taki:

2“No wan libisma, awinsi fa a koni,

kan de wan yepi gi Gado.

3Sortu prisiri yu e du a Wan di abi ala makti efu yu e libi bun?

Sortu wini A abi efu yu e libi krin?

4Yu e prakseri tak' na fu di yu e lespeki En meki A e strafu yu,

èn tyari yu go na krutu?

5A no fu den takrudu fu yu ede?

A no fu di den sondu fu yu furu sote?

6Bika fu soso yu ben teki panti fu den kondreman fu yu,

krosi fu pinaman srefi yu ben e puru na den skin.

7Den sma di ben weri, yu no gi watra,

den di angri ben e kiri, yu no gi brede.

8Iya, na den trangawan leki yu abi a kondre,

na den di abi makti e libi na ini.

9Uma di masra dede kba,

yu seni gwe nanga leigi anu,

èn yu trapu psa den pikin

di no abi p'pa nanga m'ma moro.

10Na dat' meki sma seti trapu gi yu na alasei,

èn na dat' meki wantronso yu e frede te fu dede tu.

11Yu no e si tak' a e dungru na yu lontu

èn tak' bigi watra e tapu yu?

12Gado, na ini a hei heimel A e libi.

Luku o hei den stari de.

13Ma yu e prakseri taki: ‘San Gado sabi?

A man si psa den deki wolku fu krutu sani?

14Bika yu e prakseri taki wolku tapu En

meki A no man si noti te A e waka psa

pe heimel e tuka nanga grontapu.’

15Yu wani go doro tapu a kruktu owru pasi,

a pasi di ogri-ati sma ben e waka?

16Dede hari den tyari gwe fosi den yuru ben kisi,

leki fa liba e srepi oso tyari gwe.

17Na sma di ben e taigi Gado taki:

‘Libi un meki un de fu unu!’

Den ben e tak' tu taki:

‘San a Wan di abi ala makti kan du gi unu?’

18Ma na En ben furu den oso fu den nanga gudu.

Ma mi e tan fara fu a fasi fa den e denki.

19Den sma di e libi bun e breiti

te den e si san e miti den ogri-ati sma,

èn den sma di no e du ogri

e teki den e meki spotu.

20Den e taki: ‘Luku, Gado e puru un feyanti na pasi,

èn faya e bron ala san den libi na baka.’

21Yob, meki en bun nanga Gado,

libi ini freide nanga En,

dati sa tyari soso bun gi yu.

22Teki den sani di A e leri yu,

èn kibri den wortu fu En ini yu ati.

23Efu yu sa drai go baka na a Wan di abi ala makti

èn tapu a ogri di e psa ini yu oso,

A sa meki yu de baka san yu ben de bifo.

24Libi a gowtu ini a gron,

meki a gowtu fu Ofir tan didon ini a kriki,

25dan a Wan di abi ala makti sa de yu gowtu,

èn A sa de bogobogo solfru tu gi yu.

26Dan yu sa prisiri nanga a Wan di abi ala makti,

èn yu o man opo yu ede baka luku Gado.

27Te yu o begi, A o piki yu,

te yu o pramisi En wan sani,

yu o man du san yu pramisi En.

28Ibri besroiti di yu o meki, o waka bun,

èn faya sa krin yu pasi.

29Te wan sma firi broko, ma yu e taki: ‘Opo’,

Gado sa yepi a sma dati di ben saka den ede.

30A e yepi den sma srefi di du ogri.

Owktu yu kan feni yepi, efu yu anu krin.”

23

Yob e angri fu feni Gado

231Dan Yob piki taki:

2“Ma owktu tide mi e tan kaka futu fu kragi,

bika awinsi mi poti mi anu tapu mi mofo,

mi no man tapu a dyeme di mi e dyeme.

3Tye, efu mi ben sabi pe mi ben kan feni Gado,

efu mi ben kan go na a presi pe A e sidon.

4Dan mi bo brokobroko a tori fu mi gi En,

mi bo ferteri En ala sani fin'fini.

5Dan mi bo yere san A bo tak' gi Ensrefi,

èn ferstan san A wani taigi mi.

6Te A bo strei nanga mi,

A no bo strei nanga bigi krakti nanga mi.

Kwet'kweti, ma A bo arki san mi abi fu taki.

7Dan drape, mi leki wan sma di de fu fertrow,

bo man poti a tori fu mi na En fesi,

èn mi krutubakra bo taki tak' mi fri fu têgo.

8Ma yere, efu mi go na oostsei, A no de drape,

efu mi go na westsei, A no de fu si.

9Te A e wroko na noordsei, mi no man si En,

èn efu A drai go na zuidsei, A no de fu feni.

10Ma En sabi fa mi e tyari misrefi.

Te A kba tesi mi, mi o krin leki lala gowtu.

11Mi tan waka leti na En baka,

mi no beni kmopo fu a pasi fu En srefsrefi.

12Mi hori mi na den gebod fu En,

èn mi ben warderi den wortu fu En moro ala tra sani.

13Ma A e tan na den besroiti di A e meki,

no wan sma man tapu En.

A e du san En ati firi.

14A o du den sani tu di A poti fu du nanga mi,

èn furu de fu kon ete.

15Na dat' meki mi e frede fu miti nanga En,

prakseri mi e prakseri a sani dati wawan,

mi e beifi kba.

16-17Bika mi no e frede gi a dipi dungru di lontu mi,

ma gi Gado, di meki mi lasi ati,

gi a Wan di abi ala makti, di bruya mi.