Sranan Tongo Bible 2016 (STB16)
22

A di fu dri leisi di Elifas taki

221Dan Elifas fu Teman bigin taki baka. A taigi Yob taki:

2“No wan libisma, awinsi fa a koni,

kan de wan yepi gi Gado.

3Sortu prisiri yu e du a Wan di abi ala makti efu yu e libi bun?

Sortu wini A abi efu yu e libi krin?

4Yu e prakseri tak' na fu di yu e lespeki En meki A e strafu yu,

èn tyari yu go na krutu?

5A no fu den takrudu fu yu ede?

A no fu di den sondu fu yu furu sote?

6Bika fu soso yu ben teki panti fu den kondreman fu yu,

krosi fu pinaman srefi yu ben e puru na den skin.

7Den sma di ben weri, yu no gi watra,

den di angri ben e kiri, yu no gi brede.

8Iya, na den trangawan leki yu abi a kondre,

na den di abi makti e libi na ini.

9Uma di masra dede kba,

yu seni gwe nanga leigi anu,

èn yu trapu psa den pikin

di no abi p'pa nanga m'ma moro.

10Na dat' meki sma seti trapu gi yu na alasei,

èn na dat' meki wantronso yu e frede te fu dede tu.

11Yu no e si tak' a e dungru na yu lontu

èn tak' bigi watra e tapu yu?

12Gado, na ini a hei heimel A e libi.

Luku o hei den stari de.

13Ma yu e prakseri taki: ‘San Gado sabi?

A man si psa den deki wolku fu krutu sani?

14Bika yu e prakseri taki wolku tapu En

meki A no man si noti te A e waka psa

pe heimel e tuka nanga grontapu.’

15Yu wani go doro tapu a kruktu owru pasi,

a pasi di ogri-ati sma ben e waka?

16Dede hari den tyari gwe fosi den yuru ben kisi,

leki fa liba e srepi oso tyari gwe.

17Na sma di ben e taigi Gado taki:

‘Libi un meki un de fu unu!’

Den ben e tak' tu taki:

‘San a Wan di abi ala makti kan du gi unu?’

18Ma na En ben furu den oso fu den nanga gudu.

Ma mi e tan fara fu a fasi fa den e denki.

19Den sma di e libi bun e breiti

te den e si san e miti den ogri-ati sma,

èn den sma di no e du ogri

e teki den e meki spotu.

20Den e taki: ‘Luku, Gado e puru un feyanti na pasi,

èn faya e bron ala san den libi na baka.’

21Yob, meki en bun nanga Gado,

libi ini freide nanga En,

dati sa tyari soso bun gi yu.

22Teki den sani di A e leri yu,

èn kibri den wortu fu En ini yu ati.

23Efu yu sa drai go baka na a Wan di abi ala makti

èn tapu a ogri di e psa ini yu oso,

A sa meki yu de baka san yu ben de bifo.

24Libi a gowtu ini a gron,

meki a gowtu fu Ofir tan didon ini a kriki,

25dan a Wan di abi ala makti sa de yu gowtu,

èn A sa de bogobogo solfru tu gi yu.

26Dan yu sa prisiri nanga a Wan di abi ala makti,

èn yu o man opo yu ede baka luku Gado.

27Te yu o begi, A o piki yu,

te yu o pramisi En wan sani,

yu o man du san yu pramisi En.

28Ibri besroiti di yu o meki, o waka bun,

èn faya sa krin yu pasi.

29Te wan sma firi broko, ma yu e taki: ‘Opo’,

Gado sa yepi a sma dati di ben saka den ede.

30A e yepi den sma srefi di du ogri.

Owktu yu kan feni yepi, efu yu anu krin.”

23

Yob e angri fu feni Gado

231Dan Yob piki taki:

2“Ma owktu tide mi e tan kaka futu fu kragi,

bika awinsi mi poti mi anu tapu mi mofo,

mi no man tapu a dyeme di mi e dyeme.

3Tye, efu mi ben sabi pe mi ben kan feni Gado,

efu mi ben kan go na a presi pe A e sidon.

4Dan mi bo brokobroko a tori fu mi gi En,

mi bo ferteri En ala sani fin'fini.

5Dan mi bo yere san A bo tak' gi Ensrefi,

èn ferstan san A wani taigi mi.

6Te A bo strei nanga mi,

A no bo strei nanga bigi krakti nanga mi.

Kwet'kweti, ma A bo arki san mi abi fu taki.

7Dan drape, mi leki wan sma di de fu fertrow,

bo man poti a tori fu mi na En fesi,

èn mi krutubakra bo taki tak' mi fri fu têgo.

8Ma yere, efu mi go na oostsei, A no de drape,

efu mi go na westsei, A no de fu si.

9Te A e wroko na noordsei, mi no man si En,

èn efu A drai go na zuidsei, A no de fu feni.

10Ma En sabi fa mi e tyari misrefi.

Te A kba tesi mi, mi o krin leki lala gowtu.

11Mi tan waka leti na En baka,

mi no beni kmopo fu a pasi fu En srefsrefi.

12Mi hori mi na den gebod fu En,

èn mi ben warderi den wortu fu En moro ala tra sani.

13Ma A e tan na den besroiti di A e meki,

no wan sma man tapu En.

A e du san En ati firi.

14A o du den sani tu di A poti fu du nanga mi,

èn furu de fu kon ete.

15Na dat' meki mi e frede fu miti nanga En,

prakseri mi e prakseri a sani dati wawan,

mi e beifi kba.

16-17Bika mi no e frede gi a dipi dungru di lontu mi,

ma gi Gado, di meki mi lasi ati,

gi a Wan di abi ala makti, di bruya mi.

24

241Fu sanede a Wan di abi ala makti

no poti wan ten fu krutu ogri-ati sma?

Fu sanede den wan di e dini En

no sabi den dei te A e leisi strafu?

2Yu abi sma di e dribi den stonpostu fu den,

go tapu a tra dyari.

Den e fufuru meti èn den e tyari den go wei,

leki na den abi den.

3Den e teki a buriki fu den pikin,

di no abi p'pa nanga m'ma moro, tyari gwe.

A kaw fu a uma di masra dede kba,

den e teki leki panti.

4Den e tapu pasi gi den pôtiwan alasei.

Ala mofinawan fu a kondre abi fu kibri gi den.

5Luku, den pôtisma dati e hari go suku nyanyan,

leki den buriki fu a sabana.

Na a fasi dati wawan

den kan feni nyanyan gi den pikin.

6Ini tra sma pranigron den abi fu go piki

san tan na baka,

ini droifidyari fu den ogri-ati sma den e go piki

den droifi di libi.

7Fu di den no abi krosi,

den e sribi nanga sososkin te neti.

Den no abi noti fu tapu den skin gi a kowru.

8Ini den bergi sibibusi e nati den petepete,

den e brasa bergiston hori

fu di den no abi kibripresi.

9Yu abi ogri-ati sma di e grabu wan pikin, di no abi p'pa moro,

puru fu a bobi fu en m'ma,

den e teki a nyunyun pikin fu a mofinawan leki panti.

10Fu di den pôtisma no abi krosi,

den e waka lontu nanga soso skin,

nanga angribere den e syow karu.

11Den e masi oleif tron oli,

èn den e masi droifi tron win,

na den presi pe den sani dati e du,

ma densrefi watra e kiri te fu dede.

12A dyeme fu sma di e dede, de fu yere ini a foto,

sma di kisi mankeri, e bari kari suku yepi,

ma Gado no e arki a begi fu den.

13Ogri-ati sma nanga a krin fu dei na feyanti,

den no sabi fa a tan,

den e kmopo na pasi gi en.

14Fosi dei krin a kiriman e opo

fu go kiri a pôtiman di de na nowtu.

Neti yuru a e waka leki wan fufuruman.

15Sma di e huru e wakti fu a dungru fadon,

den e taki na ini densrefi taki:

‘No wan sma no mus si mi,’

èn den e tapu den fesi.

16Ini a dungru den e boro go ini sma oso,

deiten den e kibri den ede,

den no wani sabi not'noti fu a krin fu dei.

17Gi ala den sortu sma dati,

a moro dipi dungru de leki mamanten.

Den frede sani fu a dipi dungru no e skreki den moro.

18Ma densrefi e psa gwe leki skuma tapu watra.

Wan fluku de tapu den dyari fu den.

No wan fu den sma di e masi droifi tron win,

wani go na den droifidyari fu den.

19Leki fa dreiten nanga son

e hari a watra teki di sneeuw e libi na baka,

na so dedekondre e hari sondusma teki.

20A bere pe a kmopo srefi e fergiti en,

den woron e nyan a dedeskin fu en.

No wan sma e prakseri en moro,

a kruktudu fu en e fadon leki wan bon.

21Bika den ben e pina uma

di no ben man hori bere fu meki pikin,

èn den no ben libi bun nanga uma

di masra dede kba.

22Ma Gado abi a makti

fu puru den trangawan na pasi,

te A opo, den sabi tak' a libi fu den

o kon na wan kba.

23Gado e gi den a firi leki noti no o miti den,

èn den bow na tapu a firi dati.

Ma A e luku ala san den e du.

24Den e opo fu wan syatu pisten nomo,

dan den no de moro,

den de leki grasi di e drei èn pori gwe.

leki karu di sma e koti trowe.

25Efu a no de so,

suma kan taigi mi tak' na lei mi e lei?

Suma kan sori mi tak' den sani di mi taki no tru?”