Sranan Tongo Bible 2016 (STB16)
25

A di fu dri leisi di Bildad taki

251Dan Bildad fu Suak bigin taki baka. A taigi Yob taki:

2“A makti nanga san Gado e rigeri,

e meki sma tnapu nanga opo mofo.

A e sorgu tak' freide de ini heimel.

3A legre fu En abi someni srudati

tak' den no de fu teri.

Tapu suma a faya fu En no e opo?

4Dan fa wan libisma o man tyari ensrefi

soleki fa Gado wani?

Fa wan libisma di kmoto na ini wan uma

kan de sondro fowtu?

5Yere, efu srefi a faya fu a mun no krin gi En,

èn den stari no e brenki nofo gi En,

6dan libisma nanga den pikin fu den no de noti moro leki woron gi En.”

26

Yob koti Bildad mofo

261Ma Yob taigi Bildad taki:

2“A no spotu yepi yu yepi a wan

di kon swaki srefsrefi,

èn a no spotu kraka yu kraka a wan

di no abi krakti moro!

3A no spotu rai yu gi a wan di ben mankeri koni,

èn a no spotu sabi yu tyari kon na krin!

4Suma yepi yu fu man tak' den sortu sani dati?

Suma gi yu den prakseri fu taki so?

5Den yeye fu den dedewan e beifi srefsrefi gi Gado,

den di e libi ondro watra.

6Dedekondre de opo-opo gi En,

a pori presi no kan tapu

fu A no kan si san e psa drape.

7Gado hari a noordsei pisi fu heimel span,

pe noti ben de.

A anga grontapu pe ben leigi.

8A span den wolku nanga watra,

sondro tak' den e priti opo.

9A e tapu a kownusturu fu En, fu a no de fu si,

A e bradi wolku abra en.

10Fu prati leti nanga dungru,

A hari wan strepi lontu a se, pe a dungru nanga a leti e miti.

11Den postu di e hori a heimel e beifi,

den e bruya te Gado e tapu skreki gi den.

12Nanga a makti fu En A wini a se,

nanga a koni fu En A maskaderi Rahab,

a bun bigi sneki fu a se.

13Nanga a bro fu En A meki tak' heimel de fu si krinkrin,

nanga En anu A boro a sneki di ben wani lowe gwe es'esi.

14Yere, den sani disi na pikinso nomo fu san Gado kan du,

èn safri nomo wi e yere den wortu fu En.

Dan suma sa man ferstan den wroko fu En

te den e sori densrefi nanga bigi krakti nanga babari?”

27

271Yob taigi den mati fu en moro fara taki:

2“Mi e sweri na a libi Gado, di no wani gi mi mi leti,

na a Wan di abi ala makti, di furu mi nanga sari, taki:

3solanga libi de na ini mi ete,

èn a bro fu En e psa ini mi noso-olo,

4lei no sa kmopo na ini mi mofo,

èn tak' mi tongo no sa bedrigi sma.

5Un dati kan fergiti en tak' mi o gi un leti,

te leki mi bro koti,

mi o hori doro tak' mi no du ogri.

6Mi sa tan hori tak' mi na wan sma di e libi bun.

mi ati no e krutu mi fu no wan dei fu mi libi.

7Meki den feyanti fu mi kisi a srefi strafu

di ogri-ati sma e kisi,

meki den wan di e feti mi kisi a srefi strafu

di sma di no e libi bun e kisi!

8Sortu howpu den sma abi di no wani dini Gado,

te Gado e tyari wan kba kon na a libi fu den?

9Te den e bari suku yepi,

fu di den kon na ini benawtu,

Gado no o arki den.

10So wan sma sa man prisiri

nanga a Wan di abi ala makti?

A man begi Gado oten a wani?

11Mi o gi un leri now fu a krakti fu Gado,

mi o tyari kon na krin gi unu

san a Wan di abi ala makti prakseri fu du.

12Ma fu di un e meki leki un sabi den sani dati kba,

fu sanede un e tan taki soso lawlaw sani?

13Na den sani disi Gado, a Wan di abi ala makti,

e meki psa nanga ogri-ati sma,

nanga den sma di e pina trawan:

14Awinsi omeni manpikin a abi,

den alamala o dede na ini feti,

no wan sma fu en o abi nofo fu nyan.

15Den wan di tan na libi, o dede fu wan takru siki,

den uma fu den no o krei srefi.

16Awinsi a ogri-ati sma tyari moni kon na wan leki santi,

èn krosi leki na fu soso a kisi den,

17na sma di e libi bun o weri den krosi fu en,

èn na sma di no e du ogri o prati a moni fu en.

18A oso di a meki swaki leki anansititei,

a gersi a afdaki fu wan gronman.

19Fu wan laste leisi a e go sribi leki wan guduman,

te a opo en ai, ala a gudu fu en gwe.

20Sani di e frede en e fadon na e skin leki bigi watra,

neti yuru tranga winti e wai en tyari gwe.

21A tranga winti di e kmopo na oostsei e grabu en teki,

a e srepi en tyari gwe, wai en puru na ini en oso.

22Nanga bigi krakti a winti e bro na en tapu,

a ogri-ati sma e meki ala muiti fu lon gi en.

23A winti e bari na en baka leki sma

di e teki en e meki spotu,

a e froiti psa alasei pe a e go.”