Yob koti Bildad mofo

26¹Ma Yob taigi Bildad taki:

²“A no spotu yepi yu yepi a wan

di kon swaki srefsrefi,

èn a no spotu kraka yu kraka a wan

di no abi krakti moro!

³A no spotu rai yu gi a wan di ben mankeri koni,

èn a no spotu sabi yu tyari kon na krin!

⁴Suma yepi yu fu man tak' den sortu sani dati?

Suma gi yu den prakseri fu taki so?

⁵Den yeye fu den dedewan e beifi srefsrefi gi Gado,

den di e libi ondro watra.

⁶Dedekondre de opo-opo gi En,

a pori presi no kan tapu

fu A no kan si san e psa drape.

⁷Gado hari a noordsei pisi fu heimel span,

pe noti ben de.

A anga grontapu pe ben leigi.

⁸A span den wolku nanga watra,

sondro tak' den e priti opo.

⁹A e tapu a kownusturu fu En, fu a no de fu si,

A e bradi wolku abra en.

¹⁰Fu prati leti nanga dungru,

A hari wan strepi lontu a se, pe a dungru nanga a leti e miti.

¹¹Den postu di e hori a heimel e beifi,

den e bruya te Gado e tapu skreki gi den.

¹²Nanga a makti fu En A wini a se,

nanga a koni fu En A maskaderi Rahab,

a bun bigi sneki fu a se.

¹³Nanga a bro fu En A meki tak' heimel de fu si krinkrin,

nanga En anu A boro a sneki di ben wani lowe gwe es'esi.

¹⁴Yere, den sani disi na pikinso nomo fu san Gado kan du,

èn safri nomo wi e yere den wortu fu En.

Dan suma sa man ferstan den wroko fu En

te den e sori densrefi nanga bigi krakti nanga babari?”

27¹Yob taigi den mati fu en moro fara taki:

²“Mi e sweri na a libi Gado, di no wani gi mi mi leti,

na a Wan di abi ala makti, di furu mi nanga sari, taki:

³solanga libi de na ini mi ete,

èn a bro fu En e psa ini mi noso-olo,

⁴lei no sa kmopo na ini mi mofo,

èn tak' mi tongo no sa bedrigi sma.

⁵Un dati kan fergiti en tak' mi o gi un leti,

te leki mi bro koti,

mi o hori doro tak' mi no du ogri.

⁶Mi sa tan hori tak' mi na wan sma di e libi bun.

mi ati no e krutu mi fu no wan dei fu mi libi.

⁷Meki den feyanti fu mi kisi a srefi strafu

di ogri-ati sma e kisi,

meki den wan di e feti mi kisi a srefi strafu

di sma di no e libi bun e kisi!

⁸Sortu howpu den sma abi di no wani dini Gado,

te Gado e tyari wan kba kon na a libi fu den?

⁹Te den e bari suku yepi,

fu di den kon na ini benawtu,

Gado no o arki den.

¹⁰So wan sma sa man prisiri

nanga a Wan di abi ala makti?

A man begi Gado oten a wani?

¹¹Mi o gi un leri now fu a krakti fu Gado,

mi o tyari kon na krin gi unu

san a Wan di abi ala makti prakseri fu du.

¹²Ma fu di un e meki leki un sabi den sani dati kba,

fu sanede un e tan taki soso lawlaw sani?

¹³Na den sani disi Gado, a Wan di abi ala makti,

e meki psa nanga ogri-ati sma,

nanga den sma di e pina trawan:

¹⁴Awinsi omeni manpikin a abi,

den alamala o dede na ini feti,

no wan sma fu en o abi nofo fu nyan.

¹⁵Den wan di tan na libi, o dede fu wan takru siki,

den uma fu den no o krei srefi.

¹⁶Awinsi a ogri-ati sma tyari moni kon na wan leki santi,

èn krosi leki na fu soso a kisi den,

¹⁷na sma di e libi bun o weri den krosi fu en,

èn na sma di no e du ogri o prati a moni fu en.

¹⁸A oso di a meki swaki leki anansititei,

a gersi a afdaki fu wan gronman.

¹⁹Fu wan laste leisi a e go sribi leki wan guduman,

te a opo en ai, ala a gudu fu en gwe.

²⁰Sani di e frede en e fadon na e skin leki bigi watra,

neti yuru tranga winti e wai en tyari gwe.

²¹A tranga winti di e kmopo na oostsei e grabu en teki,

a e srepi en tyari gwe, wai en puru na ini en oso.

²²Nanga bigi krakti a winti e bro na en tapu,

a ogri-ati sma e meki ala muiti fu lon gi en.

²³A winti e bari na en baka leki sma

di e teki en e meki spotu,

a e froiti psa alasei pe a e go.”

Yob e taki abra koni

28¹“Yu abi presi pe sma e diki solfru

nanga presi pe sma e bron gowtu puru ala a doti.

²Sma e puru isri tu ini a gron

èn bron ston puru a kopro di de na ini.

³Te den e go diki ondro a gron,

den e tyari faya,

den e diki te pe den kan go

fu ondrosuku den ston ini a dipi dungru.

⁴Farawe fu pe sma e libi

den e meki olo ini a gron,

nanga titei den e saka go ini a olo,

den e firifiri pe den kan poti den futu,

sma no e psa drape srefsrefi.

⁵Tapusei a karu e gro fu en,

ma ondro a gron, faya e bron leki not'noti.

⁶Bika na drape abi a diri ston safier,

èn gowtu fasi na den diri ston dati leki puiri.

⁷No wan aka sabi a pasi di e go drape,

no wan tingifowru man si en tu.

⁸Tranga bus'meti no e go na en tapu,

lew srefi no e waka drape.

⁹Libisma e naki a tranga ston broko,

den e diki go te na den fundamenti fu den bergi.

¹⁰Den e kapu pasi ini den bergiston fu watra kan lon,

den e luku fin'fini fu kan si ibri diri ston drape.

¹¹Den e tapu a watra fu pe a e kmopo ini a gron,

èn den e tyari den gudu kon na krin di kibri drape.

¹²Ma koni, pe a de fu feni?

Pe a tanpresi fu ferstan de?

¹³Libisma no sabi a warti fu en,

èn a no de fu feni tu na grontapu pe den e libi.

¹⁴Den watra di de dipi ondro a gron e taki:

‘A no de ini mi,’

a se e taki:

‘A no de na mi.’

¹⁵Koni no de fu bai nanga gowtu,

yu no kan pai fu en nanga solfru.

¹⁶A diri moro a fini gowtu fu Ofir,

èn moro leki difrenti diri ston.

¹⁷Gowtu nanga grasi srefi no diri leki en,

a no de fu kenki tu gi skarki fu lala gowtu.

¹⁸Koraal nanga kristal no man tnapu na en sei tu,

koni diri moro redi koraal.

¹⁹A no de fu marki nanga a diri ston topaas fu Etiopia,

noso nanga lala gowtu.

²⁰A koni disi, pe a kmopo dan?

Pe a tanpresi fu ferstan de?

²¹A kibri gi a ai fu ala libisani,

srefi den fowru di e frei na loktu no man si en.

²²Dedekondre nanga dede e taki:

‘Na yere nomo den yesi fu wi yere fu en.’

²³Na Gado wawan sabi a pasi fu go na en,

na En wawan sabi pe a de fu feni.

²⁴Bika Gado e si go te na a kba pisi fu grontapu,

ala sani ondro a heimel A e si.

²⁵Di Gado poti o hebi a winti mus de,

o bigi a se mus de,

²⁶di A meki wan wèt gi a alen,

nanga wan pasi gi a faya fu a dondru,

²⁷dan A luku koni bun,

A luku en go, A luku en kon,

dan A poti en leki wan sani di bun.

²⁸Ma libisma A taigi taki:

‘Un arki, lespeki MASRA, dati na koni,

fu libi a ogri, dati na ferstan.’ ”