Sranan Tongo Bible 2016 (STB16)
29

Den laste sani di Yob taki fu den problema fu en

291Yob tak' moro fara taki:

2“Tye, efu sani ben kan go mi bun leki fosi,

leki den dei di Gado ben e kibri mi,

3di A ben e hori a lampu fu En tapu mi ede,

èn a faya fu En ben e sori mi a pasi ini a dungru.

4Den dei di mi ben abi ala mi krakti ete,

èn Gado ben de leki wan mati ini mi oso,

5a Wan di abi ala makti ben de nanga mi,

èn den pikin fu mi ben e lontu mi.

6A ten dati mi ben gudu psa marki,

èn a oleif-oli fu mi ben e lon bogobogo

na a presi pe den ben e meki a oli.

7Te mi ben e go na a bigi doro fu a foto,

èn go sidon na mi presi tapu a pren,

8yongu boi ben e kmopo drape, leki fa den ben e si mi,

man di ben owru bari moro mi, ben e opo tnapu.

9Tiriman ben e tapu fu taki

èn den ben e poti den anu tapu den mofo.

10Prenspari man ben e tapu den mofo wantron tu,

a tongo fu den ben e fasi loktusei fu den mofo.

11Ala sma di ben e yere mi ben e gi mi grani,

ala sma di ben e si mi ben e taki bun fu mi.

12Bika te mofinawan ben e bari suku yepi,

mi ben e yepi den,

sosrefi pikin di no abi p'pa nanga m'ma moro

noso wan tra sma fu yepi den.

13Sma di ben de fu dede, ben e blesi mi,

mi ben e meki a ati fu uma di masra dede kba,

furu nanga prisiri.

14Neleki fa krosi ben gwenti de na mi skin,

na so mi ben gwenti du bun.

Neleki fa mi ben gwenti weri mi langa dyakti

nanga wan duku lontu mi ede,

na so mi ben gwenti koti krutu nanga leti.

15Mi ben de den ai gi brenisma,

èn den futu gi lansma.

16Mi sorgu gi pôtisma leki wan p'pa,

èn mi taki gi sma di mi no ben sabi,

fu den ben kan kisi den leti.

17Mi naki den tifi broko fu ogri-ati sma

èn mi ferlusu den sma ini den mofo.

18Dat' meki mi ben e prakseri taki:

Mi o libi langa

èn mi o dede wan switi fasi ini mi oso.

19Mi ben de leki wan bon,

di rutu de ini bogobogo watra,

èn na tapu den taki fu mi

a dow ben e kon sribi te neti.

20Dorodoro sma ben e gi mi grani,

èn noiti mi ben firi swaki,

mi ben de leki wan bo di hari span.

21Te mi ben e gi rai, sma ben e tan tiri,

den ben e arki bun san mi ben e taki.

22No wan sma ben e tak' moro te mi ben kba taki,

a gersi leki na dringi den ben e dringi den wortu fu mi.

23Den ben e wakti na mi tapu leki fa sma e wakti alen,

leki fa gronman e angri fu a alen.

24Te mi ben e lafu nanga den,

den no ben man bribi en,

a lafu tapu mi fesi no ben e meki den lasi ati.

25Mi ben de den fesiman èn mi ben e sori den a pasi.

Mi ben e tiri den leki fa wan kownu e tiri a legre fu en.

Mi ben e trowstu den tu te den ben e sari.