Sranan Tongo Bible 2016 (STB16)
33

331Ma arki san mi o taigi yu now, Yob,

kaka yu yesi bun fu arki ala san mi o taki.

2Yere, mi de klar'klari fu taki,

den wortu de na tapu mi tongo kba.

3Den e kmopo na ini wan krin ati,

san mi o taki tru.

4Na a Yeye fu Gado meki mi,

na a bro fu a Wan di abi ala makti gi mi libi.

5Piki mi baka efu yu man,

meki yusrefi klari fu taki gi yusrefi.

6Yere, gi Gado mi nanga yu na a srefi,

A meki misrefi fu wan pisi kleidoti.

7Dat' meki yu no abi fu frede gi mi,

mi no o pina yu tumsi.

8Ma mi yere di yu ben taki a sani disi,

mi e yere den wortu fu yu ini mi yesi ete:

9‘Mi no du ogri, mi de sondro fowtu,

mi e libi krin, mi de sondro sondu.

10Ma toku Gado e feni sani fu kragi mi,

A e teki mi leki En feyanti.

11A e fasi mi futu nanga bui.

A e luru mi fu luku ala san mi e du.’

12Ma Yob, mi abi fu taigi yu tak' yu no abi leti.

Gado bigi moro libisma.

13Fu sanede yu e krutu nanga En,

tak' A no e piki tapu den sani di yu taki?

14Bika Gado e piki, A e piki dorodoro,33:14 Un kan puru a pisi disi so tu: A e piki tapu difrenti fasi.

ma libisma no e de na ai.

15Te neti, te den e sribi dipi,

noso te den e dyonko,

A e gi den dren, A e meki den e si sani.

16Dan A e tyari sani kon na krin gi den,

safri na ini den yesi.

A e stampu wan warskow gi den.

17A e du dati fu libisma kan tapu nanga kruktudu,

èn fu den no kisi heimemre,

18fu kibri den gi a grebi,

tak' den no abi fu koti a liba abra

di e tyari dedesma go drape.

19Gado e warskow libisma tu nanga siki,

fu poti den nanga pen tapu sikibedi,

nanga korsu di e bron den dorodoro te na ini den bonyo.

20Sowan sma e fuga fu nyanyan,

srefi gi a nyanyan di a lobi sote.

21Dei fu dei a e mangri,

den bonyo fu en di no ben de fu si,

e kon fu si now.

22Safrisafri a e go na en grebi,

safrisafri a e doro den dede makti.

23Ma kande wan engel ben kan hori baka gi en,

wan fu den dusundusun engel di e taki gi libisma,

fu sori en san a mus du.

24Dan a engel sa abi sari-ati nanga en

èn taigi Gado taki:

‘No meki a go na dedekondre,

mi feni wan fasi fu pai fu ferlusu en.’

25Dan a sikisma sa kisi en skin baka

èn krakti leki di a ben yongu.

26Te a o begi, Gado o piki en,

nanga prisiri a o kon na En fesi,

bika Gado gi en a grani fu en baka.

27A e singi gi ala sma taki: ‘Mi ben e sondu,

mi du sani di no ben bun srefsrefi,

ma mi no kisi a strafu di mi ben mus kisi.

28Gado kibri mi gi a grebi,

èn mi e libi nanga prisiri go moro fara.’

29Yere, Gado e du ala den sani disi dorodoro gi libisma:

30kibri den gi a grebi

èn meki den abi prisiri baka nanga den libi.

31Yob yere, arki mi bun now,

tan tiri meki mi taki.

32Efu yu abi wan sani fu taki,

taki en, bika mi e angri fu gi yu leti.

33Ma efu yu no abi noti fu taki,

dan yu tan tiri èn arki mi.

Meki mi leri yu san na koni.”

34

341Dan Elihu tak' moro fara taki:

2“Koniman, un arki san mi o taki,

un di e meki leki un sabi sani, un kaka un yesi.

3Bika neleki fa mofo e tesi nyanyan,

na so yesi e arki fin'fini san a e yere.

4Meki un teki a besroiti

san na a yoisti sani di musu psa,

meki un krutu a tori na tapu wan leti fasi.

5Bika Yob e taki: ‘Mi e libi bun,

ma Gado no wani gi mi mi leti.

6Awinsi fa mi abi leti,

sma e teki mi leki wan leiman.

Awinsi fa mi no du ogri,

a soro di a peiri fu En meki, e kiri mi.’

7Wan tra sma leki Yob no de,

di e teki Gado e meki spotu so makriki,

leki na watra a e dringi.

8A lobi de nanga sma di e du ogri,

èn a e waka nanga ogri-ati sma.

9Bika a e taki ini ensrefi taki:

‘Libisma no abi no wan wini

fu de mati nanga Gado.’

10Dat' meki un arki mi,

un di abi sowan krin ferstan,

Gado, a Wan di abi ala makti,

Gado no abi noti fu du nanga ogri noso kruktu.

11Ma Gado e pai libisma fu den sani di den e du,

A e sorgu tak' den e kisi san fiti a fasi fa den e tyari ensrefi.

12A tru, Gado, a Wan di abi ala makti,

Gado no abi noti fu du nanga ogri,

A e krutu sani na tapu wan leti fasi tu.

13Suma gi Gado a makti fu tiri grontapu?

Suma poti a heri grontapu ondro a tiri fu En?

14Efu Gado ben sa teki a besroiti

fu teki a yeye nanga a libibro fu En baka,

15ala san e libi bo dede wantron,

èn libisma bo tron doti baka.

16Efu yu e ferstan san mi e taki, arki mi dan,

kaka yu yesi gi den wortu fu mi.

17Efu Gado no e krutu sani na tapu wan leti fasi,

A no kan de tiriman.

Dan fa yu kan teki a prefuru

fu krutu a Wan di e du sani nanga leti

èn di makti sote?

18En di e taigi kownu taki: ‘Un no de noti!’

bigiman fu kondre taki: ‘Un ogri-ati sma unu!’

19Gado no e teki a sei fu tiriman,

èn A no e si a guduman moro hei moro a pôtiman,

bika na En meki ala libisma.

20Ini wan momenti den e dede,

mindrineti den guduman e skreki wiki

èn den no de moro.

Gado e puru den wan di abi makti na grontapu

sondro fu wan sma fasi den.

21Bika den ai fu En e luku ala san libisma e du,

èn A e si ala futu di den e puru.

22Gado e si den sma di e du ogri,

awinsi den go kibri ini a moro dipi dungru di de.

23Dat' meki A no e feni en fanowdu fu taigi libisma

oten A o kari den fu kon na krutu.

24A e maskaderi den di abi makti,

sondro fu ondrosuku a tori fu den,

dan A e poti trawan ini den presi.

25Iya, A sabi den wroko fu den,

mindrineti A e pusu den trowe,

èn A e maskaderi den.

26Fu den kruktudu fu den, A e fon den,

leti na ala sma fesi.

27Bika den no e waka na En baka moro

èn den no e libi leki fa En wani.

28Fu den ede a dyeme fu pôtiwan doro te na En,

A e yere a krei fu den di de ini hebi nowtu.

29Ma efu A no e du noti, suma kan krutu En?

Efu A kibri En fesi, suma kan si En?

Ma A e hori ai tapu libisma, tapu her'heri folku,

30fu sma no tron den kownu di no wani dini En,

sma di o pina a folku.

31Ma efu wan sma sa taigi Gado taki:

‘Mi sondu, ma mi o tapu nanga en,

32sori mi san mi no e du bun,

efu mi meki fowtu, mi no o meki den moro,’

33san yu e prakseri Yob,

Gado sa strafu so wan sma?

Taki meki mi yere, meki wan besroiti,

bika yu no e teki fa Gado e krutu sani.

34Sma di abi wan krin ferstan sa agri nanga mi,

wan koniman di e arki mi, sa taigi mi taki:

35‘Yob e taki leki a no abi ferstan,

soso lawlaw sani a e taki.

36Mi e winsi taki Yob kisi a moro hebi strafu di de,

fu di a piki leki wan ogri-ati sma.

37Sondu tapu sondu a e lai na en tapu,

bika leti pe un de a e gi Gado bigitaki.’ ”

35

351Elihu tak' moro fara taki:

2“Yob, yu denki tak' yu abi a leti fu taki:

‘Mi e libi na tapu wan leti fasi na Gado fesi?’

3Ma a srefi ten dati yu e aksi tu taki:

‘San a sani dati e du gi mi?

Sortu wini mi abi efu mi no e sondu?’

4Mi o piki yu na tapu a sani dati,

yu nanga den mati fu yu.

5Fringi wan ai go na heimel,

luku o hei den wolku de loktusei fu yu.

6San yu e du Gado efu yu e sondu,?

Awinsi yu e sondu dorodoro,

san yu e du En nanga dati?

7Efu yu e libi na tapu wan leti fasi,

san yu e gi En nanga dati?

San A kan kisi fu yu?

8A ogri-ati fasi fu yu

kan du soso wan libisma leki yusrefi wan sani,

na den abi wini tu efu yu e libi bun.

9Te sma de ini hebi benawtu,

fu di sma di abi makti e pina den,

den e bari e suku yepi.

10Ma no wan fu den e taki:

‘Pe Gado, di meki mi, de?

Pe a Wan de di kan meki mi singi ini tranga ten,

11a Wan di gi un moro ferstan

leki den meti di e waka na grontapu,

èn moro koni

leki den fowru di e frei na loktu?’

12Dat' meki den kan bari suku yepi,

ma Gado no e piki den,

bika takru-ati sma tyari heimemre.

13Yu kan teki en fu mi, na fu soso den e kari,

Gado no e arki den,

a Wan di abi ala makti no e luku den na wan ai.

14O moro A no o arki yu, Yob,

now di yu taki tak' yu no e si En,

èn tak' a tori fu yu de na En fesi,

ma dati A e meki yu wakti?

15Èn now, fu di Gado no e strafu,

awinsi fa En ati e bron,

fu di A gersi tak' a no e luku a sondu so fini,

16Yob e opo en mofo e taki lawlaw sani,

èn taki wan lo sani di ensrefi no e ferstan.”