Sranan Tongo Bible 2016 (STB16)
40

401Dan MASRA taki baka nanga Yob. A sten fu En ben de fu yere ini wan tranga winti. A taigi Yob taki:

2“Meki yusrefi klari, bika Mi o aksi yu wantu sani,

èn yu mus piki Mi.

3Na sori yu wani sori srefi tak' Mi no e krutu nanga leti?

Na sori yu wani sori tak' Mi fowtu èn yu abi leti?

4Yu abi a srefi krakti leki Mi?

Te yu e taki, a sten fu yu e dondru leki di fu Mi?

5Moi yusrefi dan nanga grani nanga makti,

weri glori nanga krakti dan leki krosi na yu skin.

6Lusu a hebi atibron fu yu,

efu yu si wan heimemre sma,

broko en saka,

7broko ala heimemre sma saka,

maskaderi den ogri-ati sma wantewante.

8Beri den alamala,

sroto den ini dedekondre.

9Dan Mi srefi sa gi yu grani,

bika dan yu wini nanga yu eigi krakti.

10Prakseri a nijlpaard di Mi meki,

neleki yu.

A e nyan grasi leki wan kaw.

11Ma luku den bowtu fu en, fa den tranga,

den titei fu en bere, fa den steifi.

12A kan meki a tere fu en tnapu leki wan sedrebon,

den titei fu en bowtu, na ini bondru den de.

13Den bonyo fu en tranga leki kopro peipi,

den anu nanga den futu fu en, leki isri tiki.

14En na a moro ferwondru sani di Gado meki,

soso a Wan di meki en kan hari wan deigri gi en.

15Den bergi pe ala den bus'meti e prei,

e sorgu gi a nyanyan fu en.

16Ondro a mokomoko a e didon,

mindri a langa grasi fu a swampu,

pe a no e de fu si.

17A mokomoko e gi en wan kowrupe,

den pankukuwiwiri fu a kriki e lonboto en.

18A watra kan lon o tranga a wani, a no e seki,

a e de tiri fu en

te den skwala fu a Yordanliba e naki na en mofo.

19Suma sa man grabu en nanga aka,40:19 Un kan puru a pisi disi so tu: suma sa man grabu en te a de na ai.

èn hari wan titei psa ini en noso?

20Yu sa man kisi wan kaiman40:20 A Hebrewtekst abi wan Leviatan. nanga wan aka,

dan yu hari en kon na syoro?

Yu sa man fasi a tongo fu en nanga titei?

21Yu sa man hari wan titei psa ini en noso,

noso aka en na en kakumbe?

22Yu denki dan taki a sa begi yu,

noso taki switi nanga yu?

23Yu denki taki a o meki wan ferbontu nanga yu,

taki a o tron yu knekti fu têgo?

24Yu denki taki yu o man prei nanga en,

prei nanga en leki fa den e prei nanga pikin fowru,

èn tai en na wan titei gi den umapikin fu yu?

25Fisiman no abi fu denki taki den o man kisi en fu seri,

dan den prati a moni makandra.

26Awinsi yu fringi omeni lansri fasi na en skin nanga en ede,

noti no o yagi.

27Yu kan prefuru tu fu grabu en nanga yu anu,

yu no o fergiti a feti di a o feti nanga yu,

èn yu no e du en noiti moro.

28Iniwan sma di wani kisi en e kon na syen,

bika luku a e luku den wawan, den e fadon kba.

41

411Efu no wan sma e teki a prefuru fu go ferferi en,

suma o man hori feti nanga Mi?

2Suma ben gi Mi wan sani tak' Mi mus pai en baka?

Ala sani ondro a heri heimel na fu Mi.41:2 A Hebrewtekst fu a pisi disi no krin.

3Meki Mi ferteri yu fu den bowtu fu en,

a bigi krakti di a abi,

nanga fu a spesrutu fasi fa a meki.

4Suma o man hari a buba fu en puru na en skin?

San o man boro a dobru isri dyakti fu en?41:4 Na so a Grikitekst abi en. A Hebrewtekst abi: Suma o man waka go na en nanga wan sani fu poti ini en mofo fu kan tiri en?

5Suma o man hari a mofo fu en opo?

Den tifi fu en de fu frede sote.

6Bun deki buba de tapu a baka fu en,

den fasi bun steifi na wan.

7A wan e tuka so bun na a trawan,

winti srefi no kan psa na den mindri.

8A fasi fa den fasi na makandra,

den no man prati.

9Te a e koso, faya e koti,

èn den ai fu en redi leki te a son e opo.

10Faya e kmopo ini en mofo,

a e spiti kmopo leki fa a e spiti kmopo fu wan ipi krofaya.

11Smoko e kmopo fu den noso-olo fu en,

neleki fa a e kmopo fu wan ketre di e kuku.

12A bro fu en e meki krofaya teki faya,

wan faya e kmopo na ini en mofo.

13Na a neki fu en a krakti fu en de,

ala sma di e si en e bruya.

14A meti fu en no e anga,

ma a fasi bun steifi na en skin.

15A ati fu en tranga leki ston,

a no abi no wan dropu frede.

16Te a e opo, a gado fu a se srefi e frede,

den skwala dati no sabi sortu sei den mus lon go.

17Na fu soso sma e hari den deigri fu feti nanga en,

na fu soso den e sutu peiri èn fringi lansri na en tapu.

18Isri de leki drei grasi gi en,

kopro leki pori udu.

19A no e lon gi peiri,

ston di sma e sutu na en tapu de leki grasi gi en.

20Bigi tiki a e si leki drei grasi

èn a e lafu gi a babari fu wan lansri di sma fringi.

21En ondrobere srapu leki pis'pisi kleipatu,

a e libi marki na baka te a e hari psa ini a tokotoko.

22Te a go na watra a watra e gersi wan patu di e kuku,

a se e gersi wan ketre nanga kuku oli.

23A skuma di a e libi na baka de leki wan pasi tapu a watra.

24Noti na grontapu de leki en,

wan sani di Mi meki di no sabi san na frede.

25A e si ala sani di e si ensrefi hei leki noti,

en na a kownu fu ala bigi meti.”

42

Yob saka ensrefi

421Dan Yob piki taki:

2“Mi sabi taki Yu abi a makti fu du ala sani,

èn taki noti no kan tapu Yu te Yu poti fu du wan sani.

3Yu ben aksi mi fa mi du teki a prefuru fu krutu a besroiti fu Yu,

sondro fu sabi san mi e taki.

A tru, mi ben taki sani di mi no ben ferstan,

sani di bigi tumsi gi a pikin ferstan fu mi.

4Yu ben taigi mi tu taki mi mus tan tiri te Yu e taki,

èn tak' mi mus piki na tapu den sani di Yu aksi mi.

5Fosi na soso yere mi ben yere fu Yu,

ma now mi si Yu nanga mi eigi ai.

6Dat' meki mi e teki ala sani baka di mi taki,

mi e begi Yu pardon tu,

leti dyaso pe mi sidon ini a doti nanga a asisi.”

7Di MASRA ben kba taki nanga Yob, A taigi Elifas fu Teman taki: “Mi ati e bron srefsrefi tapu yu nanga den tu mati fu yu, bika un no taki wan leti fasi fu Mi. Mi knekti Yob wawan taki so fu Mi. 8Dat' meki iniwan fu un mus teki seibi bulu nanga seibi man skapu, dan un e go nanga den na mi knekti Yob. Drape un mus bron den leki wan ofrandi gi Mi, dan Mi knekti Yob sa begi gi unu. Mi sa du san a o aksi Mi. So Mi no sa strafu unu fu a tak' di un no taki wan leti fasi fu Mi. Mi knekti Yob wawan taki so fu Mi.” 9Dan Elifas fu Teman, Bildad fu Suak nanga Sofar fu Naama go du san MASRA taigi den. Èn MASRA du san Yob aksi En. 10Dan baka di Yob begi gi den mati fu en, MASRA meki a tron wan guduman baka. MASRA gi Yob dobru fu ala san a ben abi fosi.

11Baka dati ala den brada nanga s'sa fu Yob nanga ala den sma di a ben sabi go nyan nanga en ini en oso. Den taigi en taki den firi nanga en èn den trowstu en fu a hebi tesi di MASRA ben gi pasi fu miti en. Iniwan fu den gi en wan solfru moni nanga wan gowtu keti. 12MASRA blesi Yob ini a ten di ben de na en fesi moro leki a ten di ben de na en baka. A kisi tin-na-fo dusun skapu nanga krabita, siksi dusun kameel, tu dusun kaw di e wroko tu na tu, nanga wan dusun umaburiki. 13A kisi seibi manpikin nanga dri umapikin tu. 14A fosi umapikin fu en a kari Yemima, a di fu tu Kesia nanga a di fu dri Keren-Hapuk. 15Den umapikin fu Yob ben de den moro moi umasma fu a heri kondre. Yob seti en so taki den umapikin fu en kisi den pisi tu ini ala san a ben abi, neleki den brada fu den. 16Baka dati Yob libi ete wan hondro nanga fotenti yari. A si den granpikin fu en nanga den pikin fu den. 17Yob dede nanga wan moi libimarki, a libi te a sari en.