Sranan Tongo Bible 2016 (STB16)
5

51Bari suku yepi, Yob! No wan sma e arki yu.

Sortu wan fu den engel yu wani aksi fu yepi yu?

2Dede na a bakapisi fu te wan don sma e sidon nyan en niri,

èn konsensi fonfon e tyari dede gi wan don sma.

3Mi ben si wan don sma di ben abi en bun,

mi fluku a oso fu en wantron.

4No wan sei den manpikin fu en e feni yepi.

No wan sma e taki gi den,

te krutubakra e leisi strafu gi den na den doro fu a foto.

5Sma di abi angri e nyan den sani di den don sma ben koti,

den sani di gro mindri makamaka srefi den e teki,

èn gridi sma e angri fu a gudu fu den.

6Ogri no e gro kmopo ini a doti,

problema no e kmopo na ini a gron.

7Ma leki fa a no abi misi tak' faya o spiti kmopo fu wan ipi udufaya,

na so problema o kon tapu a pasi fu iniwan libisma.

8Ma Yob, efu mi ben de ini yu presi,

mi bo aksi Gado san mi mus du,

èn mi bo libi a heri tori fu mi gi En.

9Bika Gado e du bigi sani di libisma no man ferstan,

den wondru di A e du no de fu teri.

10A e meki alen fadon na grontapu,

A e meki den pranigron kisi watra.

11A e meki libisma di no de noti tron wan bun sani.

A e opo den wan baka di de na low.

12Gado e tyari bruya kon ini den sani di bedrigiman e prakseri fu du,

den no man du no wan fu den sani dati.

13A e kisi den sma di denki tak' den koni nanga den eigi triki,

A e meki tak' den sani di bedrigiman wani du, no go doro.

14Gado, meki deiten tan leki neti gi den sortu sma dati,

meki den e waka e firifiri leki breniman bigibigi dei.

15Gado e kibri den mofinawan fu den wortu fu den ogri-ati sma.

A e puru den swakiwan ini a anu fu den trangawan.

16So den swakiwan e abi howpu,

èn den ogri-ati sma abi fu tapu den mofo.

17A sma di Gado e strafu na wan blesi sma,

dat' meki yu no mus si en leki noti

te a Wan di abi Ala Makti e strafu yu.

18Bika te Gado gi wan sma wan mankeri, Ensrefi e dresi en,

te A naki, A e dresi nanga En eigi anu.

19Gado sa ferlusu yu ala leisi baka fu problema,

fu ogri no miti yu.

20Ini bigi angriten A o hori yu na libi,

èn te feti broko ini a kondre, A o kibri yu gi a deigri.

21Gado o kibri yu fu takru wortu di sma e taki fu yu

èn yu no abi fu frede gi bigi dyugudyugu di e tyari pori.

22Bigi dyugudyugu nanga angriten yu o si leki lawlaw sani,

èn krasi meti no sa skreki yu moro.

23Ston no sa hori den sani di yu prani na baka fu den gro,

èn krasi meti no o broko kon na yu tapu.

24Dan yu sa sabi tak' sani o go bun ini yu oso.

Te yu o go na a skapupen fu yu,

yu o si tak' no wan no o mankeri.

25Dan yu sa sabi tak' yu o kisi furu pikin,

den o furu leki grasi di e gro na alasei.

26Yu o dede te yu doro wan moi libimarki fosi,

neleki fa den e puru karu te a lepi fosi.

27Yob yere, ala den sani tru di mi taigi yu, wi ondrosuku den.

Poti yu prakseri na den tapu èn teki san un taigi yu.”

6

Yob piki Elifas

61Ma Yob piki Elifas taki:

2“Efu wan sma bo man wegi a sari di mi e sari,

efu wan sma bo man poti ala pina fu mi na tapu wan wegi,

3a bo sori tak' den hebi moro leki ala a santi fu a se.

Na dat' meki mi ben taki sondro fu prakseri san mi e taki.

4Bika a Wan di abi ala makti sutu mi nanga den peiri fu En,

a dresi di A poti na den, go dipi na ini mi skin.

Mi tnapu fesi nanga fesi nanga den bigi nowtu

di Gado seti poti gi mi.

5Wan buriki no e bari fu angri te a feni grun grasi fu nyan,

wan kaw no e bari tu te den poti nyanyan gi en.

6Nyanyan sondro sowtu no abi tesi,

a weti fu eksi moro ogri.

7Mi no lostu den sortu nyanyan dati srefsrefi,

den e drai mi bere.

8Tye, efu Gado ben sa yere mi begi,

efu A ben sa wani du san mi aksi En.

9Efu Gado ben sa wani maskaderi mi,

efu A ben sa wani langa en anu,

èn koti a bro fu mi!

10Dati bo de wan trowstu gi mi,

mi bo dyompo fu prisiri ini a hebi pen di mi e nyan,

bika mi du ala ten san Gado di santa, taki.

11Bika mi no abi a krakti fu nyan a pina disi moro langa.

Sortu bun e wakti mi tak' mi bo wani libi go moro fara?

12Mi no tranga leki ston,

a skin fu mi no meki fu kopro.

13Mi no man yepi misrefi moro,

èn no wan sei mi kan go fu suku yepi.

14Sma di no abi sari-ati gi mati di de na ini hebi nowtu,

no abi frede tu gi a Wan di abi ala makti.

15Unu leki mati fu mi no de fu fertrow

Un de leki watra fu wan kriki di e lon psa.

16Ini a kowruten den e span nanga ijs nanga sneeuw,

di e tapu a watra.

17Ma te a drei hori, den e drei sote,

tak' den no e de fu feni srefsrefi moro.

18Den sma di e go na fara presi

èn libi a pasi di den e waka fu go suku a kriki,

o feni densrefi te ini wan sabana èn lasi den libi drape.

19Sonwan fu den sma dati di kmoto fu Tema, e suku fu en,

trawan di kmoto fu Seba poti den howpu na en tapu.

20Ma a howpu di den ben abi meki den kon na syen,

di den doro pe a kriki ben mus de,

den no man bribi san den e si.

21Un de leki den drei kriki gi mi.

Un si a bigi nowtu di miti mi, dan un e bruya.

22Mi no man memre tak' mi aksi un fu un gi mi wan sani,

noso fu un pai wan sma wan tyuku gi mi,

23noso tak' mi aksi un fu un ferlusu mi fu a sma di e pina mi,

èn fu un pai a sma di e basi mi, fu a fri mi.

24Un sori mi san mi du fowtu, dan mi sa tan tiri.

Un meki mi ferstan san mi no du bun.

25Wortu di kmopo na ini wan krin ati e gi krakti,

ma a krutu di un e krutu mi no e du noti gi mi.

26Fu sanede un e prakseri taki den sani san mi taki no bun.

Na si un e si den sani leki noti di wan sma e taki

di no abi howpu moro?

27Un no abi trobi fu fringi lot srefi fu kan wini wan pikin,

di no abi p'pa nanga m'ma moro,

un no abi trobi fu seri un mati srefi!

28Mi wani aksi unu fu un luku mi na ini mi fesi.

Mi e taigi unu tak' a no lei mi e lei gi unu.

29Mi e begi un fu un tapu fu krutu mi.

Iya, un tapu nanga en.

Un no man si tak' mi no du no wan ogri?

30A no lei mi e lei te mi e taki abra a pina fu mi,

mi sabi a difrenti bun mindri koloku nanga ongoloku.

7

Yob e krutu nanga Gado

71Solanga wan libisma de na libi, a mus wroko tranga.

A e psa den dei fu en leki wan man di e wroko dei wroko,

2leki wan srafu di e angri fu wan kowrupe,

èn leki fa wan man di e wroko dei wroko,

e angri fu en pai na a kba fu a dei.

3Na so Gado meki mi e libi fu soso,

a wan mun baka a trawan,

a wan neti baka a trawan mi e pina.

4Te mi e go sribi mi e aksi misrefi:

‘oten a neti o psa?’

Bika a neti e go nanga langa, èn so mi e fuga

fu a drai di mi e drai na tapu a bedi te musudei.

5Mi heri skin tapu nanga tranga doti èn nanga woron,

mi buba kon drei, den soro e puru pori watra.

6Den dei fu mi e kon es'esi na wan kba,

neleki a titei na a nanai fu wan sma di e nai krosi es'esi.

Es'esi den kon na wan kba, sondro wan enkri howpu.

7Gado, memre tak' a libi fu mi e psa gwe,

neleki a soktu fu wan sma.

Den ai fu mi no sa si a bun fu a libi moro.

8Den ai fu Yu di e luku mi, no o si mi moro.

Yu o luku fu mi, ma mi no o de fu feni moro.

9Leki fa wan wolku e psa fu no drai kon moro,

na so wan libisma di saka go na ini dedekondre,

no e kon moro.

10Noiti moro a e drai go baka na en oso,

den sma di ben sabi en, e fergiti en.

11Dat' meki mi no o hori mi mofo,

mi o taki, nanga ala a pen di mi e nyan,

mi o kragi, awinsi fa mi e nyan mi niri.

12Mi a no a se noso wan fu den bun bigi sneki fu a se,

taki Yu mus hori ai ala ten na mi tapu.

13Te mi prakseri taki:

‘Mi bedi sa de wan trowstu gi mi,

mi sribipe sa lekti a sari fu mi,’

14dan Yu e gi mi takru dren di e meki mi e skreki wiki,

Yu e meki mi e si sani di e frede mi.

15Dat' meki a moro betre efu wan sma sa tyokro mi kiri,

a moro betre mi dede,

dan taki a skin fu mi tron soso bonyo.

16Mi e fuga fu a libi fu mi, a no fu têgo mi o libi.

Gado, libi mi nanga rostu, mi no abi langa moro kba fu libi.

17Fu sanede Yu e si libisma so hei?

Fu sanede Yu e poti Yu prakseri na en tapu?

18Ala mamanten Yu e luku en san a e du,

ala momenti Yu e tesi en.

19Oten Yu o puru Yu ai na mi tapu,

oten Yu o meki mi bro pikinso fu mi kan swari mi spiti?

20Sortu sondu mi du di hati Yu so?

Yu di e hori ai nomo na mi tapu,

fu sanede na mi wawan Yu e si?

Fa a du kon tak' mi tron wan hebi gi Yu?

21Efu mi sondu,

fu sanede Yu no e gi mi pardon dan?

Efu mi du sani di no bun,

fu sanede Yu no kan si den leki noti.

Bika heri esi mi o didon na ondro gron,

dan Yu o suku mi,

ma mi no o de na libi moro.”