Sranan Tongo Bible 2016 (STB16)
9

Yob piki Bildad

91Ma Yob piki Bildad taki:

2“Iya, mi sabi san yu e taki.

Wan libisma no o man wini fu Gado fesi krutu.

3Efu toku wan sma wani go na krutu nanga En,

a sma no o man piki En,

awinsi A aksi a sma wan dusun sani.9:3 Un kan puru a pisi disi so tu: A sma kan aksi En wan dusun sani sondro fu A piki.

4Gado koni èn A tranga sote,

no wan sma kan kaka futu gi En dan noti no psa nanga en.

5A e puru bergi fu den presi sondro fu gi wan warskow,

A e drai den tapu na ini En atibron.

6A e meki grontapu seki na tapu en fundamenti,

den postu di hori en srefi e beifi.

7A e komanderi a son fu a no opo,

A e kiri a faya fu den stari.

8En wawan hari a heimel span na loktu,

èn A e waka tapu den bigi skwala fu a se.

9Na En meki den grupu stari di den e kari Bigi Beer,

Orion nanga Pleiaden,

sosrefi a grupu di de na zuidsei tu.

10Gado e du bigi sani di libisma no man ferstan,

den wondru di A e du no de fu teri.

11Te A e psa na mi sei,

mi no e si En,

te A e psa krosbei fu mi,

mi no sabi srefsrefi tak' A de drape.

12Suma sa man tapu En te A wani teki wan sani?

Suma sa man aksi En taki: ‘San Yu e du?’

13A atibron fu Gado no e kowru es'esi,

srefi den feyanti fu En di ben yepi a bun bigi sneki Rahab,

ben abi fu boigi gi En.

14Dan fa mi o man opo mi mofo?

Pe mi o feni wortu fu man taki gi misrefi?

15Awinsi mi no fowtu, a moro betre mi tan tiri

èn begi mi Krutubakra,

fu A abi sari-ati nanga mi.

16Efu mi kari En fu kon na krutu èn A piki tak' A o kon,

a o de wan fruwondru sani gi mi tak' A arki mi.

17A e meki wan tranga winti naki mi trowe,

A e gi mi mankeri moro nanga moro,

sondro tak' mi du wan sani.

18A no e gi mi a okasi fu mi teki bro srefi,

mi e fuga fu ala a pina di mi e nyan.

19Te a kon fu luku suma moro tranga,

a no abi misi tak' na En.

Te a kon fu gi frantwortu,

A e taki: ‘suma o man tyari Mi go na krutu?’

20Awinsi mi abi leti, A o meki mi eigi mofo krutu mi,

awinsi mi no du ogri, A o krutu mi tak' mi du.

21Mi sabi tak' mi no du ogri,

ma mi no abi trobi moro san wani psa nanga mi,

a libi fu mi e fuga mi.

22Ma Gado no abi trobi nanga den sani dati.

Na dat' meki mi e taki:

‘A e tyari wan kba kon na a libi fu a wan di e du ogri

nanga a wan di no e du ogri srefsrefi.’

23Efu wantronso wan takru siki panya,

Gado e lafu te A si fa den sma di no e du ogri, e bruya.

24Gado gi a grontapu abra ini a makti fu ogri-ati sma,

èn A breni a ai fu den krutubakra,

fu den no kan koti krutu nanga leti.

Efu a no En e du den sani dati, dan suma dan?

25Leki wan boskopuman di e lon es'esi,

na so esi den dei fu mi e psa gwe.

no wan bun den e no tyari kon.

26Es'esi den e psa gwe, leki boto,

leki wan aka, di e frei go grabu wan meti.

27Gado, awinsi mi taigi Yu tak' mi no o krutu moro,

tak' mi no o poti wan sari fesi moro,

ma tak' mi o lafu,

28mi e frede gi a pen di Yu kan seni kon baka,

bika mi sabi tak' Yu e si mi leki wan sma di du ogri.

29Efu a krin gi Yu tak' mi du ogri,

dan na fu soso mi e tan suku mi leti.

30Awinsi mi wasi mi skin nanga a moro krin watra di de,

krin den anu fu mi nanga sopo,

31Yu o fringi mi ini wan olo pe den e trowe doti,

tak' srefi den krosi fu mi o fisti fu mi.

32Gado a no wan libisma leki mi,

noso mi bo man tak' gi misrefi

te mi nanga En ben tnapu fesi krutubakra.

33Mi e winsi tak' wan sma ben de

di ben kan koti a krutu fu unu,

wan sma di abi makti abra un ala tu.

34Dan Gado no bo man strafu mi so moro,

A no bo man meki mi e frede so moro.

35Dan mi bo man tak' gi misrefi tu

sondro fu frede gi En,

bika mi sabi fu misrefi taki mi no du ogri.