Sranan Tongo Bible 2016 (STB16)
10

A feti na a foto Gibeon

101Kownu Adonisedek fu Yerusalem ben kisi fu yere tak' Yosua ben teki a foto Ai abra èn tak' a ben kiri ala den sma fu en. A ben yere tu tak' a srefi sani di Yosua ben du nanga Yeriko nanga a kownu fu en, na dati a du tu nanga Ai nanga a kownu fu en, sosrefi tak' den sma fu Gibeon ben meki mati nanga Israel èn tak' den ben e libi now na den mindri. 2A sani dati meki Adonisedek nanga en folku kon frede srefsrefi, bika Gibeon ben de wan bigi foto. A ben bigi leki den tra foto di ben abi wan kownu. A ben bigi moro Ai srefi èn ala den man fu Gibeon ben de dyadya fetiman. 3Dat' meki kownu Adonisedek fu Yerusalem seni boskopuman go na kownu Hoham fu Hebron, kownu Piram fu Yarmut, kownu Yafia fu Lakis nanga kownu Debir fu Eglon. A seni a boskopu disi gi den: 4“Un kon yepi mi fu un go feti nanga Gibeon. Bika den meki wan ferbontu nanga Yosua nanga den Israelitisma tak' noiti den o feti nanga densrefi.” 5Dan so den feifi kownu fu den Amoritisma bondru densrefi: a kownu fu Yerusalem, a kownu fu Hebron, a kownu fu Yarmut, a kownu fu Lakis nanga a kownu fu Eglon. Makandra nanga ala den legre fu den, den hari go na Gibeon, den lontu a foto na alasei, dan den bigin feti nanga en. 6Ne den man fu Gibeon seni a boskopu disi go gi Yosua, ini a kampu fu den Israelitisma na Gilgal: “No libi den knekti fu yu wawan, kon es'esi na wi fu ferlusu wi èn fu yepi wi. Bika ala den kownu fu den Amoritisma di e libi ini den bergi, bondru kon feti nanga wi.”

7Dan Yosua hari kmoto na Gilgal, makandra nanga a heri legre fu en, soso bun dyadya fetiman. 8Dan MASRA taigi Yosua taki: “Yu no abi fu frede gi den, bika Mi e gi den abra na yu. No wan fu den o man hori feti nanga yu.” 9Yosua ben abi wan neti nomo fanowdu fu kmoto fu Gilgal go na Gibeon. Dan a broko go na a feyanti tapu sondro fu den ben ferwakti en. 10MASRA meki den bruya di den si a legre fu Israel. Dat' meki Yosua ben kan teki wan bigi wini na den tapu na Gibeon. A lon na den baka go na a sei fu a bergipasi fu Bet-Horon èn a kiri wan lo fu den te na den foto Aseka nanga Makeda. 11Di den feyanti ben e lon saka fu a bergipasi fu Bet-Horon, MASRA meki bigibigi tranga pis'pisi ijs fadon kmoto fu heimel na den tapu, go te na Aseka. A ijs dati kiri moro furu fu den, dan di den man fu Israel ben kiri na ini feti. 12Bika a dei dati, a dei di MASRA gi den Amoritisma abra na Israel, Yosua ben taki nanga MASRA leti fesi ala den Israelitisma. A ben taki:

“Son, tan tnapu na Gibeon,

munkenki tan tnapu na a Ayalondal.”

13Dan a son tan tnapu

èn a munkenki no gwe,

te leki Israel ben puru en atibron tapu en feyanti.

A sani disi skrifi poti ini a Buku fu den sma di de fu fertrow. A son no saka a heri dei dati, ma a tan tnapu na heimel. 14Wan dei leki a dei dati no ben de bifo èn a no kon noiti moro, pe MASRA piki a begi fu wan libisma a fasi dati. MASRA du en fu di A ben e feti gi Israel. 15Baka dati Yosua nanga a heri legre drai go baka na a kampu fu den na Gilgal.

16Den feifi kownu fu den Amoritisma ben lowe èn den ben go kibri ini wan bergi-olo na Makeda. 17Di Yosua kisi fu yere tak' na drape den kibri, 18a komanderi den man fu en taki: “Un lolo bigi ston poti fesi a olo èn un poti waktiman. 19Ma unu no mus tan dyaso. Un lon go moro fara baka un feyanti èn un kiri ibriwan fu den di de na libi ete. Un no gi den a okasi fu den lon go ini den foto fu den, bika MASRA, a Gado fu unu, gi den abra na unu.” 20Den Israelitisma teki wan bigi wini tapu den feyanti fu den. Den kiri furu fu den èn wantu nomo ben man lowe go na den tranga foto fu den. 21Baka dati den drai go baka na Yosua na a kampu fu den na Makeda. No wan sma ben kisi wan mankeri èn no wan sma ben taigi den Israelitisma wan sani.

22Dan Yosua taki: “Un opo a bergi-olo dan un tyari den feifi kownu kon gi mi.” 23Den du san a taki èn den puru den feifi kownu fu a bergi-olo tyari go gi Yosua. Dati ben de a kownu fu Yerusalem, a kownu fu Hebron, a kownu fu Yarmut, a kownu fu Lakis nanga a kownu fu Eglon. 24Di den tyari den kownu gi en, a kari ala den man fu Israel kon na en. Dan a taigi den fesiman fu a legre, di ben feti makandra nanga en, taki: “Un kon krosbei dan un poti un futu tapu den neki fu den kownu disi.” Den go èn den poti den futu tapu den neki fu den kownu. 25Dan Yosua taigi den taki: “Un no abi fu frede èn un no abi fu lasi ati. Un mus tranga èn un mus abi dek'ati. MASRA o du a srefi sani disi nanga ala den feyanti nanga san un mus feti ete.” 26Baka dati Yosua naki den feifi kownu kiri, dan a anga den na feifi bon. Den dedeskin fu den tan drape te neti. 27Di a son ben e saka Yosua komanderi den man fu en fu puru den na den bon, fu trowe den ini a bergi-olo pe den ben go kibri èn fu tapu a bergi-olo nanga bigi ston. Te tide den ston dati drape ete.

28A srefi dei dati Yosua nanga a legre fu en teki a foto Makeda abra. Den kiri a kownu nanga ala sma drape nanga deigri. Ala sma di ben e libi drape den kiri, no wan sma den meki tan na libi. A srefi sani san Yosua ben du nanga a kownu fu Yeriko, a du tu nanga a kownu fu Makeda.

Yosua e teki den foto na zuidsei abra

29Baka dati Yosua nanga a heri legre fu Israel hari go moro fara, fu Makeda go na Libna èn den feti nanga a foto dati. 30Dan MASRA gi a foto nanga a kownu fu en ini a makti fu Israel. Den kiri ala sma drape nanga deigri, no wan sma den meki tan na libi. A srefi sani di Yosua du nanga a kownu fu Yeriko, a du tu nanga a kownu fu Libna.

31Baka dati Yosua nanga a heri legre hari go moro fara, fu Libna go na Lakis. Den lontu a foto dati na alasei dan den feti nanga en. 32Tapu a di fu tu dei fu a feti MASRA gi Lakis abra ini a makti fu Israel. Den teki a foto abra èn den kiri ala libisma drape nanga deigri, soleki fa den ben du nanga Libna. 33Dan kownu Horam fu Geser hari kon fu yepi Lakis. Ma Yosua fon en nanga den man fu en, te leki a kiri den alamala.

34Baka dati Yosua nanga a legre hari go moro fara, fu Lakis go na Eglon. Den lontu a foto dati na alasei dan den feti nanga en. 35A srefi dei dati den teki a foto abra èn den kiri ala sma drape nanga deigri. Ala sma di ben e libi drape den kiri, soleki fa den ben du nanga Lakis.

36Baka dati Yosua nanga a heri legre hari kmoto fu Eglon go na Hebron èn den feti nanga a foto dati. 37Den teki en abra èn den kiri a kownu nanga ala sma drape nanga deigri. Den kiri ala den sma tu fu den foto ini a birti. No wan den meki tan na libi, leki fa den du nanga Eglon tu. Ala sma di ben e libi drape den kiri.

38Dan Yosua nanga a heri legre drai go na a foto Debir èn den feti nanga a foto dati. 39A teki a foto abra èn den kiri a kownu nanga ala tra sma drape nanga deigri. Den kiri ala sma tu fu den foto di ben de ini a birti. Ala sma di ben e libi drape den kiri. No wan sma den meki tan na libi. A srefi di den ben du nanga Hebron nanga Libna nanga den kownu fu den, den du tu nanga Debir nanga a kownu fu en.

40Na so Yosua teki a heri kondre abra, a bergikontren, a Negebsabana, a kontren na den bergifutu nanga a kontren mindri den bergi nanga a Dedese. A kiri ala den kownu. No wan sma a meki tan na libi. Ala sma di ben e libi drape a kiri, soleki fa MASRA, a Gado fu Israel, ben komanderi en. 41Yosua ben kiri ala sma fu Kades-Barnea go te na Gasa, sosrefi fu a heri kontren fu Gosen go te na Gibeon. 42Wan leisi nomo Yosua hari go feti, dan a wini ala den kownu dati èn teki a kondre fu den abra, fu di MASRA, a Gado fu Israel, ben e feti gi Israel. 43Baka dati Yosua nanga a heri legre fu Israel drai go baka na a kampu fu den na Gilgal.