Sranan Tongo Bible 2016 (STB16)
12

Den kownu di den Israelitisma ben wini

121Disi na den kownu di den Israelitisma ben wini èn den ben teki a kontren fu den abra na oostsei fu a Yordanliba, fu a Arnonliba te go miti a Hermonbergi nanga a heri oostsei fu a Yordandal:

2A fosi kownu ben de Sikon, a kownu fu den Amoritisma, di ben e libi na Hesbon. A kontren fu en ben e bigin na Arower na sei a Arnonliba, a ben e waka mindrisei fu a Arnonliba, nanga afu fu Gilead te go miti a Yabokliba, pe a kontren fu den Amonitisma e bigin. 3Moro fara a pisi fu a Yordandal di e waka fu a oostsei fu a meer fu Kineret go na a oostsei fu a Sowtuse, di den e kari a Dedese tu, te go miti Bet-Hayesimot. Na a zuidsei a kontren ben e waka te go miti a futu fu a Pisgabergi. 4A di fu tu kownu ben de Og, a kownu fu Basan. A ben de wan fu den laste Refaitisma èn a ben libi na den foto Astarot nanga Edrei. 5Og ben de kownu abra a Hermonbergi, Salka nanga heri Basan, te go miti a kontren fu Gesur nanga Maaka. Moro fara abra a tra afu fu Gilead te go miti a kontren fu kownu Sikon fu Hesbon.

6Moses, a knekti fu MASRA, nanga den Israelitisma ben wini den tu kownu disi. Baka dati Moses gi a kontren fu den na a lo fu Ruben, Gad nanga a afu lo fu Manase, leki den eigi tanpresi.

7Baka dati Yosua nanga den Israelitisma wini ala den kownu na westsei fu a Yordanliba fu Baal-Gad ini a Libanondal te go miti den Kali Bergi di e go na a sei fu Seir. Yosua gi a kontren dati na den Israelitisma leki den eigi tanpresi. A gi ibri lo en eigi pisi. 8Dati ben de a bergikontren, a kontren na den bergifutu, a Yordandal, a kontren mindri den bergi nanga a Dedese, a bigi dreisabana, nanga a Negebsabana. A kontren dati ben de a kontren fu den Hetitisma, fu den Amoritisma, fu den Kananitisma, fu den Perisitisma, fu den Hiwitisma nanga fu den Yebusitisma. 9Disi na den kownu di den wini: a kownu fu Yeriko, a kownu fu Ai, ini a birti fu Betel, 10a kownu fu Yerusalem, a kownu fu Hebron, 11a kownu fu Yarmut, a kownu fu Lakis, 12a kownu fu Eglon, a kownu fu Geser, 13a kownu fu Debir, a kownu fu Geder, 14a kownu fu Horma, a kownu fu Arad, 15a kownu fu Libna, a kownu fu Adulam, 16a kownu fu Makeda, a kownu fu Betel, 17a kownu fu Tapua, a kownu fu Hefer, 18a kownu fu Afek, a kownu fu Lasaron, 19a kownu fu Madon, a kownu fu Hasor, 20a kownu fu Simron-Meroon, a kownu fu Aksaf, 21a kownu fu Taanak, a kownu fu Megido, 22a kownu fu Kedes, a kownu fu Yokneam na Karmelbergi, 23a kownu fu Dor, na a syoro krosbei fu a foto dati, a kownu fu Goyim ini Gilgal, 24nanga a kownu fu Tirsa. Makandra den ben de dritenti-na-wan kownu.

13

Den kontren di ben mus teki abra ete

131Di Yosua ben kon grani srefsrefi kba, MASRA taigi en taki: “Yu kon grani, ma furu presi de ete di un mus teki abra. 2Disi na den kontren di un mus teki abra ete: a heri kontren fu den Filistijnsma nanga den Gesuritisma. 3Dati na a kontren fu a kriki Sikor na a oostsei fu Egipte, go te na a kontren fu Ekron na noordsei. A heri pisi dati na fu Kanaan tu. Na feifi kownu fu den Filistijnsma e tiri a kontren drape: a di fu a foto Gasa, a di fu a foto Asdod, a di fu a foto Askelon, a di fu a foto Gat nanga a di fu a foto Ekron. A kontren fu den Awitisma, 4na zuidsei fu den Filistijnsma un mus teki abra ete. Sosrefi a heri kontren fu den Kananitisma nanga Meara, wan foto fu den sma fu Sidon, go te na a foto Afek pe a kontren fu den Amoritisma e bigin. 5Moro fara a kondre fu den Giblitisma nanga a heri kontren fu a Libanonbergi na oostsei, fu Baal-Gad na a futu fu a Hermonbergi go te na a pasi fu Hamat. 6Ala den sma di e libi ini a bergikontren fu a Libanonbergi go te na Misrefot-Maim, ala den Sidonisisma, Mi sa yagi gwe gi den Israelitisma. Sorgu wawan taki yu fringi a lot fu prati en gi Israel, leki fa Mi komanderi yu. 7Yu mus prati en gi den neigi lo di tan abra nanga a tra afu lo fu Manase.”

Yosua e prati a kontren na oostsei fu a Yordanliba

8A lo fu Ruben, a di fu Gad nanga a afu lo fu Manase ben kisi wan kontren fu densrefi. Moses, a knekti fu MASRA, ben gi den a kontren dati na a oostsei fu a Yordanliba. 9Dati ben de a kontren fu a foto Arower na sei a Arnonliba, a ben e waka mindrisei fu a Arnonliba, a heri hei kontren fu Medeba go miti Dibon, 10ala den foto fu Sikon, a kownu fu den Amoritisma, di ben e libi na Hesbon, te go miti a kontren fu den Amonitisma. 11Moro fara Gilead, a kontren fu den Gesuritisma nanga den Maakatitisma, a heri Hermonbergi nanga heri Basan, go te na Salka. 12Sosrefi a heri kondre fu kownu Og fu Basan, di ben e tiri Astarot nanga Edrei. Og ben de a laste fu den Refaitisma. Moses ben wini a folku dati èn yagi den gwe. 13Ma den Israelitisma no ben man yagi den Gesuritisma nanga den Maakatitisma gwe fu den tanpresi. Dat' meki den folku dati e libi mindri den Israelitisma te tide.

14Moses no ben gi a lo fu Lefi wan pisi gron gi densrefi. Gado ben pramisi den taki wan pisi fu den ofrandi di den ben o bron nanga faya gi MASRA, a Gado fu Israel, ben o de fu den.

A kontren fu a lo fu Ruben

15Moses ben gi den famiri fu a lo fu Ruben a kontren disi: 16A ben e bigin na a foto Arower na sei a Arnonliba, a ben e waka na mindrisei fu a Arnonliba nanga a heri hei kontren na Medeba. 17Ini a kontren disi yu ben abi Hesbon nanga ala den foto ini a birti fu en di ben de ini a hei kontren. Dati ben de den foto: Dibon, Bamot-Baal, Bet-Baal-Meon, 18Yasa, Kedemot, Mefaat, 19Kiryataim, Sibma, Seret-Hasakar di de tapu a pikinbergi ini a dal, 20Bet-Peor, a futu fu Pisgabergi, Bet-Hayesimot, 21ala den foto fu a hei kontren, nanga a heri kondre fu kownu Sikon fu den Amoritisma di ben e tan na Hesbon. Moses ben wini a kownu dati makandra nanga den edeman fu den Midyanitisma, di ben de knekti fu Sikon. Den edeman dati ben de: Ewi, Rekem, Sur, Hur nanga Reba. 22A lukuman Bileam, a manpikin fu Beor, ben de mindri den sma tu di den Israelitisma ben kiri.

23A kontren fu a lo fu Ruben ben e kba na a Yordanliba nanga a syoro fu en. Disi ben de den foto nanga den dorpu di den famiri fu a lo fu Ruben ben kisi taki na fu den.

A kontren fu a lo fu Gad

24Moses ben gi a lo fu Gad wan kontren tu. Disi na a kontren di den famiri fu a lo fu Gad ben kisi. 25Den ben kisi a kontren fu Yaser, ala den foto fu Gilead, afu fu a kondre fu den Amonitisma go te na a foto Arower na a oostsei fu Raba. 26A kontren disi ben waka fu Hesbon go te na Ramat-Hamispe nanga Betonim èn moro fara fu Makanaim go te na a kontren fu Lo-Debar. 27Den kisi wan pisi oostsei fu a Yordanliba tu ini a Yordandal nanga den foto Bet-Haram, Bet-Nimra, Sukot nanga Safon. A pisi dati ben de san ben libi fu a kondre fu kownu Sikon fu Hesbon. A kontren fu Gad ben e kba na a Yordanliba te go miti a zuidsei fu a meer fu Kineret.

28Disi ben de den foto nanga den dorpu di den famiri fu a lo fu Gad ben kisi taki na fu den.

A kontren di a afu lo fu Manase kisi

29Moses ben gi afu fu a lo fu Manase wan kontren tu. Disi na a kontren di den famiri fu a afu lo fu Manase ben kisi: 30A kontren fu den ben e bigin na Makanaim, heri Basan, a heri kondre fu kownu Og fu Basan, nanga ala den dorpu fu Yair di ben de ini Basan. Dati ben de siksitenti dorpu. 31Moro fara afu fu Gilead nanga den foto Astarot nanga Edrei, den tu foto pe kownu Og ben e libi ini Basan.

Disi na a kontren di den famiri fu a afu lo fu Manase kisi. Den ben de bakapikin fu Makir, a manpikin fu Manase.

32Disi na a kontren ini den bigi opo wei fu Moab na oostsei fu a Yordanliba nanga Yeriko, di Moses ben gi den Israelitisma taki na fu den. 33Ma Moses no ben gi a lo fu Lefi wan pisi gron gi densrefi. MASRA, a Gado fu Israel, ben de san den kisi gi densrefi. Na a pramisi dati den ben kisi.

14

Den lo di kisi kontren na westsei fu a Yordanliba

141Disi na den kontren di den Israelitisma kisi ini Kanaan taki na fu den. Priester Eleasar, Yosua, a manpikin fu Nun, nanga den famiri-edeman fu den lo fu Israel, ben prati a kondre gi den Israelitisma. 2MASRA ben komanderi Moses dati na a lot ben mus sori fa a kondre ben mus prati gi den neigi nanga afu lo di no ben kisi kontren gi densrefi ete. 3Tu nanga afu lo ben kisi kontren fu Moses gi densrefi kba na a tra sei fu a Yordanliba. Ma a no ben gi a lo fu Lefi wan pisi gron gi densrefi drape. 4Den bakapikin fu Yosef ben prati na ini tu lo: a lo fu Manase nanga a lo fu Efraim. A lo fu Lefi no kisi wan pisi gron gi densrefi ini a kondre. Den kisi foto fu libi nanga weigron lontu den foto gi den meti fu den. 5Den Israelitisma prati a kondre neleki fa MASRA ben komanderi Moses.

Yosua gi Kaleb a foto Hebron

6Wantu man fu a lo fu Yuda ben kon na Yosua na Gilgal. Dan a Kenisitiman Kaleb, a manpikin fu Yefune, taigi en taki: “Yu sabi san MASRA ben taigi Moses, a man fu Gado, fu mi nanga yu na Kades-Barnea. 7Mi ben abi fotenti yari di Moses, a knekti fu MASRA, ben seni mi fu Kades-Barnea kon na a kondre disi, fu kon luku kibrikibri fa sani de dyaso. Di mi drai kon, mi ferteri en finifini san mi si. 8Ma den man di ben go nanga mi ben meki a folku kon frede nanga san den taki. Ma mi ben tan fertrow MASRA, a Gado fu mi, nanga mi heri ati. 9Na dat' meki Moses sweri a srefi dei dati gi mi taki: ‘Fu di yu tan fertrow MASRA, a Gado fu mi, nanga yu heri ati, A e gi yu a kontren pe yu waka psa. Fu têgo a sa de fu yu nanga den bakapikin fu yu.’ 10We luku, MASRA ori mi na libi soleki fa A ben pramisi. Na fotenti-na-feifi yari di psa A ben taigi Moses a sani dati. A ten dati Israel ben e waka ini a bigi dreisabana ete. Now mi abi aititenti nanga feifi yari. 11Ma mi abi a srefi krakti leki di Moses ben seni mi fu go luku a kondre. A krakti di mi abi now na a srefi krakti di mi ben abi a ten dati: krakti fu hari go na feti èn fu du ala sortu tra sani. 12Dat' meki mi e aksi yu fu yu gi mi a bergikontren disi, soleki fa MASRA ben taki a ten dati. Yu srefi ben yere a ten dati tak' na Enakitisma e libi drape ini bigi foto di tranga fu teki abra. Efu MASRA de nanga mi, mi o man yagi den gwe, soleki fa MASRA ben taki.” 13Dan Yosua blesi Kaleb, a manpikin fu Yefune, èn a gi en a foto Hebron taki na fu en. 14Na fu di a Kenisitiman Kaleb, a manpikin fu Yefune, ben tan fertrow MASRA, a Gado fu Israel, nanga en heri ati, meki Hebron na fu en te tide. 15Fosi a ten dati Hebron ben nen Kiryat-Arba. Arba ben de a moro bigi Enakitiman. Nanga a sani dati a feti tapu ini a kondre.