Sranan Tongo Bible 2016 (STB16)
20

201MASRA taigi Moses taki: 2“Taigi den sma fu Israel taki: ‘Den sa kiri ibri Israelitisma noso ibri doroseisma di e libi na ini Israel, di tyari wan pikin fu en leki ofrandi gi Molok. A folku sa fringi ston na en tapu te leki a dede. 3Misrefi sa drai Mi baka gi sowan sma. Mi sa yagi en fu têgo kmoto na mindri fu den Israelitisma fu di a tyari wan pikin fu en leki ofrandi gi Molok. Tapu a fasi dati a e doti a santa presi fu Mi èn a e afrontu Mi santa nen. 4Efu a folku e tapu en ai gi a sani disi èn den no kiri a man, ma den libi en fu tyari wan pikin fu en leki ofrandi gi Molok, 5dan Mi sa drai Mi baka gi a man disi nanga en heri famiri. Mi sa yagi en fu têgo kmoto na mindri fu den Israelitisma makandra nanga ala den sma di e waka na en baka. Bika den e huru gi Mi nanga a dini di den e dini Molok. 6Mi sa drai Mi baka gi iniwan sma èn Mi sa yagi en fu têgo kmoto na mindri fu den Israelitisma, efu a huru gi Mi fu go suku yepi na den yeye fu dedewan noso na yeye di e taigi sma sani di de fu kon. 7Un mus sorgu taki un santa èn un mus tan santa, bika Mi na MASRA, un Gado.

8Un sa hori unu finifini na den sani di un mus tan du. Mi na MASRA, na Mi poti un aparti.

9Un sa kiri a sma di fluku en papa noso en mama. Na ensrefi suku en dede efu a fluku en papa noso en mama. 10Un sa kiri a man di go na bedi nanga wan tra man frow. Un sa kiri en nanga a frow nanga san a go na bedi. 11Efu wan man go na bedi nanga a frow fu en papa, a e gi en papa syen nanga dati. Un sa kiri den ala tu. Na densrefi suku den dede. 12Efu wan man go na bedi nanga a frow fu en manpikin, un sa kiri den ala tu. Na wan trutru hogri sani den du. Na densrefi suku den dede. 13Efu wan man go na bedi nanga wan tra man, leki fa yu e go na bedi nanga wan uma, un sa kiri den ala tu. Na wan groskin sani den du. Na densrefi suku den dede. 14Na wan trutru syen sani efu wan man go na bedi nanga wan uma èn nanga a mama fu a uma dati. Un sa bron den ala dri fu puru a syen dati na un mindri. 15Un sa kiri a man di go na bedi nanga wan meti. Un sa kiri a meti tu. 16Wan uma no sa go na wan meti tu fu go nanga a meti na bedi. Un sa kiri a uma nanga a meti dati. Den no sa tan na libi. Na densrefi suku den dede. 17Na wan syen sani efu wan man teki en eigi sisa noso en afu sisa fu libi, dan a go na bedi nanga en. Den sa yagi den fu têgo kmoto na mindri fu den Israelitisma, leti na ala sma fesi. A man fiti fu kisi strafu fu di a go na bedi nanga en eigi sisa. 18Efu wan man sribi nanga wan uma di abi en munsiki, un mus yagi a man nanga a uma dati fu têgo kmoto na mindri fu den Israelitisma. Bika a man opo a krosi fu a uma, meki a presi fu pe a uma e brudu de fu si èn a uma ben wani dati tu. 19Yu no sa go na bedi nanga a sisa fu yu mama noso nanga a sisa fu yu papa. Bika nanga dati yu e gi yu famiri syen. Den fiti fu kisi strafu. 20A man di go na bedi nanga en tanta e gi en omu syen. Den fiti fu tyari a strafu fu den sondu. Den no sa kisi pikin. 21Na wan trutru syen sani efu wan man teki wan frow libi nanga san en brada ben e libi fosi. A e gi en brada syen nanga dati. Den no sa kisi pikin.

22Ma un mus du ala den sani di un mus tan du èn un mus tan hori unsrefi finifini na ala den sani fu Mi. Efu un no du dati, a kondre pe Mi e tyari un go fu libi, sa spiti un puru. 23Un no sa du den sani di a folku ben e du di Mi sa yagi puru na un fesi. Bika na fu di den ben e du ala den sani disi meki Mi no wani si den srefsrefi moro.’ 24Ma un Mi taigi taki: ‘Un sa teki a kondre abra èn Mi sa gi en na unu, wan kondre pe merki nanga oni de bogobogo.

Mi na MASRA, un Gado. Na Mi poti un aparti fu den tra folku.’ 25Un mus prati meti di bun fu nyan nanga meti di no bun fu nyan, èn fowru di bun fu nyan nanga fowru di no bun fu nyan. Un mus du disi fu un no tron wan groskin sani, fu di un nyan wan meti, wan fowru noso wan sani di e kroipi na gron, di no krin ini Mi ai. 26Un mus sorgu taki un santa, bika Mi, MASRA, santa. Na Mi poti un aparti fu den tra folku, fu un kan de fu Mi. 27Un sa kiri a man noso a uma di e meki a yeye fu dedewan taki noso di abi wan yeye di e taigi sma sani di de fu kon. Un sa fringi ston na den tapu kiri den. Na densrefi suku den dede.”

21

Den priester mus hori densrefi santa

211MASRA taigi Moses taki: “Yu mus taigi den priester, den manpikin fu Aaron, taki no wan fu den mus doti densrefi fu di den fasi wan dedeskin fu wan famiri. 2Soso efu na wan krosbei famiri leki den mama, den papa, den manpikin, den umapikin, den brada, 3noso den sisa di no trow ete, di no abi masra ete èn di e libi na oso ete, dan den kan doti densrefi. 4Ma den no mus doti densrefi èn meki taki den no santa moro fu di den fasi wan dedeskin fu den frow famiri.21:4 A Hebrewtekst fu a pisi disi no krin. 5Den priester no sa piri den ede noso koti a lantyi fu den barba puru. Den no sa tyerfi marki ini den buba tu. 6Den poti aparti gi den Gado èn den no sa afrontu a nen fu den Gado. Bika na den e bron a nyanyan leki ofrandi gi MASRA, a Gado fu den. Dat' meki den mus santa.

7Wan priester no sa teki wan uma fu libi di ben doti ensrefi fu di a ben e uru, noso wan uma di en masra yagi gwe, bika a poti aparti gi en Gado. 8Un sa lespeki en leki wan santa man, bika na en e bron a nyanyan leki ofrandi gi un Gado. A mus de wan santa man gi unu, bika Mi, MASRA, santa èn na Mi poti un aparti. 9Efu wan umapikin fu wan priester broko ensrefi saka fu libi wan uru libi, dan a e broko en papa saka nanga dati. Den sa bron en.

10A granpriester no sa libi en edewiwiri anga èn a no sa priti en krosi. Na en na a moro hei wan na mindri den trawan. Na tapu en ede den kanti a salfu oli. Na en den wei èn na gi en den weri den santa krosi. 11A no sa kon krosbei fu no wan dedeskin. A no sa doti ensrefi nanga en papa noso en mama srefi. 12A no sa gwe libi a santa presi noso a o meki taki a santa presi no krin moro. Bika na en den wei èn a salfu oli fu Gado de tapu en. Mi na MASRA.

13A sa teki wan uma di noiti no go na bedi nanga wan man ete. 14A no sa teki wan uma fu libi di masra dede kba, wan uma di en masra yagi gwe noso wan uma di ben e libi wan uru libi. A sa teki wan uma fu en eigi folku di noiti no go na bedi nanga wan man ete. 15A sa du disi fu no broko den pikin nanga bakapikin fu en saka na mindri den sma fu en folku, bika Mi na MASRA, di poti en aparti.”

16MASRA taigi Moses taki: 17“Taigi Aaron taki: ‘Efu wan pikin noso bakapikin fu yu malengri, a no sa kon leki priester fu bron nyanyan leki ofrandi gi en Gado. 18Bika no wan sma di malengri sa tron priester. No wan brenisma, lansma, sma di kisi wan mankeri ini en fesi noso wan sma di anu noso futu langa psa marki. 19No wan sma sa tron priester tu di anu noso futu ben broko, dan a no gro bun baka, 20no wan sma di abi wan bokru baka, no wan sandopi, no wan sma nanga wan ai siki, no wan sma di abi wan skin siki noso wan sma di kisi mankeri na en manpresi. 21No wan malengri pikin noso bakapikin fu priester Aaron sa tron priester, fu bron ofrandi nanga faya gi MASRA. Fu di a malengri a no sa kon fu bron nyanyan leki ofrandi gi Gado. 22Ma a kan nyan fu a nyanyan di den tyari kon leki ofrandi gi a Gado fu en. A kan nyan fu a santa nanga a moro santa nyanyan. 23Fu di a malengri a no sa kon pe a garden de ini a santa presi èn a no sa kon na a altari noso a e afrontu a santa presi. Mi na MASRA, di poti den priester aparti.’ ”

24Dan so Moses taigi Aaron, den manpikin fu en nanga ala sma fu Israel den sani disi.

22

221MASRA taigi Moses taki: 2“Yu mus taigi Aaron nanga den manpikin fu en taki den mus hori den na den sani san den leri, te den sma fu Israel e tyari den santa ofrandi kon di den poti aparti gi Mi. Efu den no du dati den e afrontu Mi nen. Mi na MASRA. 3Taigi den taki: Iniwan pikin noso bakapikin fu den di o tron priester na den baka, mus krin ini Gado ai fosi a kon krosbei fu den santa ofrandi di den sma fu Israel poti aparti gi MASRA. Efu den no du dati Mi sa yagi den fu têgo kmoto na Mi fesi. Mi na MASRA. 4No wan pikin noso bakapikin fu Aaron di gwasi, noso di abi wan siki fu en manpresi di e meki dot'doti watra kmoto fu en manpresi, sa nyan fu a santa ofrandi. Te a kon betre fosi, dan a kan nyan fu a ofrandi. A no sa nyan fu a ofrandi tu efu a fasi wan sani di no krin ini Gado ai, fu di a sani ben miti nanga wan dedeskin, noso efu en manwatra ben lon. 5Efu a no krin tu ini Gado ai, fu di a fasi wan meti di e kroipi, noso fu di a fasi wan tra sma di no krin ini Gado ai fu di a sma abi wan sani di e meki taki a no krin ini Gado ai, 6dan ensrefi no sa krin ini Gado ai tu te leki neti fadon. A no sa nyan fu a santa ofrandi te leki a wasi en skin. 7Te neti fadon a sa krin baka ini Gado ai, dan a kan nyan fu a santa ofrandi, bika na en nyanyan. 8A no sa nyan wan dede meti noso wan meti di wan tra meti ben priti. Efu a du dati a e doti ensrefi. Mi na MASRA. 9Den mus hori densrefi na den sani di den leri, fu den no sondu. Noso den o dede, fu di den afrontu den santa sani. Mi na MASRA, di poti den aparti.

10No wan sma di no fiti sa nyan wan santa sani. Wan sma di e tan na a priester no sa nyan wan santa sani. Efu na yuru a priester yuru wan sma fu e wroko gi en, a sma dati no sa nyan wan santa sani tu. 11Efu na bai a priester bai wan srafu gi ensrefi, dan a srafu dati kan nyan wan santi sani. Wan sma di gebore ini a oso fu a priester kan nyan a nyanyan fu a priester tu. 12Efu a umapikin fu a priester trow nanga wan sma di no de wan priester, dan umapikin dati no sa nyan fu a pisi fu den santa ofrandi di de gi a priester. 13Efu a masra fu a umapikin fu a priester dede noso efu en masra yagi en gwe sondro taki den ben abi pikin èn a drai go tan baka na en papa oso, leki di a no ben abi masra ete, dan a kan nyan fu a nyanyan fu en p'pa. Ma wan sma di no fiti no sa nyan a nyanyan disi. 14Efu wan sma nyan wan santa sani sondro espresi, a abi fu pai a priester fu a sani di a nyan. A sa poti tutenti prosenti moro na en tapu. 15Den priester no sa afrontu den santa ofrandi di den sma fu Israel tyari kon gi MASRA. 16Efu den du dati den o meki a folku sondu tu, te den o nyan fu a santa ofrandi. Mi na MASRA, di poti den aparti.”

17MASRA taigi Moses taki: 18“Taigi Aaron, den manpikin fu en nanga ala den sma fu Israel taki: ‘Efu wan sma fu Israel noso wan doroseisma, di e tan ini Israel, tyari wan ofrandi kon fu bron gi MASRA, fu di a ben pramisi fu du dati, noso fu di a wan du en nanga wan fri wani, 19dan a mus tyari wan kaw, wan skapu noso wan krabita. A mus de wan manwan èn noti no mus mankeri a meti. Dan Gado sa abi prisiri nanga a ofrandi. 20Den no sa tyari no wan meti leki ofrandi, efu ala sani no bun nanga a meti dati. Gado no sa abi prisiri nanga a ofrandi dati. 21Efu na wan freide-ofrandi wan sma tyari gi MASRA, fu di a ben pramisi fu du dati, noso fu di a wan du en nanga wan fri wani, a sa tyari wan kaw, wan skapu noso wan krabita. Noti no mus mankeri a meti. Dan Gado o abi prisiri nanga a ofrandi. Ala sani mus bun na a meti. 22Efu a meti breni, efu wan presi fu en skin broko, efu a abi wan soro, wan sweri, kraskrasi noso wan tra siki fu a skin, un no sa tyari en leki ofrandi gi MASRA. Un no sa bron so wan meti leki ofrandi gi MASRA tapu a altari. 23Efu den futu fu a kaw noso a skapu langa noso syatu tumsi, dan un kan tyari en leki wan ofrandi di gi nanga wan fri wani. Ma un no sa tyari en kon fu di un ben pramisi fu tyari wan ofrandi, noso Gado no o abi prisiri nanga en. 24Wan bulu di malengri fu di a kisi mankeri na en manpresi, dan a no abi trobi sortu mankeri, un no sa tyari en leki ofrandi gi MASRA. Un no sa tyari so wan meti leki ofrandi ini un kondre. 25Un no sa teki sowan meti tu na wan doroseisma fu tyari en leki wan ofrandi èn bron en leki nyanyan gi un Gado, bika ala sani no bun na a meti. A meti malengri. Gado no o abi prisiri nanga a ofrandi.’ ”

26MASRA taigi Moses taki: 27“Te wan kaw, wan skapu noso wan krabita kisi wan pikin, a pikin sa tan seibi dei na a mama. Ma bigin fu a di fu aiti dei a kan bron leki ofrandi èn MASRA sa abi prisiri nanga en. 28Un no sa srakti wan kaw, wan skapu noso wan krabita nanga a pikin fu en tapu a srefi dei. 29Te un srakti wan meti leki ofrandi fu gi MASRA tangi, dan un sa du en so wan fasi taki Gado sa abi prisiri nanga en. 30Un sa nyan a meti tapu a srefi dei dati. Noti fu en mus tan te a tamara fu en. Mi na MASRA.

31Un hori un na den gebod fu Mi. Mi na MASRA. 32Un no sa afrontu a santa nen fu Mi, fu Mi tan santa na ini a ai fu den sma fu Israel. Mi na MASRA, di poti un aparti. 33Na Mi puru un na ini Egipte, fu de un Gado. Mi na MASRA.”