Sranan Tongo Bible 2016 (STB16)
26

A blesi fu du a wani fu Gado

261“Un no sa meki kruktu gado gi unsrefi. Un no sa koti udu ston noso wan tra sani tu fu meki wan popki fu en noso poti wan ston tnapu fu anbegi en. Un no sa tyerfi prentyi tu ini ston, dan un poti den tnapu ini un kondre fu boigi gi en. Mi na MASRA, un Gado. 2Un hori unu na den sani fu a sabatdei èn un mus abi lespeki gi a santa presi fu Mi. Mi na MASRA.

3Efu un du den sani di un mus tan du èn un hori un na den gebod fu Mi, 4dan Mi sa meki alen fadon tapu a yoisti ten. A gron sa gi nyanyan èn den bon sa gi froktu. 5A ten fu masi a buba puru na a graan, sa tan te leki a ten doro fu un puru den droifi na den bon. A ten fu puru den droifi na den bon sa tan te leki a ten doro fu sai. Un sa nyan te un bere furu èn un sa libi sondro frede ini un kondre. 6Mi sa meki freide de ini a kondre, fu un kan sribi sondro taki wan sani skreki unu. Mi sa yagi den krasi meti puru fu a kondre èn no wan tra kondre sa feti nanga unu. 7Na unu sa meki den feyanti fu unu lon èn un sa kiri den na ini feti. 8Feifi fu unu sa wini wan hondro èn wan hondro fu unu sa wini tin dusun fu un feyanti. Un sa kiri den na ini feti. 9Mi sa sorgu gi unu. Mi sa meki un kisi furu pikin èn Mi sa meki un si taki Mi e hori Mi na a ferbontu. 10Un sa nyan a nyanyan di un ben kibri poti ini maksin, te leki a ten doro fu un koti nyanyan baka. Dan un o abi fu puru a owru nyanyan ini den maksin fu meki presi gi a nyanyan di un koti now. 11Mi sa poti Mi tenti tnapu na un mindri èn Mi no sa drai Mi baka gi unu. 12Mi sa koiri na un mindri. Mi sa de un Gado èn un sa de Mi pipel. 13Mi na MASRA, un Gado, di puru unu na ini Egiptekondre, fu un no de srafu fu den moro. Mi broko a hebi di ben de na un tapu fu un kan tnapu let'opu.

14Ma efu un no wan arki Mi èn efu un no wan hori un na den gebod disi, 15efu un no wani du den sani di un mus tan du, fu di un e si den fu noti, efu un no wani tan hori unsrefi na den sani fu Mi fu di un poti den na wan sei èn broko a ferbontu fu Mi fu di un no hori un na den gebod fu Mi, 16dan na disi Mi sa du nanga unu: Mi sa meki ogri miti unu. Mi sa meki un kisi wan takru kosokoso nanga hebi korsu, di sa meki un ai kon dungru èn meki un bro de na tapu. Un sa sai fu soso bika den feyanti fu unu sa nyan sa un prani. 17Mi sa drai Mi baka gi unu. Den feyanti fu unu sa fon unu èn den wan di no man si un srefsrefi na ai, sa basi unu èn un sa lowe sondro taki sma de na un baka.

18Efu baka dati un no wani du ete san Mi taki, Mi sa strafu unu seibi tron moro hebi fu den sondu fu unu. 19Mi sa broko a krakti tapu san un e bow. Mi no sa meki alen fadon. A heimel o gersi isri èn a gron o kon tranga leki kopro. 20Un sa lasi un krakti fu soso. A gron no sa gi nyanyan èn den bon no sa gi froktu.

21Efu un tan kaka un futu èn un no wani arki Mi, Mi sa strafu unu seibi tron moro hebi fu den sondu fu unu. 22Mi sa lusu krasi meti na un tapu. Den sa kiri den pikin fu unu èn priti ala den meti fu unu di un e kweki. Den sa kiri someni sma, taki sma no sa de fu si na strati.

23Efu den sani disi no meki un drai kon baka na Mi, ma un e tan kaka un futu, 24dan Mi sa kaka Mi futu gi unu tu. Mi sa strafu un ete wan leisi seibi tron moro hebi fu den sondu fu unu. 25Mi sa meki feti broko, fu di un no hori unu na a ferbontu. Te un go kibri ini den foto fu unu, Mi sa seni wan takru siki kon èn un o fadon na ini anu fu den feyanti fu unu. 26Mi o meki wan angriten broko. Wan onfu nomo o sari fu tin umasma baka den brede. Den o abi fu prati a brede ini pikinpikin pisi gi den ososma fu den. Unu o nyan ma un bere no o furu.

27Efu baka dati un no wani arki Mi ete èn un e tan kaka un futu, 28dan nanga atibron Mi sa strafu unu seibi tron moro hebi fu den sondu fu unu. Iya, Misrefi sa strafu unu. 29Dan un sa nyan den manpikin nanga den umapikin fu unu. 30Mi sa broko den presi pe un e tyari ofrandi èn den altari tapu san un e bron wierook, Mi sa naki trowe. Mi sa trowe den dedeskin fu unu tapu wan ipi nanga den kruktu gado fu unu èn Mi sa drai Mi baka gi unu. 31Mi sa broko den foto fu unu trowe na gron. De santa presi fu unu Mi sa figi puru. Mi no wani smeri den switi smeri fu den ofrandi fu unu moro. 32Mi sa broko a kondre tapu sowan fasi, taki den feyanti fu unu di o teki a kondre abra no o tnapu nanga opo mofo te den si en. 33Mi sa panya unu na mindri den tra folku. Tra kondre o de nomo na un baka fu feti nanga unu. A kondre fu unu o de wan sabana èn den foto fu unu o broko didon na gron. 34Te a kondre didon leki wan sabana, a sa kisi a rostu di a ben mus kisi. Bika den no ben gi a kondre a rostu di a ben mus kisi ini den sabat-yari. Unsrefi o de na ini a kondre fu unu feyanti te a kondre sa kisi a rostu. A kondre sa kisi a rostu di a ben mus kisi. Ma un no ben gi a kondre a rostu di a ben mus kisi ini den sabat-yari. 35A heri pisten di a kondre didon leki wan sabana, a sa rostu. Disi na a rostu di a ben mus kisi. Ma di un ben tan ini a kondre un no gi en a rostu ini den sabat-yari. 36Mi sa poti sowan frede ini a ati fu den wan fu unu di tan na libi ini a kondre fu un feyanti, taki den o lon suku kibripe efu wan wiwiri opo wai nomo. Den sa lowe leki te sma de na den baka fu kiri den èn den o fadon, sondro taki wan sma de na den baka. 37Den o lon fadon abra makandra leki te sma de na den baka fu kiri den, ma no wan sma o de na den baka. Un no o man hori feti nanga den feyanti fu unu tu. 38Un o dede ini wan kondre san no de un eigi kondre èn den o beri unu ini a kondre fu un feyanti. 39Den wan fu unu di de na libi ete, o pori gwe ini a kondre fu un feyanti, fu unu eigi sondu ede nanga fu di fu den afo fu unu.

40Ma efu den taki sortu sondu den nanga den afo fu den du, taki Mi no ben man fertrow den, taki den ben kaka den futu gi Mi, 41èn taki na fu dat'ede Mi ben kaka Mi futu baka gi den èn tyari den go na a kondre fu den feyanti fu den, efu den saka densrefi, efu den no tranga den ati èn efu den wani tyari a strafu fu den sondu, 42dan Mi sa memre a ferbontu fu Mi nanga Yakob, Isak nanga Abraham. Mi sa memre a kondre. 43Ma den sa abi fu gwe libi a kondre. Te den no drape, a kondre sa kisi a rostu di a ben mus kisi ini den sabat-yari. Ma un no ben gi en. Den sa butu fu den sondu di den du, fu di den no tan hori densrefi na den sani fu Mi, fu di den si den fu noti èn den no du den sani di den ben mus tan du, fu di den poti den na wan sei. 44Ma srefi te den de ini a kondre fu den feyanti, Mi no sa drai Mi baka gi den. Mi no sa broko a ferbontu nanga den èn Mi no sa kiri den, fu di Mi no wani si den srefsrefi moro. Bika Mi na MASRA, den Gado. 45Mi sa memre a ferbontu di Mi meki nanga den afo fu den. Mi puru den na ini Egiptekondre meki den tra folku si. Mi du dati fu Mi kan de wan Gado gi den. Mi na MASRA.”

46Disi na den sani na san den sma fu Israel ben mus tan hori densrefi, den sani di den ben mus tan du, nanga den wèt. MASRA ben meki Moses taigi den ala den sani disi èn den ben de fu leri den sma fu Israel fa den ben mus libi nanga En.