Sranan Tongo Bible 2016 (STB16)
9

Yesus seni den man di ben e teki leri fu En fu go panya a bun nyunsu

Mat 10:5-15; Mrk 6:7-13

91Wan dei Yesus kari den twarfu man kon na En, dan A gi den krakti nanga makti fu puru ala sortu takruyeye tapu sma èn fu dresi sikisma. 2Dan A seni den go fu panya a nyunsu taki Gado bigin tiri libisma èn fu dresi sma. 3A taigi den taki: “Te un e gwe, un no mus tyari noti fu te un de na pasi. Un no mus tyari wan wakatiki noso wan saka. Un no mus tyari nyanyan, moni noso tra krosi.

9:3-5
Luk 10:4-11
4Efu wan sma wani fu un tan ini en oso, dan un mus tan drape te leki un go moro fara. 5Ma efu no wan sma no wani fu un tan na ini den oso, dan un mus kmopo ini a foto dati. Un naki a santi fu a foto dati puru na un futu, fu meki den sma ferstan taki un no e tyari frantwortu moro gi den.”
9:5
Bosk 13:51
6So den waka go na ala den dorpu. Ala presi pe den ben go, den ben panya a bun nyunsu èn den ben dresi sma.

Herodes nanga Yesus

Mat 14:1-12; Mrk 6:14-29

7Di Herodes, a tiriman fu Galilea, yere fu ala den sani di ben psa, a no ben sabi san a ben mus prakseri. Bika son sma ben taki tak' Yohanes ben kon baka na libi.

9:7-8
Mat 16:14
Mrk 8:28
Luk 9:19
8Tra sma ben taki tak' Elia ben kon baka, èn trawan baka ben taki tak' wan fu den fosten profeiti ben kon baka na libi. 9Ma Herodes taki: “Na mi meki den kapu Yohanes ede puru. Ma dan suma na a man disi fu san mi e yere?” So Herodes ben du muiti fu si Yesus.

Yesus gi feifi dusun sma nyanyan

Mat 14:13-21; Mrk 6:30-44; Yoh 6:1-14

10Di den boskopuman fu Yesus drai kon baka, den ferteri En ala sani san den ben du. Dan Yesus tyari den go nanga En na a foto Betsaida, na wan presi pe den wawan ben kan de. 11Ma di ala den sma kisi fu yere pe A de, den go na En baka. Yesus meki den kon na En, dan A bigin taki nanga den fu a fasi fa Gado o tiri libisma. A dresi sikisma tu. 12Di a son bigin saka, den twarfu man di ben e teki leri fu Yesus kon na En, dan den taigi En taki: “Seni ala den sma gwe fu den go suku wan presi fu sribi nanga wan sani fu nyan na ini den dorpu nanga den kampu ini a birti, bika sma no e libi dya pe un de.” 13Ma Yesus taigi den taki: “Na unu mus gi den sma wan sani fu nyan.” Ma den taki: “Un abi feifi brede nomo, nanga tu fisi. Noso na go un mus go fu bai nyanyan gi ala den sma disi.” 14Den taki so bika na feifi dusun mansma so ben drape. Dan Yesus taigi den man di ben e teki leri fu En taki: “Un meki den go sidon ini grupu fu feifitenti sma.” 15So den meki den sma go sidon soleki fa Yesus taki. 16Dan Yesus teki den feifi brede nanga den tu fisi, A luku go na heimel èn A begi. Dan A broko den brede nanga den fisi, èn A gi den man di ben e teki leri fu En fu den prati gi a bigi grupu sma. 17Ala den sma nyan te den bere furu. Baka dati den man di ben e teki leri fu Yesus furu twarfu baskita nanga den pis'pisi di ben tan abra.

Petrus taki Yesus na a Mesias

Mat 16:13-20; Mrk 8:27-30

18Wan dei Yesus ben de En wawan e begi, èn den man di ben e teki leri fu En ben de nanga En. Dan Yesus aksi den taki: “Suma den bigi grupu sma e taki tak' Mi de?” 19Den piki taki: “Son sma e taki: Yu na Yohanes a Dopuman. Tra sma e taki: Yu na Elia. Trawan baka e taki: Yu na wan fu den fosten profeiti di kon baka na libi.”

9:19
Mat 14:1-2
Mrk 6:14-15
Luk 9:7-8
20Dan Yesus aksi den taki: “Ma unu, suma unu e taki tak' Mi de?”
9:20
Yoh 6:68-69

Petrus piki En taki: “Yu na a Mesias di Gado seni kon.” 21Dan Yesus warskow den krin tak' den no mus taigi no wan sma.

Yesus taki fu a pina di o miti En

Mat 16:21-28; Mrk 8:31—9:1

22Yesus taki moro fara taki: “A Manpikin fu Libisma o abi fu nyan furu pina. Den fesiman fu a folku, den prenspari priester, nanga den sabiman fu Gado wèt o poti En na wan sei. Sma o kiri En, ma tapu a di fu dri dei Gado o meki A kon baka na libi.”

23Dan Yesus taigi ala den sma taki: “Efu wan sma wani waka na Mi baka, a mus poti en eigi wani na wan sei. A mus de klar'klari ala dei fu nyan pina te fu dede srefi, èn a mus kon nanga Mi.

9:23
Mat 10:38
Luk 14:27
24Bika a sma di wani tan libi fa a wani, o lasi en libi. Ma a sma di e poti en libi na wan sei fu Mi ede, sa kisi a libi fu têgo.
9:24
Mat 10:39
Luk 17:33
Yoh 12:25
25Bika san yu e wini efu yu kisi ala sani fu grontapu, ma yu lasi a libi fu têgo, noso yu pori yu libi? 26Ala sma di o taki tak' den no sabi Mi, noso den sani san Mi e leri, a Manpikin fu Libisma o taigi den owktu taki A no sabi den te A drai kon baka nanga a bigi makti fu En, fu En P'pa nanga fu den santa engel. 27Mi e taigi unu wan tru sani: Son sma de dya na un mindri di no sa dede fosi den si fa Gado o bigin tiri libisma.”

Moses nanga Elia kon na Yesus tapu a bergi

Mat 17:1-8; Mrk 9:2-8

28Aiti dei so baka di Yesus taki den sani disi, A teki Petrus, Yohanes nanga Yakobus go na tapu wan bergi fu go begi.

9:28-35
2Pe 1:17-18
29Di Yesus ben e begi, En fesi kenki èn En krosi kon weti taki a e brenki. 30Dan wantron so tu man ben drape e taki nanga En. A ben de Moses nanga Elia. 31Den ben e brenki, èn den ben e taki nanga Yesus fu a dede di A ben o dede na Yerusalem. 32Petrus, Yohanes nanga Yakobus ben fadon na sribi. Di den wiki, den si fa Yesus ben e brenki, èn den si den tu man di ben e taki nanga En. 33Di Elia nanga Moses ben de fu gwe, Petrus taigi Yesus taki: “Meister, a bun taki un dya. Meki un meki dri tenti: wan gi Yu, wan gi Moses nanga wan gi Elia.” Ma Petrus taki a sani disi sondro fu denki moro fara. 34Di a ben e taki, wan wolku saka kon na den tapu. Di a wolku tapu den, den kon frede. 35Dan wan sten taki kmopo ini a wolku taki: “Disi na mi Manpikin, di Mi teki fu du Mi wani. Un mus arki san A e taki.”
9:35
Yes 42:1
Mat 3:17
12:18
Mrk 1:11
Luk 3:22
36Di a sten e taki, den si Yesus wawan nanga den. Ini a ten dati den man no ferteri no wan sma san den ben si. Den ben hori den mofo.

Yesus puru wan takruyeye tapu wan boi

Mat 17:14-21; Mrk 9:14-29

37A tamara fu en, di den saka kmopo fu a bergi, wan bigi grupu sma waka miti Yesus. 38Ne wan man ini a grupu bari taki: “Meister, mi e begi Yu fu kon luku a boi fu mi. Na en wawan mi abi. 39Wan yeye e kon na en tapu, dan wantron a e bigin bari. A yeye e gi en stoipi taki skuma e kmopo ini en mofo. Te a yeye bigin pina en, a no wani libi en. 40Mi ben aksi den man di e teki leri fu Yu fu yagi a yeye puru na en tapu, ma den no ben man.” 41Dan Yesus taigi den sma taki: “Ai baya! Yu kan si taki un no e bribi, èn taki un ati takru. O langa Mi mus tan na un mindri fu teki den sani disi?” Dan A taigi a man taki: “Tyari yu manpikin kon dya.” 42Di a boi e waka kon, a takruyeye naki en stoipi fringi trowe na gron. Yesus komanderi a takruyeye fu kmopo ini a boi, dan a boi kon betre. Dan Yesus langa a boi baka gi en p'pa. 43Ala den sma ben tnapu nanga opo mofo di den si a fasi fa Gado bigi.

Yesus taki baka fu a pina di o miti En

Mat 17:22-23; Mrk 9:30-32

A pisten di den sma ben e ferwondru ete fu ala den sani san Yesus ben e du, A taigi den man di ben e teki leri fu En taki: 44“Un no mus fergiti a sani san Mi o taigi un now: Den o gi a Manpikin fu Libisma abra na ini anu fu libisma.” 45Ma den man no ben ferstan san Yesus ben wani taki. A ben de wan kibritori gi den, di den no ben man ferstan. Ma den ben frede fu aksi Yesus san A ben wani taki.

Suma moro prenspari?

Mat 18:1-5; Mrk 9:33-40

46Wan pikin tak'taki ben de mindri den man di ben e teki leri fu Yesus, fu sortu wan fu den na a moro prenspari wan.

9:46
Luk 22:24
47Ma Yesus ben sabi san den e prakseri, so A teki wan pikin poti tnapu na En sei. 48Dan A taigi den taki: “A sma di opo en doro gi sowan pikin ini Mi nen, e opo en gi Mi. Èn a sma di opo en doro gi Mi, e opo en gi a Wan di seni Mi kon. Bika a wan fu unu di saka ensrefi gi ala trawan, na en na a moro prenspari wan.”
9:48
Mat 10:40
Luk 10:16
Yoh 13:20
49Dan Yohanes taki: “Meister, un si wan man e yagi takruyeye puru na sma tapu na ini Yu nen. Un ben suku fu tapu en, bika a no de ini a grupu fu unu.” 50Yesus piki taki: “No tapu en. Bika efu wan sma no e suku fu tapu a wroko fu unu, dan a de na un sei.”

Yesus nanga den sma fu Samaria

51A ten fu Yesus go baka na heimel ben kon krosbei, so A teki a besroiti fu go na Yerusalem. 52Dan A seni wantu boskopuman go na En fesi. Den man go na wan fu den dorpu fu Samaria, fu seti sani gi Yesus. 53Ma den sma no ben wani A tan drape, bika A ben de na pasi fu go na Yerusalem. 54Di Yakobus nanga Yohanes yere a sani disi, den taki: “Masra, Yu wani fu un taki fu faya kmopo na heimel fu bron den kiri?”

9:54
2Kow 1:9-16
55Ma Yesus drai, dan A piri ai gi den. 56Dan den go na wan tra dorpu.

Te yu wani waka na Yesus baka

Mat 8:19-22

57Di den ben de na pasi, wan sma taigi Yesus taki: “Mi sa go nanga Yu ala sei pe Yu e go.” 58Ma Yesus piki en taki: “Krab'dagu abi den olo, èn pikinfowru abi den nesi. Ma a Manpikin fu Libisma no abi wan presi fu kanti En ede.” 59Dan Yesus taigi wan tra sma taki: “Kon nanga Mi.” Ma a man piki taki: “Masra, gi mi a okasi fu go beri mi p'pa fosi.” 60Dan Yesus taki: “Meki den dedewan beri den eigi dede. Ma yu mus go panya a nyunsu taki Gado o tiri libisma.” 61Dan ete wan tra sma taigi Yesus taki: “Masra, mi sa waka na yu baka, ma meki mi go bari den ososma fu mi adyosi fosi.”

9:61
1Kow 19:20
62Ma Yesus taigi en taki: “A sma di poti en futu na pasi kba, ma di e tan luku na baka, no fiti fu kon ondro a tiri fu Gado.”

10

Yesus seni sma fu panya a boskopu

101Baka dati Masra teki ete seibitenti-na-tu10:1 Wantu manuscript skrifi taki: seibitenti. tra man, dan A seni den tu na tu go na En fesi na ala den foto nanga presi pe En srefi ben o go. 2A taigi den taki: “A nyanyan ini a gron lepi kba fu koti, èn a furu, ma nofo wrokoman no de. Fu dat'ede un mus begi Masra di abi a gron, fu A seni moro wrokoman go ini a gron fu koti a nyanyan.

10:2
Mat 9:37-38
3So, un go. Mi e seni unu leki pikin skapu go na mindri tigri.
10:3
Mat 10:16
4Un no mus tyari portmoni, saka, noso susu. Èn un no mus tan taki tori na pasi.
10:4-11
Mat 10:7-15
Mrk 6:8-11
Luk 9:3-5
5Te un go na ini wan sma oso, a fosi sani san un mus taki na: ‘A freide fu Gado mus de nanga unu.’ 6Efu a sma di abi a oso na wan sma di lobi freide, dan a freide san un winsi en sa tan nanga en. Ma efu na wan sma di no lobi freide, dan a freide san un winsi en o drai kon baka na unu. 7Te un go tan na wan sma oso, un mus tan drape. Nyan èn dringi san den gi unu, bika a fiti tak' wan wrokoman kisi en pai. Un no mus froisi fu a wan oso go na a trawan.
10:7
1Kor 9:14
1Tim 5:18
8Efu den sma fu wan foto meki un kon ini a foto fu den, dan un mus nyan san den gi unu fu nyan. 9Dresi den sikiwan drape, dan un taigi den taki: ‘Her'esi Gado o bigin tiri libisma.’ 10Ma efu un doro wan foto pe den sma no wani fu un tan drape, dan un mus go na tapu strati dan un taki:
10:10-11
Bosk 13:51
11‘Srefi a santi fu a foto fu unu wi e figi puru na wi futu. Ma un mus sabi taki her'esi Gado o bigin tiri libisma.’ 12Mi e taigi un taki: Tapu a bigi dei, a strafu fu a foto disi o hebi moro a strafu fu a foto Sodom.”
10:12
Gen 19:24-28
Mat 11:24

Yesus krutu wantu foto

Mat 11:20-24

13Dan Yesus taki: “Un sma fu Korasin nanga Betsaida, un mus luku bun! Bika efu den bigi sani di psa na un mindri, ben psa na ini den foto Tirus nanga Sidon, someni langa den sma dati ben o drai den libi. Den ben o weri rowkrosi èn sidon ini asisi fu sori taki den e sari.

10:13
Yes 23:1-18
Ese 26:1—28:26
Yow 3:4-8
Amo 1:9-10
Sak 9:2-4
14Tapu a bigi krutu dei, a strafu fu unu o hebi moro di fu den sma fu Tirus nanga Sidon. 15Un sma fu Kafarnaum, un e prakseri taki un o doro na heimel? Na ini dedekondre un o feni unsrefi!”
10:15
Yes 14:13-15
16Dan Yesus taki: “A sma di e arki san un e taki, e arki Mi. Suma no wani arki san un e taki, no wani arki san Mi e taki. Èn suma no e arki Mi, no e arki a Wan di seni Mi kon.”
10:16
Mat 10:40
Mrk 9:37
Luk 9:48
Yoh 13:20

Den man drai kon baka

17Den seibitenti-na-tu man ben prisiri di den drai kon baka. Den taigi Yesus taki: “Masra, te nanga den takruyeye srefi e du san un taki te un kari a nen fu Yu.” 18Dan Yesus piki den taki: “Mi si fa Satan fadon fu loktu kon na gron, soleki fa faya e koti na loktu. 19Luku, Mi gi unu makti fu trapu na tapu sneki nanga kruktutere. Mi gi un makti tu na tapu a heri legre fu didibri. Noti no sa du unu ogri.

10:19
Psa 91:13
20Ma un no mus prisiri fu di den takruyeye e du san un taki, ma un mus prisiri fu di un nen skrifi na ini heimel.”

Yesus gi En P'pa tangi

Mat 11:25-27; 13:16-17

21A srefi ten dati, a Santa Yeye furu Yesus nanga prisiri. Dan Yesus taki: “P'pa, Yu di de Masra fu heimel nanga grontapu, Mi e taki Yu tangi tak' Yu kibri den sani disi meki den koniman nanga den leriman no ferstan den, ma dan Yu sori den na den sma di no sabi furu. Iya, P'pa, bika na so Yu ben wani en.” 22Yesus taki: “Mi P'pa gi Mi makti abra ala sani. Boiti a P'pa, no wan sma no sabi suma na a Manpikin. Èn no wan sma no sabi suma na a P'pa, boiti a Manpikin nanga den sma di a Manpikin wani fu sabi dati.”

10:22 a
Yoh 3:35

23Dan Yesus kari den man di ben e teki leri fu En kon na wan sei. A taigi den taki: “Un na blesi sma, fu di un e si den sani san un e si now. 24Bika Mi e taigi un taki: Furu profeiti nanga kownu ben wani si san unu e si, ma den no si en. Èn den ben wani yere san unu e yere, ma den no yere en.”

A agersitori fu a bun man fu Samaria

25Wan dei wan sabiman fu Gado wèt go na Yesus fu tesi En. A taki: “Meister, san mi mus du fu kan kisi a libi fu têgo?”

10:25-28
Mat 22:35-40
Mrk 12:28-34
26Yesus piki en taki: “San skrifi ini a wèt fu Gado? San yu e leisi drape?” 27A man piki taki: “A skrifi taki: Yu mus lobi Masra, yu Gado, nanga yu heri ati, nanga yu heri sili, nanga ala yu krakti, èn nanga yu heri ferstan. Èn yu mus lobi tra sma soleki fa yu lobi yusrefi.”
10:27 a
Deu 6:5
28Yesus taigi en taki: “Yu piki bun. Du dati, dan yu o kisi a libi fu têgo.”
10:28
Lev 18:5
29Ma a man ben wani krin en fesi, dat' meki a aksi Yesus taki: “Ma suma na den tra sma?” 30Dan Yesus piki en taki: “Wan man ben kmopo fu Yerusalem e go na a foto Yeriko. Di a ben de na pasi, fufuruman grabu en. Den teki ala san a ben abi, den fon en te fu dede, dan den gwe libi en didon drape. 31Baka wan pisten wan priester ben e psa na tapu a srefi pasi. Di a si a man, a koti abra go waka na a tra sei fu a pasi. 32Owktu wan Lefitiman ben psa drape. Di a si a man, ensrefi koti abra go waka na a tra sei. 33Baka dati wan man fu Samaria kon psa. Di a doro krosbei, a si a man didon tapu a pasi, dan a firi sari gi en.
10:33-34
2His 28:15
34A go na a man, a krin den soro fu en nanga oli nanga win, dan a tai den. Baka dati a poti a man na tapu en eigi buriki. A tyari en go na wan oso pe yu ben kan yuru wan presi fu tan, dan a sorgu gi en. 35A tra dei, fosi a man fu Samaria gwe, a gi a man di abi a presi tu solfrumoni. A taigi en taki: ‘Luku a man gi mi. Efu a moni no sari, mi sa pai yu te mi drai kon baka.’ ” 36Dan Yesus aksi a sabiman fu Gado wèt taki: “Taigi Mi, sortu wan fu den dri man disi sori a man di den fufuruman grabu taki a de wan sma di e lobi tra sma?” 37A piki taki: “A wan di sori sari-ati gi a tra man.” Dan Yesus taigi en taki: “Go, dan yu du a srefi sani tu.”

Maria nanga Marta

38Yesus nanga den man di ben e teki leri fu En waka go moro fara. Di den doro na wan fu den dorpu, wan uma di ben nen Marta kari Yesus kon na en oso.

10:38-39
Yoh 11:1
39A ben abi wan s'sa di nen Maria. Maria ben sidon na Yesus futusei e arki san Yesus ben e leri. 40Ma Marta ben e broko en ede nanga ala den sani san ben de fu du. Dan a go na Yesus èn a taigi En taki: “Masra, Yu no abi bisi taki mi s'sa e libi mi wawan fu du ala a wroko? Yu no kan taigi en fu a kon yepi mi?” 41Ma Yesus piki en taki: “Marta, Marta. Yu e broko yu ede, èn yu e feti nanga someni sani. 42Ma na wan sani nomo de fanowdu. Èn Maria teki a bun sani dati, san no wan sma no man puru na en anu.”

11

Fa fu begi

Mat 6:9-13; 7:7-11

111Wan dei Yesus ben de na wan presi e begi. Di A kba begi, wan fu den man di e teki leri fu En, aksi En taki: “Masra, leri un begi, soleki fa Yohanes leri den man di e teki leri fu en.” 2Dan Yesus taki: “Te yu e begi, yu mus taki:

‘P'pa, Yu nen mus de santa.

Kon tiri wi.

3Gi wi ala dei a nyanyan

di wi abi fanowdu.

4Gi wi pardon fu wi sondu,

bika wi srefi e gi ala sma pardon

di du wi wan sani.

Èn no meki tesi kon na wi pasi.’ ”

5Dan Yesus taki moro fara: “Kon un taki wan fu unu abi wan mati, dan yu go mindrineti na en go aksi en taki: ‘Mati, leni mi dri brede fu yu, 6bika wan mati fu mi di e go na wan presi, kon luku mi. Ma mi no abi noti fu gi en.’ 7Dan a mati fu yu bari kmopo fu en oso taki: ‘No ferferi mi. Mi doro sroto kba, èn mi nanga den pikin fu mi go didon kba. Mi no man opo fu gi yu brede.’ 8Mi e taigi yu taki: Awinsi a no ben wani opo fu gi yu san yu abi fanowdu fu di yu nanga en na mati, toku a o du en fu di yu e tan naki tapu en doro. 9Dat'ede Mi e taigi un taki: Tan begi, dan yu sa kisi. Tan suku, dan yu sa feni. Tan naki, dan doro sa opo gi yu. 10Bika a sma di e tan begi, e kisi. A sma di e tan suku, e feni. Èn a sma di e tan naki, doro e opo gi en. 11Sortu p'pa de na un mindri di o gi en boi wan sneki, efu a boi aksi en wan fisi? 12Noso wan kruktutere, efu a boi aksi en wan eksi? 13We, efu unu leki sondusma sabi fa fu gi un pikin bun sani, fa fu un P'pa di de na heimel dan? A sa gi a Santa Yeye na den sma di e aksi En fu dati.”

Yesus nanga Beelsebul

Mat 12:22-30; Mrk 3:20-27

14Wan dei Yesus ben e puru wan takruyeye di no ben man taki tapu wan man. Baka di a takruyeye gwe, a babawman bigin taki. A bigi grupu sma di ben drape ben ferwondru. 15Ma sonwan fu den taki: “Na Beelsebul, a edeman fu den takruyeye, e gi En a makti fu yagi den takruyeye puru.”

11:15
Mat 9:34
10:25
16Trawan ben suku fu tesi Yesus. Den ben wani fu A sori den wan marki di kmopo fu Gado.
11:16
Mat 12:38
16:1
Mrk 8:11
17Ma Yesus ben sabi san den e prakseri. A taigi den taki: “Ibri kondre pe den sma e feti nanga densrefi, o broko, èn a wan oso o fadon tapu a trawan. 18Unu e taki tak' na Beelsebul e gi Mi krakti fu yagi den takruyeye puru. Ma efu Satan e feti nanga den tra didibri, fa a o man tan rigeri dan? 19Efu na Beelsebul e gi Mi a krakti fu yagi takruyeye, suma e gi den sma fu unu a krakti dati dan? Dat' meki na den srefi o sori unu tak' un no abi leti. 20Ma efu na Gado e gi Mi a krakti fu yagi den takruyeye, dan dati e sori taki Gado bigin tiri libisma kba. 21Te wan tranga man di abi ala en fetisani, e hori wakti gi en eigi oso, dan noti fu en no kan lasi. 22Ma te wan sma di tranga moro en sa kon feti nanga en, èn wini en, dan a o teki ala den fetisani tapu san a trangaman ben e bow, èn a o prati den tra sani san a teki. 23Suma no de na Mi sei, e suku fu broko Mi. Èn suma no e wroko makandra nanga Mi, e tyari prati.”
11:23
Mrk 9:40

Yesus sori fa takruyeye e wroko

Mat 12:43-45

24“Te wan takruyeye kmopo na tapu wan sma, a e go na dreisabana fu suku wan presi fu rostu. Te a no feni, dan a e taki: ‘Mi o drai go baka na mi oso pe mi kmopo.’ 25Te a drai kon, a e si taki a tanpresi krin èn ala sani de tapu en presi. 26Dan a e gwe go teki seibi tra takruyeye kon di ogri moro en. Den e kon inisei, èn den e tan drape. Te fu kba a kon moro takru gi a sma leki na a bigin.”

27Di Yesus ben e taki den sani disi, wan uma di ben de ini a bigi grupu sma, bari taigi En taki: “Blesi de tapu a m'ma di tyari Yu na ini en bere, èn di gi Yu bobi.” 28Ma Yesus piki en taki: “Iya, na so a de. Ma wan moro bigi blesi de tapu den sma di e arki Gadowortu èn di e du san A e taki.”

Den sma aksi fu wan marki

Mat 12:38-42

29Moro nanga moro sma ben e kon arki Yesus. Dan Yesus taki: “Unu fu a ten disi na takru-ati sma. Un wani taki Mi mus sori un wan marki. Ma a wan enkri marki san un o kisi, na a wan fu Yona.

11:29
Mat 16:4
Mrk 8:12
30Bika leki fa Yona ben de wan marki gi den sma fu a foto Nineve, na so a Manpikin fu Libisma sa de wan marki gi unu.
11:30
Yona 3:4
31Tapu a bigi krutu dei, a uma di ben tiri a kondre Seba sa tnapu makandra nanga unu fu a ten disi èn a sa krutu unu. Bika a ben kmopo fu wan farawe kondre kon arki a koni fu Salomo. Ma luku, wan sma de dya di bigi moro Salomo.
11:31
1Kow 10:1-10
2His 9:1-12
32Tapu a dei dati, den sma fu Nineve sa tnapu makandra nanga unu fu a ten disi èn den o krutu unu. Bika den ben drai den libi di Yona tyari a boskopu gi den. Ma luku, wan sma de dya di bigi moro Yona.”
11:32
Yona 3:5

Yu ai na a lampu fu yu skin

Mat 5:15; 6:22-23

33“No wan sma e leti wan kokolampu fu poti na ini wan kasi noso ondro wan embre. Ma yu e poti en na tapu wan tafra, fu ala sma di e kon na inisei kan si a faya.

11:33
Mat 5:15
Mrk 4:21
Luk 8:16
34Yu ai de leki wan lampu di e tyari leti gi yu skin. Efu yu ai krin, yu heri libi krin. Ma efu yu ai dungru, dan yu heri libi dungru. 35Sorgu taki a sani san mus tyari leti kon gi yu, no e tyari dungru. 36So efu yu heri libi krin, èn no wan dungru pisi no de, dan a o de neleki te a faya fu wan lampu e krin ala sani. Yu heri libi o krin fu tru.”

Yesus e piri ai gi den hoigriman

Mat 23:1-36; Mrk 12:38-40

37Di Yesus ben e taki ete, wan fu den Fariseiman kari En kon na en oso fu kon nyan. Yesus go inisei, dan A teki presi sei a tafra. 38A Fariseiman ferwondru di a si taki Yesus bigin nyan sondro fu wasi En anu. 39Dan Masra taigi en taki: “Un Fariseiman e wasi dorosei fu a kan nanga a preti. Ma fu inisei, un lai gridi maniri nanga takru prakseri. 40Un donman unu! Gado di meki dorosei, meki inisei tu. 41Prati san un abi nanga pôtisma, dan ala sani o de krin gi unu. 42Ma un Fariseiman, un mus luku bun! Bika un e gi Gado tin prosenti fu den moro pikin spesrei di un prani. Ma un no e krutu sma tapu wan leti fasi, èn un no lobi Gado. A bun fu du a wan sani, ma dan un mus du a trawan tu.

11:42
Lev 27:30
43Un Fariseiman, un mus luku bun! Bika un lobi fu sidon na den moro prenspari presi na ini den kerki, èn un lobi te sma e gi un lespeki odi na wowoyo. 44Un Fariseiman, un mus luku bun! Bika un de leki grebi di no de fu si. Den sma di e waka na den tapu, no sabi srefi tak' na tapu grebi den e waka.”

45Wan fu den sabiman fu Gado wèt taigi Yesus taki: “Meister, efu Yu e taki so, Yu e afrontu unu tu.” 46Ma Yesus piki en taki: “Un sabiman fu Gado wèt, un mus luku bun tu! Bika un e poti ala sortu wèt gi den sma di tranga fu hori. Ma un srefi no e broko un ede nanga den. 47Un mus luku bun! Bika un e meki moimoi grebi gi den profeiti, ma na den afo fu unu ben kiri den. 48A sani san un e du, e sori taki un e feni en bun san den afo fu unu ben du. Bika na den kiri, èn unu e meki den grebi. 49Dat' meki Gado ini En bigi koni ben taki: ‘Mi o seni profeiti nanga boskopuman go na den. Sonwan fu den, den o kiri, èn den o de na trawan baka fu du den ogri.’ 50Gado o meki unu di libi now pai fu a brudu fu ala den profeiti di lon sensi grontapu meki, 51bigin fu a brudu fu Abel kon te na a brudu fu Sakarias di den kiri ini a Oso fu Gado mindri a altari nanga a santa presi. Iya, un kan sabi taki Gado o meki un pai fu dati.

11:51 a
Gen 4:8
52Un sabiman fu Gado wèt, un mus luku bun! Un no e gi den sma a sroto fu den ferstan den sani fu Gado. Un srefi no e meki muiti fu ferstan den, èn un tapu den sma di e pruberi fu du dati.” 53Di Yesus ben e gwe fu a oso fu a Fariseiman, a ati fu den sabiman fu Gado wèt nanga den Fariseiman ben bita na En tapu. Espresi den ben aksi En ala sortu sani fu suku En mofo. 54Na so den ben seti trapu gi Yesus, fu A kan taki wan sani di no bun.