Sranan Tongo Bible 2016 (STB16)
15

A agersitori fu a lasi skapu

Mat 18:12-14

151Ala den man di e piki lantimoni nanga den sondusma, ben e kon na Yesus fu arki san A e leri.

15:1-2
Luk 5:29-30
2Ma den Fariseiman nanga den sabiman fu Gado wèt ben e knoru taki: “A man disi e meki den sondusma kon na En, èn A e nyan nanga den.” 3Dan Yesus gi den a agersitori disi. A taki: 4“Efu yu abi wan hondro skapu, èn wan fu den lasi, san yu o du? A no libi yu o libi den neigitenti-na-neigi trawan ini a dreisabana, fu go suku a wan di lasi te leki yu feni en? 5Dan te yu feni en, yu o opo en nanga prisiri, poti na tapu yu skowru. 6Te yu doro na oso, yu o kari ala den mati nanga den birtisma fu yu kon na wan, dan yu o taigi den taki: ‘Un prisiri nanga mi, bika mi feni a skapu fu mi di ben lasi.’ 7We, Mi e taigi un taki: Na so moro prisiri de na heimel fu a wan sondusma di drai en libi, dan fu den neigitenti-na-neigi bun sma di no abi fu drai den libi.”

A agersitori fu a moni di ben lasi

8Yesus gi ete wan agersitori. A taki: “Efu wan uma abi tin solfrumoni,15:8 Wan solfrumoni na a moni san wan wrokoman ben e wroko wan dei. dan a lasi wan fu den, san a o du? A o leti wan lampu, sibi a oso, èn a o suku bun te leki a feni en. 9Te a feni en, a o kari den kompe nanga den birtisma fu en kon, dan a o taigi den taki: ‘Un prisiri nanga mi, bika mi feni a solfrumoni fu mi di ben lasi.’ 10Mi e taigi un taki: Na so den engel fu Gado e prisiri te wan sondusma drai en libi.”

A agersitori fu a manpikin di ben lasi

11Yesus taki moro fara: “Wan man ben abi tu boi. 12A moro yongu wan taigi en p'pa taki: ‘P'pa, gi mi san mi mus kisi fu a gudu fu unu.’ Dan a p'pa prati a gudu fu en gi den tu boi. 13Wantu dei na baka, a moro yongu wan seri ala den sani teki a moni, dan a gwe na wan fara kondre. Drape a fermorsu ala en moni, fu di a ben libi wan yayolibi. 14Di a kba fermorsu ala en moni, wan tranga angriten kon ini a kondre. A boi bigin pina, 15dan a go suku wroko. So a bigin wroko gi wan fu den sma fu a kondre. A sma dati seni en fu go luku den agu gi en na ini en gron. 16Angri ben kiri a boi sote taki a ben wani furu en bere nanga den buba san den agu ben e nyan, ma no wan sma no gi en. 17Di a boi kisi ensrefi, a taki: ‘Mi p'pa abi someni wrokoman, èn den man dati abi bogobogo nyanyan. Ma mi e dede dya fu angri. 18Mi o opo go baka na mi p'pa, dan mi o taigi en taki: P'pa, mi sondu na fesi Gado èn na fesi yu. 19Mi no warti fu de yu pikin moro. Teki mi leki wan fu den wrokoman fu yu.’ 20Na so a boi opo, dan a drai go baka na en p'pa.

A ben de fara ete di en p'pa si a e kon. Dan a p'pa firi sari gi en. A lon go miti a boi, a brasa en èn a bosi en. 21Dan a boi taigi en p'pa taki: ‘P'pa, mi sondu na fesi Gado èn na fesi yu. Mi no warti fu de yu pikin moro.’ 22Ma a p'pa taigi den knekti fu en taki: ‘Un tyari a moro bun krosi kon es'esi dyaso, dan un weri en gi en. Un weri wan linga gi en na en finga, nanga susu na en futu. 23Un go teki a pikin kaw san un ben kweki poti aparti, dan un srakti en meki un hori wan fesa. 24Bika a boi fu mi disi ben dede, ma now a e libi baka. A ben lasi, ma now mi feni en.’ Na so den bigin hori wan fesa.

25A pisten dati a moro bigi boi ben e wroko ini a gron. Di a kon krosbei fu a oso, a yere poku nanga dansi. 26A kari wan fu den knekti kon, dan a aksi en taki: ‘San de fu du?’ 27A piki en taki: ‘Yu brada kon baka na oso, èn yu p'pa meki den srakti a pikin kaw, bika a kisi en bunbun baka.’ 28Dan a brada ati bron. A no ben wani go na inisei. Dan en p'pa kon na dorosei kon aksi en tangitangi fu kon na inisei. 29Ma a piki en p'pa taki: ‘Luku omeni yari mi wroko so tranga gi yu. Noiti mi no psa yu mofo. Ma noiti yu gi mi wan pikin bokoboko srefi fu mi hori wan fesa nanga den mati fu mi. 30Ma a boi fu yu disi fermorsu yu gudu nanga den motyo. Dan di a kon baka, yu meki den srakti a pikin kaw gi en!’ 31Ma a p'pa taigi en taki: ‘Mi boi, ala ten yu de nanga mi, èn ala sani fu mi, na fu yu tu. 32Ma un ben musu fu hori wan fesa fu meki prisiri. Bika yu brada ben dede, ma now a e libi baka. A ben lasi, ma now mi feni en.’ ”

16

A agersitori fu a man di ben luku den gudu

161Dan Yesus gi den sma di ben e teki leri fu En wan agersitori. A taki: “Wan guduman ben abi wan man di ben e luku den gudu fu en. Dan a guduman kisi fu yere taki a man ben e fermorsu en gudu. 2A seni kari en, dan a taigi en taki: ‘San na den sani san mi e yere fu yu? Yu mus gi frantwortu fu san yu ben du nanga den gudu fu mi, bika yu no o luku den moro langa.’ 3Ne a man prakseri taki: ‘San mi mus du? Mi masra o puru a wroko na mi anu. Mi no man diki skopu, èn mi e syen fu go begi moni. 4We, mi sabi san mi o du fu den sma opo den oso gi mi te mi lasi mi wroko.’ 5Dan a seni kari ala den sma di mus pai en masra wan fru wan kon na en. A aksi a fosi wan taki: ‘Omeni yu mus pai mi masra?’ 6A man piki en taki: ‘Mi mus pai wan hondro bari oli.’ Dan a taigi a man taki: ‘Luku a papira dya san e sori omeni yu mus pai. Go sidon es'esi, dan yu skrifi taki yu mus pai feifitenti bari oli.’ 7Baka dati a aksi a di fu tu man taki: ‘Omeni yu mus pai mi masra?’ A man piki en taki: ‘Mi mus pai wan hondro saka tarwe.’ Dan a taigi a man dati taki: ‘Luku a papira dya san e sori omeni yu mus pai. Skrifi taki yu mus pai aititenti saka tarwe.’ 8A man di ben luku den gudu, no du san bun, ma en masra prijse en fu a koni sani san a du. Na so a de. Den sma fu a grontapu disi e denki moro bun te den abi fu wroko nanga densrefi, moro den sma fu a leti. 9Dat'ede Mi e taigi un taki: Du bun gi tra sma nanga den gudu16:9 Ini Grikitongo a skrifi: mammon. A wortu disi wani taki: moni noso grontapu gudu. fu grontapu. Bika te yu no o abi den sani dati moro, yu o abi wan oso fu têgo.

10Efu den kan fertrow yu nanga pikinpikin sani, dan den o man fertrow yu nanga bigi sani tu. Ma efu yu no de fu fertrow nanga pikinpikin sani, dan yu no o de fu fertrow nanga bigi sani tu. 11So, efu yu no ben de fu fertrow nanga grontapu gudu, dan suma sa fertrow yu nanga trutru gudu? 12Èn efu yu no ben de fu fertrow nanga den sani fu wan tra sma, dan suma sa gi yu sani san de fu yu srefi? 13Wan knekti no kan wroko gi tu basi. Bika a sa hori a wan na ati, dan a lobi a trawan. Noso a sa lespeki a wan, ma a no o teri a trawan. Yu no kan dini Gado makandra nanga den gudu fu grontapu.”

16:13
Mat 6:24

Yesus nanga den Fariseiman

14Di den Fariseiman yere san Yesus taki, den meki spotu nanga En, bika den ben lobi moni. 15Dan Yesus taigi den taki: “Un wani fu den sma si un leki sma di bun ini Gado ai, ma Gado sabi un ati. Bika san warti furu ini libisma ai, no warti noti gi Gado.

16Moses nanga den profeiti ben leri unu te leki Yohanes kon. Bigin fu a ten dati a bun nyunsu e preiki taki Gado o tiri libisma, èn ala sma e du muiti fu kon ondro a tiri fu Gado.

16:16
Mat 11:12-13
17We arki, a moro makriki fu broko heimel nanga grontapu, dan fu puru wan pikin pisi fu a wèt fu Gado.
16:17
Mat 5:18
18Iniwan man di broko trow nanga en uma, dan a trow nanga wan trawan, e libi wan huru libi. Èn efu wan man trow nanga wan uma di en masra broko trow nanga en, a e libi wan huru libi tu.”
16:18
Mat 5:32
1Kor 7:10-11

A guduman nanga Lasarus

19Yesus taki: “Yu ben abi wan guduman di ben e weri bun diri krosi, èn ala dei a ben e hori bigi fesa. 20Èn yu ben abi wan pôtiman tu di ben nen Lasarus. A ben e didon na mofodoro fu a guduman oso, èn en heri skin ben lai nanga sorosoro. 21A ben e angri fu furu en bere nanga san ben fadon fu a tafra fu a guduman. Te a ben e didon drape, den dagu ben e kon leki den soro fu en. 22Baka wan pisten a pôtiman kon dede, dan den engel tyari en go na Abraham sei. A guduman dede tu, dan den beri en. 23A ben e nyan hebi pina na ini dedekondre. Di a opo en ai luku, a si Abraham farawe nanga Lasarus na en sei. 24Dan a bari gi Abraham taki: ‘Papa Abraham, sari mi! Seni Lasarus fu a go dopu wan pikin pisi fu en finga nomo ini pikin watra fu kon kowru mi tongo. Bika mi e nyan tumsi pen na ini a faya disi.’ 25Ma Abraham piki en taki: ‘Mi boi, memre taki di yu ben e libi na grontapu yu ben abi en bun. Ma na soso ogri ben e miti Lasarus. Now Lasarus e kisi trowstu dyaso, èn yu e nyan pen. 26Boiti dati, wan dipi olo e prati wi nanga unu. So, awinsi un ben sa wani, no wan fasi no de fu wi kon na a sei dati. Èn unu fu a sei dati no man kon na wi.’ 27Dan a guduman taki: ‘Papa, dan mi e begi yu fu seni Lasarus go na a oso fu mi p'pa. 28Mi abi feifi brada. Meki a go warskow den bun, fu den no kon pina dya tu.’ 29Ma Abraham taigi en taki: ‘Den brada fu yu abi den buku fu Moses nanga den profeiti. Meki den arki san den e taki.’ 30Ma a man piki taki: ‘Nono, papa Abraham. Ma efu wan sma di dede kba go warskow den, den o drai den libi.’ 31Ma Abraham taki: ‘Efu den no e arki Moses nanga den profeiti, dan den no o arki wan tra sma, awinsi na wan di kon na libi baka.’ ”

17

Yesus warskow den sma

Mat 18:6-7,21-22; Mrk 9:42

171Yesus taigi den sma di e teki leri fu En taki: “Ala ten yu o abi sani san o wani meki yu du sondu. Ma a sma di e tyari den sani dati kon mus luku bun! 2A ben o moro bun gi en efu den tai wan bigi ston na en neki èn fringi en go na ini a se, prefu a kori wan fu den pikinwan disi fu meki a sondu. 3So luku bun san yu e du!

17:3
Mat 18:15

Efu yu brada sondu, bari en. Efu a sari fu san a du, yu mus gi en pardon. 4Awinsi na seibi leisi ini wan dei a du yu wan sani, dan a kon taigi yu ala den seibi leisi taki a e sari fu san a du, yu mus gi en pardon.”

5Dan den boskopuman fu Yesus taigi En taki: “Masra, gi un moro bribi.” 6Masra piki den taki: “Efu a bribi fu unu ben bigi leki wan mosterdsiri nomo, un ben kan taigi a bon disi taki: ‘Rutu yusrefi puru, dan yu prani yusrefi ini a se.’ Èn a ben o du san yu taki.”

Wan knekti mus du en wroko

7“Kon un taki wan fu unu abi wan knekti di e wroko gron noso e luku skapu. Te a kon na oso, yu no e taigi en fu a kon nyan wantron. 8Nono, ma yu e taigi en taki: ‘Seti yu krosi fu wroko, bori mi nyanyan, dan yu tyari en kon gi mi. Te mi kba nyan nanga dringi, dan fosi yu kan go nyan nanga dringi.’ 9Yu prakseri taki yu o abi fu taki a knekti tangi fu di a du san a ben mus du? Nono. 10We, na so un mus de tu. Baka te un du ala sani san den taigi un fu du, un mus taki: ‘Wi na knekti nomo di no warti noti. Na du un du san un ben mus fu du.’ ”

Den tin gwasiman

11Di Yesus ben de na pasi fu go na Yerusalem, A waka psa ini Galilea nanga Samaria. 12Dan di A doro na ini wan fu den dorpu, A si tin gwasiman di ben e waka miti En. Den man disi tan tnapu farawe, 13dan den bari taki: “Yesus, Meister, abi sari-ati nanga unu!” 14Yesus luku den, dan A taki: “Go na den priester, meki den luku unu.” Di den man de na pasi e gwe, den kon betre.

17:14
Lev 14:1-32
15Di wan fu den si taki a kon betre, a drai kon baka èn nanga tranga sten a gi Gado grani. 16A trowe ensrefi langalanga na gron na Yesus futu èn a taki En tangi. Ma a man disi ben de wan sma fu Samaria. 17Dan Yesus taki: “A no ala tin man kon betre? Pe den tra neigi de? 18A man disi a no wan Dyu. Fa a kan tak' na en wawan drai kon baka fu gi Gado grani?” 19Dan Yesus taigi a man taki: “Opo, yu kan gwe. A bribi fu yu meki yu kon betre.”

Te Yesus o kon baka

Mat 24:23-28,37-41

20Den Fariseiman aksi Yesus oten Gado o bigin tiri libisma. Dan Yesus piki den taki: “Te Gado o bigin tiri libisma, no wan marki o de fu si na fesi. 21Yu no o man taki: ‘Luku en dyaso,’ noso: ‘Luku en drape.’ Bika a tiri fu Gado de let' dya na un mindri.”

22Dan A taigi den sma di e teki leri fu En taki: “Wan ten o kon pe un o angri fu si wan fu den dei fu a Manpikin fu Libisma. Ma un no o si en. 23Sma o taigi unu taki: ‘Luku En drape,’ noso: ‘Luku En dyaso.’ No go luku, èn no waka na den baka. 24Bika leki fa faya e koti èn a de fu si fu a wan sei fu heimel go te na a tra sei, na so a Manpikin fu Libisma o de te A e drai kon baka. 25Ma fosi a sani dati psa, A mus nyan furu pina, èn den sma fu a ten disi o poti En na wan sei. 26Soleki fa a ben de ini a ten fu Noa, na so a sa de te a Manpikin fu Libisma o drai kon baka.

17:26
Gen 6:5-8
27Ini den dei dati den sma ben e nyan, den ben e dringi èn trow ben e trow, te leki a dei di Noa go ini a bigi sipi. Dan a bigi frudu kon, èn a kiri ala den sma dati.
17:27
Gen 7:6-24
28Na so a ben de tu ini a ten di Lot ben e libi. Den sma ben e nyan èn den ben e dringi. Den ben e bai èn seri sani. Den ben e prani èn den ben e bow oso.
17:28-29
Gen 18:20—19:25
29Ma a dei di Lot gwe libi Sodom, faya nanga kroiti fadon kmopo fu heimel leki alen èn a kiri ala den sma. 30Na so a o de te a Manpikin fu Libisma o drai kon baka fu ala sma si En. 31Tapu a dei dati a sma di de tapu a daki fu en oso, no mus saka go na gron fu teki sani ini en oso. Sosrefi a sma di de ini en gron, no mus drai go baka na en oso.
17:31
Mat 24:17-18
Mrk 13:15-16
32Un prakseri san psa nanga a uma fu Lot!
17:32
Gen 19:26
33A sma di e suku fu hori en libi, o lasi en. Ma a sma di e poti en libi na wan sei, o kisi en baka.
17:33
Mat 10:39
16:25
Mrk 8:35
Luk 9:24
Yoh 12:25
34Mi e taigi un taki: A neti dati tu sma o didon tapu wan bedi. Wan o gwe, èn a trawan o tan na baka. 35Tu uma o de na den miri e mara. Wan o gwe, èn a trawan o tan na baka. 36Tu man o de ini wan gron e wroko. Wan o gwe, èn a trawan o tan na baka.”17:36 Wantu manuscript no abi vers 36. 37Dan den man aksi Yesus taki: “Masra, pe den sani disi o psa?” Yesus piki den taki: “Pe a dedeskin didon, na drape yu e si tingifowru.”