Sranan Tongo Bible 2016 (STB16)
111Masra Teofilus,

Furu sma meki muiti kba fu skrifi den sani san ben psa na un mindri, 2soleki fa den sma di ben si ala den sani sensi na a bigin èn di ben panya a boskopu, ben ferteri wi. 3Ma baka di misrefi go ondrosuku fin'fini fa ala sani ben waka sensi na a bigin, mi prakseri taki a ben o bun fu skrifi den sani soleki fa den ben psa, poti ini wan buku gi yu. 4Mi e du disi fu yu kon si taki den sani san den ben leri yu, na tru.

Wan engel go na Sakarias

5Ini den dei di Herodes ben de kownu fu Yudea, wan priester ben de di ben nen Sakarias. A ben de fu a grupu fu Abia. En uma Elisabet ben de wan bakapikin fu Aaron.

1:5
1His 24:10
6Den tu sma disi ben bun ini Gado ai, èn den ben hori densrefi na ala den komanderi fu Gado èn na san A ben wani taki sma mus du. No wan sma ben man taki takru fu den. 7Ma den no ben abi no wan pikin, bika Elisabet no ben man kisi pikin, èn den ala tu ben kon owru kba.

8Now a ben de a ten taki Sakarias ben mus du en wroko leki priester gi Gado, fu di a grupu fu en ben mus du a wroko a pisten dati. 9Dan soleki fa a gwenti fu den priester ben de, den ben hari lot fu luku suma ben mus go na ini a santa presi fu Masra fu go bron switismeri. Di den hari a lot, a sori taki na Sakarias ben mus go. 10A yuru di a switismeri ben e bron, ala den sma ben de na prasi e begi. 11Dan wan engel fu Masra sori ensrefi na Sakarias. A engel ben tnapu na a let'sei fu a altari pe a switismeri ben e bron. 12Di Sakarias si a engel, a skreki èn a kon frede. 13Ma a engel taigi en taki: “Sakarias, no frede. Gado yere yu begi. Elisabet, a uma fu yu, o kisi wan manpikin gi yu èn yu mus kari en Yohanes. 14Yu o breiti èn prisiri nanga en, èn furu sma o prisiri taki a kon gebore. 15Bika a o de wan prenspari man fu Masra. A no mus dringi win noso sopi. Na ini en m'mabere srefi a o furu nanga a Santa Yeye.

1:15
Nom 6:3
16A o meki furu sma fu Israel drai kon baka na Masra, a Gado fu den. 17A o waka na Masra fesi tapu a srefi fasi èn nanga a srefi krakti fu Elia. A o meki taki pratifasi no de moro na mindri pikin nanga den bigisma fu den. A o meki sma di trangayesi, bigin libi leki den sma di bun ini Gado ai. Na so a o meki a folku klari gi Masra.”
1:17
Mal 4:5-6

18Dan Sakarias aksi a engel taki: “Fa mi o sabi taki a sani disi o psa? Bika mi owru kba, èn a uma fu mi doro wan hei libi marki kba tu.” 19Dan a engel piki en taki: “Mi na Gabriyel, a wan di e tnapu krosbei fu Gado. Na En seni mi kon na yu fu ferteri yu a bun nyunsu disi.

1:19
Dan 8:16
9:21
20We luku, den sani san mi taigi yu, o psa na a ten di Gado poti. Ma fu di yu no bribi san mi taigi yu, yu o babaw. Yu no o man taki te leki a dei te ala den sani disi o psa.”

21A pisten dati den sma ben de na prasi e wakti Sakarias. Den ben ferwondru taki Sakarias tan so langa ini a santa presi. 22Di Sakarias kon na dorosei, a no ben man taki nanga den. So den sma kon ferstan taki Gado ben sori en wan sani ini a santa presi. A meki wantu beweigi nanga en anu èn a tan babaw. 23Di a ten kon kba san a ben mus du en wroko, a drai go baka na en oso.

24Baka den dei dati en uma Elisabet hori bere. Feifi mun langa a no ben kmopo na ini en oso fu sma si en. 25Elisabet taki: “Disi na san Gado du gi mi ini a ten di A sari mi. A puru a syen na mi tapu san mi ben abi mindri den sma.”

Wan engel go na Maria

26Di Elisabet ben abi siksi mun bere, Gado seni a engel Gabriyel go na a foto Nasaret ini Galilea. 27A ben mus go na wan yongu uma di noiti no ben sribi nanga wan man ete. A yongu uma disi ben nen Maria. A ben o trow nanga Yosef, wan man di ben de wan bakapikin fu kownu David.

1:27
Mat 1:18
28Di Gabriyel go ini a oso fu Maria, a taki en odi. Dan a taigi en taki: “Masra de nanga yu, èn a blesi fu Masra de na yu tapu.” 29Maria skreki sote di a yere san a engel taki. Dan a aksi ensrefi san a odi disi wani taki. 30Ma a engel taigi en taki: “Yu no abi fu frede, Maria, bika Gado sori yu a bun-ati fu En. 31Luku. Yu o hori bere, èn yu o kisi wan manpikin. Yu mus kari en Yesus.
1:31
Mat 1:21
32A o de wan prenspari man èn den o kari En a Manpikin fu a Moro Hei Gado. Masra Gado o meki A tron kownu na a presi fu En afo David.
1:32-33
2Sam 7:12-13,16
Yes 9:7
33A sa de a kownu fu a folku Israel fu têgo,1:33 Ini Grikitongo a skrifi taki: A sa de a kownu fu a oso fu Yakob fu têgo. èn noiti wan kba o kon na a tiri fu En.”

34Dan Maria taigi a engel taki: “Fa dati o du psa? Bika noiti ete mi sribi nanga wan man.” 35Dan a engel piki en taki: “A Santa Yeye o kon na yu tapu, èn a krakti fu a Moro Hei Gado o saka kon tapu yu. Dat' meki den sa kari a santa pikin di o gebore, a Manpikin fu Gado. 36Luku, Elisabet a famiri fu yu, owru kba. Ma ensrefi de nanga bere fu kisi wan manpikin. Den ben taki a no man kisi pikin, ma na siksi mun kba di a abi bere. 37Bika noti no de san Gado no kan du.”

1:37
Gen 18:14
38Dan Maria taki: “We, mi de na Masra anu. Meki ala sani psa nanga mi soleki fa yu taki.” Dan a engel gwe.

Maria go luku Elisabet

39Baka dati Maria teki pasi go es'esi na wan foto san de ini den bergi fu Yudea. 40A go na Sakarias oso, dan a gi Elisabet odi. 41Di Elisabet yere a odi fu Maria, a pikin dyompo ini en bere. Ne Elisabet kon furu nanga a Santa Yeye, 42dan a taki nanga tranga sten taki: “Masra blesi yu moro ala uma di de, èn a blesi fu Masra de tapu a pikin ini yu bere. 43Ma fa mi du feni a bun disi, taki a m'ma fu a Mesias kon luku mi? 44Bika luku, di mi yere a odi fu yu, a pikin dyompo fu prisiri ini mi bere. 45A blesi fu Gado de na yu tapu fu di yu bribi taki a sani san Masra taigi yu, o psa.”

A singi fu Maria

46Dan Maria taki:

Nanga mi heri ati

mi e opo a nen fu Masra,

1:46-55
1Sam 2:1-10

47èn nanga ala sani san de na ini mi,

mi e prisiri nanga Gado,

mi Ferlusuman.

48Bika A prakseri mi,

aladi mi na a moro lagi knekti fu En.

Luku, bigin fu now ala sma o taki,

yari go yari kon,

taki mi na wan blesi sma.

1:48
1Sam 1:11

49Bika Gado di abi Makti,

A du bigi sani gi mi

èn a nen fu En santa.

50A e sori sari-ati na ala sma di e lespeki En,

den sma di e libi nownow,

nanga den di o libi bakaten.

51A du bigi wroko nanga a makti fu En.

A tyari bruya kon ini den prakseri fu den sma di abi bigimemre.

52A meki den bigiman fu kondre lasi den makti,

èn A opo den sma di trawan no e teri.

1:52
Yob 5:11
12:19

53Den sma nanga angribere A gi nofo fu nyan,

ma den guduman A seni gwe nanga soso anu.

54-55Soleki fa A pramisi den bigisma fu unu,

A langa wan anu gi Israel,

a folku di e dini En.

Bika A memre taki fu têgo A ben o sori sari-ati na Abraham,

nanga na den bakapikin fu en.

1:54-55
Gen 17:7

56Maria ben tan dri mun so na Elisabet, dan a drai go baka na en oso.

Yohanes kon gebore

57Di a yuru doro fu Elisabet meki a pikin, a kisi wan boi. 58Den birtisma nanga den famiri fu en, ben yere fa Masra ben sori bigi sari-ati na Elisabet. So den ben prisiri nanga en. 59Di a boi tapu aiti dei, den sma kon fu besnei a boi. Dan den ben wani gi a boi a nen fu en p'pa Sakarias.

1:59
Lev 12:3
60Ma en m'ma taki: “Nono. Un mus kari en Yohanes.” 61Ma den taigi Elisabet taki: “No wan sma de ini yu famiri di abi a nen dati.” 62Dan den sma meki wantu beweigi nanga den anu fu aksi Sakarias fa a wani taki a pikin mus nen. 63Ne Sakarias aksi den sma wan sani fu skrifi na tapu. A skrifi taki: “A mus nen Yohanes.” Ala den sma ben ferwondru. 64Dan wantron so Sakarias ben man taki baka èn a bigin fu opo Gado nen. 65Ala den sma di ben libi ini a birti fu den, ben kisi bigi lespeki gi Gado. Èn ini a heri bergi presi fu Yudea den sma ben taki fu den sani disi. 66Ala sma di yere ben teki den sani disi na prakseri. Den ben aksi densrefi taki: “San a pikin disi o tron?” Bika a ben de krin fu si taki a krakti fu Gado ben de na en tapu.

Den sani san Sakarias taki

67Sakarias kon furu nanga a Santa Yeye, dan a bigin taki san Gado gi en fu taki. A taki:

68Mi e opo a nen fu Masra,

a Gado fu Israel.

Bika A langa wan anu gi En folku

èn A ferlusu den.

69A gi unu wan tranga Ferlusuman,

di de wan bakapikin

fu En knekti David,

70-71fu ferlusu unu puru

ini a makti fu un feyanti,

nanga fu den sma

di no lobi unu srefsrefi.

Langaten na fesi A ben meki

den santa profeiti fu En taki a sani disi kba.

72Na so A sori sari-ati na den afo fu unu.

A hori ensrefi na a santa ferbontu fu En.

73Bika A ben meki wan sweri

nanga un afo Abraham,

74taki A ben o ferlusu unu puru

ini a makti fu un feyanti,

fu un kan dini En sondro frede.

75Un o man dini En un heri libi langa,

tapu wan santa fasi,

èn tapu wan fasi di bun ini Gado ai.

76Èn yu, mi pikin,

den sa kari yu wan profeiti fu a Moro Hei Gado,

bika yu sa waka na Masra fesi,

fu meki pasi klari gi En,

1:76
Mal 3:1

77fu meki a folku fu en sabi taki Gado o ferlusu den,

te A gi den pardon fu den sondu.

78Bika fu di Gado abi bigi sari-ati gi unu,

a Wan di o kmopo na heimel

o kon na unu fu yepi unu.

A o kon leki a son di e opo

79fu tyari leti kon gi den sma di de na dungru,

gi den di de na pasi fu go dede.

Èn A o sori unu a pasi fu freide.

1:79
Yes 9:1

80A boi ben e gro, èn moro nanga moro a Yeye ben gi en krakti. A ben e tan na ini a dreisabana te leki a dei di a sori ensrefi na den sma fu Israel.
2

Yesus gebore

Mat 1:18-25

21Ini a srefi ten dati grankownu Augustus ben seni wan boskopu go lontu ini ala den kondre di a ben e tiri, taki ala sma mus go skrifi den nen na ini lantibuku. 2Disi ben de a fosi leisi di den ben meki den sma skrifi den nen na ini lantibuku èn a psa ini a ten di Kwirinius ben de granman fu Siria. 3So ala sma ben go skrifi den nen na ini a foto pe a famiri fu den ben kmopo. 4Dan fu di Yosef ben de wan bakapikin fu David, a kmopo fu Nasaret na ini Galilea fu go na Betlehem na ini Yudea, bika na drape David ben gebore. 5A go drape fu skrifi en nen nanga a di fu Maria, a uma nanga san a ben o trow. A pisten dati Maria ben abi bere. 6Di den ben drape, a yuru doro fu Maria kisi a pikin. 7Dan a kisi en fosi boi. A domru En na ini krosi, dan a poti En didon ini wan baki pe meti e nyan, bika a oso pe yu ben kan yuru wan presi fu tan, ben furu kba.

Den man di ben luku den skapu

8Ini a srefi kontren dati wantu skapuman ben de ini den wei e hori wakti te neti gi den skapu fu den. 9Dan wantron so wan engel fu Masra ben tnapu na den fesi, èn a glori fu Masra ben krin a heri presi pe den ben de. Den man ben frede srefsrefi. 10Ma a engel taigi den taki: “No frede! Bika mi tyari wan bun nyunsu gi unu san o meki a heri folku prisiri. 11Tide a Ferlusuman gebore gi unu na ini a foto fu David. Na En na a Mesias, na En na Masra. 12Disi na a marki: Te un go, un o si wan pikin di domru na ini krosi, èn a didon ini wan baki pe meti e nyan.” 13Dan wantron so wan heri ipi tra engel ben tnapu nanga a fosi wan. Den ben e prijse Gado taki:

14“Glori gi Gado di de na heimel, èn freide gi den sma na grontapu di Gado lobi.”

15Di den engel gwe baka na heimel, den skapuman taigi makandra taki: “Meki un go na Betlehem fu go luku a sani san Masra seni taigi unu.” 16Den man gwe es'esi, dan den feni Maria nanga Yosef, nanga a pikin di ben didon na ini a baki. 17Di den si a pikin den ferteri ala sani san a engel ben taigi den fu a pikin. 18Ala sma di yere a tori ben ferwondru fu a sani san den skapuman taki. 19Maria no fergiti den sani san den taki, ma a tan memre den. 20Di den man e drai gwe baka, den ben e prijse Gado èn gi En glori fu ala sani san den ben si nanga san den ben yere. Ala sani ben psa soleki fa a engel ben taigi den.

21Di a pikin tapu aiti dei, den ben mus besnei En. Dan den gi En a nen Yesus. Bika fosi A ben de ini en mamabere, a engel ben taki tak' na so den mus kari En.

2:21 a
Lev 12:3

Simeon nanga Hana

22A ten ben doro tak' den ben mus krin densrefi gi Gado soleki fa a wèt fu Moses e taki. Dan Yosef nanga Maria tyari Yesus go na Yerusalem fu poti En na ini Masra anu.

2:22-24
Lev 12:6-8
23Bika a skrifi na ini a wèt fu Masra taki: “Ala fosi manpikin un sa poti aparti gi Masra.”
2:23
Eks 13:2,12
24A wèt fu Masra e taki moro fara tak' den ben mus tyari tu paskadoifi noso tu yongu doifi leki wan ofrandi gi Gado.

25A pisten dati wan man ben e libi ini Yerusalem di ben nen Simeon. A man disi ben bun ini Gado ai. A ben hori ensrefi trutru na a Dyubribi, èn a Santa Yeye ben de na en tapu. A ben angri fu si a dei di Gado ben o ferlusu Israel. 26A Santa Yeye ben sori Simeon taki a no ben o dede solanga a no ben si a Mesias di Masra ben o seni kon. 27Dan a Santa Yeye ben meki Simeon go ini a tempel di Yosef nanga Maria tyari Yesus go drape fu du nanga En soleki fa a wèt e taki. 28Dan Simeon teki a pikin tapu en anu èn a opo Gado nen. A taki:

29Masra,

now Yu kan meki Yu knekti dede ini freide,

leki fa Yu ben taki.

30Bika mi si a Ferlusuman nanga mi eigi ai,

31di Yu ben o seni kon gi ala folku.

32A o de leki wan faya

di o sori den sma di no sabi Yu,

a pasi fu Yu,

èn A o meki Yu pipel Israel kisi grani.

2:32
Yes 42:6
49:6

33Yosef nanga Maria ben ferwondru fu yere den sani san Simeon taki fu Yesus. 34Dan Simeon blesi den. A taigi Maria, a m'ma fu a pikin taki: “Luku, a pikin disi na wan marki di furu sma ini Israel o poti na wan sei. Na dati o broko den neki. Ma gi furu trawan A o tyari nyun libi kon. 35Na sowan fasi a sani san de ini den sma ati o kon na krin. Ma yu o abi dipi sari na ini yu ati.”

36Wan owru uma ben de ini a tempel tu. A ben nen Hana èn a ben de wan profeiti fu Gado. A p'pa fu en ben nen Fanuel èn a ben de fu a lo fu Aser. A uma disi no ben abi masra, bika seibi yari baka di a trow, en masra dede. 37Hana ben abi aititenti-na-fo yari, èn a ben tan ini a tempel e dini Gado dei nanga neti nanga faste èn begi. 38A srefi ten di Simeon ben e taki nanga Yosef nanga Maria, Hana kon tnapu drape. Dan a bigin opo Gado nen owktu èn ala sma di ben ferwakti taki Gado ben o ferlusu Yerusalem, a ferteri fu a pikin disi.

39Di Maria nanga Yosef du ala sani san den ben mus du, soleki fa a wèt fu Masra e taki, den drai go baka na Nasaret na ini Galilea, pe den ben e libi.

2:39
Mat 2:23
40A pikin ben e gro èn A ben kon tranga. A ben kon koni moro nanga moro èn Gado ben sori en a bun-ati fu En.

Yesus go na a tempel

41Ala yari a m'ma nanga a p'pa fu Yesus ben e go na Yerusalem fu nyan a Paskafesa.

2:41
Eks 12:1-27
Deu 16:1-8
42Di Yesus tapu twarfu yari den go na a fesa soleki fa den ben gwenti. 43Baka di a fesa kba, den teki pasi fu drai go baka na oso. Yesus tan na baka ini Yerusalem. Ma En m'ma nanga En p'pa no ben sabi. 44Fu di den ben prakseri taki A ben de mindri den tra sma di ben e drai go baka na oso tu, den waka wan heri dei fosi den bigin aksi famiri nanga mati efu den ben si Yesus. 45Di den no ben man feni En, den drai go baka na Yerusalem fu suku En. 46Dan tapu a di fu dri dei, den feni En na ini a tempel. Drape A ben e sidon na mindri den man di e gi leri. A ben e arki san den ben taki èn A ben e aksi den wantu sani. 47Ala sma di ben yere En, ben ferwondru fu a ferstan san A ben abi, nanga a fasi fa A ben piki den man. 48Di Maria nanga Yosef si En, den no ben sabi san fu taki. Dan Maria taki: “Boi, fa Yu kan du a sani disi nanga unu? Luku fa mi nanga Yu p'pa ben e waka suku Yu, bika un ati ben de na dyompo.” 49Dan A piki den taki: “Fu sanede un ben e suku Mi? Na sabi un no sabi dan taki Mi mus de na ini a oso fu Mi P'pa?” 50Ma den no ben ferstan a piki san A ben piki den. 51Dan Yesus drai go baka na Nasaret nanga den, èn A ben du san den ben e taigi En. Ma Maria no fergiti no wan fu den sani disi. 52So Yesus ben kon moro bigi èn A ben kon moro koni. Gado ben lobi En, èn den sma ben lobi En tu.
2:52
1Sam 2:26
Leri 3:4

3

Yohanes a dopuman

Mat 3:1-12; Mrk 1:1-8; Yoh 1:19-28

31A ben de tin-na-feifi yari kba taki Tiberius ben de grankownu. A ten dati Pontius Pilatus ben de granman fu Yudea. Herodes ben e tiri Galilea. Filipus, a brada fu Herodes, ben e tiri Iturea nanga Trakonitus. Èn Lisanias ben e tiri Abilena. 2Kayafas nanga Anas ben de granpriester.3:2 Fosi na Anas ben de a granpriester, ma awinsi a no ben de granpriester moro, den sma ben e tan kari en granpriester ete. Ini a srefi yari dati Gado ben gi Yohanes, a manpikin fu Sakarias, wan boskopu di a ben de ini a dreisabana. 3So Yohanes ben waka ini a heri birti fu a Yordanliba e bari a boskopu taki den sma mus drai den libi èn teki dopu. Na sowan fasi Gado ben o gi den pardon fu den sondu. 4Ini a buku fu a profeiti Yesaya, a skrifi taki:

Wan sma e bari wroko ini a dreisabana taki:

Meki pasi klari gi Masra,

puru ala boktuboktu gi En.

3:4-6
Yes 40:3-5

5Tapu ala den dipi olo,

èn puru den bergi na pasi,

pikinwan nanga bigiwan.

No wan kronkron pasi mus de,

èn den olo-olo pasi mus kon grati.

6Dan so ala sma sa si a Ferlusuman,

di Gado o seni kon.

7Dan Yohanes taigi a bigi ipi sma di ben kon na en fu teki dopu taki: “Un sneki unu! Suma gi un wan pingi fu lon gi a strafu fu Gado di de fu kon?
3:7
Mat 12:34
23:33
8Efu trutru un drai un libi, meki a de fu si dan. Un no bigin prakseri ini unsrefi taki: ‘Wi na bakapikin fu Abraham.’ Bika mi e taigi un taki: Gado kan meki den ston disi tron bakapikin fu Abraham.
3:8
Yoh 8:33
9A aksi de klar'klari kba na den rutu fu den bon. Ibri bon di no e gi bun froktu, den o kapu puru èn fringi go ini a faya.”
3:9
Mat 7:19

10Dan den sma aksi en taki: “We, san un mus du dan?” 11Yohanes piki den taki: “A sma di abi tu empi mus gi wan na a sma di no abi, èn a sma di abi nyanyan mus gi a sma di no abi.” 12Den man di e piki lantimoni ben kon fu teki dopu tu. Dan den aksi Yohanes taki: “Meister, san unu mus du?”

3:12
Luk 7:29
13A piki den taki: “No teki moro moni leki san yu mus teki.” 14Den srudati srefi aksi en taki: “Èn san un dati mus du?” A piki den taki: “No teki sma moni nanga tranga, èn no lei gi wan sma di no du noti. A moni san un e kisi mus de nofo gi unu.”

15Dan fu di a folku ben abi bigi howpu, meki den aksi densrefi efu a no Yohanes na a Mesias. 16Dat' meki Yohanes taigi den taki: “Mi e dopu unu nanga watra, ma wan Man e kon di abi makti moro mi. Mi no warti srefi fu lusu en susu puru na En futu. Na En o dopu unu nanga a Santa Yeye èn nanga faya. 17A hori En wrokosani na ini En anu fu wai a buba puru ini a graan. A graan A o poti na ini En maksin, ma den buba A o bron na ini faya di no man dede.”

18Nanga furu tra wortu Yohanes ben ferteri den sma a bun nyunsu. 19A ben piri ai tu gi a tiriman Herodes fu di a ben trow nanga Herodias, a uma fu en brada, èn fu ala den tra ogri san a ben du.

3:19-20
Mat 14:3-4
Mrk 6:17-18
20Dan Herodes du wan moro bigi ogri di a poti Yohanes na straf'oso.

Yesus teki dopu

Mat 3:13-17; Mrk 1:9-11

21Wan dei di Yohanes ben e dopu sma, Yesus srefi go teki dopu. Dan di Yesus ben e begi, heimel opo 22èn a Santa Yeye saka leki wan libilibi doifi kon na En tapu. Ne wan sten taki kmopo fu heimel taki: “Yu na mi Manpikin di Mi lobi. Mi abi prisiri nanga Yu.”

3:22
Gen 22:2
Psa 2:7
Yes 42:1
Mat 3:17
Mrk 1:11
Luk 9:35

Den afo fu Yesus

Mat 1:1-17

23Yesus ben abi dritenti yari so di A bigin nanga En wroko. Den sma ben sabi En leki a manpikin fu Yosef. Yosef ben de a manpikin fu Eli. 24Eli ben de a manpikin fu Matat èn Matat ben de a manpikin fu Lefi. Lefi ben de a manpikin fu Melki èn Melki ben de a manpikin fu Yanai. Yanai ben de a manpikin fu Yosef, 25èn Yosef ben de a manpikin fu Matatias. Matatias ben de a manpikin fu Amos èn Amos ben a manpikin fu Nahum. Nahum ben de manpikin fu Hesli èn Hesli ben a manpikin fu Nagai. 26Nagai ben de a manpikin fu Maat èn Maat ben de a manpikin fu Matatias. Matatias ben de a manpikin fu Semeyin èn Semeyin ben de a manpikin fu Yosek. Yosek ben de a manpikin fu Yoda, 27èn Yoda ben de a manpikin fu Yoanan. Yoanan ben de a manpikin fu Resa èn Resa ben de a manpikin fu Serubabel. Serubabel ben de a manpikin fu Sealtiyel èn Sealtiyel ben de a manpikin fu Neri. 28Neri ben de a manpikin fu Melki èn Melki ben de a manpikin fu Adi. Adi ben de a manpikin fu Kosam èn Kosam ben de a manpikin fu Elmadan. Elmadan ben de a manpikin fu Er. 29Er ben de a manpikin fu Yosua. Yosua ben de a manpikin fu Eliyeser èn Eliyeser ben de a manpikin fu Yorim. Yorim ben de a manpikin fu Matat èn Matat ben de a manpikin fu Lefi. 30Lefi ben de a manpikin fu Simeon èn Simeon ben de a manpikin fu Yuda. Yuda ben de a manpikin fu Yosef èn Yosef ben de a manpikin fu Yonan. Yonan ben de a manpikin fu Elyakim. 31Elyakim ben de a manpikin fu Melea. Melea ben de a manpikin fu Mena èn Mena ben de a manpikin fu Matata. Matata ben de a manpikin fu Natan èn Natan ben de a manpikin fu David. 32David ben de a manpikin fu Isai èn Isai ben de a manpikin fu Obed. Obed ben de a manpikin fu Boas èn Boas ben de a manpikin fu Salma. Salma ben de a manpikin fu Nakson. 33Nakson ben de a manpikin fu Aminadab. Aminadab ben de a manpikin fu Admin èn Admin ben de a manpikin fu Arni. Arni ben de a manpikin fu Hesron èn Hesron ben de a manpikin fu Peres. Peres ben de a manpikin fu Yuda. 34Yuda ben de a manpikin fu Yakob. Yakob ben de a manpikin fu Isak èn Isak ben de a manpikin fu Abraham. Abraham ben de a manpikin fu Tera èn Tera ben de a manpikin fu Nakor. 35Nakor ben de a manpikin fu Serug èn Serug ben de a manpikin fu Rehu. Rehu ben de a manpikin fu Peleg èn Peleg ben de a manpikin fu Eber. Eber ben de a manpikin fu Sela. 36Sela ben de a manpikin fu Kenan. Kenan ben de a manpikin fu Arpaksad èn Arpaksad ben de a manpikin fu Sem. Sem ben de a manpikin fu Noa èn Noa ben de a manpikin fu Lamek. 37Lamek ben de a manpikin fu Metusela èn Metusela ben de a manpikin fu Henok. Henok ben de a manpikin fu Yered èn Yered ben de a manpikin fu Mahalalel. Mahalalel ben de a manpikin fu Kenan. 38Kenan ben de a manpikin fu Enos. Enos ben de a manpikin fu Set èn Set ben de a manpikin fu Adam. Adam ben de a manpikin fu Gado.